Psalms 48
0 ထါ,တၢ်သးဝံၣ်လၢစီၤကိးရးအဖိခွါ.
1 ယွၤန့ၣ်ဒိၣ်ဝဲ,ဒီးဂ့ၤဒိးတၢ်စံးထီၣ်ပတြၢၤအီၤအါအါကလဲာ်လၢပကစၢ်အဝ့ၢ်ပူၤ,လၢကစၢၢ်စီဆှံတဖျၢၣ်အလိၤလီၤ.
2 အလီၢ်ထီၣ်ထီမုာ်မး,ဟီၣ်ခိၣ်ဒီဘ့ၣ်အတၢ်သူၣ်ဖှံသးညီမ့ၢ်ကစၢၢ်စံယိၣ်လၢကလံၤစိးတခီ,စီၤပၤဖးဒိၣ်အဝ့ၢ်လီၤ.
3 ပှၤသ့ၣ်ညါယွၤလၢအနူၢ်တဖၣ်အပူၤလၢအမ့ၢ်လ့တဖျၢၣ်လီၤ.
4 အဂ့ၢ်ဒ်အံၤ,ကွၢ်ကွၢ်,စီၤပၤတဖၣ်အိၣ်ဖှိၣ်ရိဖှိၣ်,လဲၤပူၤကွံာ်ဝဲတပူၤဃီလီၤ.
5 ထံၣ်ဘၣ်ဝဲဒီး,ကမၢကမၣ်ဝဲ,ပျံၤတၢ်ဖုးတၢ်ဒီးဃ့ၢ်ဝဲလီၤ.
6 တၢ်ကနိးကစုာ်ဖီၣ်ဃာ်အီၤဖဲန့ၣ်,တၢ်ဆိးကဲးဒ်ပိာ်မုၣ်အဟုးဆါအသိးန့ၣ်လီၤ.
7 နမၤဟးဂီၤတၢ်ၡံၣ်အကဘီတဖၣ်လၢကလံၤမုၢ်ထီၣ်လီၤ.
8 ဒ်ပနၢ်ဟူတၢ်အသိးန့ၣ်ပထံၣ်ဘၣ်တၢ်လၢတၢ်သုးမုၢ်ဂီၢ်မုၢ်အယွၤအဝ့ၢ်ပူၤ,လၢပကစၢ်အဝ့ၢ်ပူၤလီၤ.ယွၤဒုးအိၣ်ဂၢၢ်ဆိးကျၢၤအီၤလီၤစိၤလီၤထီလီၤ. စ့လၤ.
9 ယွၤဧၢ,ပသ့ၣ်နီၣ်ထီၣ်က့ၤနဘျုးနဖှိၣ်လၢနနူၢ်စီဆှံအပူၤလီၤ.
10 ယွၤဧၢ,ဒ်နမံၤအသိးန့ၣ်,နတၢ်စံးထီၣ်ပတြၢၤမ့ၢ်ဒ်န့ၣ်သိးပၢၢ်လၢဟီၣ်ခိၣ်အကတၢၢ်တဖၣ်လီၤ.နစုထွဲပှဲၤဝဲဒီးတၢ်တီတၢ်လိၤလီၤ.
11 မ်ကစၢၢ်စံယိၣ်သူၣ်ခုသးခု,ယူဒၤအဖိမုၣ်တဖၣ်သူၣ်ဖှံသးညီလၢနစံၣ်ညီၣ်တၢ်တဖၣ်အဃိန့ၣ်တက့ၢ်.
12 ဟးတရံးစံယိၣ်,ဒီးလဲၤတရံးအီၤ,ဂံၢ်ထီၣ်အတၢးထီတဖၣ်,
13 တိၢ်နီၣ်အခိၣ်ဒူတဖၣ်,ဆိကမိၣ်အနူၢ်တဖၣ်,ဒ်သိးသုကစံးဘၣ်ပှၤတစိၤလၢသုလီၢ်ခံန့ၣ်တက့ၢ်.
14 အဂ့ၢ်ဒ်အံၤ,ကစၢ်တဂၤအံၤမ့ၢ်ပကစၢ်အစိၤစိၤအဃၣ်ဃၣ်လီၤ.အဝဲဒၣ်န့ၣ်ကဆှၢပှၤတုၤပသံလီၤ.