Proverbs 6
1 ယဖိခွါဧၢ,နမ့ၢ်အုၣ်ကီၤနသးလၢနတံၤနသကိးအဂီၢ်,နမ့ၢ်ဟံးန့ၢ်ပှၤအစုလၢပှၤဂၤအဂီၢ်ဒီး,
2 နမ့ၢ်ဘၣ်တ့ၢ်တၢ်လၢပျံၤသကွီၤလၢနထးခိၣ်အတၢ်ကတိၤ,နမ့ၢ်ဘၣ်တၢ်ဖီၣ်န့ၢ်နၤလၢနထးခိၣ်အကလုၢ်ဒီး,
3 ယဖိခွါဧၢ,မၤတၢ်အံၤ,ဒီးမၤပူၤမၤဖျဲးနသးတက့ၢ်.အဂ့ၢ်ဒ်အံၤ,နလီၤဘၣ်လံလၢနတံၤနသကိးအစုပူၤလံ,ဒီးလဲၤဆီၣ်လီၤနသး,ဒီးသဆၣ်ထီၣ်နတံၤနသကိးအခံတက့ၢ်,
4 ဟ့ၣ်မံနမဲာ်တဂ့ၤ,ဟ့ၣ်မံခ့နမဲာ်ဖံးတဂ့ၤ.
5 မၤပူၤမၤဖျဲးနသးဒ်တၤဟိစဘံလၢပှၤအစုပူၤအသိးန့ၣ်,ဒီးဒ်ထိၣ်တဘ့ၣ်လၢပှၤဖီၣ်န့ၢ်ထိၣ်အစုပူၤအသိးန့ၣ်တက့ၢ်.
6 ပှၤကၢၣ်ဖိဧၢ,လဲၤဆူတၢၢ်ဧိၤတြၤဧိၤအအိၣ်,ကွၢ်ဆိအကမိၣ်အကျဲဒီးကူၣ်တၢ်သ့တက့ၢ်.
7 အဝဲဒၣ်န့ၣ်အပဒိၣ်တအိၣ်,အပှၤကွၢ်အီၤတအိၣ်,အပှၤပၢၤအီၤတအိၣ်ဘၣ်လီၤ.
8 လၢတၢ်ကိၢ်အကတီၢ်န့ၣ်ကတဲာ်ကတီၤအတၢ်အီၣ်,ဒီးလၢကူးဘုအကတီၢ်န့ၣ်ထၢဖှိၣ်အတၢ်အီၣ်တၢ်အီလီၤ.
9 ပှၤကၢၣ်ဖိဧၢ,နကမံဆံးယံာ်လဲၣ်,နကဖုသံနီၣ်လၢနမံန့ၣ်အကတီၢ်ဖဲလဲၣ်.
10 မံတစဲးစဲး,မံခ့တစဲးစဲး,ချံးလီၤစုတစဲးစဲးဒ်သိးနကမံလီၤလီၤ.
11 နတၢ်ဖှီၣ်တၢ်ယာ်ကဟဲဒ်တမျိၤတမျာ်လၢကျဲပူၤအသိး,ဒီးနတၢ်ဖှီၣ်တၢ်နးဒ်ပှၤအိၣ်ဒီးအစုကဝဲၤအသိးန့ၣ်လီၤ.
12 ပှၤတဂိာ်တသီၣ်ဘၣ်ပှၤအၢပှၤသီန့ၣ်လဲၤဝဲဒီးထးခိၣ်လီတၢ်လီၤ.
13 ဖျးအမဲာ်,ကတိၤတၢ်လၢအခီၣ်,ဒုးနဲၣ်တၢ်လၢအစုမုၢ်စုနၢလီၤ.
14 လီတၢ်ဝ့ၤတၢ်အိၣ်ဝဲလၢအသးကံၢ်ပူၤ,ကူၣ်ဝဲလၢတၢ်မၤအၢတထံၣ်ဃီ,ထိၣ်အ့ၣ်လိာ်ဆိးက့လိာ်တၢ်လီၤ.
15 မၤသးဒ်န့ၣ်ဒီးအတၢ်နးတၢ်ဖှီၣ်ကဟဲဘၣ်အီၤသတူၢ်ကလာ်,ကဟးဂီၤသပြူၤကလာ်,ဒီးတၢ်မၤဘျါက့ၤအီၤတအိၣ်ဘၣ်.
16 တၢ်ဃုမံၤယွၤသးဟ့အီၤ,ဒီးနွံမံၤအသးဘၣ်အၢအီၤလီၤ.
17 ပှၤအမဲာ်အိၣ်ထီၣ်ထီ,ပှၤအပျ့ၤလၢအကတိၤတၢ်ကဘျံးကဘျၣ်,ဒီးပှၤအစုလၢအလူလီၤတၢ်သွံၣ်လၢအတၢ်ဒဲးဘးတအိၣ်ဘၣ်,
18 ပှၤအသးလၢအကူၣ်တၢ်တိာ်အၢ,ပှၤအခီၣ်လၢအဃ့ၢ်တၢ်ချ့ဆူတၢ်အၢအအိၣ်,
19 ပှၤအုၣ်အသးတတီဘၣ်လၢအကတိၤတၢ်ကဘျံးကဘျၣ်,ဒီးပှၤလၢအထိၣ်အ့ၣ်လိာ်ဆိးက့လိာ်တၢ်လၢဒီပုၢ်ဝဲၢ်အကျါလီၤ.
20 ယဖိခွါဧၢ,တိၢ်န့ၢ်နပၢ်အတၢ်မၤလိာ်တက့ၢ်,ဒီးဟးသဒၣ်နမိၢ်အတၢ်သိၣ်တဂ့ၤ.
21 စၢထီၣ်အီၤလၢနသးအလိၤတထံၣ်ဃီ,စၢထီၣ်အီၤလၢနကိာ်လိၤတက့ၢ်.
22 တုၤနလဲၤတၢ်ဒီး,ကဆှၢနၤ,တုၤနမံလီၤဒီး,ကပၢၤနၤ,ဒီးတုၤနဖုသံနီၣ်ထီၣ်ဒီး,ကကတိၤတၢ်ဒီးနၤလီၤ.
23 အဂ့ၢ်ဒ်အံၤ,တၢ်မၤလိာ်န့ၣ်မ့ၢ်မ့ၣ်အူဒၢ,ဒီးတၢ်သိၣ်န့ၣ်မ့ၢ်တၢ်ကပီၤ,ဒီးတၢ်သိၣ်ဃီၣ်အတၢ်သိၣ်က့ၤသီက့ၤန့ၣ်မ့ၢ်တၢ်မူအကျဲလီၤ.
24 အဝဲသ့ၣ်ကတြီနၤလၢပိာ်မုၣ်အအၢ,ပိာ်မုၣ်ဟးဂီၤလၢအလွဲတၢ်လၢအပျ့ၤလီၤ.
25 သးကွံအက့ၢ်ဘၣ်အဂီၤဂ့ၤလၢနသးကံၢ်ပူၤတဂ့ၤ.ဒီးဒုးဖီၣ်န့ၢ်အမဲာ်ဖံးလၢနၤတဂ့ၤ.
26 အဂ့ၢ်ဒ်အံၤ,ပှၤဖှီၣ်လီၤလၢဃဲသဲမုၣ်အဃိန့ၣ်အတၢ်အိၣ်တ့ၢ်ထဲကိၣ်တလိၣ်,ဒီးပှၤအဲၣ်ဘၢဝၤဃုပှၤအသးသမူလၢအပှ့ၤဒိၣ်န့ၣ်လီၤ.
27 ပှၤမ့ၢ်ပာ်မ့ၣ်အူလၢအသးနါပှၢ်ဒီး,အကူအသိးတကဲၤထီၣ်ဘၣ်ဧါ.
28 ပှၤမ့ၢ်လဲၤတၢ်လၢမ့ၣ်အူကဖးအဖီခိၣ်ဒီး,အခီၣ်တကိၢ်ဃိာ်ဘၣ်ဧါ.
29 တၢ်မၤအသးဒ်န့ၣ်လၢကယဲၢ်ပှၤလၢအလဲၤနုာ်ဆူပှၤဂၤအမါအအိၣ်တဂၤလၢ်လၢ်န့ၣ်လီၤ.ကယဲၢ်ပှၤလၢအထိးဘၣ်အီၤန့ၣ်ကတူၢ်ဘၣ်တၢ်ဒဲးဘးကိးဂၤဒဲးလီၤ.
30 ပှၤဟုၣ်တၢ်ဘျၣ်တၢ်န့ၣ်တုၤတၢ်သၣ်ဝံၤအသးဒီး,မ့ၢ်ဟုၣ်တၢ်ဒ်သိးအသးကဘျဲးအီၣ်ဒီး,ပှၤတကွၢ်ကပာ်ဘၣ်အီၤဘၣ်.
31 ဘၣ်ဆၣ်ဒီးပှၤမ့ၢ်ထံၣ်န့ၢ်အီၤဒီး,ဘၣ်ဟ့ၣ်ကၣ်တၢ်အလီၢ်နွံစး,ဘၣ်ဟ့ၣ်အဟံၣ်အတၢ်ဖိတၢ်လံၤခဲလၢာ်လီၤ.
32 ပှၤလၢအမၤကမၣ်ပှၤမါန့ၣ်အသးဆးတအိၣ်ဘၣ်.ပှၤလၢအမၤတၢ်တမံၤန့ၣ်မ့ၢ်အမၤသံလီၤအသးဒၣ်ဝဲန့ၣ်လီၤ.
33 ကထံၣ်န့ၢ်တၢ်တီၢ်အလီၢ်တဖၣ်,ဒီးတၢ်မဲာ်ဆှး,ဒီးအတၢ်ဒုၣ်ဒွဲၣ်န့ၣ်တဘၣ်တၢ်တြူာ်ကွံာ်အီၤဘၣ်.
34 အဂ့ၢ်ဒ်အံၤ,တၢ်သးက့ၣ်ဒုးကဲထီၣ်ပှၤကညီအသးထီၣ်,ဒီးတသးလီဘၣ်လၢမၤဆၢတၢ်အမုၢ်နံၤဘၣ်.
35 တကွၢ်ပးကဲဘၣ်တၢ်လိးလၢစ့ဘၣ်,ဒီးနမ့ၢ်ဟ့ၣ်ခိၣ်ဖးအါဘၣ်ဆၣ်ဒီး,တမံသူၣ်တမံသးဘၣ်ဝဲဘၣ်.