Library · ksw

Numbers 28

1 ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်,

2 မၤလိာ်ပှၤအံၣ်စရ့လးဖိဒီးစံးဘၣ်အီၤ,ယတၢ်မၤဘူၣ်,ယကိၣ်လၢတၢ်လုၢ်မ့ၣ်အူအဂီၢ်,တၢ်နၢမူလၢယဂီၢ်န့ၣ်သုဘၣ်ပလီၢ်သုသး,ဒီးမၤဘူၣ်အီၤလၢအဆၢအကတီၢ်ဒၣ်ဝဲန့ၣ်လီၤ.

3 ဒီးနဘၣ်စံးဘၣ်အီၤ,အအံၤမ့ၢ်တၢ်လုၢ်မ့ၣ်အူလၢသုဘၣ်မၤဘူၣ်ယွၤလၢအီၤန့ၣ်,သိဖိတနံၣ်ဖိအလၢအပှဲၤခံဒု,တနံၤဘၣ်တနံၤ,တၢ်လုၢ်မ့ၣ်အူတထံၣ်ဃီလီၤ.

4 သိဖိတဒုန့ၣ်နဘၣ်လုၢ်လၢမုၢ်ဂီၤ,ဒီးသိဖိခံဒုတဒုန့ၣ်နဘၣ်လုၢ်လၢမုၢ်ဟါ,

5 ဒီးကိၣ်ကမူၣ်တအ့ဖးဆံဆဲၣ်ပူတပူလၢတၢ်မၤဘူၣ်ကိၣ်အဂီၢ်ဃါဃုာ်ဒီးသိတိၢ်အသးတဟံၣ်လွံၢ်ပူတပူလီၤ.

6 မ့ၢ်တၢ်လုၢ်မ့ၣ်အူတထံၣ်ဃီလၢတၢ်စံၣ်ညီၣ်လၢကစၢၢ်စံၤနါအလိၤ,လၢတၢ်နၢမူအဂီၢ်,တၢ်လုၢ်မ့ၣ်အူလၢယွၤအဂီၢ်လီၤ.

7 ဒီးတၢ်လုၢ်အီန့ၣ်မ့ၢ်တဟံၣ်လွံၢ်ပူတပူလၢသိဖိတဒုအဂီၢ်လီၤ.လၢတၢ်အလီၢ်စီဆှံအပူၤန့ၣ်,နဘၣ်မၢပှၤလူလီၤစပံးထံ,တၢ်လုၢ်အီ,လၢယွၤအဂီၢ်လီၤ.

8 ဒီးသိဖိခံဒုတဒုန့ၣ်နဘၣ်လုၢ်အီၤလၢမုၢ်ဟါလီၤ.ဒ်တၢ်မၤဘူၣ်ကိၣ်လၢမုၢ်ဂီၤအသိး,ဒီးဒ်တၢ်လုၢ်အီအသိးန့ၣ်နဘၣ်မၤဘူၣ်အီၤ,တၢ်လုၢ်မ့ၣ်အူဘၣ်ဃးဒီးတၢ်နၢမူလၢယွၤအဂီၢ်လီၤ.

9 ဒီးလၢအိၣ်ဘှံးအနံၤန့ၣ်သိဖိတနံၣ်ဖိအလၢအပှဲၤခံဒု,ဒီးကိၣ်ကမူၣ်ခံအ့စရိၣ်လၢတၢ်မၤဘူၣ်ကိၣ်အဂီၢ်ဃါဃုာ်ဒီးသိ,ဒီးအတၢ်လုၢ်အီလီၤ.

10 လၢတၢ်လုၢ်မ့ၣ်အူတထံၣ်ဃီဒီးအတၢ်လုၢ်အီအမဲာ်ညါန့ၣ်,တၢ်လုၢ်မ့ၣ်အူကိးအိၣ်ဘှံးအနံၤဒဲးဘၣ်အိၣ်ဝဲလီၤ.

11 ဒီးလၢသုလါအခီၣ်ထံးတဖၣ်န့ၣ်သုဘၣ်မၤဘူၣ်ယွၤလၢတၢ်လုၢ်မ့ၣ်အူ,ဂီၤဖံးဖါဖိခံဒု,ဒီးသိဖါတဒု,သိဖိတနံၣ်ဖိအလၢအပှဲၤနွံဒု,

12 ဒီးကိၣ်ကမူၣ်သၢအ့စရိၣ်,တၢ်မၤဘူၣ်ကိၣ်ဃါဃုာ်ဒီးသိလၢဂီၤဖံးဖါတဒုအဂီၢ်,ဒီးကိၣ်ကမူၣ်ခံအ့စရိၣ်,တၢ်မၤဘူၣ်ကိၣ်ဃါဃုာ်ဒီးသိလၢသိဖါတဒုအဂီၢ်လီၤ.

13 ဒီးကိၣ်ကမူၣ်တအ့စရိၣ်ဃါဃုာ်ဒီးသိ,တၢ်မၤဘူၣ်ကိၣ်လၢသိဖိတဒုအဂီၢ်,တၢ်လုၢ်မ့ၣ်အူ,တၢ်နၢမူ,တၢ်လုၢ်လၢမ့ၣ်အူလၢယွၤအဂီၢ်လီၤ.

14 ဒီးအတၢ်လုၢ်အီန့ၣ်မ့ၢ်စပံးထံဖးဖီဟံၣ်လၢဂီၤဖံးဖါတဒုအဂီၢ်,ဒီးတဟံၣ်သၢပူတပူလၢသိဖါတဒုအဂီၢ်,ဒီးတဟံၣ်လွံၢ်ပူတပူလၢသိဖိတဒုအဂီၢ်လီၤ.အဝဲန့ၣ်မ့ၢ်တၢ်လုၢ်မ့ၣ်အူလၢတလါဘၣ်တလါအဂီၢ်လၢဒီနံၣ်အလါတဖၣ်အဂီၢ်လီၤ.

15 ဒီးလၢတၢ်လုၢ်တထံၣ်ဃီဒီးအတၢ်လုၢ်အီအမဲာ်ညါန့ၣ်,မဲာ်တဲးလဲးဖိတဒုကဘၣ်တၢ်လုၢ်အီၤလၢတၢ်လုၢ်တၢ်ဒဲးဘးအဂီၢ်လီၤ.

16 ဒီးလါခီၣ်ထံးလါထီၣ်တဆံလွံၢ်နံၤတနံၤန့ၣ်မ့ၢ်ယွၤအတၢ်လဲၤကပာ်လီၤ.

17 ဒီးလါထီၣ်တဆံယဲၢ်နံၤတနံၤန့ၣ်မ့ၢ်တၢ်မၤဘူၣ်လီၤ.ပှၤဘၣ်အီၣ်ကိၣ်တအိၣ်ဒီးကိၣ်မံၣ်န့ၣ်နွံနံၤလီၤ.

18 မုၢ်ခီၣ်ထံးတနံၤန့ၣ်မ့ၢ်တၢ်မၤဘူၣ်စီဆှံလီၤ.သုတဘၣ်မၤတၢ်အကုၢ်အပှၤအတၢ်မၤနီတမံၤဘၣ်,

19 သုဘၣ်မၤဘူၣ်တၢ်လၢမ့ၣ်အူ,တၢ်လုၢ်မ့ၣ်အူလၢယွၤအဂီၢ်,ဂီၤဖံးဖါဖိခံဒု,ဒီးသိဖါတဒုဒီးသိဖိတနံၣ်ဖိနွံဒု,ဘၣ်အိၣ်အလၢအပှဲၤဒီးသုလီၤ.

20 ဒီးအတၢ်မၤဘူၣ်ကိၣ်န့ၣ်မ့ၢ်ကိၣ်ကမူၣ်ဃါဃုာ်ဒီးသိလီၤ.သၢအ့စရိၣ်သုဘၣ်မၤဘူၣ်လၢဂီၤဖံးဖါတဒုအဂီၢ်,ဒီးခံအ့စရိၣ်လၢသိဖါတဒုအဂီၢ်လီၤ.

21 ဒီးတအ့စရိၣ်လၢသိဖိတဒုအဂီၢ်,တအ့စရိၣ်လၢသိဖိတဒုအဂီၢ်န့ၣ်နဘၣ်မၤဘူၣ်လၢသိဖိနွံဒုအဂီၢ်စုာ်စုာ်,

22 ဒီးမဲာ်တဲးလဲးလၢတၢ်လုၢ်တၢ်ဒဲးဘးအဂီၢ်ဒ်သိးအကမၤတၢ်ပူၤဖျဲးလၢသုဂီၢ်လီၤ.

23 လၢတၢ်လုၢ်မ့ၣ်အူလၢမုၢ်ဂီၤလၢအမ့ၢ်တၢ်လုၢ်မ့ၣ်အူတထံၣ်ဃီအမဲာ်ညါန့ၣ်,သုဘၣ်မၤဘူၣ်တၢ်တဖၣ်န့ၣ်လီၤ.

24 ဒ်တၢ်တဖၣ်အသိးန့ၣ်သုဘၣ်မၤကိးမုၢ်နံၤဒဲးနွံနံၤညါန့ၣ်,တၢ်လုၢ်မ့ၣ်အူအတၢ်အီၣ်,တၢ်နၢမူလၢယွၤအဂီၢ်လီၤ.လၢတၢ်လုၢ်မ့ၣ်အူတထံၣ်ဃီဒီးအတၢ်လုၢ်အီအမဲာ်ညါန့ၣ်,သုဘၣ်မၤဘူၣ်အီၤလီၤ.

25 ဒီးနွံနံၤတနံၤန့ၣ်သုဘၣ်အိၣ်ဒီးတၢ်မၤဘူၣ်စီဆှံလီၤ.သုတဘၣ်မၤတၢ်အကုၢ်အပှၤအတၢ်မၤနီတမံၤဘၣ်.

26 ဒီးတုၤသုမၤဘူၣ်ယွၤလၢတၢ်အီၣ်အသီ,လၢသုတၢ်နွံတဖၣ်အပူၤလၢတၤသၣ်ဆိအမုၢ်နံၤန့ၣ်သုဘၣ်အိၣ်ဒီးတၢ်မၤဘူၣ်စီဆှံလီၤ.သုတဘၣ်မၤတၢ်အကုၢ်အပှၤအတၢ်မၤနီတမံၤဘၣ်.

27 ဒီးသုဘၣ်မၤဘူၣ်တၢ်လုၢ်မ့ၣ်အူ,လၢတၢ်နၢမူလၢယွၤအဂီၢ်,ဂီၤဖံးဖါဖိခံဒု,သိဖါတဒု,သိဖိတနံၣ်ဖိနွံဒု,

28 ဒီးအတၢ်မၤဘူၣ်ကိၣ်,ကိၣ်ကမူၣ်ဃါဃုာ်ဒီးသိ,သၢအ့စရိၣ်လၢဂီၤဖံးဖိတဒုအဂီၢ်,ခံအ့စရိၣ်လၢသိဖါတဒုအဂီၢ်,

29 တအ့စရိၣ်လၢသိဖိတဒုအဂီၢ်,တအ့စရိၣ်လၢသိဖိတဒုအဂီၢ်,လၢသိဖိနွံဒုအဂီၢ်စုာ်စုာ်,

30 ဒီးမဲာ်တဲးလဲးဖိတဒု,ဒ်သိးအကမၤတၢ်ပူၤဖျဲးလၢသုဂီၢ်လီၤ.

31 ဒီးလၢတၢ်လုၢ်မ့ၣ်အူတထံၣ်ဃီ,ဒီးအတၢ်မၤဘူၣ်ကိၣ်,ဒီးအတၢ်လုၢ်တၢ်အီအဖီခိၣ်န့ၣ်,သုဘၣ်မၤဘူၣ်အီၤ,ဒီးဘၣ်အိၣ်အလၢအပှဲၤဒီးသုလီၤ.