1 Chronicles 10
1 ဒီးပှၤဖလ့ၡသးဖိဒုးတၢ်ဒီးအံၣ်စရ့လး,ဒီးအံၣ်စရ့လးအပှၤကညီဃ့ၢ်တၢ်လၢပှၤဖလ့ၡသးဖိအမဲာ်ညါဒီးလီၤဃံၤသံလၢကစၢၢ်ကံးလဘိအလိၤလီၤ.
2 ဒီးပှၤဖလ့ၡသးဖိလူၤသပှၢ်စီၤစီလူး,ဒီးအဖိခွါတဖၣ်,ဒီးပှၤဖလ့ၡသးဖိမၤသံစီၤစီလူးအဖိခွါစီၤယိနၤသၣ်,ဒီးစီၤအဘံနဒာ်,ဒီးစီၤမးလကံရှူၤလီၤ.
3 ဒီးတၢ်ဒုးသုးန့ၣ်ကဲထီၣ်တၢ်ကီလၢစီၤစီလူးအဂီၢ်,ဒီးပှၤခးတၢ်ဖိခးဘၣ်အီၤ,ဒီးဘၣ်တၢ်ဆဲးအီၤလၢပှၤခးတၢ်ဖိလီၤ.
4 ဒီးစီၤစီလူးစံးဘၣ်ပှၤစိာ်အစုကဝဲၤတဂၤ,ဘီၣ်ထီၣ်နနး,ဒီးဆဲးဖျိယၤလၢအီၤတက့ၢ်.ပှၤတဒိးဘၣ်တၢ်ကူးတရံးတဖၣ်န့ၣ်ကမၤတရီတပါဘၣ်ဖုးယၤလီၤ.ဘၣ်ဆၣ်ဒီးပှၤစိာ်အစုကဝဲၤတဂၤန့ၣ်တမၤဘၣ်ဝဲဘၣ်.အဂ့ၢ်ဒ်အံၤ,ပျံၤတၢ်ဒိၣ်မးလီၤ.ဒီးစီၤစီလူးဟံးန့ၢ်နးတဘ့ၣ်,ဒီးထိၣ်လီၤဃံၤအသးလၢအဖီခိၣ်လီၤ.
5 ဒီးတုၤပှၤစိာ်အစုကဝဲၤတဂၤန့ၣ်ထံၣ်ဘၣ်ဝဲလၢစီၤစီလူးသံလံဒီး,အဝဲဒၣ်ထိၣ်လီၤဃံၤအသးလၢအနးတဘ့ၣ်အဖီခိၣ်စ့ၢ်ကီး,ဒီးသံဝဲလီၤ.
6 ဒီးစီၤစီလူးသံဝဲ,ဒီးအဖိခွါသၢဂၤ,ဒီးအပှၤဟံၣ်ဖိခဲလၢာ်တဘျီဃီလီၤ.
7 ဒီးတုၤအံၣ်စရ့လးအပှၤကညီလၢအအိၣ်ဝဲလၢကစၢၢ်ကဆူးခဲလၢာ်န့ၣ်ထံၣ်ဘၣ်လၢပှၤဃ့ၢ်ဝဲ,ဒီးလၢစီၤစီလူး,ဒီးအဖိခွါတဖၣ်သံတ့ၢ်လံန့ၣ်ဒီး,လဲၤသဒၣ်အဝ့ၢ်တဖၣ်,ဒီးဃ့ၢ်ထီၣ်ကွံာ်လီၤ.ဒီးပှၤဖလ့ၡသးဖိဟဲအိၣ်ဝဲဆိးဝဲလၢအပူၤလီၤ.
8 ဒီးမုၢ်ဆ့ၣ်ထီၣ်တနံၤန့ၣ်တုၤပှၤဖလ့ၡသးဖိဟဲဘ့ၣ်ကွံာ်ပှၤသံအကူအသိးဒီး,တၢ်မၤအသးလၢအထံၣ်န့ၢ်စီၤစီလူး,ဒီးအဖိခွါသၢဂၤလီၤဃံၤဝဲလၢကစၢၢ်ကံးလဘိအလိၤလီၤ.
9 ဒီးဘ့ၣ်ကွံာ်ဝဲအကူအသိးဝံၤဒီး,ဟံးန့ၢ်အခိၣ်,ဒီးအသဃိး,ဒီးမၢပှၤလဲၤစိာ်ဝ့ၤဝီၤလၢပှၤဖလ့ၡသးဖိအကီၢ်ပူၤ,ဒ်သိးအကစံၣ်တဲၤတဲလီၤတၢ်လၢအတၢ်ဂီၤအဟံၣ်ပူၤ,ဒီးလၢပှၤဂီၢ်မုၢ်အကျါလီၤ.
10 ဒီးပာ်ဝဲအသဃိးလၢအကစၢ်တဖၣ်အဟံၣ်ပူၤ,ဒီးမၤစဲဃာ်ဝဲအခိၣ်လၢဒၤကိၣ်အဟံၣ်ပူၤလီၤ.
11 တုၤပှၤယၤဘ့ၣ်ကံးလဧးဖိနၢ်ဟူကယဲၢ်တၢ်လၢပှၤဖလ့ၡသးဖိမၤစီၤစီလူးဒီး,
12 ပှၤသုးဖိခဲလၢာ်ဂဲၤဆၢထၢၣ်,ဒီးဟံးန့ၢ်စီၤစီလူးအစိၣ်,ဒီးအဖိခွါတဖၣ်အစိၣ်,ဒီးဟဲစိာ်ဝဲဆူယၤဘ့ၣ်,ဒီးခူၣ်လီၤကွံာ်ဝဲအဃံလၢသ့ထိးဖၣ်တထံးအဖီလာ်လၢအအိၣ်ဝဲလၢယၤဘ့ၣ်အပူၤ,ဒီးဒုၣ်တၢ်အီၣ်နွံနံၤလီၤ.
13 ဒီးစီၤစီလူးသံဝဲလၢအတၢ်ကမၣ်အဃိလၢအမၤကမၣ်ဘၣ်ယွၤ,ယွၤအကလုၢ်ကထါလၢအတတိၢ်န့ၢ်ဘၣ်ဝဲအဃိ,ဒီးလၢအဃ့တၢ်လၢပှၤအိၣ်ဒီးပှၤသံအကလၤဒီးသံကွၢ်အီၤအဃိ,
14 ဒီးတသံကွၢ်ဘၣ်ယွၤဘၣ်.မၤသးဒ်န့ၣ်ဒီးအဝဲဒၣ်မၤသံအီၤ,ဒီးဘိးဃၣ်ဘီမုၢ်ဆူစီၤယံးၡဲအဖိခွါ,စီၤဒၤဝံးအအိၣ်လီၤ.