Jeremiah 52
1 လၢစီၤစံးဒကံယၤကဲထီၣ်စီၤပၤန့ၣ်အသးပှၢ်ခံဆံတနံၣ်,ဒီးကဲစီၤပၤလၢယရူၤၡလ့ၣ်အပူၤတဆံတနံၣ်,ဒီးအမိၢ်အမံၤမ့ၢ်နီၢ်ဃမူတလး,စီၤယံးရမံယၤလၢလံးဘနၤအဖိမုၣ်လီၤ.
2 ဒီးမၤတၢ်အၢလၢယွၤအမဲာ်,ဒ်ကယဲၢ်တၢ်လၢစီၤယဟိၤယါကံၣ်မၤဝဲအသိးန့ၣ်လီၤ.
3 အဂ့ၢ်ဒ်အံၤ,လၢယွၤအသးထီၣ်အဃိန့ၣ်တၢ်မၤအသးလၢယရူၤၡလ့ၣ်,ဒီးလၢယူဒၤအပူၤတုၤအဟီထီၣ်ကွံာ်အီၤလၢအမဲာ်ညါ,ဒီးစီၤစံးဒကံယၤပူထီၣ်ဘၤဘူၤလိၣ်အစီၤပၤန့ၣ်လီၤ.
4 ဒီးလၢအကဲစီၤပၤအနံၣ်ပှဲၤထီၣ်ခွံနံၣ်တနံၣ်လၢဆံဆဲၣ်လါ,လၢလါထီၣ်ဆံဆဲၣ်နံၤတနံၤန့ၣ်တၢ်မၤအသးလၢပှၤဘၤဘူၤလိၣ်အစီၤပၤနဘူၤကးန့စၢ်ဟဲထီဒါယရူၤၡလ့ၣ်,အဝဲဒၣ်,ဒီးအပှၤသုးမုၢ်ခဲလၢာ်,ဒီးသူၣ်ဒဲထီဒါအီၤ,ဒီးသူၣ်တိာ်ဝးတရံးထီဒါအီၤလီၤ.
5 ဒီးဝ့ၢ်န့ၣ်ဘၣ်တၢ်ဝီၤဃာ်အီၤတုၤလီၤလၢစီၤပၤစံးဒကံယၤအနံၣ်ပှဲၤထီၣ်တဆံတနံၣ်န့ၣ်လီၤ.
6 ဒီးလွံၢ်လါတလါထီၣ်ခွံနံၤတနံၤန့ၣ်တၢ်သၣ်ဝံၤလီၤဒိဆူၣ်ထီၣ်ဝဲလၢဝ့ၢ်ပူၤ,ဒီးကိၣ်တအိၣ်ဘၣ်လၢကီၢ်အပှၤဂီၢ်မုၢ်အဂီၢ်ဘၣ်.
7 ဒီးဝ့ၢ်န့ၣ်ဘၣ်တၢ်ဘၢၣ်ဖျိဝဲ,ဒီးကယဲၢ်ပှၤသုးဖိဃ့ၢ်ဝဲ,ဒီးဟးထီၣ်လၢဝ့ၢ်ပူၤလၢမုၢ်နၤလၢပဲတရီအကျဲလၢအအိၣ်လၢတၢ်ခိၣ်ဒူခံကထၢအဘၢၣ်စၢၤ,လၢအအိၣ်ဝဲလၢစီၤပၤအတၤသၣ်အလီၢ်အဃၢၤန့ၣ်လီၤ.ဒီးပှၤက့ၤစ့းဖိအိၣ်ဝးတရံးထီဒါဝ့ၢ်န့ၣ်လီၤ.ဒီးလဲၤကျဲဆူတၢ်ပျီပူၤလီၤ.
8 ဒီးပှၤက့ၤစ့းဖိအပှၤသုးမုၢ်လူၤစီၤပၤ,ဒီးချုးန့ၢ်စီၤစံးဒကံယၤလၢယရံၤဃိအပျီပူၤ,ဒီးအပှၤသုးမုၢ်ခဲလၢာ်လီၤပြံလီၤပြါလၢအအိၣ်န့ၣ်လီၤ.
9 ဒီးဖီၣ်န့ၢ်စီၤပၤ,ဒီးဟဲစိာ်အီၤဆူဘၤဘူၤလိၣ်အစီၤပၤအအိၣ်လၢရံးဘလးလၢကီၢ်ဃမါသးအပူၤ,ဒီးအဝဲဒၣ်စံၣ်ညီၣ်အီၤလီၤ.
10 ဒီးဘၤဘူၤလိၣ်အစီၤပၤမၤသံစီၤစံးဒကံယၤအဖိခွါတဖၣ်လၢအမဲာ်ညါ,ဒီးမၤသံစ့ၢ်ကီးယူဒၤအပဒိၣ်ဖးဒိၣ်ခဲလၢာ်လၢရံးဘလးအပူၤ,
11 ဒီးအူခွဲးထီၣ်ကွံာ်စီၤစံးဒကံယၤအမဲာ်,ဒီးစၢဃာ်အီၤလၢတိၢ်သွဲ,ဒီးဘၤဘူၤလိၣ်အစီၤပၤစိာ်အီၤဆူဘၤဘူၤလိၣ်,ဒီးပာ်အီၤလၢဃိာ်ပူၤတုၤမုၢ်တနံၤလၢအသံလီၤ.
12 ဒီးယဲၢ်လါတလါ,လါထီၣ်ဆံဆဲၣ်နံၤန့ၣ်,ဘၤဘူၤလိၣ်အစီၤပၤနဘူၤကးန့စၢ်အနံၣ်ပှဲၤထီၣ်တဆံခွံနံၣ်တနံၣ်န့ၣ်ပှၤပၢၤတၢ်ဖိအခိၣ်လၢအခိးတၢ်လၢဘၤဘူၤလိၣ်အစီၤပၤအမဲာ်ညါ,စီၤနဘူစၢ်ရဒၢ်ဟဲဝဲဆူယရူၤၡလ့ၣ်အပူၤ,
13 ဒီးဆူးထီၣ်ကွံာ်ယွၤအဟံၣ်,ဒီးစီၤပၤအဟံၣ်,ဒီးဟံၣ်လၢယရူၤၡလ့ၣ်အပူၤခဲလၢာ်,ဒီးကယဲၢ်ပှၤအဒိၣ်ခဲလၢာ်အဟံၣ်န့ၣ်ဆူးထီၣ်ကွံာ်ဝဲလၢမ့ၣ်အူလီၤ.
14 ဒီးပှၤက့းစ့းဖိအပှၤသုးမုၢ်ခဲလၢာ်လၢအအိၣ်ဝဲဒီးပှၤပၢၤတၢ်ဖိအခိၣ်န့ၣ်မၤလီၤပှီၢ်ကွံာ်ယရူၤၡလ့ၣ်အခိၣ်ဒူဝးတရံးဝဲလီၤ.
15 ဒီးပှၤဖှီၣ်ဖိယာ်ဖိလၢပှၤဂီၢ်မုၢ်တနီၤ,ဒီးပှၤဂီၢ်မုၢ်လၢအအိၣ်လီၤတဲာ်လၢဝ့ၢ်ပူၤ,ဒီးပှၤလဲၤသဒၣ်တၢ်ဖိလၢအလဲၤသဒၣ်တၢ်ဆူဘၤဘူၤလိၣ်အစီၤပၤအအိၣ်,ဒီးပှၤဂီၢ်မုၢ်အတၢ်အိၣ်လီၤတဲာ်န့ၣ်ပှၤပၢၤတၢ်ဖိအခိၣ်စီၤနဘူစၢ်ရဒၣ်စိာ်မၢကဲကုၢ်လီၤ.
16 မ့မ့ၢ်ပှၤကီၢ်ဖိအပှၤဖှီၣ်ဖိယာ်ဖိတနီၤန့ၣ်ပှၤပၢၤတၢ်ဖိအခိၣ်ပာ်လီၤတဲာ်ဒ်သိးအကကဲထီၣ်ပှၤမၤတၤသၣ်အလီၢ်,ဒီးပှၤမၤဟီၣ်ခိၣ်ဖိန့ၣ်လီၤ.
17 ဒီးထူၣ်တိၢ်တဖၣ်လၢအအိၣ်လၢယွၤအဟံၣ်ပူၤ,ဒီးတၢ်အခီၣ်တဖၣ်,ဒီးပီၣ်လဲၣ်တိၢ်လၢအအိၣ်ဝဲလၢယွၤအဟံၣ်ပူၤန့ၣ်ပှၤက့ၤစ့းဖိမၤလီၤကလဲအီၤ,ဒီးစိာ်ထီၣ်ကွံာ်အတိၢ်ခဲလၢာ်ဆူဘၤဘူၤလိၣ်န့ၣ်လီၤ.
18 ဒီးသပၢၤဒီးတပူာ်,ဒီးနီၣ်တံာ်ကွံာ်တၢ်,ဒီးသလၢဖှံတၢ်,ဒီးနီၣ်တၢၤ,ဒီးကယဲၢ်တၢ်အဃၢၤအဃိၢ်တိၢ်လၢပှၤမၤတၢ်လၢအီၤခဲလၢာ်န့ၣ်စိာ်ကွံာ်ဝဲလီၤ.
19 ဒီးသလၢဖှံတၢ်ဒီးသပၢၤမ့ၣ်အူ,ဒီးသလၢ,ဒီးသပၢၤ,ဒီးမ့ၣ်အူဒၢ,ဒီးလီခီဖျၢၣ်သလၢၣ်,ဒီးသလၢလၢပှၤလူလီၤတၢ်လၢအီၤ,တၢ်တ့အသးလၢထူ,အထူဧိၤလွဲဧိၤ,ဒီးတၢ်တ့အသးလၢစ့,အကျိၣ်ဧိၤစ့ဧိၤန့ၣ်ပှၤပၢၤတၢ်ဖိအခိၣ်စိာ်ကွံာ်ဝဲလီၤ.
20 ဒီးထူၣ်ခံထူၣ်,ပီၣ်လဲၣ်တဖျၢၣ်,ဒီးဂီၤဖံးတိၢ်တဆံခံဒုလၢအဖီလာ်,ဒီးတၢ်အခီၣ်တဖၣ်လၢစီၤၡလိၤမိၤတ့ဝဲလၢယွၤအဟံၣ်အဂီၢ်န့ၣ်တၢ်တဖၣ်ခဲလၢာ်အတိၢ်အတၢ်လီၤတယၢၢ်တအိၣ်ဘၣ်.
21 ထူၣ်တထူၣ်အထီမ့ၢ်တဆံဃိးပျၢ်,ဒီးအကဝီၤန့ၣ်ပျံၤအထီတဆံခံပျၢ်အတဝီအီၤ,ဒီးအတီၣ်မ့ၢ်တဖံး,ဒီးအိၣ်ဝဲဒီးအအိပူၤလီၤ.
22 ဒီးအခိၣ်လၢအဖီခိၣ်မ့ၢ်တိၢ်,ဒီးအခိၣ်အထီမ့ၢ်ယဲၢ်ပျၢ်,ဒီးစၤအတၢ်မၤ,ဒီးသလဲသၣ်လၢအခိၣ်လိၤဝးတရံးန့ၣ်မ့ၢ်တိၢ်ခဲလၢာ်လီၤ.ဒီးအဝဲတထူၣ်,ဒီးသလဲသၣ်န့ၣ်မ့ၢ်ဒ်အဝဲသ့ၣ်တဖၣ်အသိးန့ၣ်လီၤ.
23 ဒီးသလဲသၣ်န့ၣ်အိၣ်ခွံဆံဃုဖျၢၣ်တခီ,ဒီးသလဲသၣ်ခဲလၢာ်န့ၣ်မ့ၢ်တကယၤလၢစၤအတၢ်မၤဝးတရံးဝဲလီၤ.
24 ဒီးပှၤပၢၤတၢ်ဖိအခိၣ်ဟံးန့ၢ်ပှၤလုၢ်တၢ်အခိၣ်စီၤစရါယၤ,ဒီးပှၤလုၢ်တၢ်အခိၣ်ခံဂၤတဂၤစီၤစဖါနယၤ,ဒီးပှၤပၢၤတြဲၤသၢဂၤလီၤ.
25 ဒီးလၢဝ့ၢ်ပူၤန့ၣ်ဟံးန့ၢ်ပှၤဒ့ဒံၣ်ဖိတဂၤလၢအအိၣ်ဝဲလၢပှၤသုးဖိအဖီခိၣ်,ဒီးပှၤနွံဂၤလၢအကွၢ်စီၤပၤအမဲာ်လၢအထံၣ်န့ၢ်ဝဲလၢဝ့ၢ်ပူၤ,ဒီးပှၤသုးမုၢ်အပှၤကွဲးလံာ်အခိၣ်လၢအဒုးအိၣ်ဖှိၣ်ကီၢ်အပှၤဂီၢ်မုၢ်,ဒီးပှၤဃုဆံလၢကီၢ်အပှၤဂီၢ်မုၢ်အကျါ,လၢအထံၣ်န့ၢ်ဝဲလၢဝ့ၢ်ပူၤလီၤ.
26 ဒီးပှၤပၢၤတၢ်ဖိအခိၣ်စီၤနဘူစၢ်ရဒၣ်ဟံးန့ၢ်အဝဲသ့ၣ်တဖၣ်န့ၣ်,ဒီးစိာ်ကွံာ်အီၤဆူဘၤဘူၤလိၣ်အစီၤပၤအအိၣ်လၢရံးဘလးန့ၣ်လီၤ.
27 ဒီးဘၤဘူၤလိၣ်အစီၤပၤကျီကွံာ်အီၤ,ဒီးမၤသံအီၤလၢရံးဘလးလၢကီၢ်ဃမါသးအပူၤလီၤ.ဒီးစိာ်ကွံာ်ယူဒၤလၢအကီၢ်ပူၤ,ဒီးမၢကဲကုၢ်အီၤလီၤ.
28 အအံၤမ့ၢ်ပှၤဂီၢ်မုၢ်လၢနဘူၤကးန့စၢ်စိာ်မၢကဲကုၢ်လၢအနံၣ်ပှဲၤထီၣ်နွံနံၣ်တနံၣ်န့ၣ်,ပှၤယူဒၤဖိသၢကထိခံဆံသၢဂၤ,
29 ဒီးလၢစီၤနဘူၤကးန့စၢ်အနံၣ်ပှဲၤထီၣ်တဆံဃိးနံၣ်န့ၣ်,ပှၤယရူၤၡလ့ၣ်ဖိဃိးကယၤသၢဆံခံဂၤ,
30 လၢစီၤနဘူၤကးန့စၢ်အနံၣ်ပှဲၤထီၣ်ခံဆံသၢနံၣ်တနံၣ်န့ၣ်ပှၤပၢၤတၢ်ဖိအခိၣ်စီၤနဘူစၢ်ရဒၣ်စိာ်မၢကဲကုၢ်ပှၤယူဒၤဖိနွံကယၤလွံၢ်ဆံယဲၢ်ဂၤလီၤ.ပှၤခဲလၢာ်န့ၣ်မ့ၢ်ပှၤလွံၢ်ကထိဃုကယၤလီၤ.
31 ဒီးယူဒၤအစီၤပၤယဟိၤယါခံၣ်ကဲကုၢ်ပှဲၤထီၣ်သၢဆံနွံနံၣ်,လါတဆံခံလါတလါ,လါထီၣ်ခံဆံယဲၢ်နံၤတနံၤန့ၣ်တၢ်မၤအသးလၢဘၤဘူၤလိၣ်အစီၤပၤအ့ဝလးမရၤဒိးကဲသီစီၤပၤတနံၣ်ဒီး,ဝံၣ်ထီၣ်ယူဒၤအစီၤပၤယဟိၤယါခံၣ်အခိၣ်,ဒီးဟဲစိာ်အီၤလၢဃိာ်ပူၤန့ၣ်လီၤ.
32 ဒီးကတိၤတၢ်မုာ်မုာ်ဒီးအီၤ,ဒီးပာ်အလီၢ်ပစိာ်ထီန့ၢ်စီၤပၤတဖၣ်အလီၢ်ပစိာ်လၢအအိၣ်ဒီးအီၤလၢဘၤဘူၤလိၣ်အပူၤန့ၣ်လီၤ.
33 ဒီးလဲက့ၤဃိာ်အတၢ်ကူတၢ်သိး,ဒီးအဝဲဒၣ်အီၣ်ကိၣ်လၢအမဲာ်ညါတထံၣ်ဃီတစိၤဒၣ်အီၤလီၤ.
34 ဒီးတၢ်နီၤဖးဟ့ၣ်အီၤလၢစီၤပၤအအိၣ်တထံၣ်ဃီ,အတၢ်တနံၤအဂီၢ်တနံၤအဂီၢ်တစိၤဒၣ်အီၤလီၤ.