Psalms 39
0 စီၤဒၤဝံးအထါလၢတၢ်အခိၣ်စီၤယဒူသူၣ်အဂီၢ်.
1 ယစံး,ယကတိၢ်န့ၢ်ယကျဲ,ဒ်သိးယသုတမၤတၢ်ဒဲးဘးလၢယပျ့ၤတဂ့ၤ,ပှၤတတီတလိၤအိၣ်လၢယမဲာ်ညါအဖၢမုၢ်ဒီး,ယကကွၢ်က့ၤယထးခိၣ်လၢနိာ်ပျံၤလီၤ.
2 ယအိၣ်ဘှီၣ်ကလာ်,ယအိၣ်တအုၣ်လီၤ.ယအိၣ်ဃိကလာ်လၢတၢ်အဂ့ၤဒၣ်လဲာ်လီၤ.ဒီးယတၢ်သးအုးန့ၣ်ဘၣ်တၢ်ထိၣ်ဂဲၤအီၤလီၤ.
3 ယသးကိၢ်ထီၣ်လၢယပူၤလီၤ.လၢယဆိကမိၣ်တၢ်အဖၢမုၢ်န့ၣ်မ့ၣ်အူကဲၤထီၣ်လီၤ.ယကတိၤတၢ်လၢယပျုၤ,
4 ယွၤဧၢ,ဘိးဘၣ်သ့ၣ်ညါယၤလၢယကတၢၢ်,ဒီးယမုၢ်နံၤတဖၣ်အတၢ်ပှဲၤအံၤပှဲၤနုၤမ့ၢ်အဆံးအါလဲၣ်န့ၣ်တက့ၢ်.ယသးကလၢာ်အကတီၢ်ဖဲလဲၣ်ဖဲလဲၣ်,တၢ်မိၣ်သ့ၣ်ညါယသးလီၤ.
5 ကွၢ်ကွၢ်,နပာ်ယမုၢ်နံၤတဖၣ်လၢဖံးတဖၣ်လီၤ.ဒီးတစိၤဒၣ်ယၤန့ၣ်မၤအသးဒ်တၢ်နီတမံၤဘၣ်အသိးလၢနမဲာ်ညါလီၤ.ပှၤကညီတဂၤလၢ်လၢ်ဖဲအအိၣ်ဂၢၢ်ဆိးကျၢၤအခါန့ၣ်မ့ၢ်ထဲတၢ်ကလီကလီဧိၤလီၤ.
6 ပှၤကညီလဲၤတၢ်ဒ်တၢ်ကဒုအသိး,မၤကိၢ်အသးလၢတၢ်ကလီကလီအဃိလီၤ.ပာ်ဖှိၣ်တၢ်,ဒီးမ့ၢ်မတၤမတၤကထၢဖှိၣ်ဝဲန့ၣ်တသ့ၣ်ညါဘၣ်ဝဲဘၣ်. စ့လၤ.
7 ဒီးခဲကနံၣ်အံၤယအိၣ်ခိးတၢ်မနုၤတမံၤလဲၣ်,ကစၢ်ဧၢ,ယမုၢ်လၢ်တၢ်လၢနၤလီၤ.
8 မၤပူၤမၤဖျဲးယၤလၢယတၢ်ကမၣ်ခဲလၢာ်တက့ၢ်.ပာ်ယၤလၢတၢ်ဒုၣ်ဒွဲၣ်အလီၢ်လၢပှၤဟးဂီၤဖိအဂီၢ်န့ၣ်တဂ့ၤ.
9 ယအိၣ်ဘှီၣ်ကလာ်,ယတအဲးထီၣ်ဘၣ်ယထးခိၣ်ဘၣ်.အဂ့ၢ်ဒ်အံၤ,နမၤနဲလီၤ.
10 ဒုးဟးထီၣ်ကွံာ်နတၢ်တီၢ်လၢယၤတက့ၢ်.ယလၢာ်လၢနစုအတၢ်တီၢ်အဃိလီၤ.
11 တုၤနသိၣ်ဃီၣ်ပှၤကညီလၢတၢ်သိၣ်ဃီၣ်တဖၣ်လၢအတၢ်အၢအတၢ်သီအဃိဒီး,အတၢ်မုာ်လၤတဖၣ်န့ၣ်နမၤလၢာ်ကွံာ်ဒ်တၢ်အဃၢ်အသိးန့ၣ်လီၤ.ပှၤကညီတဂၤလၢ်လၢ်န့ၣ်မ့ၢ်ထဲတၢ်ကလီကလီဧိၤလီၤ. စ့လၤ.
12 ကနၣ်ယဘါထုကဖၣ်တၢ်တက့ၢ်,ယွၤဧၢ,ဒိကနၣ်ယဃ့ကညးတၢ်တက့ၢ်.အိၣ်ဘှီၣ်လၢယမဲာ်ထံတဂ့ၤ.အဂ့ၢ်ဒ်အံၤ,ယမ့ၢ်ပှၤတခီဘီမုၢ်ဖိဒီးနၤ,ပှၤအိၣ်တမှံၤဒ်ယပၢ်ခဲလၢာ်အသိးန့ၣ်လီၤ.
13 ယတချုးက့ၤဒံးဘၣ်ဒီးတအိၣ်လၢၤဘၣ်,ပျဲယၤ,ဒ်သိးယကဆူၣ်ထီၣ်က့ၤတက့ၢ်.