Library · ksw

Leviticus 9

1 ဒီးဃိးနံၤတနံၤန့ၣ်တၢ်မၤအသးလၢစီၤမိၤရှ့ကိးန့ၢ်စီၤအၤဟရိၣ်ဒီးအဖိခွါတဖၣ်,ဒီးပှၤအံၣ်စရ့လးဖိအသူၣ်က့သးပှၢ်တဖၣ်လီၤ.

2 ဒီးစံးဘၣ်စီၤအၤဟရိၣ်,ဟံးန့ၢ်ဂီၤဖံးဖိတဒုလၢတၢ်လုၢ်တၢ်ဒဲးဘးအဂီၢ်,ဒီးသိဖါအလၢအပှဲၤတဒုလၢတၢ်လုၢ်မ့ၣ်အူအဂီၢ်,ဒီးလုၢ်အီၤလၢယွၤအမဲာ်ညါတက့ၢ်.

3 ဒီးနဘၣ်ကတိၤတၢ်ဒီးပှၤအံၣ်စရ့လးဖိဒီးစံး,ဟံးန့ၢ်မဲာ်တဲးလဲးဖါတဒုလၢတၢ်လုၢ်တၢ်ဒဲးဘးအဂီၢ်ဒီးဂီၤဖံးဖိတဒု,ဒီးသိဖိအလၢအပှဲၤတဒု,တၢ်တနံၣ်ဖိလၢတၢ်လုၢ်မ့ၣ်အူအဂီၢ်,

4 ဒီးဂီၤဖံးတဒု,ဒီးသိဖါတဒုလၢတၢ်လုၢ်တၢ်မၤဃူမၤဖိးအဂီၢ်,အိၣ်ဒီးတၢ်မၤဘူၣ်ကိၣ်ဃါဃုာ်ဒီးသိ,ဒ်သိးသုကလုၢ်အီၤလၢယွၤအမဲာ်ညါန့ၣ်တက့ၢ်.အဂ့ၢ်ဒ်အံၤ,တၢ်လၢမုၢ်မဆါတနံၤအံၤယွၤကအိၣ်ဖျါထီၣ်လၢသုမဲာ်ညါလီၤ.

5 ဒီးတၢ်လၢစီၤမိၤရှ့မၤလိာ်ဝဲန့ၣ်အဝဲသ့ၣ်တဖၣ်ဟဲစိာ်ဆူတၢ်အိၣ်ဖှိၣ်အဒဲအမဲာ်ညါ,ဒီးကယဲၢ်ပှၤအိၣ်ဖှိၣ်ဖိသုးဘူးအသး,ဒီးဆၢထၢၣ်လၢယွၤအမဲာ်ညါလီၤ.

6 ဒီးစီၤမိၤရှ့စံးဝဲဒၣ်,အဝဲအံၤမ့ၢ်တၢ်လၢယွၤမၤလိာ်လၢသုဘၣ်မၤ,ဒီးယွၤအလၤကပီၤကအိၣ်ဖျါထီၣ်လၢသုမဲာ်ညါလီၤ.

7 ဒီးစီၤမိၤရှ့စံးဘၣ်စီၤအၤဟရိၣ်,လဲၤဆူတၢ်လုၢ်လီၢ်အအိၣ်,ဒီးလုၢ်နတၢ်လုၢ်တၢ်ဒဲးဘး,ဒီးနတၢ်လုၢ်မ့ၣ်အူ,ဒီးမၤတၢ်ပူၤဖျဲးလၢနဂီၢ်ဒၣ်နဲ,ဒီးလၢပှၤဂီၢ်မုၢ်အဂီၢ်,ဒီးလုၢ်ပှၤဂီၢ်မုၢ်အတၢ်လုၢ်,ဒီးမၤတၢ်ပူၤဖျဲးလၢအဂီၢ်,ဒ်ယွၤမၤလိာ်ဝဲအသိးန့ၣ်တက့ၢ်.

8 ဒီးစီၤအၤဟရိၣ်လဲၤဆူတၢ်လုၢ်အလီၢ်အအိၣ်,ဒီးမၤသံတၢ်လုၢ်တၢ်ဒဲးဘးအဂီၤဖံးဖိလၢအဂီၢ်ဒၣ်ဝဲလီၤ.

9 ဒီးစီၤအၤဟရိၣ်အဖိခွါတဖၣ်ဟဲစိာ်တၢ်သွံၣ်ဆူအအိၣ်,ဒီးအဝဲဒၣ်ဘျၢအစုမုၢ်လၢတၢ်သွံၣ်ပူၤ,ဒီးပာ်ဝဲလၢတၢ်လုၢ်လီၢ်အနၢၤတဖၣ်အလိၤလီၤ.ဒီးလူလီၤကွံာ်တၢ်သွံၣ်န့ၣ်လၢတၢ်လုၢ်လီၢ်အခီၣ်ထံးလီၤ.

10 မ့မ့ၢ်တၢ်လုၢ်တၢ်ဒဲးဘးအသိ,ဒီးအကလ့ၢ်တဖၣ်,ဒီးတၢ်အိၣ်လၢအသူၣ်အလိၤန့ၣ်ဆိၣ်ကဲၤကွံာ်လၢတၢ်လုၢ်လီၢ်အဖီခိၣ်,ဒ်ယွၤမၤလိာ်စီၤမိၤရှ့အသိးန့ၣ်လီၤ.

11 ဒီးအညၣ်,ဒီးအဖံးန့ၣ်ဆူးထီၣ်ကွံာ်လၢမ့ၣ်အူလၢပှၤသူၣ်ဒဲအလီၢ်လၢခိလီၤ.

12 ဒီးမၤသံတၢ်လုၢ်မ့ၣ်အူ,ဒီးစီၤအၤဟရိၣ်အဖိခွါတဖၣ်ဟ့ၣ်အီၤလၢအသွံၣ်,ဒီးဖှံဝဲလၢတၢ်လုၢ်လီၢ်အဖီခိၣ်ဝးတရံးဝဲလီၤ.

13 ဒီးဟ့ၣ်အီၤလၢတၢ်လုၢ်မ့ၣ်အူ,ဒီးအကူာ်တဖၣ်,ဒီးအခိၣ်,ဒီးအဝဲဒၣ်ဆိၣ်ကဲၤကွံာ်အီၤလၢတၢ်လုၢ်လီၢ်အဖီခိၣ်လီၤ.

14 ဒီးသ့စီကွံာ်အပှံာ်,ဒီးအခီၣ်,ဒီးဆိၣ်ကဲၤကွံာ်အီၤလၢတၢ်လုၢ်မ့ၣ်အူအဖီခိၣ်လၢတၢ်လုၢ်လီၢ်အဖီခိၣ်လီၤ.

15 ဒီးဟဲစိာ်ပှၤဂီၢ်မုၢ်အတၢ်လုၢ်ဒီးဟံးန့ၢ်မဲာ်တဲးလဲးဖါတဒုလၢအမ့ၢ်တၢ်လုၢ်တၢ်ဒဲးဘးလၢပှၤဂီၢ်မုၢ်အဂီၢ်,ဒီးမၤသံအီၤ,ဒီးလုၢ်အီၤလၢတၢ်ဒဲးဘးအဂီၢ်ဒ်တၢ်အခီၣ်ထံးအသိးန့ၣ်လီၤ.

16 ဒီးဟဲစိာ်တၢ်လုၢ်မ့ၣ်အူ,ဒီးလုၢ်ဝဲဒ်တၢ်သိၣ်တၢ်သီအသိးန့ၣ်လီၤ.

17 ဒီးဟဲစိာ်တၢ်မၤဘူၣ်ကိၣ်,ဒီးဟံးန့ၢ်တတၢၤဒုၣ်လၢအီၤ,ဒီးလၢတၢ်လုၢ်မ့ၣ်အူလၢမုၢ်ဂီၤအမဲာ်ညါန့ၣ်ဆိၣ်ကဲၤကွံာ်အီၤလၢတၢ်လုၢ်လီၢ်အဖီခိၣ်လီၤ.

18 ဒီးမၤသံဂီၤဖံးတဒု,ဒီးသိဖါတဒု,တၢ်မၤဃူမၤဖိးအတၢ်လုၢ်လၢအမ့ၢ်လၢပှၤဂီၢ်မုၢ်အဂီၢ်လီၤ.ဒီးစီၤအၤဟရိၣ်အဖိခွါတဖၣ်ဟ့ၣ်အီၤလၢအသွံၣ်ဒီးအဝဲဒၣ်ဖှံတၢ်လုၢ်လီၢ်အဖီခိၣ်ဝးတရံးလၢအီၤ,

19 ဒီးဂီၤဖံးဒီးသိဖါအသိ,အမဲၢ်ဘီၣ်,ဒီးတၢ်လၢအပှံာ်အဖီခိၣ်,ဒီးအကလ့ၢ်တဖၣ်,ဒီးတၢ်အိၣ်လၢအသူၣ်အလိၤလီၤ.

20 ဒီးပာ်အသိလၢအသးနါပှၢ်အဖီခိၣ်,ဒီးအဝဲဒၣ်ဆိၣ်ကဲၤကွံာ်သိလၢတၢ်လုၢ်လီၢ်အဖီခိၣ်လီၤ.

21 ဒီးအသးနါပှၢ်,ဒီးအဖံဘၣ်ခိၣ်အထွဲန့ၣ်စီၤအၤဟရိၣ်ဝၢ်ဝဲလၢတၢ်ဝၢ်လၢယွၤအမဲာ်ညါ,ဒ်ယွၤမၤလိာ်စီၤမိၤရှ့အသိးန့ၣ်လီၤ.

22 ဒီးစီၤအၤဟရိၣ်ယူာ်ထီၣ်အစုဆူပှၤဂီၢ်မုၢ်အအိၣ်,ဒီးဆိၣ်ဂ့ၤအီၤ,ဒီးဟဲလီၤလၢအလုၢ်တၢ်လုၢ်တၢ်ဒဲးဘး,ဒီးတၢ်လုၢ်မ့ၣ်အူ,ဒီးတၢ်လုၢ်မၤဃူမၤဖိးတၢ်တဖၣ်န့ၣ်လီၤ.

23 ဒီးစီၤမိၤရှ့,ဒီးစီၤအၤဟရိၣ်လဲၤနုာ်လၢတၢ်အိၣ်ဖှိၣ်အဒဲပူၤ,ဒီးဟဲက့ၤထီၣ်,ဒီးဆိၣ်ဂ့ၤပှၤဂီၢ်မုၢ်,ဒီးယွၤအလၤအကပီၤအိၣ်ဖျါထီၣ်လၢပှၤဂီၢ်မုၢ်ခဲလၢာ်အမဲာ်ညါလီၤ.

24 ဒီးမ့ၣ်အူဟဲထီၣ်လၢယွၤအမဲာ်ညါ,ဒီးအီၣ်ကွံာ်တၢ်လုၢ်မ့ၣ်အူ,ဒီးသိလၢတၢ်လုၢ်လီၢ်အဖီခိၣ်လီၤ.ဒီးပှၤဂီၢ်မုၢ်ထံၣ်ဘၣ်ဝဲ,ဒီးကိးပသူထီၣ်,ဒီးထိၣ်လီၤပှီၤအသးလီၤ.