Library · ksw

Jeremiah 45

1 တုၤစီၤန့ၤရံယၤအဖိခွါစီၤဘၤရူးကွဲးတၢ်ကတိၤတဖၣ်န့ၣ်လၢလံာ်ပူၤလၢစီၤယံးရမံယၤအထးခိၣ်,လၢယူဒၤအစီၤပၤစီၤယိၤၡံယၤအဖိခွါစီၤယဧိၤယါကံၣ်အနံၣ်ပှဲၤထီၣ်လွံၢ်နံၣ်တနံၣ်န့ၣ်ဒီး,ဝံယံးရမံယၤစံးဘၣ်အီၤလၢတၢ်ကတိၤအံၤဒီးစံးဝဲဒၣ်,

2 စီၤဘၤရူးဧၢ,ယွၤအံၣ်စရ့လးအကစၢ်စံးဘၣ်နၤဒ်အံၤ,

3 နစံး,ယဘၣ်အဖှီၣ်လီၤ.အဂ့ၢ်ဒ်အံၤ,ယွၤပာ်တၢ်မၤကိၢ်မၤဂီၤလၢယသူၣ်အုးသးအုးအဖီခိၣ်လီၤ.ယကအုကစွါသတးဒီး,ယသးလီၤဘှါ,ဒီးယအိၣ်ဘှံးတသ့ဘၣ်.

4 နဘၣ်စံးလၢအီၤဒ်အံၤ,ယွၤစံးဒ်အံၤ,ကွၢ်ကွၢ်,တၢ်လၢယမၤထီၣ်န့ၣ်ယကမၤလီၤပှီၢ်,ဒီးတၢ်လၢယသူၣ်လီၤန့ၣ်ယကထဲးထီၣ်ကွံာ်လၢကီၢ်ဒီဘ့ၣ်ညါအံၤအပူၤလီၤ.

5 ဒီးနဃုတၢ်အဒိၣ်တဖၣ်လၢနဂီၢ်စ့ၢ်ကီးဧါ,ဃုအီၤတဂ့ၤ.အဂ့ၢ်ဒ်အံၤ,ကွၢ်ကွၢ်,ယကဒုးဘၣ်တၢ်ဖံးတၢ်ညၣ်ခဲလၢာ်လၢတၢ်အၢလီၤ,ယွၤစံးဝဲဒၣ်,ဘၣ်ဆၣ်ဒီးဖဲနလဲၤတၢ်တပူၤလၢ်လၢ်န့ၣ်,ယကဟ့ၣ်နသးသမူလၢတၢ်ဂုာ်န့ၢ်လၢနဂီၢ်လီၤ.