Exodus 6
1 ဒီးယွၤစံးဘၣ်စီၤမိၤရှ့,ခဲကနံၣ်အံၤယကမၤဖၤရိၤဒ်လဲၣ်ဒ်လဲၣ်န့ၣ်နကထံၣ်ဘၣ်လီၤ.အဂ့ၢ်ဒ်အံၤ,ကပျၢ်အီၤဒီးအစုဆူၣ်,ဒီးကဟီထီၣ်ကွံာ်အီၤဒီးအစုဆူၣ်လၢအကီၢ်ပူၤလီၤ.
2 ဒီးယွၤကတိၤတၢ်ဒီးစီၤမိၤရှ့ဒီးစံးဘၣ်အီၤ,ယဲဒၣ်အံၤယမ့ၢ်ယဟိဝၤလီၤ.
3 ဒီးယလီၣ်ဖျါထီၣ်ယသးလၢစီၤအၤဘြၤဟၣ်,ဒီးစီၤအံၤစဲး,ဒီးစီၤယၤကိာ်လၢယမံၤယွၤသ့တၢ်လၢာ်လီၤ.မ့မ့ၢ်လၢယမံၤယဟိဝၤန့ၣ်တၢ်တဒုးသ့ၣ်ညါဘၣ်အီၤလၢယၤဘၣ်.
4 ဒီးယပာ်ဂၢၢ်ပာ်ကျၢၤစ့ၢ်ကီးလံယတၢ်အၢၣ်လီၤအီလီၤဒီးအီၤလၢယကဟ့ၣ်လီၤအီၤလၢကီၢ်ကနၤဧၣ်,အအိၣ်တမှံၤအဂီၢ်,ဖဲအအိၣ်တမှံၤလၢအပူၤလီၤ.
5 ဒီးယနၢ်ဟူစ့ၢ်ကီးပှၤအံၣ်စရ့လးဖိအတၢ်ကအုကစွါလၢပှၤအဲၤကူပတူးဖိမၢအကဲကုၢ်,ဒီးယသ့ၣ်နီၣ်ထီၣ်က့ၤလံယတၢ်အၢၣ်လီၤအီလီၤလံ.
6 မၤသးဒ်န့ၣ်ဒီးစံးဘၣ်ပှၤအံၣ်စရ့လးဖိ,ယမ့ၢ်ယွၤလီၤ,ဒီးယကဒုးဟးထီၣ်ကွံာ်သုလၢပှၤအဲၤကူပတူးဖိအတၢ်ဝံတၢ်ယိးအဖီလာ်,ဒီးယကမၤထူၣ်ဖျဲးသုလၢအကုၢ်အတၢ်မၤ,ဒီးယကပှ့ၤက့ၤသုလၢယစုယူာ်ထီၣ်အသး,ဒီးလၢတၢ်စံၣ်ညီၣ်ဖးဒိၣ်တဖၣ်,
7 ဒီးယကပာ်သုလၢပှၤဂီၢ်မုၢ်လၢယဂီၢ်,ဒီးယကကဲထီၣ်ကစၢ်လၢသုဂီၢ်,ဒီးသုကသ့ၣ်ညါလၢယမ့ၢ်ယွၤသုကစၢ်လၢအဒုးဟးထီၣ်ကွံာ်သုလၢပှၤအဲၤကူပတူးဖိအတၢ်ဝံတၢ်ယိးအဖီလာ်လီၤ.
8 ဒီးယကဒုးဟဲသုဆူကီၢ်လၢယယူာ်ထီၣ်ယစုဒ်သိးယကဟ့ၣ်အီၤလၢစီၤအၤဘြၤဟၣ်,စီၤအံၤစဲး,ဒီးစီၤယၤကိာ်,ဒီးယကဟ့ၣ်လီၤအီၤလၢသုတၢ်န့ၢ်သါလီၤ.တၢ်လၢယၤအံၤယမ့ၢ်ယွၤလီၤ.
9 ဒီးစီၤမိၤရှ့ကတိၤတၢ်ဒီးပှၤအံၣ်စရ့လးဖိဒ်န့ၣ်,ဒီးအဝဲသ့ၣ်တဖၣ်န့ၢ်တကနၣ်ဘၣ်စီၤမိၤရှ့အကလုၢ်လၢအသူၣ်ကိၢ်အသးဂီၤအဃိ,ဒီးလၢကုၢ်အတၢ်မၤအဃိလီၤ.
10 ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်,
11 လဲၤနုာ်,စံးဘၣ်အဲၤကူပတူးအစီၤပၤဖၤရိၤလၢအဘၣ်ပျၢ်ကွံာ်ပှၤအံၣ်စရ့လးဖိလၢအကီၢ်ပူၤလီၤ.
12 ဒီးစီၤမိၤရှ့ကတိၤတၢ်လၢယွၤအမဲာ်ညါ,ဒီးစံးဝဲဒၣ်,ကွၢ်ကွၢ်,ပှၤအံၣ်စရ့လးဖိတကနၣ်ဘၣ်ယကလုၢ်ဘၣ်,ဒီးဖၤရိၤကကနၣ်ယကလုၢ်ဒ်လဲၣ်.ဒီးယဲဒၣ်အံၤယပျုၤတဘၣ်တၢ်ကူးတရံးဘၣ်.
13 ဒီးယွၤကတိၤတၢ်ဒီးစီၤမိၤရှ့ဒီးစီၤအၤဟရိၣ်,ဒီးမၤလိာ်အီၤ,လၢပှၤအံၣ်စရ့လးဖိအဂီၢ်,ဒီးလၢအဲၤကူပတူးအစီၤပၤဖၤရိၤအဂီၢ်,ဒ်သိးအကဒုးဟးထီၣ်ကွံာ်ပှၤအံၣ်စရ့လးဖိလၢအဲၤကူပတူးအပူၤန့ၣ်လီၤ.
14 အအံၤမ့ၢ်အဝဲသ့ၣ်အပၢ်အပှၤဟံၣ်ဖိအခိၣ်တဖၣ်,စီၤအံၣ်စရ့လးအဖိဝဲၢ်ကိစီၤရူၤဘ့ၣ်အဖိခွါတဖၣ်,စီၤဃနိာ်,စီၤပးလူ,ဒီးစီၤဃ့စရိၣ်,ဒီးစီၤကၢ်မံၤလီၤ.အဝဲသ့ၣ်တဖၣ်န့ၣ်မ့ၢ်စီၤရူၤဘ့ၣ်အဒူၣ်တဖၣ်လီၤ.
15 ဒီးစီၤစူၤမ့းအိၣ်အဖိခွါတဖၣ်,စီၤယမူးအ့လး,ဒီးစီၤယးမံၣ်,ဒီးစီၤအိၣ်ဟး,ဒီးစီၤယၤကံၣ်,ဒီးစီၤစိဃၢ်,ဒီးပှၤကနၤဧၣ်မုၣ်အဖိခွါစီၤၡီအူးလီၤ.အဝဲသ့ၣ်တဖၣ်န့ၣ်မ့ၢ်စီၤစူၤမ့းအိၣ်အဒူၣ်တဖၣ်လီၤ.
16 ဒီးအအံၤမ့ၢ်စီၤလ့ၤဝံအဖိခွါအမံၤဒ်အစၢၤအသွဲၣ်အသိးန့ၣ်,စီၤက့ရၡိၣ်,ဒီးစီၤကဃးဒီးစီၤမရၤရံၤလီၤ.ဒီးစီၤလ့ၤဝံအသးသမူအနံၣ်တဖၣ်န့ၣ်မ့ၢ်တကယၤသၢဆံနွံနံၣ်လီၤ.
17 ဒီးစီၤက့ရၡိၣ်အဖိခွါမ့ၢ်စီၤလံးဘနံၤဒီးစီၤၡံမံၤဒ်အဒူၣ်တဖၣ်အသိးန့ၣ်လီၤ.
18 ဒီးစီၤကဃးအဖိခွါမ့ၢ်စီၤဧၤမရၣ်,ဒီးစီၤယံးစဟၢ်,ဒီးစီၤဃ့တြိၣ်,ဒီးစီၤဧူးစံၤအ့လးလီၤ.ဒီးစီၤကဃးအသးသမူအနံၣ်တဖၣ်န့ၣ်မ့ၢ်တကယၤသၢဆံသၢနံၣ်လီၤ.
19 ဒီးစီၤမရၤရံၤအဖိခွါမ့ၢ်စီၤမးဃလံ,ဒီးစီၤမူၡံၤလီၤ.အဝဲသ့ၣ်တဖၣ်န့ၣ်မ့ၢ်စီၤလ့ၤဝံအဒူၣ်တဖၣ်ဒ်အစၢၤအသွဲၣ်အသိးန့ၣ်လီၤ.
20 ဒီးစီၤဧၤမရၣ်န့ၢ်မါလၢအပၢ်အဒီပုၢ်ဝဲၢ်မုၣ်နီၢ်ယိကဘ့ၣ်,ဒီးအဝဲဒၣ်ဆံးစၢ်န့ၢ်အီၤလၢစီၤအၤဟရိၣ်ဒီးစီၤမိၤရှ့လီၤ.ဒီးစီၤဧၤမရၣ်အသးသမူအနံၣ်တဖၣ်န့ၣ်မ့ၢ်တကယၤသၢဆံနွံနံၣ်လီၤ.
21 ဒီးစီၤယံးစဟၢ်အဖိခွါမ့ၢ်စီၤကိၤရးဒီးစီၤန့ဖ့းဒီးစီၤစံးကရံလီၤ.
22 ဒီးစီၤဧူးစံၤအ့လးအဖိခွါမ့ၢ်စီၤမံၤၡအ့လးဒီးစီၤအလံစဖၣ်ဒီးစီၤစံးသရံလီၤ.
23 ဒီးစီၤအၤဟရိၣ်န့ၢ်မါလၢစီၤနးၡိၣ်အဒီပုၢ်ဝဲၢ်မုၣ်စီၤဧးမံၤနဒးအဖိမုၣ်နီၢ်အ့းလံၤစါဘ့းလီၤ.ဒီးဆံးစၢ်န့ၢ်အီၤလၢစီၤနၤဒး,ဒီးစီၤအဘံဟူၤ,ဒီးစီၤအလၤဧစၢ်,ဒီးစီၤအံသမၢ်လီၤ.
24 ဒီးစီၤကိၤရးအဖိခွါမ့ၢ်စီၤအစံၢ်,ဒီးစီၤအ့လကါနၤ,ဒီးစီၤအဘံအစၤဖးလီၤ.အဝဲသ့ၣ်တဖၣ်န့ၣ်မ့ၢ်ပှၤကိၤရးဖိအဒူၣ်တဖၣ်လီၤ.
25 ဒီးစီၤအၤဟရိၣ်အဖိခွါစီၤအလၤဧစၢ်န့ၣ်န့ၢ်မါလၢစီၤပူတံၤအ့ၤလးအဖိမုၣ်တဂၤ,ဒီးအဝဲဒၣ်ဆံးစၢ်န့ၢ်အီၤလၢစီၤဖံနဃၣ်လီၤ.အဝဲသ့ၣ်တဖၣ်န့ၣ်မ့ၢ်ပှၤလ့ၤဝံဖိအပၢ်အခိၣ်တဖၣ်,ဒ်အဒူၣ်တဖၣ်အသိးန့ၣ်လီၤ.
26 အဝဲသ့ၣ်န့ၣ်မ့ၢ်စီၤအၤဟရိၣ်,ဒီးစီၤမိၤရှ့,လၢယွၤစံးဘၣ်အီၤ,ဒုးဟးထီၣ်ကွံာ်ပှၤအံၣ်စရ့လးဖိလၢကီၢ်အဲၤကူပတူးအပူၤ,ဒ်အသုးမုၢ်တဖၣ်အသိးန့ၣ်လီၤ.
27 အဝဲသ့ၣ်တဖၣ်န့ၣ်မ့ၢ်ပှၤလၢအကတိၤတၢ်ဒီးအဲၤကူပတူးအစီၤပၤဖၤရိၤဒ်သိးအကဒုးဟးထီၣ်ကွံာ်ပှၤအံၣ်စရ့လးဖိလၢအဲၤကူပတူးန့ၣ်လီၤ.အဝဲသ့ၣ်မ့ၢ်စီၤမိၤရှ့ဒီးစီၤအၤဟရိၣ်န့ၣ်လီၤ.
28 ဒီးတၢ်မၤအသးလၢမုၢ်တနံၤလၢယွၤကတိၤတၢ်ဒီးစီၤမိၤရှ့လၢကီၢ်အဲၤကူပတူးအပူၤ,
29 ယွၤကတိၤတၢ်ဒီးစီၤမိၤရှ့ဒီးစံးဝဲဒၣ်,တၢ်လၢယၤအံၤယမ့ၢ်ယွၤလီၤ.တၢ်လၢယစံးဘၣ်နၤတမံၤလၢ်လၢ်န့ၣ်စံၣ်တဲၤတဲလီၤအဲၤကူပတူးအစီၤပၤဖၤရိၤတက့ၢ်.
30 ဒီးစီၤမိၤရှ့စံးဝဲလၢယွၤအမဲာ်ညါ,ကွၢ်ကွၢ်,ယဲဒၣ်အံၤယပျုၤတဘၣ်တၢ်ကူးတရံးဘၣ်,ဒီးဖၤရိၤကကနၣ်ယကလုၢ်ဒ်လဲၣ်.