Ezekiel 30
1 ယွၤအကလုၢ်ဘၣ်ယၤဒီးစံးဝဲဒၣ်,
2 ပှၤကညီဖိခွါဧၢ,ကတိၤတၢ်လၢဝံကျိာ်ဒီးစံး,ကစၢ်ယွၤစံးဒ်အံၤ,ဟီၣ်ပသူထီၣ်တက့ၢ်.နံၤတနံၤန့ၣ်ဘၣ်အဖှီၣ်လီၤ.
3 အဂ့ၢ်ဒ်အံၤ,မုၢ်တနံၤန့ၣ်အိၣ်ဘူးထီၣ်လံ.ယွၤအမုၢ်တနံၤအိၣ်ဘူးထီၣ်လံ.မုၢ်တနံၤအိၣ်ဒီးတၢ်အၢၣ်လီၤ.ပှၤကလုာ်တဖၣ်အဆၢကတီၢ်ဘၣ်လံ.
4 ဒီးနးဧိၤဘီဧိၤကဘၣ်အဲၤကူပတူး,ဒီးတုၤပှၤဘၣ်တၢ်မၤသံအီၤတဖၣ်လီၤဃံၤလၢအဲၤကူပတူးအပူၤဒီး,တၢ်ပျံၤတၢ်ဖုးကအိၣ်ဝဲလၢကူၤၡးအပူၤ,ဒီးတၢ်ကဟံးထီၣ်ကွံာ်အပှၤဂီၢ်မုၢ်,ဒီးအခီၣ်ထံးတဖၣ်ကလီၤပှီၢ်ကွံာ်လီၤ.
5 ကူၤၡး,ပူၤတၤ,ဒီးလူၤဒံ,ဒီးပှၤဃါဃုာ်အသးခဲလၢာ်,ဒီးကူာ်,ဒီးကယဲၢ်ပှၤကီၢ်ဖိလၢအအၢၣ်လီၤအီလီၤတၢ်ဒီးအီၤခဲလၢာ်န့ၣ်ကလီၤဃံၤအိၣ်ဒီးအီၤလၢနးဧိၤဘီဧိၤလီၤ.
6 ကစၢ်ယွၤစံးဒ်အံၤ,ပှၤလၢအမၤစၢၤအဲၤကူပတူးတဖၣ်ကလီၤဃံၤ,ဒီးအစိၤကမီၤအတၢ်ပာ်ထီၣ်ထီအသးန့ၣ်တၢ်ကဆီၣ်လီၤအီၤလီၤ.လၢမံးကဒိးလးပၢၢ်လၢစဝ့န့ၤကလီၤဃံၤလၢနးဧိၤဘီဧိၤလၢအပူၤလီၤ,ကစၢ်ယွၤစံးဝဲဒၣ်.
7 ဒီးကအိၣ်သယုၢ်လၢကီၢ်လၢအအိၣ်သယုၢ်တဖၣ်အကျါ,ဒီးအဝ့ၢ်တဖၣ်ကအိၣ်ဝဲလၢဝ့ၢ်လၢတၢ်မၤလူၤအီၤအကျါလီၤ.
8 ဒီးတုၤယဆိၣ်ကဲၤထီၣ်မ့ၣ်အူလၢအဲၤကူပတူးအပူၤ,ဒီးပှၤမၤစၢၤအီၤကတုၤလၢတၢ်ဟးဂီၤဒီး,ကသ့ၣ်ညါဝဲလၢယမ့ၢ်ယွၤလီၤ.
9 တၢ်လၢမုၢ်တနံၤန့ၣ်ကလူးတဖၣ်ကဟးထီၣ်လၢယအိၣ်လၢကဘီပူၤဒ်သိးအကမၤပျံၤပှၤကူၤၡးဖိလၢအတပလီၢ်ဘၣ်အသးဘၣ်,ဒီးတၢ်ပျံၤတၢ်ဖုးဒ်လၢအဲၤကူပတူးအမုၢ်တနံၤအသိးန့ၣ်ကဘၣ်အီၤလီၤ.အဂ့ၢ်ဒ်အံၤ,ကွၢ်ကွၢ်,ဟဲဝဲလီၤ.
10 ကစၢ်ယွၤစံးဒ်အံၤ,ဒီးယကမၤစှီၢ်ကွံာ်အဲၤကူပတူးအပှၤဂီၢ်မုၢ်လၢဘၤဘူၤလိၣ်အစီၤပၤနဘူၤကးန့စၢ်အစုပူၤလီၤ.
11 အဝဲဒၣ်ဒီးအပှၤဂီၢ်မုၢ်အိၣ်ဝဲဒီးအီၤ,တၢ်မၤပျံၤတၢ်လၢပှၤကလုာ်တဖၣ်အကျါန့ၣ်ကဟဲမၤဟးဂီၤကီၢ်တဘ့ၣ်န့ၣ်,ဒီးကဘီၣ်ထီၣ်အနးထီဒါအဲၤကူပတူး,ဒီးမၤပှဲၤကီၢ်တဘ့ၣ်န့ၣ်လၢပှၤဘၣ်တၢ်မၤသံအီၤလီၤ.
12 ဒီးယကဒုးလီၤသံးကွံာ်ထံမိၢ်ပှၢ်အထံ,ဒီးကဆါကွံာ်ကီၢ်န့ၣ်လၢပှၤတတီတလိၤဘၣ်အစုပူၤ,ဒီးယကမၤသယုၢ်ကီၢ်,ဒီးကယဲၢ်တၢ်လၢအအိၣ်ဝဲလၢအပူၤလၢပှၤတခီဘီတခီမုၢ်ဖိအစုပူၤလီၤ.ယၤယွၤအံၤယကတိၤလံတၢ်လံ.
13 ကစၢ်ယွၤစံးဒ်အံၤ,ယကမၤဟးဂီၤတၢ်ဂီၤတၢ်ဖီၣ်တဖၣ်,ယကမၤစှီၢ်ကွံာ်တၢ်ဂီၤတၢ်ဖီၣ်လၢနိဖးအပူၤ,ဒီးပဒိၣ်ဖးဒိၣ်တဂၤတအိၣ်လၢၤဘၣ်လၢကီၢ်အဲၤကူပတူးအပူၤဘၣ်,ဒီးယကဒုးဘၣ်ကီၢ်အဲၤကူပတူးလၢတၢ်ပျံၤတၢ်ဖုးလီၤ.
14 ယကမၤသယုၢ်ပၤသြိၣ်,ဒီးယကဆိၣ်ကဲၤထီၣ်မ့ၣ်အူလၢစိၤဧၢ်အပူၤ,ဒီးယကမၤတၢ်စံၣ်ညီၣ်လၢနိအလိၤလီၤ.
15 ဒီးယကလူလီၤယသးကဲၤထီၣ်လၢစံၤ,အဲၤကူပတူးအဂံၢ်အဘါအဖီခိၣ်,ဒီးယကဒီၣ်တဲာ်ကွံာ်နိအပှၤဂီၢ်မုၢ်လီၤ.
16 ဒီးယကဆိၣ်ကဲၤထီၣ်မ့ၣ်အူလၢအဲၤကူပတူးအပူၤ,ဒီးစံၤန့ၣ်ကကဆှဲးကဆှိး,ဒီးနိန့ၣ်ကသ့ၣ်ဖး,ဒီးနိဖးကဘၣ်တၢ်မၤဆူၣ်အီၤလၢမုၢ်ဆါခီလီၤ.
17 အၤဝ့ၣ်,ဒီးပံၤဘ့စ့းအပှၤဖိၣ်သၣ်ခွါန့ၣ်ကလီၤဃံၤလၢနး,ဒီးပိာ်မုၣ်တဖၣ်န့ၣ်ကလဲၤကဲကုၢ်လီၤ.
18 တုၤယမၤကၢ်ကွံာ်အဲၤကူပတူးအနီၣ်ယိးဘိလၢအပူၤ,ဒီးအဂံၢ်အဘါအသးထီၣ်ကဆိတ့ၢ်လၢအပူၤဒီး,မုၢ်နံၤကခံးလီၤလၢတၤပါန့ၤအပူၤလီၤ,တၢ်အၢၣ်ကလုၣ်ဘၢအီၤ,ဒီးအဖိမုၣ်တဖၣ်ကလဲၤကဲကုၢ်လီၤ.
19 ဒီးယကမၤတၢ်စံၣ်ညီၣ်လၢအဲၤကူပတူးအပူၤ,ဒီးကသ့ၣ်ညါဝဲလၢယမ့ၢ်ယွၤလီၤ.
20 ဒီးလၢနံၣ်တဆံတနံၣ်,လၢလါခီၣ်ထံး,လါထီၣ်နွံနံၤတနံၤန့ၣ်တၢ်မၤအသးလၢယွၤအကလုၢ်ဘၣ်ယၤဒီးစံးဝဲဒၣ်,
21 ပှၤကညီဖိခွါဧၢ,ယမၤကၢ်လံအဲၤကူပတူးအစီၤပၤဖၤရိၤအစုဒုၣ်လံ,ဒီးကွၢ်ကွၢ်,တၢ်တဘိၣ်ဘံထီၣ်ဘၣ်အီၤဒ်သိးအကပာ်ကသံၣ်လၢအလိၤဘၣ်,တၢ်တဘိၣ်ဘံဘိၣ်ဃာ်ဘၣ်အီၤဒ်သိးအကဒုးဆူၣ်ထီၣ်အီၤလၢအကဟံးဃာ်နးန့ၣ်အဂ့ၢ်ဘၣ်.
22 မၤသးဒ်န့ၣ်ဒီးကစၢ်ယွၤစံးဒ်အံၤ,ကွၢ်ကွၢ်,ယထီဒါအဲၤကူပတူးအစီၤပၤဖၤရိၤ,ဒီးယကမၤကၢ်အစုဒုၣ်ခံခီ,အဆူတခီ,ဒီးအကၢ်တခီ,ဒီးယကဒုးလီၤတဲာ်နးလၢအစုပူၤလီၤ.
23 ဒီးယကမၤလီၤပြံလီၤပြါပှၤအဲၤကူပတူးဖိလၢပှၤကလုာ်တဖၣ်အကျါ,ဒီးယကမၤလီၤမုၢ်လီၤဖးအီၤလၢကီၢ်တဖၣ်အကျါလီၤ.
24 မ့မ့ၢ်ယကဒုးဆူၣ်ထီၣ်ဘၤဘူၤလိၣ်အစီၤပၤအစုဒုၣ်,ဒီးယကဒၢနုာ်ယနးလၢအစုပူၤလီၤ.ဒီးယကမၤကၢ်ကွံာ်ဖၤရိၤအစုဒုၣ်,ဒီးကကအုကစွါလၢအမဲာ်ညါဒ်ပှၤလၢအဘၣ်ဆဲးသံအတၢ်ကအုကစွါအသိးန့ၣ်လီၤ.
25 မ့ၢ်မးယကဒုးဆူၣ်ထီၣ်ဘၤဘူၤလိၣ်အစီၤပၤအစုဒုၣ်,ဒီးဖၤရိၤအစုဒုၣ်ကလီၤဘှါလီၤ.ဒီးတုၤယဒၢနုာ်ယနးလၢဘၤဘူၤလိၣ်အစီၤပၤအစုပူၤ,ဒီးအဝဲဒၣ်ကယူာ်ထီၣ်အီၤလၢကီၢ်အဲၤကူပတူးအဖီခိၣ်ဒီး,ကသ့ၣ်ညါဝဲလၢယမ့ၢ်ယွၤလီၤ.
26 ဒီးယကမၤလီၤပြံလီၤပြါပှၤအဲၤကူပတူးဖိလၢပှၤကလုာ်တဖၣ်အကျါ,ဒီးမၤလီၤမုၢ်လီၤဖးအီၤလၢကီၢ်တဖၣ်အကျါ,ဒီးကသ့ၣ်ညါဝဲလၢယမ့ၢ်ယွၤလီၤ.