Library · ksw

Numbers 16

1 ဒီးစီၤလ့ၤဝံအဖိခွါစီၤကဃးအဖိခွါ,စီၤယံးစတၢ်အဖိခွါ,စီၤကိၤရးအိၣ်ဒီးစီၤရူၤဘ့ၣ်အဖိခွါတဖၣ်စီၤအလံအာ်အဖိခွါ,စီၤဒၤသၣ်ဒီးစီၤအဘံရၣ်,ဒီးစီၤပ့ၤလ့းအဖိခွါစီၤအိၣ်,ဟံးန့ၢ်အသကိးတဖၣ်,

2 ဒီးဂဲၤဆၢထၢၣ်လၢစီၤမိၤရှ့အမဲာ်ညါ,အိၣ်ဒီးပှၤအံၣ်စရ့လးဖိတနီၤနီၤ,ပဒိၣ်လၢတၢ်အိၣ်ဖှိၣ်အပူၤ,ပှၤဒိးတၢ်ကိးအီၤလၢတၢ်အိၣ်ဖှိၣ်အပူၤ,ပှၤလၢအမံၤဟူသၣ်ဖျါခံကယၤယဲၢ်ဆံ,

3 ဒီးအိၣ်ဖှိၣ်ရိဖှိၣ်ထီဒါစီၤမိၤရှ့ဒီးစီၤအၤဟရိၣ်,ဒီးစံးဘၣ်အီၤ,အါလံလၢသုဂီၢ်လံ.အဂ့ၢ်ဒ်အံၤ,ပှၤအိၣ်ဖှိၣ်ခဲလၢာ်န့ၣ်မ့ၢ်အစီဆှံကိးဂၤဒဲး,ဒီးယွၤအိၣ်လၢအကျါလီၤ.ဒီးသုပာ်ထီၣ်ထီသုသးလၢယွၤအတၢ်အိၣ်ဖှိၣ်အဖီခိၣ်န့ၣ်မ့ၢ်အဘၣ်မနုၤလဲၣ်.

4 ဒီးစီၤမိၤရှ့နၢ်ဟူဝဲ,ဒီးထိၣ်လီၤပှီၤအသးလီၤ.

5 ဒီးကတိၤတၢ်ဒီးစီၤကိၤရးဒီးအတၢ်အိၣ်ဖှိၣ်ခဲလၢာ်,ဒီးစံးဝဲဒၣ်,ခဲဂီၤကိာ်ယွၤကလီၣ်ဖျါထီၣ်ပှၤလၢအမ့ၢ်အတၢ်,ဒီးလၢအစီဆှံန့ၣ်,ဒီးကဒုးသုးဘူးအီၤဆူအအိၣ်,ပှၤလၢအဃုထၢအီၤန့ၣ်ကဒုးသုးဘူးအီၤဆူအအိၣ်လီၤ.

6 မၤတၢ်အံၤတက့ၢ်,သုဝဲသ့ၣ်,စီၤကိၤရးဒီးအတၢ်အိၣ်ဖှိၣ်ခဲလၢာ်,ဟံးန့ၢ်သပၢၤမ့ၣ်အူ,

7 ဒီးပာ်မ့ၣ်အူလၢအပူၤ,ဒီးပာ်တၢ်နၢမူဆိၣ်ကဲၤလၢအပူၤလၢယွၤအမဲာ်ညါခဲဂီၤကိာ်န့ၣ်တက့ၢ်.ဒီးတၢ်ကမၤအသးလၢပှၤလၢယွၤဃုထၢအီၤန့ၣ်အဝဲဒၣ်တၢ်စီဆှံဝဲလီၤ.အါလံလၢသုဂီၢ်လံ,စီၤလ့ၤဝံအဖိခွါသ့ၣ်ဧၢ.

8 ဒီးစီၤမိၤရှ့စံးဘၣ်စီၤကိၤရး,ဒိကနၣ်လၢ်တက့ၢ်,စီၤလ့ၤဝံအဖိခွါသ့ၣ်ဧၢ,

9 အံၣ်စရ့လးအကစၢ်နီၤဖးသုလၢအံၣ်စရ့လးအတၢ်အိၣ်ဖှိၣ်အပူၤ,ဒ်သိးအကဒုးဟဲဘူးသုဒီးအကစၢ်ဒၣ်ဝဲ,ဒ်သိးသုကမၤယွၤအတၢ်အိၣ်အလီၢ်အတၢ်မၤ,ဒီးဆၢထၢၣ်လၢတၢ်အိၣ်ဖှိၣ်အမဲာ်ညါ,ဒ်သိးသုကမၤအခ့အပှၤအတၢ်မၤန့ၣ်,မ့ၢ်တၢ်အဆံးတမံၤလၢသုမဲာ်ညါစ့ၢ်ကီးဧါ,

10 ဒီးဒုးလဲၤဘူးလံနၤ,ဒီးစီၤလ့ၤဝံအဖိခွါ,နဒီပုၢ်ဝဲၢ်ခဲလၢာ်အိၣ်ဒီးနၤလံ,ဒီးသုဃုစ့ၢ်ကီးပှၤလုၢ်တၢ်အဒိၣ်အတၢ်ဧါ.

11 အကူၢ်မ့ၢ်ဒ်န့ၣ်ဒီးနဲဒၣ်ဒီးနတၢ်အိၣ်ဖှိၣ်ခဲလၢာ်အိၣ်ဖှိၣ်ထီဒါယွၤလီၤ.ဒီးစီၤအၤဟရိၣ်န့ၣ်မ့ၢ်တၢ်ဒ်လဲၣ်ဒ်လဲၣ်လၢသုကဒူးကဒ့ၣ်တၢ်လၢအလိၤလဲၣ်.

12 ဒီးစီၤမိၤရှ့မၢပှၤလဲၤကိးန့ၢ်စီၤအလံအာ်အဖိခွါစီၤဒၤသၣ်ဒီးစီၤအဘံရၣ်,ဒီးအဝဲသ့ၣ်စံးဝဲဒၣ်,ပတလဲၤဘၣ်,

13 နဒုးဟးထီၣ်ပှၤလၢကီၢ်လၢအယွၤဒီးတၢ်နုၢ်ထံဒီးကနဲစီ,ဒ်သိးပကဘၣ်တၢ်မၤသံပှၤလၢပှၢ်မုၢ်ကနၢန့ၣ်တအါဘၣ်ဒီး,မ့ၢ်နပာ်နသးလၢနကကဲပဒိၣ်သပှၢ်တၢၢ်လၢပဖီခိၣ်ဧါ,

14 လၢန့ၣ်အမဲာ်ညါနတဒုးဟဲပှၤဆူကီၢ်လၢအယွၤဝဲဒီးတၢ်နုၢ်ထံဒီးကနဲစီဘၣ်,နတဟ့ၣ်သါဘၣ်ပှၤလၢစံာ်ဧိၤပှဲၤဧိၤ,လၢစပံးအလီၢ်ဘၣ်.နကအူခွဲးထီၣ်ကွံာ်ပှၤတဖၣ်န့ၣ်အမဲာ်စ့ၢ်ကီးဧါ.ပတလဲၤဘၣ်.

15 ဒီးစီၤမိၤရှ့အသးထီၣ်ကဲၤထီၣ်ဒိၣ်မး,ဒီးစံးဘၣ်ယွၤ,ကွၢ်အတၢ်မၤဘူၣ်တဂ့ၤ,ယတဟံးန့ၢ်ဘၣ်ကသ့ၣ်ယီၤတဒုဧိၤလၢအီၤ,ဒီးယတမၤအၢဘၣ်အီၤနီတဂၤဘၣ်.

16 ဒီးစီၤမိၤရှ့စံးဘၣ်စီၤကိၤရး,ခဲဂီၤကိာ်နဲဒၣ်ဒီးနတၢ်အိၣ်ဖှိၣ်ခဲလၢာ်အိၣ်လၢယွၤအမဲာ်ညါ,နဲဒၣ်ဒီးအဝဲသ့ၣ်တဖၣ်,ဒီးစီၤအၤဟရိၣ်တက့ၢ်.

17 ဒီးမ်ပှၤဟံးန့ၢ်တဂၤအသပၢၤမ့ၣ်အူဒၣ်ဝဲ,တဂၤအသပၢၤမ့ၣ်အူဒၣ်ဝဲ,ဒီးပာ်တၢ်နၢမူဆိၣ်ကဲၤလၢအပူၤ,ဒီးဟဲစိာ်ဆူယွၤအမဲာ်ညါတဂၤအသပၢၤမ့ၣ်အူဒၣ်ဝဲ,တဂၤအသပၢၤမ့ၣ်အူဒၣ်ဝဲ,သပၢၤမ့ၣ်အူခံကယၤယဲၢ်ဆံ,နဲဒၣ်စ့ၢ်ကီးဒီးစီၤအၤဟရိၣ်တဂၤအသပၢၤမ့ၣ်အူဒၣ်ဝဲ,တဂၤအသပၢၤမ့ၣ်အူဒၣ်ဝဲန့ၣ်တက့ၢ်.

18 ဒီးဟံးန့ၢ်ဝဲတဂၤအသပၢၤမ့ၣ်အူဒၣ်ဝဲ,ဒီးပာ်မ့ၣ်အူလၢအပူၤ,ဒီးပာ်တၢ်နၢမူဆိၣ်ကဲၤလၢအဖီခိၣ်,ဒီးဆၢထၢၣ်လၢတၢ်အိၣ်ဖှိၣ်အဒဲအကျဲစၢၤအိၣ်ဒီးစီၤမိၤရှ့,ဒီးစီၤအၤဟရိၣ်လီၤ.

19 ဒီးစီၤကိၤရးဒုးအိၣ်ဖှိၣ်အတၢ်အိၣ်ဖှိၣ်ခဲလၢာ်ထီဒါအီၤဆူတၢ်အိၣ်ဖှိၣ်အဒဲအကျဲစၢၤလီၤ.ဒီးယွၤအလၤကပီၤအိၣ်ဖျါထီၣ်လၢတၢ်အိၣ်ဖှိၣ်ခဲလၢာ်အမဲာ်ညါလီၤ.

20 ဒီးယွၤကတိၤတၢ်ဒီးစီၤမိၤရှ့ဒီးစီၤအၤဟရိၣ်,ဒီးစံးဝဲဒၣ်,

21 မၤလီၤဖးသုသးဒီးတၢ်အိၣ်ဖှိၣ်အံၤအအိၣ်,ဒ်သိးယကဒုးတၢ်အီၣ်ကွံာ်အီၤသတူၢ်ကလာ်တက့ၢ်.

22 ဒီးထိၣ်လီၤပှီၤအသးဒီးစံးဝဲဒၣ်,ကစၢ်ဧၢ,ကယဲၢ်တၢ်ညၣ်ခဲလၢာ်အသးတဖၣ်အကစၢ်ဧၢ,ပှၤတဂၤမၤတၢ်ဒဲးဘး,ဒီးနသးကထီၣ်ဘၣ်တၢ်အိၣ်ဖှိၣ်ခဲလၢာ်စ့ၢ်ကီးဧါ.

23 ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်,

24 ကတိၤတၢ်ဒီးတၢ်အိၣ်ဖှိၣ်,ဒီးစံးဘၣ်အီၤ,ဟးထီၣ်ကွံာ်လၢတၢ်ဝးတရံးစီၤကိၤရး,ဒီးစီၤဒၤသၣ်,ဒီးစီၤအဘံရၣ်အဒဲတက့ၢ်.

25 ဒီးစီၤမိၤရှ့ဂဲၤဆၢထၢၣ်,ဒီးလဲၤဆူစီၤဒၤသၣ်ဒီးစီၤအဘံရၣ်အအိၣ်,ဒီးပှၤအံၣ်စရ့လးဖိအပှၤသူၣ်က့သးပှၢ်တဖၣ်ပိာ်ထီၣ်အခံလီၤ.

26 ဒီးကတိၤတၢ်ဒီးတၢ်အိၣ်ဖှိၣ်ဒီးစံးဝဲဒၣ်,ဟးထီၣ်ကွံာ်လၢ်လၢပှၤအၢတဖၣ်အံၤအဒဲတက့ၢ်.ဒီးထိးအတၢ်နီတမံၤတဂ့ၤ,သုကဘၣ်တၢ်အီၣ်ကွံာ်ဘၣ်ဖုးသုလၢအတၢ်ဒဲးဘးခဲလၢာ်အပူၤလီၤ.

27 ဒီးဟးထီၣ်ကွံာ်ဝဲလၢစီၤကိၤရး,စီၤဒၤသၣ်,ဒီးစီၤအဘံရၣ်အဒဲကိးခီဒဲး,ဒီးစီၤဒၤသၣ်ဒီးစီၤအဘံရၣ်ဟဲထီၣ်ဒီးဆၢထၢၣ်ဝဲလၢအဒဲတဖၣ်အကျဲစၢၤန့ၣ်,ဒီးအမါတဖၣ်,ဒီးအဖိခွါတဖၣ်,ဒီးအဖိဆံးတဖၣ်လီၤ.

28 ဒီးစီၤမိၤရှ့စံးဝဲဒၣ်,လၢအဝဲအံၤသုကသ့ၣ်ညါလၢယွၤမၢလီၤယၤဒ်သိးယကမၤတၢ်မၤတဖၣ်န့ၣ်,(အဂ့ၢ်ဒ်အံၤ,တမ့ၢ်ဘၣ်ယၤလၢယသးဒၣ်ယဲဘၣ်.)

29 ပှၤတဖၣ်န့ၣ်မ့ၢ်သံဒ်ပှၤခဲလၢာ်သံဝဲအသိး,ဒီးတၢ်မ့ၢ်အိၣ်သကိးအီၤဒ်တၢ်အိၣ်သကိးပှၤခဲလၢာ်အသိးဒီး,ယွၤတမၢလီၤယၤဘၣ်.

30 မ့မ့ၢ်ယွၤမ့ၢ်တ့လီၤတၢ်အသီတမံၤ,ဒီးဟီၣ်ခိၣ်မ့ၢ်အဲးထီၣ်အထးခိၣ်,ဒီးယူၢ်လီၤကွံာ်အီၤဒီးကယဲၢ်တၢ်အိၣ်ဒီးအီၤခဲလၢာ်,ဒီးအဝဲသ့ၣ်မူဝဲဒီးလဲၤလီၤဆူပျုၤပူၤဒီး,သုကသ့ၣ်ညါလၢပှၤတဖၣ်န့ၣ်မၤတရီတပါယွၤလံလီၤ.

31 ဒီးတုၤအကတိၤတၢ်ကတိၤခဲလၢာ်န့ၣ်ဝံၤဒီး,တၢ်မၤအသးလၢဟီၣ်ခိၣ်အိၣ်လၢအဖီလာ်သ့ၣ်ဖး,

32 ဒီးဟီၣ်ခိၣ်အဲးထီၣ်အထးခိၣ်,ဒီးယူၢ်လီၤကွံာ်အီၤဒီးအဟံၣ်တဖၣ်,ဒီးကယဲၢ်ပှၤကညီလၢအအိၣ်ဒီးစီၤကိၤရး,ဒီးအစုလီၢ်အခီၣ်ခိၣ်ခဲလၢာ်,

33 အဝဲသ့ၣ်တဖၣ်,ဒီးကယဲၢ်ပှၤအိၣ်ဒီးအီၤခဲလၢာ်မူဝဲဒီးလဲၤလီၤဆူပျုၤပူၤဒီးဟီၣ်ခိၣ်ကျၢၢ်ဘၢတၢ်လၢအဖီခိၣ်,ဒီးဟါမၢ်ကွံာ်ဝဲလၢတၢ်အိၣ်ဖှိၣ်အပူၤတကူၢ်သ့ၣ်လီၤ.

34 ဒီးကယဲၢ်ပှၤအံၣ်စရ့လးဖိလၢအအိၣ်ဝးတရံးအီၤန့ၣ်ဃ့ၢ်ဝဲလၢအဝဲသ့ၣ်အတၢ်ကိးပသူအမဲာ်ညါလီၤ.အဂ့ၢ်ဒ်အံၤ,စံးဝဲဒၣ်,ဟီၣ်ခိၣ်ကယူၢ်ကွံာ်ဘၣ်ဖုးပှၤလီၤ.

35 ဒီးမ့ၣ်အူဟဲထီၣ်လၢယွၤအအိၣ်,ဒီးအီၣ်ကွံာ်ပှၤခံကယၤယဲၢ်ဆံလၢအမၤဘူၣ်တၢ်နၢမူဆိၣ်ကဲၤလီၤ.

36 ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်,

37 စံးဘၣ်ပှၤလုၢ်တၢ်အဒိၣ်,စီၤအၤဟရိၣ်အဖိခွါစီၤအလၤဧစၢ်,ဒ်သိးအကထုးထီၣ်သပၢၤမ့ၣ်အူလၢမ့ၣ်အူအီၣ်တၢ်အပူၤ,ဒီးဖှံနဲမ့ၣ်အူဆူဘးန့ၣ်တက့ၢ်.အဂ့ၢ်ဒ်အံၤ,စီဆှံထီၣ်ဝဲလီၤ.

38 ပှၤမၤကမၣ်လီၤအသးဒၣ်ဝဲတဖၣ်အသပၢၤမ့ၣ်အူန့ၣ်,မ်ပှၤမၤတၢ်ဘ့ၣ်ဘၣ်လၢအီၤ,တၢ်ကျးလၢတၢ်လုၢ်လီၢ်အဂီၢ်န့ၣ်တက့ၢ်.အဂ့ၢ်ဒ်အံၤ,မၤဘူၣ်ဝဲလၢယွၤအမဲာ်ညါ,ဒီးစီဆှံထီၣ်ဝဲလီၤ.ဒီးကကဲထီၣ်တၢ်ပနီၣ်လၢပှၤအံၣ်စရ့လးဖိအဂီၢ်လီၤ.

39 ဒီးပှၤလုၢ်တၢ်အဒိၣ်စီၤအလၤဧစၢ်န့ၣ်ဟံးန့ၢ်သပၢၤတိၢ်မ့ၣ်အူလၢပှၤလၢမ့ၣ်အူအီၣ်ကွံာ်အီၤမၤဘူၣ်ဝဲ,ဒီးတၢ်မၤအီၤလၢတၢ်ဘ့ၣ်ဘၣ်,တၢ်ကျးဘၢတၢ်လုၢ်လီၢ်အဂီၢ်,

40 နီၣ်သ့ၣ်နီၣ်ထီၣ်က့ၤလၢပှၤအံၣ်စရ့လးဖိအဂီၢ်,ဒ်သိးပှၤတခီဒူၣ်ဖိလၢအတမ့ၢ်ဘၣ်စီၤအၤဟရိၣ်အချံအသၣ်ဘၣ်န့ၣ်အသုတသုးဘူးအသးလၢအကမၤဘူၣ်တၢ်နၢမူဆိၣ်ကဲၤလၢယွၤအမဲာ်ညါတဂ့ၤ,ဒ်သိးအသုတကဲထီၣ်တၢ်ဒ်စီၤကိၤရး,ဒီးဒ်အတၢ်အိၣ်ဖှိၣ်အသိး,ဒ်ယွၤစံးဘၣ်အီၤလၢစီၤမိၤရှ့အစုပူၤအသိးန့ၣ်တဂ့ၤလီၤ.

41 ဒီးမုၢ်ဆ့ၣ်ထီၣ်တနံၤန့ၣ်ပှၤအံၣ်စရ့လးဖိအတၢ်အိၣ်ဖှိၣ်ခဲလၢာ်ကဒူးကဒ့ၣ်တၢ်လၢစီၤမိၤရှ့ဒီးစီၤအၤဟရိၣ်အလိၤ,ဒီးစံးဝဲဒၣ်,သုမၤသံလံယွၤအပှၤဂီၢ်မုၢ်လံလီၤ.

42 ဒီးတုၤတၢ်အိၣ်ဖှိၣ်န့ၣ်အိၣ်ဖှိၣ်ထီဒါစီၤမိၤရှ့ဒီးစီၤအၤဟရိၣ်ဒီး,တၢ်မၤအသးလၢအကွၢ်ဝဲဆူတၢ်အိၣ်ဖှိၣ်အဒဲ,ဒီးကွၢ်ကွၢ်,တၢ်အၢၣ်န့ၣ်လုၣ်ဘၢကွံာ်အီၤ,ဒီးယွၤလၤအကပီၤအိၣ်ဖျါထီၣ်လီၤ.

43 ဒီးစီၤမိၤရှ့ဒီးစီၤအၤဟရိၣ်ဟဲဝဲဆူတၢ်အိၣ်ဖှိၣ်အဒဲအမဲာ်ညါလီၤ.

44 ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်,

45 ဂဲၤဆၢထၢၣ်ကွံာ်လၢတၢ်အိၣ်ဖှိၣ်အံၤအပူၤ,ဒ်သိးယကမၤတၢ်အီၣ်ကွံာ်အီၤလၢတစိၢ်ဖိအတီၢ်ပူၤန့ၣ်တက့ၢ်.ဒီးအဝဲသ့ၣ်ထိၣ်လီၤပှီၤအသးလီၤ.

46 ဒီးစီၤမိၤရှ့စံးဘၣ်စီၤအၤဟရိၣ်,ဟံးန့ၢ်သပၢၤမ့ၣ်အူတဖျၢၣ်,ဒီးပာ်မ့ၣ်အူလၢအပူၤလၢတၢ်လုၢ်လီၢ်အဖီခိၣ်,ဒီးပာ်တၢ်နၢမူဆိၣ်ကဲၤလၢအဖီခိၣ်,ဒီးလဲၤချ့ချ့ဆူတၢ်အိၣ်ဖှိၣ်အပူၤ,ဒီးမၤတၢ်ပူၤဖျဲးလၢအဂီၢ်တက့ၢ်.အဂ့ၢ်ဒ်အံၤ,တၢ်သးထီၣ်ဟးထီၣ်လံလၢယွၤအအိၣ်လံ,တၢ်သံသတြိာ်အိၣ်ထီၣ်သီလံ.

47 ဒီးစီၤအၤဟရိၣ်ဟံးန့ၢ်တၢ်ဒ်စီၤမိၤရှ့မၤလိာ်တၢ်အသိး,ဒီးဃ့ၢ်ဝဲဆူတၢ်အိၣ်ဖှိၣ်အသးကံၢ်ပူၤ,ဒီးကွၢ်ကွၢ်,တၢ်သံသတြိာ်အိၣ်ထီၣ်သီလံလၢပှၤဂီၢ်မုၢ်အကျါလံ,ဒီးပာ်တၢ်နၢမူဆိၣ်ကဲၤလၢအဖီခိၣ်,ဒီးမၤတၢ်ပူၤဖျဲးလၢပှၤဂီၢ်မုၢ်အဂီၢ်လီၤ.

48 ဒီးဆၢထၢၣ်ဝဲလၢပှၤသံတဖၣ်ဒီးပှၤမူတဖၣ်အဘၢၣ်စၢၤန့ၣ်လီၤ.

49 ဒီးတၢ်သံသတြိာ်အိၣ်ကတီၢ်လီၤ.ဒီးပှၤသံဝဲလၢတၢ်သံသတြိာ်အပူၤန့ၣ်တကလးဒီးလွံၢ်ကထိဒီးနွံကယၤလီၤ.ပှၤလၢအသံလၢစီၤကိၤရးအမူးပူၤန့ၣ်အိၣ်ဒံးလၢအဝဲန့ၣ်အမဲာ်ညါလီၤ.

50 ဒီးစီၤအၤဟရိၣ်က့ၤက့ၤဆူစီၤမိၤရှ့အအိၣ်ဖဲတၢ်အိၣ်ဖှိၣ်အဒဲအကျဲစၢၤလီၤ.ဒီးတၢ်သံသတြိာ်အိၣ်ကတီၢ်လီၤ.