Library · ksw

Matthew 3

1 တၢ်လၢမုၢ်နံၤတဖၣ်န့ၣ်ပှၤဘျၢတၢ်စီၤယိၤဟၣ်ဟဲဝဲ,ဒီးစံၣ်တဲၤတဲလီၤတၢ်လၢယူဒၤအပှၢ်မုၢ်ကနၢ,

2 ဒီးစံးဝဲဒၣ်,ပီၢ်ယၢ်လီၤက့ၤသုသးတက့ၢ်.အဂ့ၢ်ဒ်အံၤ,မူခိၣ်အဘီအမုၢ်န့ၣ်ဘူးထီၣ်လံ.

3 အဂ့ၢ်ဒ်အံၤ,ပှၤတဂၤန့ၣ်မ့ၢ်ပှၤလၢဝံယရှါယၤကတိၤတၢ်လၢအဂ့ၢ်ဒီးစံးဝဲဒၣ်,တၢ်အကလုၢ်သီၣ်ထီၣ်လၢပှၢ်မုၢ်ကနၢ,ကတဲာ်ကတီၤက့ၤယွၤအကျဲန့ၣ်တက့ၢ်.မၤလိၤအကျဲမုၢ်တဖၣ်န့ၣ်တက့ၢ်.

4 တၢ်လၢစီၤယိၤဟၣ်တဂၤန့ၣ်အိၣ်ဒီးအကူအသိးလၢကီၤလၤအူးအဆူၣ်,ဒီးကံၢ်တူာ်အယီၢ်ဒ့လၢယီၢ်တကိးတၢ်ဖံး,ဒီးအတၢ်အီၣ်တၢ်အီမ့ၢ်ဒွဲၣ်ဧိၤတြၤဧိၤ,ဒီးကနဲမံၤအစီလီၤ.

5 တုၤနုၤတစုပှၤယရူၤရှလ့ၣ်ဖိ,ဒီးပှၤယူဒၤဖိဒီကီၢ်ညါ,ဒီးပှၤအိၣ်လၢယၢ်ဒ့ၣ်အနံၤခဲလၢာ်န့ၣ်လဲၤဆူအအိၣ်,

6 ဒီးတဲလီၤကျဲၤလီၤအတၢ်ဒဲးဘး,ဒီးဒိးဘျၢအသးလၢအစုပူၤ,လၢထံကျိယၢ်ဒ့ၣ်အပူၤလီၤ.

7 မ့မ့ၢ်တုၤအထံၣ်ဘၣ်ပှၤဖၤရံၤရှဲ,ဒီးပှၤစးဒူၤကဲအါဂၤဟဲဒ်သိးအကဒိးဘျၢဘၣ်အသးဒီး,စံးဘၣ်အီၤ,ဂုၢ်ပွ့ၤတဖုဧၢ,မ့ၢ်မတၤသိၣ်လိသုဒ်သိးသုကဃ့ၢ်ထီၣ်ကွံာ်လၢတၢ်သးထီၣ်လၢအကဟဲန့ၣ်တဂၤလဲၣ်.

8 မၤသးဒ်န့ၣ်ဒီးသၣ်ထီၣ်တၤသၣ်ဂ့ၤဘၣ်ဃးဒီးတၢ်ပီၢ်ယၢ်လီၤက့ၤပသးန့ၣ်တက့ၢ်.

9 ဒီးသုသုတဆိကမိၣ်,ဒီးစံးလၢသုသးကံၢ်ပူၤလၢစီၤအၤဘြၤဟၣ်မ့ၢ်ပပၢ်န့ၣ်တဂ့ၤ.အဂ့ၢ်ဒ်အံၤ,ယစံးဘၣ်သုလၢယွၤဒုးဂဲၤဆၢထၢၣ်ဖိတဖၣ်လၢစီၤအၤဘြၤဟၣ်အဂီၢ်လၢလၢၢ်တဖၣ်အံၤသ့လီၤ.

10 ဒီးခဲကနံၣ်အံၤဒၣ်လဲာ်ကွါပာ်လီၤလံအသးလၢသ့ၣ်အခီၣ်ထံးလံ.မၤသးဒ်န့ၣ်ဒီးကယဲၢ်သ့ၣ်လၢအတသၣ်ဘၣ်တၤသၣ်ဂ့ၤကိးထံးဒဲးန့ၣ်ဘၣ်ကူာ်လီၤကွံာ်,ဒီးဘၣ်ဘျုးလီၤကွံာ်လၢမ့ၣ်အူပူၤလီၤ.

11 ယဲဒၣ်အံၤယဘျၢသုလၢထံကျါလၢတၢ်ပီၢ်ယၢ်လီၤက့ၤပသးအဂ့ၢ်လီၤ.မ့မ့ၢ်ပှၤဟဲလၢယလီၢ်ခံတဂၤသ့န့ၢ်ယၤတက့ၢ်လီၤ.ဖဲယကစိာ်အခီၣ်ဖံးဒီး,ယတကြၢးဘၣ်လီၤ.အဝဲဒၣ်ကဘျၢသုလၢသးစီဆှံဒီးလၢမ့ၣ်အူအပူၤလီၤ.

12 အကီၢ်လဲၢ်အိၣ်လၢအစုပူၤဒီးကဝံၢ်ကဆှီထီၣ်ကွံာ်အကြဲၢ်,ဒီးကဂၢ်ဖှိၣ်အဘုလၢအဖီပူၤလီၤ.မ့မ့ၢ်လီၢ်အကမူၣ်န့ၣ်ကဆူးထီၣ်ကွံာ်ဝဲလၢမ့ၣ်အူလီၤပံာ်တသ့ဘၣ်အပူၤလီၤ.

13 တုၤနုၤတစုယ့ၣ်ရှူးဟဲလၢကၤလံၤလါဆူစီၤယိၤဟၣ်အအိၣ်ဖဲထံယၢ်ဒ့ၣ်အနံၤ,ဒ်သိးအကဒိးဘျၢအသးလၢအစုပူၤလီၤ.

14 ဒီးစီၤယိၤဟၣ်ကတိၤတြီတၢ်,ဒီးစံးဝဲဒၣ်ယဲဒၣ်အံၤယဒိးဘျၢယသးလၢနစုပူၤအလီၢ်အိၣ်,ဒီးနဟဲနဲဆူယအိၣ်ဧါ.

15 ဒီးယ့ၣ်ရှူးကတိၤဆၢတၢ်ဒီးစံးဘၣ်အီၤ,ခဲကနံၣ်အံၤပျဲတက့ၢ်.အဂ့ၢ်ဒ်အံၤ,ဂ့ၤပမၤလၢထီၣ်ပှဲၤထီၣ်ကယဲၢ်တၢ်တီတၢ်လိၤခဲလၢာ်ဒ်န့ၣ်လီၤ.

16 ဒီးယ့ၣ်ရှူးဒိးဘျၢအသးဝံၤဒီး,လဲၤထီၣ်တကီၢ်ခါလၢထံကျါ,ဒီးကွၢ်ကွၢ်,မူခိၣ်အိးထီၣ်အသးလၢအဂီၢ်,ဒီးထံၣ်ယွၤအသးယုၢ်လီၤဒ်ထိၣ်လွံၢ်အသိး,ဒီးဟဲလီၤလၢအလိၤန့ၣ်လီၤ.

17 ဒီးကွၢ်ကွၢ်,တၢ်ကလုၢ်သီၣ်လီၤလၢမူခိၣ်ဒီးစံးဝဲဒၣ်,အဝဲတဂၤအံၤမ့ၢ်ယဖိခွါလၢယအဲၣ်,ဒီးဘၣ်ယသးလၢအီၤလီၤ.