Library · ksw

Habakkuk 3

1 စီၤဃဘးကူာ်အတၢ်ထုကဖၣ်ဒ်ၡံကအိနိးအသိး.

2 ယွၤဧၢ,ယနၢ်ဟူနကစီၣ်,ဒီးယပျံၤတၢ်.ယွၤဧၢ,လၢနံၣ်ဧိၤလါဧိၤအပူၤမၤမူထီၣ်က့ၤနတၢ်မၤ,လၢနံၣ်ဧိၤလါဧိၤအပူၤန့ၣ်လီၣ်ဖျါထီၣ်အီၤတက့ၢ်.သ့ၣ်နီၣ်ထီၣ်က့ၤတၢ်သးကညီၤလၢတၢ်သးထီၣ်အပူၤတက့ၢ်.

3 ယွၤဟဲဝဲလၢတ့ၤမၣ်,ဒီးတၢ်စီဆှံတဂၤလၢကစၢၢ်ပၤရၣ်, စ့လၤ.အလၤကပီၤကျၢၢ်ဘၢမူခိၣ်,ဒီးဟီၣ်ခိၣ်ပှဲၤဝဲဒီးအတၢ်စံးထီၣ်ပတြၢၤလီၤ.

4 အတၢ်ကယဲၢ်ကယူာ်မၤအသးဒ်မုၢ်အတၢ်ကပီၤအသိး,အစုလိၤဧူၢ်ထီၣ်,ဒီးအကဟုကညီၢ်အိၣ်ခူသူၣ်ဖဲန့ၣ်လီၤ.

5 တၢ်သံသတြိာ်လဲၤဝဲလၢအမဲာ်ညါ,ဒီးတၢ်သံသတြိာ်မ့ၣ်အူလဲၤတၢ်လၢအခီၣ်ထံးလီၤ.

6 အိၣ်ကတီၢ်ဝဲ,ဒီးဟီၣ်ခိၣ်ဟူးဝးဝဲ,ကွၢ်ဝဲ,ဒီးဒုးကနိးကစုာ်ပှၤကလုာ်တဖၣ်,ကစၢၢ်ကလိအထူအယိာ်သ့ၣ်ဖးလီၤအသး,တၢ်စိခိၣ်အထူအယိာ်သကူးလီၤအသးလီၤ.အကျဲဧိၤအကပူၤဧိၤအိၣ်လၢပျၢၤလၢကစၢၤလီၤ.

7 ယထံၣ်ဘၣ်ကူၤၡးအဒဲဘၣ်တၢ်ကိၢ်တၢ်ဂီၤ,မံးဒယၣ်အဒဲအယၣ်သဒၢဟူးဝးဝဲလီၤ.

8 ယွၤဧၢ,နသးကဲၤထီၣ်ဘၣ်ထံမိၢ်ပှၢ်တဖၣ်ဧါ.နသးထီၣ်ဘၣ်ထံမိၢ်ပှၢ်တဖၣ်ဧါ.နသးကဲၤထီၣ်ဘၣ်ပီၣ်လဲၣ်သတးဒီး,နဒိးနကသ့ၣ်လၢနတၢ်အုၣ်က့ၤခီၣ်က့ၤအလ့ၣ်ကဟၣ်အပူၤစ့ၢ်ကီးဧါ.

9 နချံၣ်အိၣ်ဘ့ၣ်ဆ့,တၢ်တအိၣ်ဘၣ်လၢအလိၤ,ပျၢ်ဧိၤစၤဧိၤအါလံ,မ့ၢ်တၢ်အကလုၢ်. စ့လၤ.နမၤသ့ၣ်ဖးဟီၣ်ခိၣ်ဒီးကဲထီၣ်ထံမိၢ်ပှၢ်တဖၣ်လီၤ.

10 ကစၢၢ်ကလိထံၣ်ဘၣ်နၤဒီးဟူးဝးဝဲ,ထံလုၣ်ဘၢန့ၣ်လုၣ်ဘၢတၢ်,ထံယိာ်ပူၤထုထီၣ်အကလုၢ်,ယူာ်ထီၣ်အစုထီၣ်ထီလီၤ.

11 မုၢ်ဒီးလါအိၣ်ကတီၢ်ဝဲလၢအအိၣ်အဆိးအလီၢ်ပူၤ,လၢနပျၢ်ဧိၤစၤဧိၤလၢအယူၤဝဲလၢအတၢ်ကပီၤအဃိ,လၢနဘီဧိၤနးဧိၤအကပြုၢ်ကပြီၤအဃိလီၤ.

12 နလဲၤခီဂာ်ဟီၣ်ခိၣ်လၢနသးထီၣ်,နယီၢ်လီၤပှၤကလုာ်တဖၣ်လၢနသးကဲၤထီၣ်,

13 နလဲၤထီၣ်လၢနကအုၣ်က့ၤခီၣ်က့ၤပှၤဂီၢ်မုၢ်အဂီၢ်,လၢနပှၤဒိးဖှူအသးအတၢ်အုၣ်က့ၤခီၣ်က့ၤအဂီၢ်,နမၤလီၤပှီၢ်ကွံာ်ပှၤတတီဘၣ်အဟံၣ်အခိၣ်,နမၤအိၣ်ဖျါထီၣ်အခီၣ်ထံးတုၤလၢပှၤအကိာ်လီၤ. စ့လၤ.

14 နဆဲးအသုးဖိအခိၣ်အဒိၣ်တဂၤလၢအဘီဒၣ်ဝဲ,ပှၤလၢအလဲၤသဖှိဝဲဒ်သိးအကမၤပြံပြါယၤ,အတၢ်သးခုမ့ၢ်လၢအကအီၣ်ကွံာ်ပှၤဖှီၣ်ဖိယာ်ဖိလၢတၢ်ခူသူၣ်လီၤ.

15 နလဲၤခီဂာ်ပီၣ်လဲၣ်လၢနကသ့ၣ်,ဖဲထံဖးဒိၣ်လၢအလပီစံၣ်စုးလီၤ.

16 ယနၢ်ဟူတၢ်,ဒီးယကနိးလၢယသးကံၢ်ပူၤ,ယထးခိၣ်ဝးလၢတၢ်သီၣ်အဃိ,တၢ်အုၣ်သံတၢ်ကျၣ်သံဟဲနုာ်လၢယဃံပူၤ,ဒီးယကနိးကစုာ်လၢယလီၢ်,ဒ်သိးယကအိၣ်ဘှံးလၢတၢ်ဘၣ်ကိၢ်ဘၣ်ဂီၤအမုၢ်နံၤ,ဖဲအကတီၢ်လၢပှၤဂီၢ်မုၢ်လၢအကဒုးသုးဒီးပှၤအံၤဟဲဝဲလီၤ.

17 ချၢၣ်ဒၢမ့ၢ်တဆှိးဘၣ်ဘၣ်ဆၣ်,တၤသၣ်မ့ၢ်တအိၣ်ဘၣ်လၢစပံးမုၢ်အလိၤဘၣ်ဆၣ်,သ့ၣ်စၤယံးအသၣ်မ့ၢ်လီၤဘီဘၣ်ဆၣ်,တၢ်အီၣ်တၢ်အီမ့ၢ်တအိၣ်လၢပှၢ်လၢ်ကျါဘၣ်ဆၣ်,သိဒီးမဲာ်တဲးလဲးမ့ၢ်လၢာ်ဝဲလၢကရၢပူၤဘၣ်ဆၣ်,ဒီးဂီၤဘုၣ်ဂီၤဖံးမ့ၢ်တအိၣ်လၢအလီၢ်ပူၤဘၣ်ဆၣ်ဒီး,

18 ယသူၣ်ကပိၢ်ယသးကဝးလၢယွၤအပူၤ,ယကသူၣ်ဖှံသးညီလၢတၢ်အုၣ်က့ၤခီၣ်က့ၤအကစၢ်အပူၤလီၤ.

19 ယွၤယကစၢ်မ့ၢ်ယဂံၢ်ယဘါလီၤ.မၤယခီၣ်ဒ်တၤဟိမိၢ်အခီၣ်အသိး,ဒုးလဲၤယၤလၢယလီၢ်ထီၣ်ထီအဖီခိၣ်လီၤ.လၢတၢ်အခိၣ်အဂီၢ်,အိၣ်ဒီးယနီၣ်ဒ့တၢ်တဖၣ်.