Library · ksw

Genesis 50

1 ဒီးစီၤယိၤသးထိၣ်လီၤအသးလၢအပၢ်အမဲာ်,ဒီးအမဲာ်ထံလီၤလၢအလိၤ,ဒီးနၢမူအီၤလီၤ.

2 ဒီးစီၤယိၤသးမၤလိာ်အခ့အပှၤကသံၣ်သရၣ်တဖၣ်ဒ်သိးအကပာ်အပၢ်အစိၣ်ဒီးကသံၣ်လီၤ.ဒီးကသံၣ်သရၣ်တဖၣ်န့ၣ်ပာ်စီၤအံၣ်စရ့လးအစိၣ်ဒီးကသံၣ်လီၤ.

3 ဒီးအနံၤလွံၢ်ဆံလၢထီၣ်ပှဲၤထီၣ်လၢအဂီၢ်လီၤ.အဂ့ၢ်ဒ်အံၤ,ပှၤလၢတၢ်ပာ်အစိၣ်ဒီးကသံၣ်တဖၣ်န့ၣ်,အနံၤအသီလၢထီၣ်ပှဲၤထီၣ်ဒ်န့ၣ်လီၤ.ဒီးပှၤအဲၤကူပတူးဖိဟီၣ်ဝဲယၢၤဝဲလၢအဂီၢ်အနံၤနွံဆံလီၤ.

4 ဒီးတၢ်ဟီၣ်တၢ်ယၢၤအမုၢ်နံၤန့ၣ်ပူၤကွံာ်ဝံၤဒီး,စီၤယိၤသးစံးဘၣ်ဖၤရိၤအပှၤဟံၣ်ဖိ,ဒီးစံးဝဲဒၣ်,ယမ့ၢ်ဘၣ်ဘျုးဘၣ်ဖှိၣ်လၢသုမဲာ်ဒီး,ကတိၤလၢ်တၢ်လၢဖၤရိၤအနၢ်ပူၤ,ဒီးစံး,

5 ယပၢ်ဒုးဆိၣ်ယၤ,ဒီးစံးဝဲဒၣ်,ကွၢ်ကွၢ်,ယသံယဲလီၤ.တၢ်ပူၤလၢယခူၣ်လီၤလၢယဂီၢ်လၢကီၢ်ကနၤဧၣ်အပူၤန့ၣ်,နဘၣ်ခူၣ်လီၤကွံာ်ယၤဖဲန့ၣ်လီၤ.ဒီးခဲကနံၣ်အံၤဒုးလဲၤထီၣ်လၢ်ယၤ,ဒ်သိးယကခူၣ်လီၤကွံာ်ယပၢ်တက့ၢ်.ဒီးယကဟဲက့ၤကဒါက့ၤလီၤ.

6 ဒီးဖၤရိၤစံးဝဲဒၣ်,လဲၤထီၣ်,ဒီးခူၣ်လီၤကွံာ်နပၢ်ဒ်အဒုးဆိၣ်နၤအသိးန့ၣ်တက့ၢ်.

7 ဒီးစီၤယိၤသးလဲၤထီၣ်ခူၣ်လီၤကွံာ်အပၢ်အိၣ်ဒီးဖၤရိၤအခ့အပှၤခဲလၢာ်,ဒီးအပှၤဟံၣ်ဖိသးပှၢ်တဖၣ်,ဒီးကယဲၢ်ကီၢ်အဲၤကူပတူးအသးပှၢ်သ့ၣ်တဖၣ်န့ၣ်လဲၤထီၣ်ဒီးအီၤ,

8 ဒီးစီၤယိၤသးအပှၤဟံၣ်ဖိခဲလၢာ်,ဒီးအဒီပုၢ်ဝဲၢ်,ဒီးအပၢ်အပှၤဟံၣ်ဖိလီၤ.မ့မ့ၢ်အဖိဒံဖိသၣ်တဖၣ်,ဒီးအသိဒီးမဲာ်တဲးလဲးတဖၣ်,ဒီးဂီၤဘုၣ်ဂီၤဖံးတဖၣ်န့ၣ်,ပာ်လီၤတဲာ်ဝဲလၢကီၢ်ကိရှ့ၣ်အပူၤလီၤ.

9 ဒီးလ့ၣ်ကဟၣ်တဖၣ်,ဒီးပှၤဒိးကသ့ၣ်တဖၣ်လဲၤထီၣ်ဒီးအီၤမ့ၢ်တၢ်အဖုဖးဒိၣ်တဖုန့ၣ်လီၤ.

10 ဒီးလဲၤပၢၢ်လၢအၤတၤအကြဲၢ်ပူၤ,လၢအအိၣ်ဝဲလၢထံယၢ်ဒ့ၣ်ဝၢ်ဘးခီ,ဒီးဖဲန့ၣ်ဟီၣ်ဝဲယၢၤဝဲဒီးတၢ်ဟီၣ်တၢ်ယၢၤဖးဒိၣ်နးမးလီၤ.

11 ဒီးပှၤအိၣ်ဝဲဆိးဝဲလၢကီၢ်ကနၤဧၣ်တဖၣ်ထံၣ်ဘၣ်ဝဲလၢတၢ်ဟီၣ်ပသူဟီၣ်ပသီလၢအၤတၤအကြဲၢ်ပူၤ,ဒီးစံးဝဲဒၣ်,တၢ်ဟီၣ်ပသူဟီၣ်ပသီအံၤအိၣ်ဒီးပှၤအဲၤကူပတူးဖိနးမးလီၤ.မၤသးဒ်န့ၣ်ဒီးပှၤယုၢ်ဝဲအမံၤလၢဟ့းဘ့ၤလးမံးစရၤယံၣ်,လၢအအိၣ်လၢထံယၢ်ဒ့ၣ်ဝၢ်ဘးခီလီၤ.

12 ဒီးအဖိခွါတဖၣ်န့ၣ်မၤအီၤဒ်အမၤလိာ်အီၤအသိးန့ၣ်လီၤ.

13 ဒီးအဖိခွါတဖၣ်လဲၤစိာ်ထီၣ်က့ၤအီၤဆူကီၢ်ကနၤဧၣ်,ဒီးခူၣ်လီၤကွံာ်အီၤလၢဟီၣ်ခိၣ်အကဝီၤမးကပ့လၤအအိပူၤ,လၢစီၤအၤဘြၤဟၣ်ပှ့ၤဝဲအိၣ်ဒီးဟီၣ်ခိၣ်တကဝီၤလၢပှၤဃ့ၤသးဖိစီၤဧ့ၤဖရိၣ်လၢတၢ်သွၣ်ခိၣ်အတၢ်ဟံးဃာ်အဂီၢ်,အိၣ်ဝဲလၢမးမရ့အမဲာ်ညါလီၤ.

14 ဒီးလၢအခူၣ်လီၤကွံာ်အပၢ်အလီၢ်ခံန့ၣ်,စီၤယိၤသးက့ၤကဒါက့ၤဆူအဲၤကူပတူး,အဝဲဒၣ်ဒီးအဒီပုၢ်ဝဲၢ်တဖၣ်,ဒီးကယဲၢ်ပှၤလၢအလဲၤထီၣ်ဒီးအီၤဒ်သိးအကခူၣ်လီၤကွံာ်အပၢ်န့ၣ်ခဲလၢာ်လီၤ.

15 ဒီးစီၤယိၤသးအဒီပုၢ်ဝဲၢ်တဖၣ်ထံၣ်ဘၣ်ဝဲလၢအပၢ်သံလံ,ဒီးစံးဝဲဒၣ်,ဘၣ်တဘၣ်စီၤယိၤသးကမၤအၢမၤနးပှၤ,ဒီးကမၤအၢဆၢပှၤလၢကယဲၢ်တၢ်အၢလၢပမၤအီၤသပှၢ်တၢၢ်လီၤ.

16 ဒီးမၢလီၤအကလုၢ်ဆူစီၤယိၤသး,ဒီးစံးဝဲဒၣ်,နပၢ်တချုးသံဒံးဘၣ်ဒီး,မၤလိာ်ဝဲ,ဒီးစံးဝဲဒၣ်,

17 သုဘၣ်စံးဘၣ်စီၤယိၤသးဒ်အံၤ,ပျၢ်သးကညီၤနဒီပုၢ်ဝဲၢ်အတၢ်ကမၣ်,ဒီးအတၢ်ဒဲးဘးန့ၣ်တက့ၢ်.အဂ့ၢ်ဒ်အံၤ,မၤအၢတ့ၢ်နၤလီၤ.ဒီးခဲကနံၣ်အံၤပျၢ်နပၢ်အယွၤအခ့အပှၤအတၢ်ကမၣ်တက့ၢ်.ဒီးတုၤအကတိၤတၢ်ဒီးအီၤဒီး,

18 စီၤယိၤသးအမဲာ်ထံလီၤဝဲလီၤ.ဒီးအဒီပုၢ်ဝဲၢ်လဲၤစ့ၢ်ကီးဝဲ,ဒီးထိၣ်လီၤပှီၤအသးလၢအမဲာ်ညါဒီးစံးဝဲဒၣ်,ကွၢ်ကွၢ်,ပမ့ၢ်နကုၢ်နပှၤလီၤ.

19 ဒီးစီၤယိၤသးစံးဘၣ်အီၤ,ပျံၤတၢ်တဂ့ၤ.အဂ့ၢ်ဒ်အံၤ,ယအိၣ်လၢယွၤအလီၢ်စ့ၢ်ကီးဧါ.

20 သုဝဲဒၣ်အံၤသုကူၣ်ထီၣ်တၢ်အၢလၢယဂီၢ်လီၤ.မ့မ့ၢ်ယွၤကူၣ်ကဲထီၣ်အီၤလၢတၢ်ဂ့ၤ,ဒ်သိးအကမၤတၢ်ဒ်လၢမုၢ်မဆါတနံၤအံၤအသိး,လၢအကဒုးမူဒံးပှၤဂီၢ်မုၢ်အါအါကလဲာ်အဂ့ၢ်လီၤ.

21 ဒီးခဲကနံၣ်အံၤပျံၤတၢ်တဂ့ၤ.ယကလုၢ်အီၣ်လုၢ်အီသုဒီးသုဖိဒံဖိသၣ်သ့ၣ်တဖၣ်န့ၣ်လီၤ.ဒီးမၤမုာ်ထီၣ်က့ၤအီၤ,ဒီးကတိၤဘၣ်သူၣ်ဘၣ်သးအီၤလီၤ.

22 ဒီးစီၤယိၤသးအိၣ်ဝဲဆိးဝဲလၢအဲၤကူပတူးအပူၤ,အဝဲဒၣ်ဒီးအပၢ်အပှၤဟံၣ်ဖိလီၤ.ဒီးစီၤယိၤသးမူဝဲအနံၣ်တကယၤတဆံလီၤ.

23 ဒီးစီၤယိၤသးထံၣ်ဘၣ်စီၤအ့ဖရဲၣ်အဖိအလံၤသၢစိၤတစိၤလီၤ.ဒီးစီၤမနၤရှ့ၤအဖိခွါစီၤမၤကံၢ်အဖိအလံၤအိၣ်ဖျဲၣ်ဝဲလၢစီၤယိၤသးအခီၣ်လ့ၢ်ခိၣ်လီၤ.

24 ဒီးစီၤယိၤသးစံးဘၣ်အဒီပုၢ်ဝဲၢ်,ယသံယဲလီၤ,ဒီးယွၤကဟဲအိၣ်သကိးသုသပှၢ်တၢၢ်,ဒီးကဒုးဟဲထီၣ်သုလၢကီၢ်အံၤဆူကီၢ်တဘ့ၣ်န့ၣ်လၢအဆိၣ်တၢ်လၢအဂ့ၢ်အကျိၤဒီးစီၤအၤဘြၤဟၣ်,ဒီးစီၤအံၤစဲး,ဒီးစီၤယၤကိာ်လီၤ.

25 ဒီးစီၤယိၤသးဒုးဆိၣ်ပှၤအံၣ်စရ့လးဖိလၢတၢ်ဆိၣ်,ဒီးစံးဝဲဒၣ်,ယွၤကဟဲအိၣ်သကိးသုသပှၢ်တၢၢ်,ဒီးသုဘၣ်စိာ်ထီၣ်ကွံာ်ယဃံယကွဲလၢအံၤလီၤ.

26 ဒီးစီၤယိၤသးအသးပှၢ်အနံၣ်တကယၤတဆံန့ၣ်ဒီးသံဝဲလီၤ.ဒီးပှၤပာ်အစိၣ်ဒီးကသံၣ်,ဒီးပာ်နုာ်အီၤလၢစူၢ်တဖျၢၣ်အပူၤလၢအဲၤကူပတူးအပူၤလီၤ.