Library · ksw

Psalms 107

1 စံးထီၣ်ပတြၢၤယွၤတက့ၢ်.အဂ့ၢ်ဒ်အံၤ,ဂ့ၤဝဲလီၤ.မ့ၢ်အဘျုးအဖှိၣ်အိၣ်ဝဲလီၤထူလီၤယိာ်အဂ့ၢ်လီၤ.

2 မ်ပှၤလၢယွၤပှ့ၤက့ၤအီၤ,ပှၤလၢအပှ့ၤက့ၤလၢဒုၣ်ဒါအစုအပူၤ,

3 ဒီးဒုးအိၣ်ဖှိၣ်အီၤလၢကီၢ်တဖၣ်လၢမုၢ်ထီၣ်,ဒီးလၢမုၢ်နုာ်လၢကလံၤစိး,ဒီးလၢကလံၤထံးန့ၣ်စံးဒ်န့ၣ်တက့ၢ်.

4 လဲၤဝ့ၤဝီၤတၢ်လၢပှၢ်မုၢ်ကနၢ,လၢအလီၢ်အိၣ်သယုၢ်အပူၤလီၤ.တထံၣ်န့ၢ်ဘၣ်တၢ်အိၣ်ဝဲဆိးဝဲအဝ့ၢ်ဘၣ်.

5 တၢ်သၣ်ဝံၤအသး,ဒီးတၢ်သူအသးလၢထံ,အသးလၢအပူၤလီၤဘှါဝဲလီၤ.

6 ဒီးလၢအဘၣ်တၢ်ကိၢ်တၢ်ဂီၤန့ၣ်ကိးထီၣ်ယွၤလီၤ.အဝဲဒၣ်မၤပူၤမၤဖျဲးအီၤလၢအတၢ်နးတၢ်ဖှီၣ်,

7 ဒီးဆှၢအီၤလၢကျဲလၢအလိၤဒ်သိးအကလဲၤဆူတၢ်အိၣ်ဝဲဆိးဝဲအဝ့ၢ်ပူၤလီၤ.

8 မ်ပှၤစံးထီၣ်ပတြၢၤယွၤလၢအဘျုးအဖှိၣ်အဃိ,ဒီးအတၢ်မၤလီၤလးလၢပှၤကညီဖိအဂီၢ်အဃိန့ၣ်တက့ၢ်.

9 အဂ့ၢ်ဒ်အံၤ,ပှၤလၢတၢ်သူအသးလၢထံန့ၣ်ဒုးဘျဲးအီအီၤ,ဒီးပှၤလၢတၢ်သၣ်ဝံၤအသးန့ၣ်ဒုးဘျဲးအီၣ်အီၤလၢတၢ်ဂ့ၤလီၤ.

10 ပှၤလၢအဆ့ၣ်နီၤလၢတၢ်ခံးကျါ,ဒီးလၢတၢ်သံအကဒုပူၤ,ဘၣ်စၢဃာ်အသးဒီးတၢ်နးတၢ်ဖှီၣ်,ဒီးထးဧိၤတြၤဧိၤလီၤ.

11 မ့ၢ်အပူထီၣ်ယွၤအကလုၢ်ကထါ,ဒီးတပးကဲဘၣ်တၢ်ထီကတၢၢ်တဂၤအတၢ်ကူၣ်လိာ်တၢ်ဒီး,

12 အဝဲဒၣ်မၤလီၤဘှါအသးလၢတၢ်မၤအကိၢ်အဂီၤလီၤ.အဝဲသ့ၣ်လီၤဃံၤဝဲ,ဒီးတၢ်မၤစၢၤတအိၣ်ဘၣ်.

13 ဒီးတုၤအဘၣ်တၢ်ကိၢ်တၢ်ဂီၤဒီး,ကိးထီၣ်ယွၤ,ဒီးအဝဲဒၣ်အုၣ်က့ၤခီၣ်က့ၤအီၤလၢအတၢ်နးတၢ်ဖှီၣ်အပူၤလီၤ.

14 ဒုးဟးထီၣ်ကွံာ်အီၤလၢတၢ်ခံးကျါ,ဒီးတၢ်သံအကဒုပူၤ,ဒီးမၤတဲာ်ကွံာ်အပျံၤလီၤ.

15 မ်ပှၤစံးထီၣ်ပတြၢၤယွၤလၢအဘျုးအဖှိၣ်အဃိ,ဒီးလၢအတၢ်မၤလီၤလးလၢပှၤကညီဖိအဂီၢ်အဃိန့ၣ်တက့ၢ်.

16 အဂ့ၢ်ဒ်အံၤ,မၤကၢ်ကွံာ်တြဲၤတိၢ်,ဒီးဒီၣ်တဲာ်ကွံာ်နီၣ်ဘိထးန့ၣ်လီၤ.

17 ပှၤဟးဂီၤဖိလၢအမၤကမၣ်တၢ်အဃိ,ဒီးလၢအတၢ်အၢအဃိန့ၣ်ဘၣ်တၢ်နးတၢ်ဖှီၣ်လီၤ.

18 သးဘၣ်အၢတၢ်အီၣ်ခဲလၢာ်,ဒီးသုးဘူးအသးဆူတၢ်သံအပဲတရီတဖၣ်လီၤ.

19 ဒီးတုၤအဘၣ်တၢ်ကိၢ်တၢ်ဂီၤဒီး,ကိးထီၣ်ယွၤ,ဒီးအဝဲဒၣ်အုၣ်က့ၤခီၣ်က့ၤအီၤလၢအတၢ်နးတၢ်ဖှီၣ်အပူၤလီၤ.

20 မၢလီၤအကလုၢ်ဒီးမၤဘျါက့ၤအီၤ,ဒီးမၤပူၤမၤဖျဲးအီၤလၢတၢ်မၤဟးဂီၤအီၤလီၤ.

21 မ်ပှၤစံးထီၣ်ပတြၢၤယွၤလၢအဘျုးအဖှိၣ်အဃိ,ဒီးအတၢ်မၤလီၤလးလၢပှၤကညီဖိအဂီၢ်အဃိန့ၣ်တက့ၢ်.

22 ဒီးမ်အလုၢ်တၢ်လုၢ်စံးထီၣ်ပတြၢၤ,ဒီးစံၣ်တဲၤတဲလီၤအမၤတၢ်တဖၣ်ဒီးတၢ်သူၣ်ဖှံသးညီတက့ၢ်.

23 ပှၤလၢအလဲၤလီၤဆူပီၣ်လဲၣ်လၢကဘီပူၤတဖၣ်န့ၣ်,လၢအမၤတၢ်မၤလၢထံဖးဒိၣ်အပူၤန့ၣ်,

24 ထံၣ်ဘၣ်ယွၤအတၢ်မၤ,ဒီးအတၢ်လီၤလးလၢထံယိာ်ပူၤလီၤ.

25 အဂ့ၢ်ဒ်အံၤယွၤကတိၤတၢ်,ဒီးကလံၤမုၢ်တွၤအိၣ်ထီၣ်ဒီးမၤဒိၣ်ထီၣ်လပီတဖၣ်လီၤ.ပှၤလဲၤထီၣ်ဝဲဆူမူခိၣ်,လဲၤလီၤဝဲဆူထံယိာ်ပူၤလီၤ.

26 အသးပှံၢ်လီၤဝဲလၢအဘၣ်တၢ်ကိၢ်တၢ်ဂီၤအဃိလီၤ.

27 လဲၤကပံၢ်ကပၢ်ဝ့ၤဝီၤတၢ်,ဒီးလဲၤကနူၤကပၤဒ်ပှၤအီမူၤသံးအသိးန့ၣ်,ဒီးအတၢ်ကူၣ်သ့လၢာ်ကွံာ်ဝဲခဲလၢာ်လီၤ.

28 ဒီးတုၤအဘၣ်တၢ်ကိၢ်တၢ်ဂီၤဒီး,ကိးထီၣ်ယွၤ,ဒီးအဝဲဒၣ်ဒုးဟးထီၣ်ကွံာ်အီၤလၢအတၢ်နးတၢ်ဖှီၣ်အပူၤလီၤ.

29 ဒီးဒုးကဲထီၣ်ကလံၤမုၢ်လၢတၢ်ဂၢၢ်တပၢၢ်,ဒီးအလပီတဖၣ်အိၣ်ဃိကလာ်လီၤ.

30 ဒီးမ့ၢ်တၢ်ဂၢၢ်ထီၣ်န့ၢ်အီၤဒီး,အသူၣ်ခုအသးခုဒီးတၢ်ဆှၢအီၤဒ်န့ၣ်ဆူကဘီသန့ဖဲအဆၢတုၤဝဲတပူၤန့ၣ်လီၤ.

31 မ်ပှၤစံးထီၣ်ပတြၢၤယွၤလၢအဘျုးအဖှိၣ်အဃိ,ဒီးအတၢ်မၤလီၤလးလၢပှၤကညီဖိအဂီၢ်အဃိန့ၣ်တက့ၢ်.

32 မ်အပာ်ထီၣ်ထီအီၤလၢပှၤဂီၢ်မုၢ်အတၢ်အိၣ်ဖှိၣ်အပူၤ,ဒီးစံးထီၣ်ပတြၢၤအီၤလၢပှၤသူၣ်က့သးပှၢ်ဆ့ၣ်နီၤအကျါတက့ၢ်.

33 အဝဲဒၣ်ဒုးကဲထီၣ်ထံကျိတဖၣ်လၢပှၢ်မုၢ်ကနၢ,ဒီးထံထီၣ်ပၢၢ်လၢဟီၣ်ခိၣ်ဃ့,

34 ကီၢ်လၢအသၣ်ထီၣ်တဘ့ၣ်လၢအံသၣ်အလီၢ်လၢပှၤလၢအအိၣ်ဝဲဆိးဝဲလၢအပူၤတဖၣ်အတၢ်အၢတၢ်သီအဃိလီၤ.

35 ဒုးကဲထီၣ်ပှၢ်မုၢ်ကနၢလၢထံနိၣ်,ဒီးဟီၣ်ခိၣ်ဃ့လၢထံထီၣ်ပၢၢ်,

36 ဒီးမၢပှၤတၢ်သၣ်ဝံၤအသးန့ၣ်အိၣ်ဝဲဖဲန့ၣ်,ဒ်သိးအကကတဲာ်ကတီၤတၢ်အိၣ်ဝဲဆိးဝဲအဝ့ၢ်,

37 ဒီးဖှံတၢ်လၢစံာ်ပူၤ,ဒီးသူၣ်စပံးအလီၢ်လၢအကသၣ်ထီၣ်အတၢ်အါထီၣ်လီၤ.

38 ဒီးဆိၣ်ဂ့ၤဝဲ,ဒီးအဝဲသ့ၣ်အါထီၣ်အါအါကလဲာ်,ဒီးတဒုးစှၤလီၤဘၣ်အဆၣ်ဖိကီၢ်ဖိအဒၢဘၣ်.

39 မၤကဒီးတစုတၢ်မၤစှၤလီၤအီၤ,ဒီးတၢ်ဆီၣ်လီၤအီၤလၢတၢ်မၤနး,တၢ်မၤအၢ,ဒီးတၢ်မၤကိၢ်မၤဂီၤအဃိန့ၣ်လီၤ.

40 ယွၤလူလီၤတၢ်တရီတပါလၢပဒိၣ်ဖးဒိၣ်တဖၣ်အလိၤ,ဒီးဒုးဟးဝ့ၤဝီၤအီၤလၢတၢ်အိၣ်ကလီအလီၢ်,ဖဲကျဲတအိၣ်ဘၣ်လီၤ.

41 ဒီးပာ်ထီၣ်ထီပှၤဖှီၣ်ဖိယာ်ဖိလၢတၢ်နးတၢ်ဖှီၣ်အပူၤ,ဒီးပာ်အီၤလၢတၢ်အဒူၣ်တဖၣ်ဒ်သိတဖုအသိးန့ၣ်လီၤ.

42 ပှၤအတီအလိၤတဖၣ်ကထံၣ်ဘၣ်ဝဲဒီးသးခု,ဒီးတၢ်အၢတၢ်သီခဲလၢာ်ကျၢၢ်တံာ်အထးခိၣ်လီၤ.

43 ပှၤလၢအကူၣ်တၢ်သ့န့ၣ်ကနၢ်ပၢၢ်တၢ်တဖၣ်အံၤဒီးကတိၢ်န့ၢ်ယွၤအဘျုးအဖှိၣ်တဖၣ်လီၤ.