Psalms 56
0 လၢတၢ်အခိၣ်အဂီၢ်,လၢထိၣ်လွံၢ်တအုၣ်အိၣ်လၢအယံၤ,လၢပှၤဖလ့ၡသးဖိဖီၣ်န့ၢ်စီၤဒၤဝံးလၢကၤသးပူၤန့ၣ်စီၤဒၤဝံးအတၢ်ကွဲးယိာ်.
1 သူၣ်ကညီၤသးကညီၤယၤတက့ၢ်,ယွၤဧၢ,အဂ့ၢ်ဒ်အံၤ,ပှၤကညီသါကယူၢ်လီၤကွံာ်ယၤ,ဒုးတၢ်ဒီးမၤအၢယၤသ့သ့တနံၤလီၤ.
2 ယဒုၣ်ယဒါတဖၣ်လူၤယၤကိးမုၢ်နံၤမုၢ်နၤဒဲးလီၤ.အဂ့ၢ်ဒ်အံၤ,ပှၤအါဂၤဒုးတၢ်ဒီးယၤအိၣ်ဒီးအသးထီၣ်ထီလီၤ.
3 မုၢ်နံၤမုၢ်နၤလၢယဘၣ်ယိၣ်ဘၣ်ဘီန့ၣ်ယသန့ၤယသးလၢနၤလီၤ.
4 လၢယွၤအပူၤယကစံးပတြၢၤအကလုၢ်အကထါ,ယသန့ၤယသးလၢယွၤလီၤ.တၢ်လၢတၢ်ဖံးတၢ်ညၣ်ကမၤယၤန့ၣ်ယတဘၣ်ယိာ်ဘၣ်.
5 ဘိးက့ၣ်ယတၢ်ကတိၤကိးမုၢ်နံၤဒဲးလီၤ.အတၢ်ဆိကမိၣ်ခဲလၢာ်ထီဒါယၤလၢတၢ်အၢအဂီၢ်လီၤ.
6 အိၣ်ဖှိၣ်ရိဖှိၣ်,ဒီးခိးခူသူၣ်,ဒီးကွၢ်ယခီၣ်လီၢ်,ဒီးကွၢ်လၢ်ယသးအကျဲလီၤ.
7 မ့ၢ်အကပူၤဖျဲးလၢအတၢ်အၢတၢ်သီအဃိန့ၣ်ဧါ.လၢနသးထီၣ်န့ၣ်တ့ၢ်လီၤကွံာ်ပှၤဂီၢ်မုၢ်,ကစၢ်ဧၢ.
8 နဂံၢ်ယဟးတၢ်တဖၣ်လီၤ.ပာ်ယမဲာ်ထံလၢနထၢၣ်တၢ်ဖံးအပူၤန့ၣ်တက့ၢ်.အိၣ်ဝဲလၢနလံာ်ပူၤ,တမ့ၢ်ဘၣ်ဧါ.
9 မုၢ်နံၤလၢယကိးထီၣ်န့ၣ်ယဒုၣ်ယဒါကဃၣ်ကဒါက့ၤဆူအလီၢ်ခံန့ၣ်လီၤ.တၢ်အံၤယသ့ၣ်ညါ,လၢယွၤအိၣ်ဒီးယၤလီၤ.
10 ယကပာ်ကဖိယသးလၢကစၢ်အကလုၢ်,ယကပာ်ကဖိယသးလၢယွၤအကလုၢ်လီၤ.
11 ယသန့ၤယသးလၢယွၤ,ပှၤကညီကမၤယၤဒ်လဲၣ်ဒ်လဲၣ်န့ၣ်ယတဘၣ်ယိာ်ဘၣ်.
12 တၢ်လၢယဆိၣ်တၢ်လၢနဂီၢ်န့ၣ်အိၣ်ဝဲလၢယလိၤ,ယွၤဧၢ,ယကမၤဘူၣ်နၤလၢတၢ်စံးထီၣ်ပတြၢၤတဖၣ်လီၤ.
13 အဂ့ၢ်ဒ်အံၤ,နမၤပူၤမၤဖျဲးယသးလၢတၢ်သံ,ယခီၣ်လၢတၢ်လီၤတလံာ်န့ၣ်ဒ်သိးယကလဲၤတၢ်လၢယွၤအမဲာ်ညါလၢပှၤမူအတၢ်ကပီၤအကျါန့ၣ်လီၤ.