Library · ksw

Exodus 35

1 ဒီးစီၤမိၤရှ့ဒုးအိၣ်ဖှိၣ်ပှၤအံၣ်စရ့လးဖိအတၢ်အိၣ်ဖှိၣ်ခဲလၢာ်,ဒီးစံးဘၣ်အီၤ,အအံၤမ့ၢ်တၢ်ကတိၤလၢယွၤမၤလိာ်လၢသုဘၣ်မၤအီၤလီၤ.

2 ဃုနံၤန့ၣ်သုကမၤတၢ်လီၤ.မ့မ့ၢ်နွံနံၤတနံၤန့ၣ်ကကဲထီၣ်နံၤစီဆှံလၢသုဂီၢ်,တၢ်အိၣ်ဘှံးလၢယွၤအဂီၢ်လီၤ.ကယဲၢ်ပှၤလၢအမၤတၢ်မၤလၢအပူၤန့ၣ်,ကဘၣ်တၢ်မၤသံအီၤလီၤ.

3 လၢအိၣ်ဘှံးနံၤန့ၣ်သုတဆိၣ်ကဲၤမ့ၣ်အူလၢသုအိၣ်သုဆိးအလီၢ်နီတပူၤတဂ့ၤ.

4 ဒီးစီၤမိၤရှ့ကတိၤတၢ်ဒီးပှၤအံၣ်စရ့လးဖိအတၢ်အိၣ်ဖှိၣ်ခဲလၢာ်,ဒီးစံးဝဲဒၣ်,တၢ်အံၤမ့ၢ်တၢ်လၢယွၤမၤလိာ်တၢ်,ဒီးစံးဝဲဒၣ်,

5 ဟံးန့ၢ်တၢ်မၤဘူၣ်လၢယွၤအဂီၢ်လၢသုကျါန့ၣ်တက့ၢ်.ဖဲဒၣ်ပှၤလၢအသးအိၣ်လၢအကဟ့ၣ်ဒၣ်တဂၤလၢ်လၢ်န့ၣ်,မ်အဟဲစိာ်တၢ်မၤဘူၣ်ဆူယွၤအအိၣ်တက့ၢ်.ထူ,ဒီးစ့,ဒီးတိၢ်,

6 ဒီးတၢ်လါ,ဒီးတၢ်လုးတကုာ်,ဒီးတၢ်ဂီၤ,ဒီးဖှီဝါကဆှၣ်,ဒီးမဲာ်တဲးလဲးအဆူၣ်,

7 ဒီးသိဖါအဖံးစုၣ်ဂီၤ,ဒီးတၢ်အဖံး,ဒီးသ့ၣ်ဖှ့ၡံးတၤ,

8 ဒီးသိလၢမ့ၣ်အူဒၢအဂီၢ်,ဒီးတၢ်နၢမူလၢသိဖှူတၢ်အဂီၢ်,ဒီးလၢတၢ်ဆိၣ်ကဲၤနၢမူအဂီၢ်,

9 ဒီးတၢ်မျၢ်မဟူယၤ,ဒီးလၢၢ်လၢအမၤပှဲၤထီၣ်လၢအ့ဖိးအဂီၢ်,ဒီးလၢသဃိးအဂီၢ်လီၤ.

10 ဒီးကယဲၢ်ပှၤလၢအသးကူၣ်တၢ်သ့တဂၤလၢ်လၢ်န့ၣ်ဘၣ်ဟဲ,ဒီးမၤတၢ်လၢယွၤမၤလိာ်ဝဲခဲလၢာ်လီၤ.

11 တၢ်အိၣ်အလီၢ်,ဒီးအဒဲ,ဒီးအတၢ်ကျၢၢ်ဘၢအနီၣ်ကွးတဖၣ်,ဒီးသ့ၣ်ဘ့ၣ်ဘၣ်တဖၣ်,အနီၣ်ဘိတဖၣ်,အထူၣ်တဖၣ်,ဒီးအခီၣ်တဖၣ်,

12 တလါ,ဒီးအနီၣ်ယိးဘိတဖၣ်,တၢ်မၤပူၤဖျဲးအလီၢ်,ဒီးတၢ်ကျၢၢ်ဘၢအယၣ်ဘျးထီၣ်အသး,

13 စီၢ်နီၤခိၣ်,ဒီးအနီၣ်ယိးဘိတဖၣ်,ဒီးအလီခီခဲလၢာ်,ဒီးတၢ်မဲာ်ညါအကိၣ်,

14 ဒီးမ့ၣ်အူဒၢမိၢ်ပှၢ်လၢတၢ်ကပီၤအဂီၢ်,ဒီးအတၢ်ဖိတၢ်လံၤ,ဒီးအမ့ၣ်အူဒၢတဖၣ်,ဒိးသိလၢတၢ်ကပီၤအဂီၢ်,

15 ဒီးတၢ်လုၢ်လီၢ်ဆိၣ်ကဲၤတၢ်နၢမူ,ဒီးအနီၣ်ယိးဘိတဖၣ်,ဒီးသိဖှူတၢ်,ဒီးတၢ်ဆိၣ်ကဲၤနၢမူ,ဒီးယၣ်နီၢ်ကျၢၢ်ဘၢတၢ်လၢကျဲစၢၤအဂီၢ်ဖဲတၢ်လဲၤနုာ်လၢတၢ်အိၣ်အလီၢ်,

16 ဒီးတၢ်လုၢ်လီၢ်မ့ၣ်အူ,ဒီးအဖၣ်ကပူၤတိၢ်,အနီၣ်ယိးဘိတဖၣ်,ဒီးအတၢ်ဖိတၢ်လံၤခဲလၢာ်,သရာ်ဒီးအခီၣ်,

17 တၢ်အဂၢၤအယၣ်လီၤစဲၤတဖၣ်,အထူၣ်တဖၣ်ဒီးအခီၣ်တဖၣ်,ဒီးယၣ်နီၣ်ကျၢၢ်ဘၢတၢ်လၢတၢ်အဂၢၤအပဲတရီအဂီၢ်,

18 တၢ်အိၣ်အလီၢ်အတၢ်ကမိာ်ခံတဖၣ်,ဒီးအဂၢၤအတၢ်ကမိာ်ခံတဖၣ်,ဒီးအပျံၤတဖၣ်,

19 တၢ်အကူအသိးဘၣ်ဃးဒီးတၢ်မၤတၢ်အခ့အပှၤအတၢ်လၢအကမၤတၢ်လၢအလီၢ်စီဆှံအပူၤ,တၢ်အကူအသိးစီဆှံလၢပှၤလုၢ်တၢ်အဒိၣ်စီၤအၤဟရိၣ်အဂီၢ်,ဒီးအဖိခွါတဖၣ်အကူအသိးဒ်သိးအကမၤပှၤလုၢ်တၢ်အဒိၣ်အတၢ်မၤလီၤ.

20 ဒီးပှၤအံၣ်စရ့လးဖိအတၢ်အိၣ်ဖှိၣ်ခဲလၢာ်န့ၣ်ဟးထီၣ်ဝဲလၢစီၤမိၤရှ့အမဲာ်ညါလီၤ.

21 ဒီးကယဲၢ်ပှၤလၢအသးထိၣ်ဂဲၤအီၤ,ဒီးကယဲၢ်ပှၤလၢအသးဘိးထီၣ်အီၤတဖၣ်ဟဲဒီးဟဲစိာ်တၢ်မၤဘူၣ်ယွၤလၢတၢ်မၤဘၣ်ဃးဒီးတၢ်အိၣ်ဖှိၣ်အဒဲအဂီၢ်,ဒီးလၢအတၢ်မၤခဲလၢာ်အဂီၢ်,ဒီးလၢတၢ်အကူအသိးစီဆှံအဂီၢ်လီၤ.

22 ဒီးဟဲဝဲ,ပိာ်ခွါဒီးပိာ်မုၣ်,ကယဲၢ်ပှၤလၢအသးအိၣ်ထီၣ်ဒၣ်တၢ်,ဒီးဟဲစိာ်ဝဲထံဖှံၣ်,ဒီးနၢ်ကွီၤ,ဒီးပသံး,ဒီးဖဲ,တၢ်ကယၢကယဲထူခဲလၢာ်လီၤ.ပှၤလၢအမၤဘူၣ်တၢ်န့ၣ်မၤဘူၣ်ထူဧိၤလွဲဧိၤလၢယွၤကိးဂၤဒဲးလီၤ.

23 ဒီးကယဲၢ်ပှၤလၢအအိၣ်ဒီးတၢ်လါ,ဒီးတၢ်လုးတကုာ်,ဒီးတၢ်ဂီၤ,ဒီးဖှီဝါကဆှၣ်,ဒီးမဲာ်တဲးလဲးအဆူၣ်,ဒီးသိဖါအဖံးစုၣ်ဂီၤ,ဒီးတၢ်အဖံးန့ၣ်,ဟဲက့ၤစိာ်ဝဲကိးဂၤဒဲးလီၤ.

24 ဒီးကယဲၢ်ပှၤလၢအမၤဘူၣ်တၢ်လၢစ့ဒီးတိၢ်န့ၢ်,ဟဲစိာ်ယွၤအတၢ်မၤဘူၣ်လီၤ.ဒီးကယဲၢ်ပှၤလၢအအိၣ်ဒီးသ့ၣ်ဖှ့ၡံးတၤလၢတၢ်မၤအမၤတၢ်အဂီၢ်န့ၣ်ဟဲစိာ်ဝဲကိးဂၤဒဲးလီၤ.

25 ဒီးကယဲၢ်ပိာ်မုၣ်လၢအကူၣ်တၢ်သ့တဂၤလၢ်လၢ်န့ၣ်လ့ၢ်လုၣ်လၢအစု,ဒီးဟဲစိာ်တၢ်လၢအလ့ၢ်ဝဲ,တၢ်လါ,ဒီးတၢ်လုးတကုာ်,ဒီးတၢ်ဂီၤ,ဒီးဖှီဝါကဆှၣ်လီၤ.

26 ဒီးကယဲၢ်ပိာ်မုၣ်လၢအသးထိၣ်ဂဲၤအီၤလၢတၢ်ကူၣ်သ့န့ၣ်,လ့ၢ်မဲာ်တဲးလဲးအဆူၣ်လီၤ.

27 ဒီးပဒိၣ်တဖၣ်ဟဲစိာ်တၢ်မျၢ်မဟူယၤ,ဒီးလၢၢ်လၢအကမၤပှဲၤအ့ဖိးအဂီၢ်,ဒီးလၢသဃိးအဂီၢ်,

28 ဒီးတၢ်နၢမူ,ဒီးသိလၢတၢ်ကပီၤအဂီၢ်,ဒီးလၢသိဖှူတၢ်အဂီၢ်,ဒီးလၢတၢ်ဆိၣ်ကဲၤနၢမူအဂီၢ်လီၤ.

29 ဒီးပှၤအံၣ်စရ့လးဖိ,ဒ်အသးအိၣ်ထီၣ်ဒၣ်အသိးန့ၣ်,ဟဲစိာ်အတၢ်မၤဘူၣ်ဆူယွၤအအိၣ်,ကယဲၢ်ပိာ်မုၣ်ဒီးပိာ်ခွါလၢအသးထိၣ်ဂဲၤဒၣ်အီၤဒ်သိးအကဟဲစိာ်တၢ်လၢကယဲၢ်တၢ်မၤအဂီၢ်,လၢယွၤမၤလိာ်စီၤမိၤရှ့လၢအဘၣ်မၤခဲလၢာ်လီၤ.

30 ဒီးစီၤမိၤရှ့စံးဘၣ်ပှၤအံၣ်စရ့လးဖိ,ကွၢ်တက့ၢ်.ယွၤကိးထီၣ်ပှၤယူဒၤအဒူၣ်ဖိ,စီၤဃူၢ်အဖိခွါ,စီၤအူရံၤအဖိခွါ,စီၤဘစၤလအ့လးလၢအမံၤ,

31 ဒီးမၤပှဲၤအီၤဒီးယွၤအသး,ဒီးတၢ်ကူၣ်သ့,ဒီးတၢ်ကူၣ်တၢ်ဆး,ဒီးတၢ်သ့ၣ်ညါ,ဒီးတၢ်မၤတၢ်သ့ကိးမံၤဒဲး,

32 ဒ်သိးအကကူၣ်ထီၣ်တၢ်မၤ,လၢအကမၤတၢ်လၢထူ,ဒီးစ့,ဒီးတိၢ်,

33 ဒီးလၢအကဂူာ်ကျ့လၢၢ်လၢအကမၤပှဲၤအီၤ,ဒီးလၢအကစိးပျၤသ့ၣ်,ဒ်သိးအကမၤတၢ်ကူၣ်သ့အတၢ်မၤကိးမံၤဒဲးလီၤ.

34 ဒီးဒၢနုာ်တၢ်လၢအသးကံၢ်ပူၤဒ်သိးအကသိၣ်လိတၢ်,အဝဲဒၣ်ဒီးပှၤဒၣ်အဒူၣ်ဖိ,စီၤအဃံစမးအဖိခွါ,စီၤအၤဟလံအာ်လီၤ.

35 မၤပှဲၤအသးဒီးတၢ်ကူၣ်သ့ဒ်သိးအကမၤကယဲၢ်တၢ်မၤ,ပှၤကွဲးတၢ်အတၢ်မၤ,ဒီးပှၤကူၣ်တၢ်သ့အတၢ်မၤ,ဒီးပှၤလၢအမၤတၢ်ကံၣ်ဃ့လၢတၢ်လါ,ဒီးလၢတၢ်လုးတကုာ်,လၢတၢ်ဂီၤ,ဒီးလၢဖှီဝါကဆှၣ်,ဒီးလၢပှၤထါတၢ်,ပှၤလၢအမၤတၢ်တမံၤလၢ်လၢ်,ဒီးပှၤလၢအကူၣ်ထီၣ်တၢ်သ့တဖၣ်အတၢ်မၤလီၤ.