Proverbs 23
1 တုၤနဆ့ၣ်နီၤအီၣ်တၢ်ဒီးပဒိၣ်ဖးဒိၣ်ဒီး,ဆိကမိၣ်တၢ်အိၣ်လၢနမဲာ်ညါအဂ့ၢ်အကျိၤလီၤတံၢ်လီၤဆဲး,
2 ဒီးနမ့မ့ၢ်ပှၤလၢအအီၣ်တၢ်ဆူၣ်ဒီး,ပာ်ဒီလၢနကိာ်လိၤတက့ၢ်.
3 ဆၢန့ၢ်ဘၣ်အတၢ်ဝံၣ်တဂ့ၤ.အဂ့ၢ်ဒ်အံၤ,မ့ၢ်တၢ်အီၣ်လီတၢ်လီၤ.
4 မၤတၢ်ဆူၣ်ဒ်သိးနကထူးထီၣ်တီၤထီၣ်တဂ့ၤ.သန့ၤနသးလၢနတၢ်ကူၣ်တၢ်ဆးဒၣ်နဲတဂ့ၤ.
5 နကဒုးယူၤနမဲာ်ဆူတၢ်လၢအတမ့ၢ်ဘၣ်တၢ်ဘၣ်အအိၣ်စ့ၢ်ကီးဧါ.အဂ့ၢ်ဒ်အံၤတၢ်ထူးတၢ်တီၤန့ၣ်မၤအဒံးဆ့လၢအဂီၢ်ဒၣ်ဝဲ,ဒီးယူၤထီၣ်ကွံာ်ဝဲဆူမူခိၣ်,ဒ်လံာ်ဧိၤတြၤဧိၤအသိးန့ၣ်လီၤ.
6 အီၣ်ပှၤအတၢ်အီၣ်လၢအကူၣ်တၢ်အၢန့ၣ်တဂ့ၤ.ဒီးဆၢန့ၢ်အတၢ်အီၣ်ဝံၣ်န့ၣ်တဂ့ၤ.
7 အဂ့ၢ်ဒ်အံၤ,ဒ်အဆိကမိၣ်တၢ်လၢအသးကံၢ်ပူၤအသိးန့ၣ်အကစၢ်ဒၣ်ဝဲမ့ၢ်တၢ်ဒ်န့ၣ်သိးလီၤ.အီၣ်တၢ်အီတၢ်တက့ၢ်န့ၣ်,စံးနၤဘၣ်ဆၣ်ဒီး,အသးတအိၣ်ဘၣ်ဒီးနၤဘၣ်.
8 တၢ်လၢနအီၣ်န့ၣ်နကဘှိးထီၣ်,ဒီးနတၢ်ကတိၤမုာ်န့ၣ်ကဟါမၢ်လီၤ.
9 ကတိၤတၢ်လၢပှၤဟးဂီၤဖိအနၢ်ပူၤတဂ့ၤ.အဂ့ၢ်ဒ်အံၤ,တပးကဲဘၣ်နတၢ်ကတိၤအတၢ်ကူၣ်သ့ဘၣ်.
10 သုးကီၢ်အဃၢၤအပနီၣ်လၢအအိၣ်လၢပျၢၤတဂ့ၤ.ဒီးလဲၤနုာ်လၢပှၤဖိၣ်ဃဲအဟီၣ်ခိၣ်အကဝီၤပူၤတဂ့ၤ.
11 အဂ့ၢ်ဒ်အံၤ,ပှၤလၢအပှ့ၤက့ၤအီၤန့ၣ်မ့ၢ်ပှၤအဆူၣ်,ဒီးကလိာ်ကွီၢ်ဒီးနၤလီၤ.
12 ပာ်နသးလၢတၢ်သိၣ်လိတၢ်,ဒီးဒိးနနၢ်လၢတၢ်သ့ၣ်ညါအတၢ်ကတိၤန့ၣ်တက့ၢ်.
13 တြီတၢ်သိၣ်ဃီၣ်လၢဖိသၣ်တဂ့ၤ.အဂ့ၢ်ဒ်အံၤ,နမ့ၢ်တီၢ်အီၤလၢနီၣ်တီၢ်န့ၣ်ဘၣ်ဆၣ်ဒီး,တသံဘၣ်ဝဲဘၣ်.
14 တီၢ်အီၤလၢနီၣ်တီၢ်တက့ၢ်,ဒီးနကမၤပူၤမၤဖျဲးအသးလၢပျုၤပူၤလီၤ.
15 ယဖိခွါဧၢ,နသးမ့ၢ်ကူၣ်တၢ်သ့ဒီး,ယသးကခုယဲဒၣ်လီၤ.
16 တုၤနပျုၤကတိၤတၢ်ဘၣ်ဒီး,ယသူၣ်ကခုယသးကခုလီၤ.
17 မ်နသးအသုတသးကါပှၤတၢ်ဒဲးဘးဖိတဂ့ၤ.မ့မ့ၢ်အိၣ်လၢတၢ်ပျံၤယွၤအပူၤသ့တနံၤကျၢၤတက့ၢ်.
18 အဂ့ၢ်ဒ်အံၤ,တၢ်အကတၢၢ်အိၣ်မးဝဲ,ဒီးနမုၢ်လၢ်တၢ်န့ၣ်တဘၣ်တၢ်ဒီၣ်တဲာ်ကွံာ်အီၤဘၣ်.
19 ယဖိခွါဧၢ,ကနၣ်တၢ်,ဒီးကူၣ်တၢ်သ့,ဒီးဒုးလဲၤလိၤနသးလၢကျဲပူၤတက့ၢ်.
20 အိၣ်လၢပှၤအီလုၣ်ကိစပံးထံအကျါ,လၢပှၤအီၣ်ဆူၣ်တၢ်ညၣ်အကျါတဂ့ၤ.
21 အဂ့ၢ်ဒ်အံၤ,ပှၤအီမူၤအသး,ဒီးပှၤအီၣ်လုၣ်ကိတၢ်န့ၣ်ကဘၣ်တၢ်ဖှီၣ်တၢ်ယာ်လီၤ.ဒီးတၢ်ကၢၣ်အတၢ်မံခ့န့ၣ်ကဒုးကူဒုးသိးလၢတၢ်ယာ်တၢ်ဖျ့လီၤ.
22 ကနၣ်နပၢ်လၢအထီၣ်ဖိနၤအကလုၢ်တက့ၢ်.ဒီးတုၤနမိၢ်သးပှၢ်ဒီး,မၤတရီတပါအီၤတဂ့ၤ.
23 ပှ့ၤတၢ်မ့ၢ်တၢ်တီတက့ၢ်,ဒီးဆါကွံာ်အီၤတဂ့ၤ.ဒီးတၢ်ကူၣ်သ့,ဒီးတၢ်သိၣ်လိ,ဒီးတၢ်ကူၣ်တၢ်ဆးန့ၣ်တက့ၢ်.
24 ပှၤအတီအလိၤတဂၤအပၢ်န့ၣ်ကသူၣ်ဖှံသးညီဒိၣ်နီၢ်မးလီၤ.ဒီးပှၤလၢအထီၣ်ဖိပှၤကူၣ်တၢ်သ့န့ၣ်ကသးခုလၢအဃိလီၤ.
25 မ်နမိၢ်ဒီးနပၢ်သးခု,ဒီးပှၤလၢအဆံးစၢ်နၤန့ၣ်သူၣ်ဖှံသးညီတက့ၢ်.
26 ယဖိခွါဧၢ,ဟ့ၣ်ယၤလၢနသးတက့ၢ်.ဒီးမ်ယကျဲဘၣ်နမဲာ်တက့ၢ်.
27 အဂ့ၢ်ဒ်အံၤ,ပှၤဃဲသဲမုၣ်မ့ၢ်တၢ်ပူၤယိာ်,ဒီးပိာ်မုၣ်ဟးဂီၤန့ၣ်မ့ၢ်တၢ်ပူၤအံၣ်လီၤ.
28 အဝဲဒၣ်ခိးတၢ်ခူသူၣ်ဒ်တမျိၤတမျာ်အသိးန့ၣ်,ဒီးမၤအါထီၣ်ပှၤလီတၢ်ဖိလၢပှၤကညီအကျါလီၤ.
29 မ့ၢ်မတၤအိၣ်ဝဲဒီးတၢ်နးတၢ်ဖှီၣ်တဂၤလဲၣ်.မ့ၢ်မတၤအိၣ်ဝဲဒီးတၢ်သးအုးတဂၤလဲၣ်.မ့ၢ်မတၤအိၣ်ဝဲဒီးတၢ်အ့ၣ်လိာ်ဆိးက့လိာ်တဂၤလဲၣ်.မ့ၢ်မတၤအိၣ်ဝဲဒီးတၢ်သူၣ်ကိၢ်သးဂီၤတဂၤလဲၣ်.မ့ၢ်မတၤအဂ့ၢ်တအိၣ်ဘၣ်ဒီးအိၣ်ဝဲဒီးအပူၤလီၢ်န့ၣ်တဂၤလဲၣ်.မ့ၢ်မတၤအိၣ်ဝဲဒီးအမဲာ်ဂီၤတဂၤလဲၣ်.
30 ပှၤလၢအအိၣ်ယံာ်လၢစပံးထံအဃၢၤ,လၢအဃုစပံးထံလၢအဃါဃုာ်အသးတဖၣ်န့ၣ်လီၤ.
31 တုၤစပံးထံဂီၤထီၣ်,တုၤအဟ့ၣ်အက့ၢ်အဂီၤလၢလီခီပူၤ,တုၤအဂဲၤအသးဖဲအဘၣ်ဒီး,ကွၢ်အီၤတဂ့ၤ.
32 လၢခံကတၢၢ်န့ၣ်ကအ့ၣ်တၢ်ဒ်ဂုၢ်အသိး,ဒီးဖျးတၢ်ဒ်ဂုၢ်ပွ့အသိးန့ၣ်လီၤ.
33 နမဲာ်ကထံၣ်တၢ်လီၤဆီဒီးလီတၢ်ကထီၣ်ဖျဲးလၢနထးခိၣ်လီၤ.
34 ဒီးနကမၤသးဒ်ပှၤလၢအမံလီၤလၢပီၣ်လဲၣ်အသးကံၢ်ပူၤအသိးန့ၣ်,ဒီးဒ်ပှၤလၢအမံလီၤလၢယၢ်ထူၣ်အစိးခံအသိးန့ၣ်လီၤ.
35 စံးဝဲ,ပှၤကျီယၤ,ဒီးယတဆါဘၣ်.ပှၤတီၢ်ယၤ,ဒီးယတသ့ၣ်ညါဘၣ်.ယကဖုသံနီၣ်ထီၣ်အကတီၢ်ဖဲလဲၣ်.ယကဃုကဒီးအီၤလီၤ.