Library · ksw

Song of Songs 1

1 တၢ်သးဝံၣ်တဖၣ်အတၢ်သးဝံၣ်လၢအမ့ၢ်စီၤၡလိၤမိၤအတၢ်လီၤ.

2 မ်အနၢမူယၤလၢအထးခိၣ်အတၢ်နၢမူတဖၣ်တက့ၢ်.အဂ့ၢ်ဒ်အံၤ,နတၢ်အဲၣ်န့ၣ်ဂ့ၤန့ၢ်စပံးထံတက့ၢ်လီၤ.

3 မ့ၢ်နသိဂ့ၤအနၢမူအဃိန့ၣ်ဒီး,နမံၤမၤသးဒ်သိနၢမူလူလီၤအသးအသိးလီၤ.မၤသးဒ်န့ၣ်ဒီးပှၤမုၣ်ကနီၤအဲၣ်နၤလီၤ.

4 မိၤယၤတက့ၢ်,ဒီးပကဃ့ၢ်ပိာ်နခံလီၤ.စီၤပၤဆှၢလံယၤဆူအဒၢးပူၤလံ,ပကသူၣ်ဖှံသးညီ,ဒီးသူၣ်ခုသးခုလၢနပူၤလီၤ.ပကစံးထီၣ်ပတြၢၤနတၢ်အဲၣ်အါန့ၢ်စပံးထံတက့ၢ်လီၤ.ပှၤအတီအလိၤတဖၣ်အဲၣ်နၤလီၤ.

5 ယသူဘၣ်ဆၣ်ဒီးယဃံယလၤ,ယရူၤၡလ့ၣ်အဖိမုၣ်သ့ၣ်ဧၢ,

6 ဒ်က့ဒၢ်အဒဲအသိးန့ၣ်,ဒ်စီၤၡလိၤမိၤအယၣ်သဒၢတၢ်အသိးန့ၣ်လီၤ.မ့ၢ်ယသူ,မ့ၢ်မုၢ်ကွၢ်ဘၣ်ယၤဒီး,ကွၢ်ယၤတဂ့ၤ.ယမိၢ်အဖိခွါတဖၣ်သးထီၣ်ယၤ,ပာ်ယၤလၢပှၤပၢၤစပံးအလီၢ်လီၤ.ယစပံးအလီၢ်ဒၣ်ယဲယတပၢၤဘၣ်.

7 ပှၤလၢယသးအဲၣ်အီၤတဂၤဧၢ,ဖဲနဒုးအီၣ်နသိတဖုအဆၣ်,ဖဲနဒုးအိၣ်ဘှံးအီၤလၢမုၢ်ထူၣ်န့ၣ်စံးဘၣ်ယၤတက့ၢ်.အဂ့ၢ်ဒ်အံၤ,ယကမၤသးဒ်ပှၤလၢအအိၣ်ဒီးနီၣ်ကျၢၢ်ဘၢမဲာ်လၢနတံၤနသကိးအသိအဖုတဖၣ်အဃၢၤမ့ၢ်အဘၣ်မနုၤလဲၣ်.

8 ပိာ်မုၣ်လၢအဃံကတၢၢ်အလၤကတၢၢ်တဂၤဧၢ,နမ့ၢ်တသ့ၣ်ညါဘၣ်ဒီး,လဲၤပိာ်ကျဲလၢသိမဲာ်တဲးလဲးအခီၣ်လီၢ်,ဒီးဒုးအီၣ်နမဲာ်တဲးလဲးဖိအဆၣ်လၢပှၤကွၢ်သိအဒဲဃၢၤန့ၣ်တက့ၢ်.

9 ယပှၤသးဘိဧၢ,ယဒိလီၤနၤဒီးကသ့ၣ်တဖၣ်လၢဖၤရိၤအလ့ၣ်ကဟၣ်အပူၤလီၤ.

10 နဘိးတဖၣ်ဃံဝဲလၤဝဲဒီးတၢ်ကယၢကယဲ,နကိာ်အိၣ်ဒီးဖဲတၢ်မျၢ်တဝီလီၤ.

11 ပကတ့န့ၢ်နၤလၢသွဲထူအိၣ်ဒီးတၢ်အဖျၢၣ်စ့တဖၣ်လီၤ.

12 စီၤပၤအိၣ်ဝဲလၢစီၢ်နီၤခိၣ်အဖၢမုၢ်ဒီး,ယတၢ်နၢမူနၢ်ဒး,နၢမူဒၣ်တၢ်လီၤ.

13 ပှၤလၢယအဲၣ်အီၤတဂၤမ့ၢ်မူရၣ်တဘိၣ်လၢယဂီၢ်လီၤ.ကအိၣ်ကဆိးဝဲလၢယနုၢ်အကဆူးပူၤလီၤ.

14 ပှၤလၢယအဲၣ်အီၤတဂၤန့ၣ်မ့ၢ်သ့ၣ်ဂီၤစုမ့ၣ်အဖီတဖိးလၢတၤသၣ်အလီၢ်ဧ့ၣ်က့ဒံၤလၢယဂီၢ်လီၤ.

15 ကွၢ်ကွၢ်,ယပှၤသးဘိဧၢ,နဃံနလၤ,ကွၢ်ကွၢ်,နဃံနလၤ,နအိၣ်ဒီးထိၣ်လွံၢ်အမဲာ်လီၤ.

16 ကွၢ်ကွၢ်,ပှၤလၢယအဲၣ်အီၤတဂၤဧၢ,နဃံနလၤ,နက့ၢ်နဂီၤဂ့ၤစ့ၢ်ကီး,ပလီၢ်မံမ့ၢ်လါဟ့လီၤ.

17 ပဟံၣ်အကျိၤမ့ၢ်သ့ၣ်ဆှိအ့ရ့း,ဒီးပဟံၣ်ခိၣ်မ့ၢ်သ့ၣ်ဆှိလီၤ.