Library · ksw

Psalms 138

0 လၢစီၤဒၤဝံး.

1 ယကစံးထီၣ်ပတြၢၤနၤလၢယသးဒီဖျၢၣ်ညါ,လၢကစၢ်သ့ၣ်တဖၣ်အမဲာ်ညါန့ၣ်ယကသးဝံၣ်ထီၣ်နၤလီၤ.

2 ယကဘူၣ်ထီၣ်ဘါထီၣ်တၢ်ဆူနဟံၣ်စီဆှံအအိၣ်,ဒီးယကစံးထီၣ်ပတြၢၤနမံၤလၢနဘျုးနဖှိၣ်အဃိ,ဒီးနတၢ်မ့ၢ်တၢ်တီအဃိလီၤ.အဂ့ၢ်ဒ်အံၤ,နပာ်နကလုၢ်ကထါဒိၣ်န့ၢ်နမံၤခဲလၢာ်တက့ၢ်လီၤ.

3 လၢမုၢ်တနံၤလၢယကိးထီၣ်နၤန့ၣ်နစံးဆၢယၤ,ဒီးနဒုးဆူၣ်ထီၣ်ယဂံၢ်ယဘါလၢယသးကံၢ်ပူၤလီၤ.

4 တုၤအနၢ်ဟူတၢ်ကတိၤလၢနထးခိၣ်ဒီး,ကယဲၢ်ဟီၣ်ခိၣ်အစီၤပၤကစံးထီၣ်ပတြၢၤနၤခဲလၢာ်လီၤ.

5 ဒီးကသးဝံၣ်တၢ်လၢယွၤအကျဲအဂ့ၢ်လီၤ.အဂ့ၢ်ဒ်အံၤ,ယွၤအလၤအကပီၤန့ၣ်ဒိၣ်ဝဲလီၤ.

6 အဂ့ၢ်ဒ်အံၤ,ယွၤအိၣ်ဝဲလၢတၢ်ထီၣ်ထီဘၣ်ဆၣ်ဒီး,ကွၢ်လီၤပှၤလၢအဆီၣ်လီၤအသး,ဒီးပှၤပာ်အသးထီၣ်ထီန့ၣ်သ့ၣ်ညါဝဲလၢအယံၤလီၤ.

7 တုၤယလဲၤလၢတၢ်နးတၢ်ဖှီၣ်အကျါဒီး,နကဒုးမူထီၣ်က့ၤယၤလီၤ.နကယူာ်ထီၣ်နစုထီဒါယဒုၣ်ယဒါအတၢ်သးထီၣ်,ဒီးနစုထွဲကအုၣ်က့ၤခီၣ်က့ၤယၤလီၤ.

8 တၢ်လၢအဘၣ်ဃးဒီးယၤအံၤယွၤကမၤတုၤအပှဲၤထီၣ်လီၤ.ယွၤဧၢ,နဘျုးနဖှိၣ်အိၣ်ဝဲလီၤထူလီၤယိာ်လီၤ.နစုအတၢ်မၤန့ၣ်မ်နသုတလဲၤသဒၣ်အီၤတဂ့ၤ.