Library · ksw

Psalms 84

0 စီၤကိးရးအဖိခွါအထါလၢတၢ်အခိၣ်အဂီၢ်လၢကၤသးအတနၢ်.

1 တၢ်သုးမုၢ်အယွၤဧၢ,နအိၣ်နဆိးအလီၢ်န့ၣ်ပအဲၣ်ဒိးအီၤအလီၢ်အိၣ်ဆံးဒိၣ်လဲၣ်.

2 ယဆၢလဲၤဆူယွၤအဂၢၤတဖၣ်,တုၤယသးလီၤဘှါဝဲလီၤ.ယသးဒီးယညၣ်ကိးထီၣ်ယွၤလၢအမူဝဲတဂၤန့ၣ်လီၤ.

3 မ့ၢ်မးထိၣ်ဖှံးထံၣ်န့ၢ်အဟံၣ်,ထိၣ်ဘျ့ၣ်ဘျီၣ်ဧိၤန့ၣ်အသွံလၢအဂီၢ်ဒၣ်ဝဲဖဲအကပာ်လီၤအဖိလၢနတၢ်လုၢ်လီၢ်တဖၣ်ဒၣ်လဲာ်လီၤ,တၢ်သုးမုၢ်အယွၤ,ယစီၤပၤ,ဒီးယကစၢ်ဧၢ.

4 ပှၤလၢအအိၣ်ဝဲဆိးဝဲလၢနဟံၣ်ပူၤန့ၣ်ဘၣ်ဆိၣ်ဂ့ၤဝဲလီၤ.ကစံးထီၣ်ပတြၢၤဒံးနၤလီၤ. စ့လၤ.

5 ပှၤလၢအဂံၢ်အဘါအိၣ်လၢနပူၤ,ပှၤလၢအအဲၣ်ဒိးကျဲတဖၣ်န့ၣ်,ဘၣ်ဆိၣ်ဂ့ၤဝဲလီၤ.

6 ပိာ်ကျဲလၢမဲာ်ထံအကစၢၢ်ကဆူးအပူၤ,ဒီးဒုးကဲထီၣ်အီၤလၢထံထီၣ်ပၢၢ်အလီၢ်လီၤ.တၢ်ဟဲစူၤဆိန့ၣ်မၤပှဲၤစ့ၢ်ကီးအီၤလၢတၢ်ဘျုးတၢ်ဖှိၣ်လီၤ.

7 အဝဲသ့ၣ်တဖၣ်န့ၣ်ဒံးလဲၤတၢ်,အဂံၢ်အဘါဒံးဆူၣ်ထီၣ်သတးဒီး,အိၣ်ဖျါလၢယွၤအမဲာ်ညါလၢစံယိၣ်အပူၤကိးဂၤဒဲးလီၤ.

8 ယွၤတၢ်သုးမုၢ်အကစၢ်ဧၢ,ကနၣ်ယဘါထုကဖၣ်တၢ်တက့ၢ်.စီၤယၤကိာ်အကစၢ်ဧၢ,ဒိကနၣ်တၢ်တက့ၢ်. စ့လၤ.

9 နဲဒၣ်ပကတီၤတဘ့ၣ်ကစၢ်ဧၢ,ကွၢ်လီၤတက့ၢ်,ဒီးကွၢ်ပှၤလၢနဖှူအီၤတဂၤအမဲာ်တက့ၢ်.

10 အဂ့ၢ်ဒ်အံၤ,ပအိၣ်ပဆိးလၢနဂၢၤတဖၣ်အပူၤမုၢ်တနံၤ,ဂ့ၤန့ၢ်ပအိၣ်လၢအဂၤတပူၤအနံၤတကထိန့ၣ်တက့ၢ်လီၤ.ယဃုထၢတၢ်ပၢၤကျဲစၢၤအလီၢ်လၢယကစၢ်အဟံၣ်ပူၤန့ၣ်ဒိၣ်န့ၢ်ယအိၣ်ယဆိးလၢပှၤတတီတလိၤအဒဲတဖၣ်အပူၤန့ၣ်တက့ၢ်လီၤ.

11 အဂ့ၢ်ဒ်အံၤ,ကစၢ်ယွၤမ့ၢ်မုၢ်ဧိၤလါဧိၤ,ဒီးကတီၤတဘ့ၣ်လီၤ.ယွၤကဟ့ၣ်လီၤတၢ်ဘျုးတၢ်ဖှိၣ်,ဒီးတၢ်လၤတၢ်ကပီၤလီၤ.တတြီဘၣ်တၢ်ဂ့ၤလၢပှၤလဲၤတၢ်တီတီလိၤလိၤတဖၣ်န့ၣ်နီတမံၤဘၣ်.

12 ယွၤ,တၢ်သုးမုၢ်အကစၢ်ဧၢ,ပှၤလၢအသန့ၤအသးလၢနၤန့ၣ်ဘၣ်ဆိၣ်ဂ့ၤဝဲလီၤ.