Ezekiel 42
1 ဒီးစိာ်ထီၣ်ယၤဆူတၢ်အဂၢၤလၢခိတပူၤလၢကျဲလဲၤလၢကလံၤစိးတခီ,ဒီးစိာ်ယၤဆူဒၢးဖိတဖၣ်လၢအအိၣ်ဝဲလၢတၢ်အလီၢ်လီၤဖး,ဒီးဒၢးတဒၢးန့ၣ်အမဲာ်ညါဆူကလံၤစိးတခီလီၤ.
2 လၢပဲတရီလၢကလံၤစိးအမဲာ်ညါန့ၣ်အထီမ့ၢ်အပျၢ်တကယၤ,ဒီးအဒီၣ်ဃီၤမ့ၢ်အပျၢ်ယဲၢ်ဆံလီၤ.
3 ထူၣ်တဖၣ်လၢထူၣ်တဖၣ်အမဲာ်ညါန့ၣ်အိၣ်ဝဲသၢဂ့ၢ်သဃီၤဒီးဂၢၤလၢညါတပူၤအပျၢ်ခံဆံ,ဒီးသဃီၤဒီးတၢ်ဒါလၢၢ်လၢတၢ်အဂၢၤလၢခိတပူၤလီၤ.
4 ဒီးတၢ်ဟးဝ့ၤဝီၤအလီၢ်အဒီၣ်ဃီၤဆံဆဲၣ်ပျၢ်လၢညါတခီ,ကျဲတပျၢ်အိၣ်ဝဲလၢဒၢးဖိတဖၣ်အမဲာ်ညါန့ၣ်လီၤ.ဒီးအကျဲစၢၤဖျိထီၣ်ဝဲဆူကလံၤစိးလီၤ.
5 ဒီးဒၢးဖိလၢထးခီတဖၣ်န့ၣ်အံၣ်န့ၢ်ဒၢးတဖၣ်အိၣ်ဝဲလၢလာ်ခီတတီၤ,ဒီးလၢဒၢးတဖၣ်အိၣ်ဝဲလၢတၢ်အဘၢၣ်စၢၤတတီၤတက့ၢ်လီၤ.အဂ့ၢ်ဒ်အံၤ,ထူၣ်တဖၣ်န့ၣ်ဟံးန့ၢ်အလီၢ်လီၤ.
6 အဂ့ၢ်ဒ်အံၤ,အိၣ်ဝဲသၢတီၤလီၤ.ဘၣ်ဆၣ်ဒီးထူၣ်တဖၣ်ဒ်ထူၣ်လၢတၢ်ဂၢၤပူၤအသိးန့ၣ်တအိၣ်ဘၣ်.မၤသးဒ်န့ၣ်ဒီးအံၣ်န့ၢ်တၢ်လၢလာ်ခီတတီၤ,ဒီးတၢ်လၢအဘၢၣ်စၢၤတတီၤတက့ၢ်န့ၣ်လီၤ.
7 ဒီးတၢ်အဒူၣ်လၢခိအိၣ်သဃီၤဒီးဒၢးဖိတဖၣ်ဆူတၢ်အဂၢၤလၢခိတပူၤလၢဒၢးဖိတဖၣ်အမဲာ်ညါန့ၣ်အထီမ့ၢ်အပျၢ်ယဲၢ်ဆံလီၤ.
8 အဂ့ၢ်ဒ်အံၤ,ဒၢးဖိတဖၣ်လၢတၢ်အဂၢၤလၢခိတပူၤန့ၣ်အထီမ့ၢ်အပျၢ်ယဲၢ်ဆံလီၤ.မ့မ့ၢ်လၢနူၢ်အမဲာ်ညါန့ၣ်မ့ၢ်အပျၢ်တကယၤလီၤ.
9 ဒီးလၢဒၢးဖိတဖၣ်အဖီလာ်န့ၣ်ကျဲလဲၤနုာ်လၢအဖျိထီၣ်ဆူမုၢ်ထီၣ်တခီ,အိၣ်ဝဲဖဲပှၤလဲၤနုာ်ဆူအပူၤလၢတၢ်အဂၢၤလၢခိလီၤ.
10 လၢတၢ်အဂၢၤအဒူၣ်အတီၤပူၤဆူမုၢ်ထီၣ်တခီ,လၢတၢ်အလီၢ်လီၤဖးအမဲာ်ညါ,ဒီးလၢဒၢးတဖျၢၣ်အမဲာ်ညါန့ၣ်ဒၢးဖိတဖၣ်အိၣ်ဝဲလီၤ.
11 ဒီးကျဲအိၣ်ဝဲလၢအမဲာ်ညါမၤသးဒ်တၢ်လၢဒၢးဖိတဖၣ်လၢအအိၣ်ဝဲဆူကလံၤစိးအသိးန့ၣ်လီၤ.အထီတုၤသိးသိး,ဒီးအဒီၣ်ဃီၤတုၤတုၤသိးသိး,ဒီးအဟးထီၣ်အလီၢ်ခဲလၢာ်,ဒီးအက့ၢ်အဂီၤ,ဒီးအကျဲစၢၤန့ၣ်မ့ၢ်ဒ်သိးသိးလီၤ.
12 ဒီးဒၢးဖိတဖၣ်အိၣ်ဝဲဒီးကျဲစၢၤဖျိထီၣ်ဝဲဆူကလံၤထံးတခီဒ်န့ၣ်သိးလီၤ.ကျဲအခီၣ်ထံးအိၣ်ဝဲဒီးကျဲစၢၤတဖျိလၢကျဲတဘိအိၣ်ဝဲလၢတၢ်ဒူၣ်အမဲာ်ညါဆူမုၢ်ထီၣ်တခီဖဲပှၤလဲၤနုာ်လၢအပူၤလီၤ.
13 ဒီးအဝဲဒၣ်စံးဘၣ်ယၤ,ဒၢးဖိတဖၣ်လၢကလံၤစိးတခီ,ဒီးဒၢးဖိတဖၣ်လၢကလံၤထံးတခီလၢအအိၣ်လၢတၢ်အလီၢ်လီၤဖးအမဲာ်ညါန့ၣ်မ့ၢ်ဒၢးဖိစီဆှံဖဲပှၤလုၢ်တၢ်အဒိၣ်တုၤအသုးဘူးအသးဆူယွၤအအိၣ်န့ၣ်ဒီး,အီၣ်ဘၣ်တၢ်စီဆှံကတၢၢ်လီၤ.ဘၣ်ပာ်တၢ်စီဆှံကတၢၢ်တဖၣ်,ဒီးတၢ်မၤဘူၣ်တၢ်အီၣ်,ဒီးတၢ်လုၢ်တၢ်ဒဲးဘးဒီးတၢ်လုၢ်တၢ်ကမၣ်ဖဲန့ၣ်လီၤ.အဂ့ၢ်ဒ်အံၤ,တၢ်အလီၢ်န့ၣ်စီဆှံဝဲလီၤ.
14 တုၤပှၤလုၢ်တၢ်အဒိၣ်လဲၤနုာ်ဒီး,တဘၣ်ဟးထီၣ်ဘၣ်ဆူတၢ်အဂၢၤလၢခိအပူၤဘၣ်.မ့ၢ်အဘၣ်ပာ်အကူအသိးလၢအမၤတၢ်အခ့အပှၤအတၢ်လၢအပူၤဖဲန့ၣ်လီၤ.အဂ့ၢ်ဒ်အံၤ,မ့ၢ်တၢ်စီဆှံလီၤ.ဒီးကဘၣ်ကူသိးတၢ်အကူအသိးအဂၤ,ဒီးသုးဘူးအသးဆူတၢ်ဘၣ်ဃးဒီးပှၤဂီၢ်မုၢ်လီၤ.
15 ဒီးထိၣ်ဟံၣ်လၢညါတဖျၢၣ်ခဲလၢာ်ဝံၤဒီး,စိာ်ထီၣ်ယၤဆူပဲတရီလၢအဖျိဝဲဆူမုၢ်ထီၣ်တခီ,ဒီးထိၣ်ဝဲဝးတရံးလီၤ.
16 ဒီးထိၣ်အဃၢၤလၢမုၢ်ထီၣ်တခီလၢနီၣ်ထိၣ်တပိၢ်,ဒီးအိၣ်ဝဲအစိၤယဲၢ်ကယၤဝးတရံးဝဲလီၤ.
17 ထိၣ်ဝဲအဃၢၤလၢကလံၤစိးလၢနီၣ်ထိၣ်တပိၢ်,ဒီးအိၣ်ဝဲအစိၤယဲၢ်ကယၤဝးတရံးဝဲလီၤ.
18 ထိၣ်အဃၢၤလၢကလံၤထံးတခီလၢနီၣ်ထိၣ်တပိၢ်,ဒီးအိၣ်ဝဲအစိၤယဲၢ်ကယၤဝးတရံးဝဲလီၤ.
19 ဃၣ်အသးဆူမုၢ်ထီၣ်တခီ,ဒီးထိၣ်ဝဲအစိၤယဲၢ်ကယၤလၢနီၣ်ထိၣ်တပိၢ်လီၤ.
20 ထိၣ်တၢ်အဒူၣ်လၢအကပၤလွံၢ်ခီဝးတရံးဝဲလီၤ.အထီမ့ၢ်ယဲၢ်ကယၤ,ဒီးအဒီၣ်ဃီၤမ့ၢ်ယဲၢ်ကယၤ,ဒ်သိးကနီၤဖးတၢ်စီဆှံအလီၢ်ဒီးတၢ်တကဆှီဘၣ်အလီၢ်အဆၢန့ၣ်လီၤ.