Psalms 92
0 ထါ,တၢ်သးဝံၣ်လၢအိၣ်ဘှံးနံၤအဂီၢ်.
1 ပစံးထီၣ်ပတြၢၤယွၤ,ဒီးသးဝံၣ်နမံၤန့ၣ်မ့ၢ်တၢ်အဂ့ၤ,တၢ်ထီကတၢၢ်တဂၤဧၢ,
2 လၢပကဒုးနဲၣ်နဘျုးနဖှိၣ်လၢမုၢ်ဂီၤ,ဒီးနတၢ်မ့ၢ်တၢ်တီလၢမုၢ်နၤ,
3 လၢတၢ်အိၣ်ဒီးအပျံၤဆံဆဲၣ်ဘိ,လၢသီတူၢ်,လၢတနၢ်သီၣ်မုာ်မုာ်အလိၤလီၤ.
4 အဂ့ၢ်ဒ်အံၤ,နဒုးသးခုယၤလၢနမၤတၢ်အဃိ,ယွၤဧၢ,လၢတၢ်လၢနမၤလၢနစုတဖၣ်အဃိန့ၣ်ယကသူၣ်ဖှံသးညီလီၤ.
5 နမၤတၢ်တဖၣ်န့ၣ်မ့ၢ်ဆံးဒိၣ်လဲၣ်,ယွၤဧၢ,နကူၣ်ထီၣ်ဖးလီၤတၢ်န့ၣ်ယိာ်မးလီၤ.
6 ပှၤလၢအလီၤဂာ်ဆၣ်ဧိၤကီၢ်ဧိၤတသ့ၣ်ညါဘၣ်,ဒီးပှၤဟးဂီၤဖိအနၢ်တပၢၢ်ဘၣ်တၢ်အံၤဘၣ်.
7 တုၤပှၤအၢဖိမဲထီၣ်ဒ်နီၣ်ဧိၤမံၤဧိၤအသိးန့ၣ်,ဒီးပှၤမၤတၢ်အၢခဲလၢာ်ဘီၣ်ထီၣ်ညီထီၣ်ဒီး,မ့ၢ်ဒ်သိးအကတုၤလၢတၢ်ဟးဂီၤလီၤစိၤလီၤထီလီၤ.
8 ဒီးနဲဒၣ်အံၤနမ့ၢ်တၢ်ထီၣ်ထီကတၢၢ်လီၤထူလီၤယိာ်,ယွၤဧၢ.
9 အဂ့ၢ်ဒ်အံၤ,ကွၢ်ကွၢ်,နဒုၣ်နဒါတဖၣ်,ယွၤဧၢ.အဂ့ၢ်ဒ်အံၤ,ကွၢ်ကွၢ်,နဒုၣ်နဒါတဖၣ်ကတုၤလၢတၢ်ဟးဂီၤ,ဒီးကယဲၢ်ပှၤလၢအမၤတၢ်အၢခဲလၢာ်ကလီၤပြံလီၤပြါလီၤ.
10 ဘၣ်ဆၣ်ဒီးနပာ်ထီၣ်ထီယနၢၤဒ်တၤဖးရံၣ်အနၢၤအသိးန့ၣ်လီၤ.ယဒိးတၢ်ဖှူယၤဒီးသိအသီလီၤ.
11 ဒီးယမဲာ်ထံၣ်အတၢ်အဲၣ်ဒိးလၢယဒုၣ်ယဒါအလိၤ,ယနၢ်နၢ်ဟူတၢ်လၢအဘၣ်ပှၤအၢဖိလၢအဂဲၤဆၢထၢၣ်ထီဒါယၤအဂ့ၢ်လီၤ.
12 ပှၤတီပှၤလိၤဂ့ၤထီၣ်ဒ်သ့ၣ်စူၣ်ပလိၣ်အသိး,မဲထီၣ်ဒ်သ့ၣ်ဆှိအ့ရ့းလၢလဘၤနိၣ်အသိးန့ၣ်လီၤ.
13 သူၣ်အသးလၢယွၤအဟံၣ်ပူၤဒီးဂ့ၤထီၣ်ဝဲလၢပကစၢ်အဂၢၤပူၤလီၤ.
14 တုၤအသးပှၢ်ဒီးကသၣ်ထီၣ်ဒံးဒီးကအိၣ်ပှဲၤဒီးအထံဒီးသံကစဲာ်,
15 ဒ်သိးအကဒုးနဲၣ်လၢယွၤမ့ၢ်အတီအလိၤလီၤ.မ့ၢ်ယလၢၢ်တဖျၢၣ်,ဒီးတၢ်အၢတအိၣ်ဘၣ်လၢအပူၤဘၣ်လီၤ.