Library · ksw

Psalms 78

0 စီၤအၤစာ်အသိၣ်တၢ်.

1 ကနၣ်ယတၢ်သိၣ်တၢ်သီ,ယပှၤဂီၢ်မုၢ်သ့ၣ်ဧၢ,ဒိကနၣ်ယထးခိၣ်အတၢ်ကတိၤန့ၣ်တက့ၢ်.

2 ယကအဲးထီၣ်ယထးခိၣ်လၢတၢ်ကတိၤဒိ,ယကစံၣ်တဲၤတဲလီၤတၢ်ကတိၤခူသူၣ်လၢပျၢၤ,

3 လၢပနၢ်ဟူတ့ၢ်,ဒီးသ့ၣ်ညါ,ဒီးပပၢ်စံးဘၣ်တဲဘၣ်ပှၤလီၤ.

4 ပတပာ်တဒၢအီၤလၢအဖိတဖၣ်ဘၣ်,ပကစံၣ်တဲၤတဲလီၤပှၤလၢခံတစိၤလၢယွၤအတၢ်စံးထီၣ်ပတြၢၤ,ဒီးအဂံၢ်အဘါ,ဒီးအတၢ်မၤလီၤလးလၢအမၤဝဲတဖၣ်န့ၣ်လီၤ.

5 အဂ့ၢ်ဒ်အံၤ,ပာ်ဂၢၢ်ပာ်ကျၢၤတၢ်အုၣ်အသးလၢယၤကိာ်အပူၤ,ဒီးပာ်တၢ်သိၣ်တၢ်သီလၢအံၣ်စရ့လးအကျါ,လၢအမၤလိာ်ပပၢ်တဖၣ်လၢအကဘိးဘၣ်သ့ၣ်ညါအဖိတဖၣ်,

6 ဒ်သိးပှၤလၢခံတစိၤကသ့ၣ်ညါ,ဖိသၣ်လၢအကအိၣ်ဖျဲၣ်တဖၣ်န့ၣ်ကဂဲၤဆၢထၢၣ်,ဒီးကစံးဘၣ်တဲဘၣ်အဖိတဖၣ်တသါလီၤ.

7 ဒီးဒ်သိးအကပာ်အတၢ်မုၢ်လၢ်လၢယွၤအပူၤ,ဒီးအသုတသးပ့ၤနီၣ်ယွၤအတၢ်မၤတဂ့ၤ,ဒီးကတိၢ်န့ၢ်အတၢ်မၤလိာ်တဖၣ်န့ၣ်,

8 ဒီးဒ်သိးအသုတကဲဘၣ်ဒ်အပၢ်တဖၣ်အသိးန့ၣ်တဂ့ၤ,ပှၤတစိၤလၢအနၢ်က့ၣ်,ဒီးပူထီၣ်တၢ်,ပှၤတစိၤလၢအသူၣ်တဂၢၢ်အသးတကျၢၤဘၣ်,ဒီးအသးတမ့ၢ်တတီဘၣ်ဒီးယွၤန့ၣ်လီၤ.

9 ပှၤအ့ဖရဲၣ်ဖိအိၣ်ဒီးအစုကဝဲၤဒီးချံၣ်န့ၣ်ဃၣ်အသးလၢတၢ်ဒုးသုးအမုၢ်တနံၤန့ၣ်လီၤ.

10 တတိၢ်န့ၢ်ဘၣ်ယွၤအတၢ်အၢၣ်လီၤအီလီၤ,ဒီးပာ်အသးလၢအတလဲၤဘၣ်လၢအတၢ်သိၣ်တၢ်သီအပူၤဘၣ်.

11 ဒီးသးပ့ၤနီၣ်အမၤတၢ်,ဒီးအတၢ်လီၤလးလၢအဒုးနဲၣ်အီၤလီၤ.

12 မၤဝဲလၢတၢ်လီၤလးလၢအပၢ်တဖၣ်အမဲာ်ညါ,လၢကီၢ်အဲၤကူပတူးအပူၤ,တၢ်ပျီပူၤစိၤဧၣ်လီၤ.

13 မၤသ့ၣ်ဖးပီၣ်လဲၣ်,ဒီးဒုးလဲၤခီဂာ်အီၤ,ဒီးပာ်ဆၢထၢၣ်ထံဒ်တၢ်တပူအသိးန့ၣ်လီၤ.

14 ဒီးဆှၢအီၤလၢတၢ်အၢၣ်လၢမုၢ်ဆါ,ဒီးသီတနၤကျၢၤန့ၣ်လၢမ့ၣ်အူကပီၤလီၤ.

15 မၤသ့ၣ်ဖးလၢၢ်တဖၣ်လၢပှၢ်မုၢ်ကနၢဒီးဒုးအီအီၤလၢလၢပှဲၤပှဲၤဒ်လၢထံယိာ်ပူၤအသိးန့ၣ်လီၤ.

16 ဒီးဒုးဟဲထီၣ်ထံကျိလၢလၢၢ်အပူၤ,ဒီးဒုးယွၤလီၤထံဒ်ထံမိၢ်ပှၢ်အသိးန့ၣ်လီၤ.

17 ဒီးအဝဲသ့ၣ်မၤကမၣ်ဘၣ်ဒံးအီၤလၢအပူထီၣ်တၢ်ထီကတၢၢ်တဂၤလၢပှၢ်မုၢ်ကနၢအဃိန့ၣ်လီၤ.

18 ဒီးလ့ပစီယွၤလၢအသးကံၢ်ပူၤလၢအဃ့တၢ်အီၣ်လၢအသးကွံတၢ်အဂီၢ်န့ၣ်အဃိလီၤ.

19 မ့ၢ်မး,ကတိၤတၢ်ထီဒါယွၤ,စံးဝဲ,ယွၤကတဲာ်ကတီၤစီၢ်နီၤခိၣ်လၢပှၢ်မုၢ်ကနၢဘၣ်ကသ့ဧါ.

20 ကွၢ်ကွၢ်,ကျီလံလၢၢ်တဖျၢၣ်,ဒီးထံဖျိးထီၣ်,ဒီးထံကျိလုၣ်ဘၢတၢ်လံ.ဟ့ၣ်လီၤစ့ၢ်ကီးကိၣ်ဘၣ်ကသ့ဧါ.မ့ၢ်အကကတဲာ်ကတီၤတၢ်ညၣ်လၢအပှၤဂီၢ်မုၢ်အဂီၢ်စ့ၢ်ကီးဧါ.

21 မၤသးဒ်န့ၣ်ဒီးယွၤနၢ်ဟူ,ဒီးအသးထီၣ်,ဒီးမ့ၣ်အူဆိၣ်ကဲၤအသးထီဒါယၤကိာ်,ဒီးသးကဲၤထီၣ်ဘၣ်အံၣ်စရ့လးလီၤ.

22 အဂ့ၢ်ဒ်အံၤ,တနာ်ဘၣ်ယွၤ,ဒီးတသန့ၤဘၣ်အသးလၢအတၢ်အုၣ်က့ၤခီၣ်က့ၤတၢ်ဘၣ်.

23 ဒီးမၤလိာ်တၢ်အၢၣ်တဖၣ်လၢထးခီ,ဒီးအိးထီၣ်မူခိၣ်အတြဲၤ,

24 ဒီးဒုးဟဲစူၤတၢ်လၢမၤနၤလၢအဖီခိၣ်ဒ်သိးအကအီၣ်တၢ်,ဒီးဟ့ၣ်လီၤမူခိၣ်အဘုအဟုလီၤ.

25 တၢ်အဂံၢ်ဆူၣ်အဘါဆူၣ်တဖၣ်အတၢ်အီၣ်န့ၣ်ပှၤကညီအီၣ်ဝဲလီၤ.အဝဲဒၣ်မၢလီၤတၢ်အီၣ်ဆူအအိၣ်တုၤအဘျဲးအီၣ်လီၤ.

26 ဒုးဟဲကလံၤမုၢ်ထီၣ်လၢမူခိၣ်,ဒီးဒုးဟဲကလံၤလၢကလံၤထံးတခီလၢအစိအကမီၤန့ၣ်လီၤ.

27 ဒီးဒုးဟဲစူၤတၢ်ညၣ်လၢအဖီခိၣ်ဒ်ဟီၣ်ခိၣ်အကမူၣ်အသိး,ဒီးထိၣ်အိၣ်ဒီးအဒံးဆ့,ဒ်ပီၣ်လဲၣ်အမဲးအသိးန့ၣ်လီၤ.

28 ဒီးဒုးလီၤတဲာ်အီၤလၢအသူၣ်ဒဲအလီၢ်အသးကံၢ်ပူၤ,ဒီးအိၣ်ဝးတရံးအအိၣ်ဝဲဆိးဝဲအလီၢ်လီၤ.

29 ဒီးပှၤအီၣ်ဝဲ,ဒီးဘျဲးအီၣ်ပှဲၤဆၢၣ်ကလာ်,ဒီးယွၤဒုးန့ၢ်ဘၣ်အီၤလၢအသးကွံတၢ်န့ၣ်လီၤ.

30 ပှၤတလီၤဖးကွံာ်ဘၣ်ဒီးအတၢ်သးကွံဘၣ်.တၢ်အီၣ်အိၣ်ဝဲလၢအကိာ်ပူၤအဖၢမုၢ်ဒီး,

31 ယွၤအသးထီၣ်ဘၣ်အီၤ,ဒီးမၤသံအပှၤဘီၣ်တဖၣ်,ဒီးဒုးလီၤဃံၤအံၣ်စရ့လးအပှၤဃုထၢဖိလီၤ.

32 တၢ်န့ၣ်ခဲလၢာ်ဘၣ်ဆၣ်ဒီးမၤဒံးတၢ်ဒဲးဘးဒံး,ဒီးအတၢ်မၤလီၤလးတဖၣ်န့ၣ်,တနာ်ဘၣ်ဝဲဘၣ်.

33 မၤသးဒ်န့ၣ်ဒီး,မၤလၢာ်ကွံာ်အဝဲသ့ၣ်အမုၢ်နံၤတဖၣ်လၢတၢ်ကလီကလီအပူၤ,ဒီးအနံၣ်အလါလၢတၢ်ကိၢ်တၢ်ဂီၤအပူၤလီၤ.

34 တုၤယွၤမၤသံအီၤဒီးအဝဲသ့ၣ်ဃုအီၤ,ဒီးဟဲက့ၤ,ဒီးဃုယွၤဂီၤဂီၤလီၤ.

35 ဒီးသ့ၣ်နီၣ်ထီၣ်က့ၤဝဲလၢယွၤမ့ၢ်အလၢၢ်အလ့,ဒီးတၢ်ထီၣ်ထီကစၢ်န့ၣ်မ့ၢ်တၢ်ပှ့ၤက့ၤအီၤလီၤ.

36 ဘၣ်ဆၣ်ဒီးပှၤလီန့ၢ်အီၤလၢအထးခိၣ်,ဒီးကတိၤကဘျံးကဘျၣ်ဒီးအီၤလၢအပျ့ၤလီၤ.

37 အဂ့ၢ်ဒ်အံၤအသးတဂၢၢ်တကျၢၤဘၣ်ဒီးအီၤဘၣ်.ဒီးတအိၣ်ကျၢၤဘၣ်လၢအတၢ်အၢၣ်လီၤအီလီၤအပူၤဘၣ်.

38 ဒီးယွၤသးအိၣ်အီၤဒီးပျၢ်အတၢ်အၢ,ဒီးတမၤဟးဂီၤဘၣ်အီၤဘၣ်.ဒီးဘိးဃၣ်ကွံာ်အသးထီၣ်အါစု,ဒီးတထိၣ်ဂဲၤဘၣ်အသးကဲၤထီၣ်ခဲလၢာ်ဘၣ်.

39 ဒီးသ့ၣ်နီၣ်ထီၣ်က့ၤဝဲလၢအဝဲသ့ၣ်တဖၣ်န့ၣ်မ့ၢ်တၢ်ဖံးတၢ်ညၣ်,ကလံၤလၢအဟးကွံာ်,ဒီးတဟဲက့ၤဘၣ်.

40 အဝဲသ့ၣ်တဖၣ်န့ၣ်ပူထီၣ်ယွၤလၢပှၢ်မုၢ်ကနၢ,မၤဆါအသးလၢပှၢ်မုၢ်ကနၢန့ၣ်ပှံၤဘျီလဲၣ်.

41 ဒီးဃၣ်ကွံာ်ကဒီးအသး,ဒီးလ့ပစီယွၤ,ဒီးမၤတရီတပါအံၣ်စရ့လးအတၢ်စီဆှံလီၤ.

42 တသ့ၣ်နီၣ်ထီၣ်က့ၤဘၣ်အစု,မုၢ်နံၤလၢအပှ့ၤက့ၤအီၤလၢအဒုၣ်အဒါအစုပူၤ,

43 ပှၤလၢအပာ်အတၢ်ပနီၣ်လီၤလးလၢအဲၤကူပတူးအပူၤ,ဒီးအတၢ်လီၤလးတဖၣ်လၢတၢ်ပျီပူၤစိၤဧၣ်,

44 ဒီးဒုးကဲထီၣ်အထံမိၢ်ပှၢ်တဖၣ်လၢတၢ်သွံၣ်,ဒီးပှၤအီအထံတသ့ဘၣ်.

45 မၢလီၤတၢ်တဖုလၢအကျါလၢအအ့ၣ်တၢ်,ဒီးဒ့ၣ်လၢအမၤဟးဂီၤတၢ်လီၤ.

46 ဟ့ၣ်လီၤကွံာ်အတၢ်အါထီၣ်လၢဒွဲၣ်ဃစံ,ဒီးအမၤတၢ်လၢဒွဲၣ်အၢ်ဘၤလီၤ.

47 မၤဟးဂီၤအစပံးမုၢ်လၢသူၣ်,ဒီးအသိးဝံာ်ဒၢလၢနါဝာ်,

48 ဟ့ၣ်လီၤကွံာ်စ့ၢ်ကီးအတၢ်ဖိတၢ်လံၤဆူသူၣ်အအိၣ်,ဒီးအဆၣ်ဖိကီၢ်ဖိအဒၢဆူလီဝၢ်အဒံးန့ၣ်လီၤ.

49 မၢလီၤအသးထီၣ်ကဲၤထီၣ်ဆူအအိၣ်,တၢ်သးထီၣ်,ဒီးတၢ်သးကဲၤထီၣ်,ဒီးတၢ်ကိၢ်တၢ်ဂီၤ,တၢ်အၢအကလူးတဖၣ်ဆူအအိၣ်လီၤ.

50 မၤကျဲလၢအသးထီၣ်အဂီၢ်လီၤ.ဒ်သိးအသုတသံတဂ့ၤန့ၣ်တသးလီဘၣ်အီၤဘၣ်.ဒီးဟ့ၣ်လီၤကွံာ်အသးဆူတၢ်သံသတြိာ်အပူၤလီၤ.

51 ဒီးကျီကွံာ်ကယဲၢ်ပှၤဖိဝဲၢ်ကိလၢအဲၤကူပတူးအပူၤ,အဂံၢ်အဘါအခိၣ်တဖၣ်လၢစီၤဃၣ်အဒဲတဖၣ်အပူၤလီၤ.

52 မ့မ့ၢ်အပှၤဂီၢ်မုၢ်ဒၣ်ဝဲန့ၣ်,ဒုးဟးထီၣ်အီၤဒ်သိအသိးန့ၣ်,ဆှၢအီၤလၢပှၢ်မုၢ်ကနၢဒ်သိတဖုအသိးန့ၣ်လီၤ.

53 ဒီးဆှၢဝဲဃါမနၤ,ဒီးအဝဲသ့ၣ်တပျံၤဘၣ်တၢ်ဘၣ်.မ့မ့ၢ်အဒုၣ်အဒါတဖၣ်န့ၣ်ပီၣ်လဲၣ်လုၣ်ဘၢကွံာ်အီၤလီၤ.

54 ဒီးဒုးဟဲအီၤဆူအလီၢ်စီဆှံအဃၢၤ,ကစၢၢ်တဖျၢၣ်လၢအစုထွဲပှ့ၤဝဲလီၤ.

55 ဒီးဟီထီၣ်ကွံာ်ပှၤကလုာ်တဖၣ်လၢအမဲာ်ညါ,ဒီးနီၤဖးန့ၢ်အတၢ်န့ၢ်သါလၢပျံၤ,ဒီးဒုးအိၣ်ဒုးဆိးအံၣ်စရ့လးအဒူၣ်တဖၣ်လၢဒဲပူၤလီၤ.

56 နာ်သက့ဒီးအဝဲသ့ၣ်လ့ပစီ,ဒီးပူထီၣ်တၢ်ထီကတၢၢ်ကစၢ်,ဒီးတတိၢ်န့ၢ်ဘၣ်အတၢ်အုၣ်အသးဘၣ်.

57 ဒီးက့ၤကဒါက့ၤ,ဒီးလီတၢ်ဒ်အပၢ်တဖၣ်အသိးန့ၣ်လီၤ.အသးကဒံကဒါဒ်ချံၣ်လီတၢ်အသိးလီၤ.

58 ဒီးမၤသးထီၣ်ယွၤလၢအလီၢ်ထီၣ်ထီတဖၣ်,ဒီးမၤသးက့ၣ်အီၤလၢအတၢ်ဂီၤတၢ်ဖီၣ်လီၤ.

59 ယွၤနၢ်ဟူတၢ်ဒီးသးထီၣ်ဝဲ,ဒီးသးဘၣ်အၢအံၣ်စရ့လးနးမးလီၤ.

60 ဒီးလဲၤသဒၣ်ၡံလိၣ်အိၣ်ဝဲဆိးဝဲအလီၢ်,ဒဲလၢအပာ်ဝဲလၢပှၤကညီအကျါလီၤ.

61 ဒီးဟ့ၣ်လီၤကွံာ်အတၢ်ဂံၢ်ဆူၣ်ဘါဆူၣ်ဆူတၢ်မၢကဲကုၢ်အပူၤ,ဒီးအလၤအကပီၤန့ၣ်ဆူအဒုၣ်အဒါအစုပူၤလီၤ.

62 ဒီးဟ့ၣ်လီၤကွံာ်အပှၤဂီၢ်မုၢ်ဆူနးအအိၣ်,ဒီးအသးကဲၤထီၣ်ဘၣ်အတၢ်န့ၢ်သါလီၤ.

63 မ့ၣ်အူအီၣ်ကွံာ်အပှၤဖိၣ်သၣ်ခွါတဖၣ်,ဒီးအပှၤမုၣ်လိၣ်ဘိတဖၣ်တဒိးတၢ်စံးထီၣ်တြၢၤအီၤဘၣ်.

64 အပှၤလုၢ်တၢ်အဒိၣ်တဖၣ်လီၤဃံၤဝဲလၢဘီဧိၤနးဧိၤ,ဒီးအမုၣ်ကမဲတဟီၣ်ဘၣ်ဝဲဘၣ်.

65 ဒီးယွၤဖုသံနီၣ်ထီၣ်ဒ်ပှၤလၢအမံသပ့ၤအသိး,ဒီးဒ်ပှၤလၢအဂံၢ်ဆူၣ်ဘါဆူၣ်လၢအကိးပသူထီၣ်လၢစပံးထံအပူၤအသိးန့ၣ်လီၤ.

66 ဒီးကျီကွံာ်အဒုၣ်အဒါဆူအလီၢ်ခံ,ဒီးပာ်အီၤလၢတၢ်ဒုၣ်ဒွဲၣ်အလီၢ်လီၤထူလီၤယိာ်လီၤ.

67 ဒီးညိကွံာ်စီၤယိၤသးအဒဲ,ဒီးတဃုထၢဘၣ်အ့ဖရဲၣ်အဒူၣ်ဘၣ်.

68 ဃုထၢဝဲယူဒၤအဒူၣ်,ကစၢၢ်စံယိၣ်လၢအအဲၣ်ဝဲလီၤ.

69 ဒီးသူၣ်အလီၢ်စီဆှံဒ်တၢ်အလီၢ်ထီၣ်ထီအသိး,ဒ်ဟီၣ်ခိၣ်လၢအပာ်အခီၣ်ထံးအထူအယိာ်အသိးလီၤ.

70 ဒီးဃုထၢအခ့အပှၤစီၤဒၤဝံး,ဒီးဟံးန့ၢ်အီၤလၢသိအကရၢပူၤ,လၢအပိာ်သိမိၢ်ဒုးအီၣ်နုၢ်တဖၣ်အခံန့ၣ်လီၤ.

71 ဒုးဟဲထီၣ်အီၤဒ်သိးအကကွၢ်အပှၤဂီၢ်မုၢ်,ယၤကိာ်,ဒီးအတၢ်န့ၢ်သါ,အံၣ်စရ့လးလီၤ.

72 ဒီးကွၢ်အီၤလၢအသးဒီဖျၢၣ်,ဒီးဆှၢအီၤလၢအစုကတဲာ်ကတီၤတၢ်လီၤ.