Psalms 65
0 စီၤဒၤဝံးအထါ,တၢ်သးဝံၣ်လၢတၢ်အခိၣ်အဂီၢ်.
1 တၢ်စံးထီၣ်ပတြၢၤအိၣ်ခိးနၤလၢစံယိၣ်အပူၤ,ယွၤဧၢ,ဒီးပှၤကမၤဘူၣ်နၤလၢတၢ်ဘၣ်ဃးဒီးအဆိၣ်တၢ်န့ၣ်လီၤ.
2 ပှၤလၢအနၢ်ဟူတၢ်ဘါထုကဖၣ်တဂၤဧၢ,တၢ်ညၣ်ခဲလၢာ်ကဟဲဆူနအိၣ်လီၤ.
3 တၢ်အၢတၢ်သီမၤနၢၤယၤလီၤ.နကမၤပူၤမၤဖျဲးပတၢ်ကမၣ်လီၤ.
4 ပှၤလၢနဃုထၢအီၤ,ဒီးဒုးသုးဘူးအသးဆူနအိၣ်ဒ်သိးအကအိၣ်လၢနဂၢၤတဖၣ်အပူၤန့ၣ်ဘၣ်ဆိၣ်ဂ့ၤဝဲလီၤ.ပကမံသူၣ်မံသးလၢနဟံၣ်,နနူၢ်စီဆှံအတၢ်ဂ့ၤန့ၣ်လီၤ.
5 နကစံးဆၢပှၤလၢတၢ်ပျံၤအလီၢ်တဖၣ်လၢတၢ်တီတၢ်လိၤအပူၤ,တၢ်အုၣ်က့ၤခီၣ်က့ၤပှၤအကစၢ်,တၢ်သန့ၤအလီၢ်လၢပှၤအိၣ်လၢဟီၣ်ခိၣ်အကတၢၢ်ခဲလၢာ်,ဒီးပှၤအိၣ်လၢအယံၤလၢပီၣ်လဲၣ်ပူၤတဖၣ်အဂီၢ်န့ၣ်တဂၤဧၢ.
6 မ့ၢ်ပှၤလၢအမၤဂၢၢ်မၤကျၢၤကစၢၢ်ကလိလၢအဂံၢ်အဘါ,လၢအယီၢ်ဒ့ကံၢ်တူာ်အသးလၢတၢ်အစိအအကမီၤ,
7 လၢအဒုးအိၣ်ဘှီၣ်ပီၣ်လဲၣ်အသီၣ်,အလပီတဖၣ်အသီၣ်,ပှၤဂီၢ်မုၢ်အတၢ်တၢထီၣ်တၢလီၤလီၤ.
8 ပှၤလၢအအိၣ်ဝဲလၢတၢ်အကတၢၢ်တဖၣ်န့ၣ်ပျံၤနတၢ်အပနီၣ်လီၤလးလီၤ.နဒုးသူၣ်ဖှံသးညီမုၢ်ဂီၤဒီးမုၢ်ဟါအတၢ်လဲၤထီၣ်န့ၣ်လီၤ.
9 နအိၣ်သကိးဟီၣ်ခိၣ်,ဒီးနမၤဘၣ်စီၣ်အီၤ,နမၤထူးမၤတီၤအီၤအါအါကလဲာ်,ဒီးယွၤအထံမိၢ်ပှၢ်ပှဲၤဝဲဒီးထံလီၤ.တုၤနကတဲာ်ကတီၤဟီၣ်ခိၣ်ဒီး,နကတဲာ်ကတီၤဘုဧိၤဟုဧိၤလၢအဂီၢ်လီၤ.
10 နမၤဘၣ်စီၣ်အကျိၤတဖၣ်လၢလၢပှဲၤပှဲၤ,နမၤလီၤဆၢၣ်အဂ့ၢ်တဖၣ်,နမၤကဘုးအီၤလၢတၢ်စူၤ,နဆိၣ်ဂ့ၤအတၢ်မဲထီၣ်လီၤ.
11 နဒုးကုာ်ထီၣ်နံၣ်လၢနတၢ်ဂ့ၤအခိၣ်သလုး,နကျဲဧိၤကပူၤဧိၤဒုးလီၤစီၤသိလီၤ.
12 ဒုးလီၤစီၤဝဲလၢတၢ်အီၣ်ဆၣ်အလီၢ်အဖီခိၣ်လၢပှၢ်လၢ်ကျါ,ဒီးတၢ်စိခိၣ်တဖၣ်ကံၢ်တူာ်အယီၢ်ဒ့လၢတၢ်သူၣ်ဖှံသးညီလီၤ.
13 တၢ်အီၣ်ဆၣ်အလီၢ်န့ၣ်ကူသိးဝဲဒီးသိအဖုတဖၣ်,ဒီးတၢ်ပၢၤခိၣ်န့ၣ်တၢ်လုၣ်ဘၢအီၤလၢဘုဧိၤဟုဧိၤလီၤ.ကိးပသူထီၣ်,ဒီးသးဝံၣ်ထီၣ်လီၤ.