Library · ksw

Proverbs 29

1 ပှၤလၢအဘၣ်တၢ်သိၣ်ဃီၣ်အီၤအါဘျီဒီးပာ်ဆူၣ်အကိာ်န့ၣ်တၢ်ကမၤဟးဂီၤအီၤသတူၢ်ကလာ်,ဒီးတၢ်မၤဘျါက့ၤအီၤတအိၣ်ဘၣ်.

2 တုၤပှၤတီပှၤလိၤအါထီၣ်ဒီး,ပှၤဂီၢ်မုၢ်သူၣ်ခုသးခုလီၤ.မ့မ့ၢ်တုၤပှၤအၢတဂၤပၢတၢ်ဒီး,ပှၤဂီၢ်မုၢ်သူၣ်အုးသးအုးလီၤ.

3 ပှၤလၢအအဲၣ်တၢ်ကူၣ်သ့န့ၣ်မၤသးခုအပၢ်လီၤ.မ့မ့ၢ်ပှၤလၢအဒီတံၤဒီသကိးဒီးပှၤဃဲသဲမုၣ်န့ၣ်လၢာ်ဝီၤအစုလီၢ်အခီၣ်ခိၣ်လီၤ.

4 စီၤပၤဒုးအိၣ်ဂၢၢ်ဆိးကျၢၤထံဧိၤကီၢ်ဧိၤလၢတၢ်စံၣ်ညီၣ်တီလီၤ.မ့မ့ၢ်ပှၤလၢအဒိးန့ၢ်ခိၣ်ဖးန့ၣ်ကမၤဟးဂီၤအီၤလီၤ.

5 ပှၤလၢအကတိၤလွဲပှၤလၢအဃၢၤန့ၣ်ဒါလီၤပျံၤသကွီၤလၢအခီၣ်အဂီၢ်လီၤ.

6 ပှၤအၢအလီၤကမၣ်တၢ်န့ၣ်အိၣ်ဝဲဒီးပျံၤသကွီၤလီၤ.မ့မ့ၢ်ပှၤတီပှၤလိၤန့ၣ်သးဝံၣ်တၢ်ဒီးသူၣ်ခုသးခုလီၤ.

7 ပှၤတီပှၤလိၤန့ၣ်ပးကဲပှၤဖှီၣ်ဖိယာ်ဖိအကွီၢ်လီၤ.မ့မ့ၢ်ပှၤတတီတလိၤဘၣ်န့ၣ်အနၢ်တပၢၢ်ဘၣ်တၢ်သ့ၣ်ညါဘၣ်.

8 ပှၤမၤတရီတပါတၢ်န့ၣ်ဒုးကဲၤထီၣ်မ့ၣ်လၣ်လၢဝ့ၢ်ပူၤလီၤ.မ့မ့ၢ်ပှၤကူၣ်တၢ်သ့န့ၣ်ဒုးဃၣ်ကွံာ်တၢ်သးထီၣ်လီၤ.

9 ပှၤကူၣ်တၢ်သ့ကလိာ်ကွီၢ်ဒီးပှၤဟးဂီၤဖိ,ဒီးသးထီၣ်မ့ၢ်ဂ့ၤ,နံၤမ့ၢ်ဂ့ၤ,တၢ်အိၣ်ဘှံးတအိၣ်ဘၣ်.

10 ပှၤဘၣ်ဃးဒီးတၢ်သွံၣ်န့ၣ်သးဟ့ပှၤအလၢအပှဲၤလီၤ.မ့မ့ၢ်ပှၤအတီအလိၤန့ၣ်ဃုဒုးမူအီၤလီၤ.

11 ပှၤဟးဂီၤဖိလီၣ်ဖျါထီၣ်အသးထီၣ်ခဲလၢာ်လီၤ.မ့မ့ၢ်ပှၤကူၣ်တၢ်သ့န့ၣ်မၤစၢ်လီၤဝဲလၢအလီၢ်ခံန့ၣ်လီၤ.

12 ပှၤပၢတၢ်မ့ၢ်ကနၣ်တၢ်ကတိၤကဘျံးကဘျၣ်ဒီး,အခ့အပှၤမ့ၢ်ပှၤတတီတလိၤခဲလၢာ်လီၤ.

13 ပှၤဖှီၣ်ဖိဒီးပှၤမၤအၢမၤနးတၢ်သဂၢၢ်လိာ်အသးလီၤ.ယွၤဒုးကပီၤထီၣ်အမဲာ်ခံဂၤလၢာ်လီၤ.

14 စီၤပၤလၢအစံၣ်ညီၣ်ပှၤဖှီၣ်ဖိတီတီလိၤလိၤန့ၣ်အလီၢ်ပစိာ်ကအိၣ်ဂၢၢ်ဆိးကျၢၤလီၤထူလီၤယိာ်လီၤ.

15 နီၣ်တီၢ်ဒီးတၢ်သိၣ်ဃီၣ်န့ၣ်ဟ့ၣ်လီၤတၢ်ကူၣ်သ့လီၤ.မ့မ့ၢ်ဖိသၣ်အိၣ်ဒၣ်တၢ်န့ၣ်ကဒုးမဲာ်ဆှးအမိၢ်လီၤ.

16 တုၤပှၤတတီတလိၤဘၣ်န့ၣ်အါထီၣ်ဒီး,တၢ်ကမၣ်အါထီၣ်လီၤ.မ့မ့ၢ်ပှၤတီပှၤလိၤကထံၣ်ဘၣ်အတၢ်လီၤဃံၤန့ၣ်လီၤ.

17 သိၣ်ဃီၣ်နဖိခွါတက့ၢ်,ဒီးကဒုးအိၣ်ဘှံးနၤ,မ့ၢ်မးကမၤမုာ်ထီၣ်က့ၤနသးလီၤ.

18 ဖဲတၢ်ထံၣ်တၢ်တအိၣ်ဘၣ်န့ၣ်ပှၤဂီၢ်မုၢ်တဘၣ်တၢ်တြီအီၤဘၣ်.မ့မ့ၢ်ပှၤလၢအတိၢ်န့ၢ်တၢ်သိၣ်တၢ်သီန့ၣ်ဘၣ်တၢ်အမုာ်လီၤ.

19 တၢ်အခ့အပှၤတဒိးန့ၢ်ဘၣ်တၢ်သိၣ်ဃီၣ်လၢတၢ်ကတိၤဘၣ်.အဂ့ၢ်ဒ်အံၤ,မ့ၢ်နၢ်ပၢၢ်ဘၣ်ဆၣ်ဒီး,တစံးဆၢဘၣ်ဝဲဘၣ်.

20 နထံၣ်ဘၣ်ပှၤလၢအကတိၤတၢ်ချ့ချ့စ့ၢ်ကီးဧါ.ပမုၢ်လၢ်တၢ်လၢပှၤဟးဂီၤဖိအဂီၢ်အါန့ၢ်အီၤတက့ၢ်လီၤ.

21 ပှၤလၢအလုၢ်အီၣ်အခ့အပှၤမုာ်မုာ်လၢအဖိသၣ်လံၤလံၤန့ၣ်လၢခံက့ၤကကဲထီၣ်အဖိခွါလီၤ.

22 ပှၤသးထီၣ်န့ၣ်ထိၣ်ဂဲၤတၢ်အ့ၣ်လိာ်ဆိးက့လိာ်,ဒီးပှၤလၢအသးကဲၤထီၣ်န့ၣ်အတၢ်ကမၣ်အိၣ်အါမးလီၤ.

23 ပှၤကညီအပာ်ထီၣ်ထီအသးန့ၣ်ကဒုးဆီၣ်လီၤအီၤလီၤ.မ့မ့ၢ်ပှၤလၢအဆီၣ်လီၤအသးန့ၣ်ကဘၣ်တၢ်လၤကပီၤလီၤ.

24 ပှၤလၢအဒီတံၤဒီသကိးဒီးပှၤဟုၣ်တၢ်ဖိန့ၣ်သးဟ့အသးဒၣ်ဝဲလီၤ.နၢ်ဟူဝဲတၢ်ဆိၣ်အၢန့ၣ်,ဒီးတလီၣ်ဖျါဘၣ်တၢ်ဘၣ်.

25 တၢ်ပျံၤပှၤကညီန့ၣ်ဟဲစိာ်ပျံၤသကွီၤလီၤ.မ့မ့ၢ်ပှၤလၢအသန့ၤအသးလၢယွၤန့ၣ်ကအိၣ်ခၢၣ်သနၢၢ်လီၤ.

26 ပှၤအါဂၤဃုဘၣ်ပှၤပၢတၢ်အမဲာ်ဘၣ်ဆၣ်ဒီး,ပှၤကညီအတၢ်စံၣ်ညီၣ်န့ၣ်ဟဲဝဲလၢယွၤလီၤ.

27 ပှၤအၢပှၤသီန့ၣ်မ့ၢ်တၢ်သးဘၣ်အၢလၢပှၤတီပှၤလိၤအဂီၢ်လီၤ.ဒီးပှၤလၢအလိၤဝဲလၢကျဲန့ၣ်မ့ၢ်တၢ်သးဘၣ်အၢလၢပှၤတတီတလိၤဘၣ်အဂီၢ်လီၤ.