Library · ksw

Genesis 25

1 မၤကဒီးတစု,စီၤအၤဘြၤဟၣ်န့ၢ်အမါ,ဒီးအမံၤမ့ၢ်နီၢ်ကတူရၤလီၤ.

2 ဒီးဆံးစၢ်န့ၢ်ဝဲလၢအဂီၢ်လၢစီၤစံးမရၣ်,ဒီးစီၤယးကၡၣ်,ဒီးစီၤမဒၣ်,ဒီးစီၤမံးဒယၣ်,ဒီးစီၤယံးၡဘး,ဒီးစီၤရှူဧၤလီၤ.

3 ဒီးစီၤယးကၡၣ်ထီၣ်ဖိစီၤၡဘၤ,ဒီးစီၤဒဒၣ်လီၤ.ဒီးစီၤဒဒၣ်အဖိခွါမ့ၢ်ပှၤအၤရှူရးဖိ,ဒီးပှၤလတူၡးဖိ,ဒီးပှၤလူမးဖိလီၤ.

4 ဒီးစီၤမံးဒယၣ်အဖိခွါမ့ၢ်စီၤဧ့ၤဖၣ်,ဒီးစီၤဧ့ၤဖ့ၢ်,ဒီးစီၤဃနိာ်,ဒီးစီၤအဘံဒၤ,ဒီးစီၤအ့ၤလဒါဧၤလီၤ.ပှၤတဖၣ်ခဲလၢာ်န့ၣ်မ့ၢ်နီၢ်ကတူရၤအဖိခွါလီၤ.

5 ဒီးစီၤအၤဘြၤဟၣ်ဟ့ၣ်ကယဲၢ်တၢ်လၢအအိၣ်ဒီးအီၤလၢစီၤအံၤစဲးလီၤ.

6 မ့မ့ၢ်အသံၣ်မါတဖၣ်အဖိခွါသ့ၣ်တဖၣ်လၢအအိၣ်ဒီးစီၤအၤဘြၤဟၣ်န့ၣ်ဖဲစီၤအၤဘြၤဟၣ်မူဒံးအဖၢမုၢ်ဒီး,ဟ့ၣ်အီၤလၢတၢ်ဟ့ၣ်တဖၣ်,ဒီးမၢအဟးထီၣ်လၢအဖိခွါစီၤအံၤစဲးအအိၣ်ဆူမုၢ်ထီၣ်တခီ,ဆူကီၢ်မုၢ်ထီၣ်န့ၣ်လီၤ.

7 ဒီးအအံၤမ့ၢ်စီၤအၤဘြၤဟၣ်အမုၢ်နံၤတဖၣ်အနံၤအသီလၢအမူဝဲန့ၣ်အနံၣ်တကယၤနွံဆံယဲၢ်နံၣ်လီၤ.

8 ဒီးစီၤအၤဘြၤဟၣ်အသးလၢာ်,ဒီးသံဝဲအခိၣ်ဝါဂ့ၤ,ဒီးအိၣ်ဘျဲးအိၣ်,ဒီးတၢ်ပာ်ဖှိၣ်အီၤဒီးအပှၤတကလုာ်ဒၣ်ဝဲန့ၣ်လီၤ.

9 ဒီးအဖိခွါစီၤအံၤစဲး,ဒီးစီၤယံးၡမၤဧ့လးခူၣ်လီၤကွံာ်အီၤလၢတၢ်အိပူၤမးကပ့လၤအိၣ်ဝဲလၢပှၤဃ့ၤသးဖိစီၤစိၤဃၢ်,အဖိခွါစီၤဧ့ၤဖရိၣ်အဟီၣ်ခိၣ်တကဝီၤပူၤလၢအအိၣ်ဝဲလၢမးမရ့အမဲာ်ညါလီၤ.

10 အဝဲန့ၣ်မ့ၢ်ဟီၣ်ခိၣ်တကဝီၤလၢစီၤအၤဘြၤဟၣ်ပှ့ၤဝဲလၢစီၤဃ့ၤသးအဖိခွါတဖၣ်လီၤ.စီၤအၤဘြၤဟၣ်ဘၣ်တၢ်ခူၣ်လီၤကွံာ်အီၤဖဲန့ၣ်,ဒီးအမါနီၢ်စၤရါလီၤ.

11 ဒီးလၢစီၤအၤဘြၤဟၣ်သံအလီၢ်ခံန့ၣ်,တၢ်မၤအသးလၢယွၤဆိၣ်ဂ့ၤအဖိခွါ,စီၤအံၤစဲး,ဒီးစီၤအံၤစဲးအိၣ်ဝဲဆိးဝဲလၢပှၤမူဒီးထံၣ်ယၤတဂၤန့ၣ်အထံပူၤအဃၢၤန့ၣ်လီၤ.

12 ဒီးအအံၤမ့ၢ်စီၤအၤဘြၤဟၣ်အဖိခွါလၢပှၤအဲၤကူပတူးဖိ,နီၢ်စၤရါအကုၢ်ပိာ်မုၣ်,နီၢ်ဟၤကၢ်ဆံးစၢ်န့ၢ်လၢအဂီၢ်,စီၤယံးၡမၤဧ့လးအစၢၤအသွဲၣ်,

13 ဒီးအအံၤမ့ၢ်စီၤယံးၡမၤဧ့လးအဖိခွါတဖၣ်အမံၤလၢအမံၤတဖၣ်,ဒီးဒ်အအိၣ်ဖျဲၣ်ဝဲအသိးန့ၣ်စီၤယံးၡမၤဧ့လးအဖိခွါဝဲၢ်ကိစီၤနဘါယိး,ဒီးစီၤက့ဒၢ်,ဒီးစီၤအးဒဘအ့လး,ဒီးစီၤမံးကစၢ်,

14 ဒီးစီၤမံးၡမၤ,ဒီးစီၤဒူမၤ,ဒီးစီၤမၤစၤ,

15 စီၤဃဒၢ်,ဒီးစီၤတ့မၤ,ဒီးစီၤယတူၢ်,ဒီးစီၤနါဖံၣ်,ဒီးစီၤက့ဒမၤလီၤ.

16 အဝဲသ့ၣ်တဖၣ်န့ၣ်မ့ၢ်စီၤယံးၡမၤဧ့လးအဖိခွါဒီးအဝဲသ့ၣ်တဖၣ်န့ၣ်မ့ၢ်အမံၤလၢအသဝီပူၤ,လၢအဝ့ၢ်ကရၢအသးအပူၤ,ပဒိၣ်တဆံခံဂၤဒ်အကလုာ်အသိးန့ၣ်လီၤ.

17 ဒီးအအံၤမ့ၢ်စီၤယံးၡမၤဧ့လးမူဝဲအနံၣ်တဖၣ်လီၤ.အိၣ်ဝဲတနံၣ်တကယၤသၢဆံနွံနံၣ်,ဒီးအသးလၢာ်,ဒီးသံဝဲ,ဒီးတၢ်ပာ်ဖှိၣ်အီၤဒီးအပှၤတကလုာ်ဒၣ်ဝဲလီၤ.

18 ဒီးအိၣ်ဝဲလၢဃဝံလၤပၢၢ်လၢရှူၢ်အိၣ်လၢကီၢ်အဲၤကူပတူးအမဲာ်ညါ,ဖဲနလဲၤတၢ်ဆူကီၢ်အရှူၢ်လီၤ.အိၣ်ဝဲလၢအဒီပုၢ်ဝဲၢ်ခဲလၢာ်အမဲာ်ညါန့ၣ်လီၤ.

19 ဒီးအအံၤမ့ၢ်စီၤအၤဘြၤဟၣ်အဖိခွါ,စီၤအံၤစဲးအစၢၤအသွဲၣ်,

20 စီၤအၤဘြၤဟၣ်ထီၣ်ဖိစီၤအံၤစဲး,ဒီးစီၤအံၤစဲးဖဲအသးပှၢ်အနံၣ်လွံၢ်ဆံန့ၣ်န့ၢ်မါလၢနီၢ်ရံးဘကၤ,ပှၤစူၤရံဖိစီၤဘသူၤအ့လးအိၣ်လၢပၤဒနါရၣ်အပူၤအဖိမုၣ်,ပှၤစူၤရံဖိ,စီၤလၤဘၣ်အဒီပုၢ်ဝဲၢ်မုၣ်လီၤ.

21 ဒီးစီၤအံၤစဲးဃ့ကညးယွၤလၢအမါအဂီၢ်လၢအတူာ်ဖိအဃိလီၤ.ဒီးယွၤဒိးတၢ်ဃ့ကညးလၢအီၤ,ဒီးအမါနီၢ်ရံးဘကၤဒၢထီၣ်လီၤ.

22 ဒီးအဖိတဖၣ်ဘၣ်ထံးလိာ်အသးလၢအပူၤ,ဒီးစံးဝဲဒၣ်,မ့မ့ၢ်ဒ်န့ၣ်ဒီးယအိၣ်ဒ်အံၤဘၣ်မနုၤလဲၣ်.ဒီးလဲၤသံကွၢ်တၢ်လၢယွၤလီၤ.

23 ဒီးယွၤစံးဘၣ်အီၤ,ပှၤခံကလုာ်အိၣ်လၢနဒၢလီၢ်အပူၤ,ဒီးပှၤဂီၢ်မုၢ်ခံကလုာ်ကလီၤဖးလၢနဟၢဖၢပူၤလီၤ.ဒီးအဝဲတကလုာ်ကဆူၣ်န့ၢ်အဝဲတကလုာ်တက့ၢ်လီၤ.ဒီးအဒိၣ်ကမၤအဆံးအတၢ်လီၤ.

24 ဒီးတုၤအနံၤအသီလၢအကဆံးစၢ်န့ၣ်တၢ်ပှဲၤထီၣ်ဒီး,ကွၢ်ကွၢ်,ပှၤသဃံာ်အိၣ်ဝဲလၢအဒၢလီၢ်လီၤ.

25 ဒီးပှၤလၢအဟဲဆိတဂၤဂီၤဝဲ,မၤသးဒ်ဆ့အိၣ်ဒီးအဆူၣ်အသိးဒီဂၤညါလီၤ.ဒီးကိးဝဲအမံၤလၢစီၤဧ့ၡီၤလီၤ.

26 ဒီးတၢ်န့ၣ်အလီၢ်ခံအပုၢ်ဟဲထီၣ်ဒီးအစုဟံးဃာ်စီၤဧ့ၡီၤအခီၣ်နၢၣ်ခံလီၤ.ဒီးကိးဝဲအမံၤလၢစီၤယၤကိာ်လီၤ.ဒီးလၢအဆံးစၢ်န့ၢ်ဝဲန့ၣ်စီၤအံၤစဲးအသးပှၢ်အနံၣ်ဃုဆံလီၤ.

27 ဒီးဖိသၣ်ပိာ်ခွါတဖၣ်န့ၣ်ဒိၣ်ထီၣ်,ဒီးစီၤဧ့ၡီၤမ့ၢ်ပှၤခးတၢ်သ့,ပှၤပှၢ်လၢ်ကျါဖိလီၤ.ဒီးစီၤယၤကိာ်န့ၣ်မ့ၢ်ပှၤကစုဒု,ဒီးအိၣ်ဝဲဆိးဝဲလၢဒဲပူၤလီၤ.

28 ဒီးစီၤအံၤစဲးအဲၣ်စီၤဧ့ၡီၤလီၤ.အဂ့ၢ်ဒ်အံၤ,အဆၣ်ဖိကီၢ်ဖိအမံၤအညၣ်န့ၣ်အိၣ်ဝဲလၢအကိာ်ပူၤလီၤ.မ့မ့ၢ်နီၢ်ရံးဘကၤတဂၤအဲၣ်စီၤယၤကိာ်လီၤ.

29 ဒီးစီၤယၤကိာ်ချီတၢ်ချီ,ဒီးစီၤဧ့ၡီၤဟဲက့ၤလၢပှၢ်လၢ်ကျါ,ဒီးအသးလီၤဘှါဝဲလီၤ.

30 ဒီးစီၤဧ့ၡီၤစံးဘၣ်စီၤယၤကိာ်,ဒုးအီၣ်စာ်ယၤလၢတၢ်အဂီၤအံၤတက့ၢ်.အဂ့ၢ်ဒ်အံၤ,ယသးလီၤဘှါလီၤ.မၤသးဒ်န့ၣ်ဒီးပှၤကိးဝဲအမံၤလၢအဒိၣ်လီၤ.

31 ဒီးစီၤယၤကိာ်စံးဝဲဒၣ်,ဆါကွံာ်န့ၢ်ယၤလၢနဝဲၢ်ကိအလီၢ်လၢမုၢ်မဆါတနံၤအံၤတက့ၢ်.

32 ဒီးစီၤဧ့ၡီၤစံးဝဲဒၣ်,ကွၢ်ကွၢ်,ယကသံတ့ၢ်လီၤဒီးတၢ်လၢဝဲၢ်ကိအလီၢ်အံၤကဂိာ်တၢ်လၢယဂီၢ်မနုၤတမံၤလဲၣ်.

33 ဒီးစီၤယၤကိာ်စံးဝဲဒၣ်,ဆိၣ်တၢ်ဒီးယၤလၢမုၢ်မဆါတနံၤအံၤတက့ၢ်.ဒီးဆိၣ်တၢ်ဒီးအီၤ,ဒီးဆါကွံာ်အဝဲၢ်ကိအလီၢ်လၢစီၤယၤကိာ်လီၤ.

34 ဒီးစီၤယၤကိာ်ဟ့ၣ်စီၤဧ့ၡီၤလၢကိၣ်,ဒီးကသူအိၣ်ဒီးပထိးသၣ်လီၤ.ဒီးအီၣ်တၢ်ဒီးအီတၢ်,ဒီးဂဲၤဆၢထၢၣ်,ဒီးလဲၤတၢ်လီၤ.ဒီးစီၤဧ့ၡီၤတပးကဲဘၣ်ဝဲၢ်ကိအလီၢ်ဘၣ်လီၤ.