Mark 7
1 ဒီးပှၤဖၤရံၤရှဲတဖၣ်,ဒီးပှၤကွဲးလံာ်တနီၤနီၤလၢအဟဲလၢယရူၤရှလ့ၣ်န့ၣ်,အိၣ်ဖှိၣ်ရိဖှိၣ်လၢအအိၣ်,
2 ဒီးထံၣ်ဘၣ်လၢအပျဲၢ်အဘီၣ်တနီၤနီၤအီၣ်ကိၣ်လၢအစုတကဆှီဘၣ်,ဒ်ပစံးတၢ်အသိး,အစုလၢအတသ့ကွံာ်ဘၣ်လီၤ.
3 အဂ့ၢ်ဒ်အံၤ,ပှၤဖၤရံၤရှဲ,ဒီးပှၤယူဒၤဖိခဲလၢာ်န့ၣ်,မ့ၢ်အတိၢ်ပမှံၤပပှၢ်အတၢ်စံၣ်စိၤတဲစိၤဒီး,မ့ၢ်တသ့ကွံာ်ဘၣ်အစုလၢအစုခိၣ်ဒီး,တအီၣ်ဘၣ်တၢ်ဘၣ်.
4 ဒီးတုၤအဟဲက့ၤလၢဖၠါပူၤန့ၣ်,မ့ၢ်တဘျၢဘၣ်အသးဒီး,တအီၣ်ဘၣ်တၢ်ဘၣ်.လၢန့ၣ်အမဲာ်ညါ,အိၣ်ဒံးတၢ်အဂုၤအဂၤအါမံၤ,လၢအဒိးန့ၢ်ဝဲဒ်သိးအကတိၢ်န့ၢ်လီၤ.ဘျၢလီခီ,ဒီးသလူသ့ၣ်,ဒီးသလူတိၢ်ဘီ,[ဒီးစီၢ်နီၤခိၣ်]လီၤ.
5 တုၤနုၤတစုပှၤဖၤရံၤရှဲ,ဒီးပှၤကွဲးလံာ်သ့ၣ်တဖၣ်န့ၣ်သံကွၢ်အီၤ,ဘၣ်မနုၤလၢနပျဲၢ်တလဲၤဘၣ်ဒ်ပမှံၤပပှၢ်အတၢ်စံၣ်စိၤတဲစိၤအသိးဘၣ်,ဒီးအီၣ်တၢ်အီတၢ်ဒီးအစုတသ့ကွံာ်ဘၣ်န့ၣ်လဲၣ်.
6 ဒီးအဝဲဒၣ်စံးဆၢတၢ်ဒီးစံးဘၣ်အီၤ,စီၤယရှါယၤကတိၤတၢ်လၢဝံအကျိာ်လၢပှၤလီတၢ်ဖိသုဝဲသ့ၣ်အဂ့ၢ်အကျိၤ,ဘၣ်မးလီၤ.တၢ်ကွဲးအသးဒ်အံၤ,ပှၤတကလုာ်အံၤယူးယီၣ်ယၤလၢအပျုၤ,မ့မ့ၢ်အသးန့ၣ်ယံၤဝဲဒီးယၤလီၤ,
7 မ့ၢ်အဝဲသ့ၣ်သိၣ်လိတၢ်လၢပှၤကညီအတၢ်မၤလိာ်လၢတၢ်သိၣ်တၢ်သီအလီၢ်ဒီး,ဘူၣ်ထီၣ်ဘါထီၣ်ယၤကလီကလီ.
8 သုပာ်ကွံာ်ယွၤအတၢ်သိၣ်တၢ်သီ,ဒီးသုတိၢ်န့ၢ်ပှၤကညီအတၢ်စံၣ်စိၤတဲစိၤလီၤ.
9 ဒီးစံးဘၣ်အီၤ,ဒ်သိးသုကတိၢ်န့ၢ်သုတၢ်စံၣ်စိၤတဲစိၤဒီး,သုမၤယွၤအတၢ်သိၣ်တၢ်သီလၢတၢ်ကလီကလီ,ဘၣ်မးလဲၣ်.
10 အဂ့ၢ်ဒ်အံၤ,စီၤမိၤရှ့စံးဝဲဒၣ်,ယူးယီၣ်နမိၢ်ဒီးနပၢ်တက့ၢ်.ဒီးအမိၢ်မ့ၢ်ဂ့ၤ,အပၢ်မ့ၢ်ဂ့ၤ,ပှၤလၢအကတိၤအၢအီၤန့ၣ်,မ်အသံသပှၢ်တၢၢ်တက့ၢ်.
11 မ့မ့ၢ်သုဝဲသ့ၣ်အံၤသုစံး,ပှၤကညီမ့ၢ်စံးဘၣ်အမိၢ်အပၢ်,ဖဲဒၣ်တၢ်လၢနဂ့ၤန့ၢ်ဘၣ်လၢယၤတမံၤမံၤအံၤ,မ်အကကဲလၢကီၤဘၣ်(ဒ်ပစံးတၢ်အသိးတၢ်မၤဘူၣ်)တက့ၢ်န့ၣ်ဒီး,
12 သုတဒုးမၤစၢၤလၢၤဘၣ်အီၤလၢအမိၢ်အပၢ်ဘၣ်.
13 အန့ၣ်ဒီးသုမၤဟးဂီၤယွၤအကလုၢ်အကထါလၢသုတၢ်စံၣ်စိၤတဲစိၤလၢသုစံၣ်ဃဲၤက့ၤန့ၣ်လီၤ.ဒီးတၢ်ဂုၤတၢ်ဂၤဒ်န့ၣ်အသိး,သုမၤအါမံၤလီၤ.
14 ဒီးကိးန့ၢ်ပှၤဂီၢ်မုၢ်ခဲလၢာ်ဆူအအိၣ်ဒီးစံးဘၣ်အီၤ,ကနၣ်ယကလုၢ်သုဝဲခဲလၢာ်,ဒီးနၢ်ပၢၢ်တက့ၢ်.
15 တၢ်အိၣ်လၢခိလၢအလဲၤနုာ်ဝဲဆူပှၤကညီအပူၤန့ၣ်,မၤတကဆှီဘၣ်အီၤတသ့ဘၣ်နီတမံၤဘၣ်.မ့မ့ၢ်တၢ်လၢအဟဲထီၣ်လၢအပူၤတဖၣ်န့ၣ်,မ့ၢ်တၢ်လၢအမၤကဆှီဘၣ်ပှၤကညီလီၤ.
16 ပှၤမ့ၢ်အိၣ်ဒီးအနၢ်လၢအနၢ်ဟူတၢ်တဂၤဂၤဒီး,မ်အနၢ်ဟူတၢ်တက့ၢ်.
17 ဒီးတုၤအဟးထီၣ်လၢပှၤဂီၢ်မုၢ်အအိၣ်ဒီးလဲၤနုာ်လၢဟံၣ်ပူၤဒီး,အပျဲၢ်အဘီၣ်သံကွၢ်အီၤလၢတၢ်ကတိၤဒိန့ၣ်အဂ့ၢ်လီၤ.
18 ဒီးစံးဘၣ်အီၤ,သုသူၣ်ဆးသးဆးတအိၣ်ဘၣ်စ့ၢ်ကီးဒ်န့ၣ်အသိးဧါ.ကယဲၢ်တၢ်အိၣ်လၢခိလၢအလဲၤနုာ်ဆူပှၤကညီအပူၤန့ၣ်,မၤတကဆှီဘၣ်အီၤတသ့ဘၣ်န့ၣ်,သုနၢ်တပၢၢ်ဘၣ်ဧါ.
19 အဂ့ၢ်ဒ်အံၤ,တလဲၤနုာ်ဘၣ်ဝဲဆူအသးအပူၤဘၣ်.မ့မ့ၢ်ဆူအဟၢဖၢပူၤဒီးလဲၤလီၤဝဲဆူအ့ၣ်ဆါအလီၢ်သတးဒီး,မၤကဆှီထီၣ်ကယဲၢ်တၢ်အီၣ်တၢ်အီခဲလၢာ်လီၤ.
20 ဒီးစံးဝဲဒၣ်,တၢ်လၢအဟဲထီၣ်လၢပှၤကညီအပူၤန့ၣ်,မၤတကဆှီဘၣ်ပှၤကညီလီၤ.
21 အဂ့ၢ်ဒ်အံၤ,တၢ်ကူၣ်အအၢတဖၣ်,တၢ်မၤကမၣ်မုၣ်ကမၣ်ခွါ,တၢ်ဟုၣ်တၢ်ဘျၣ်,တၢ်မၤသံပှၤကညီ,
22 တၢ်အဲၣ်ဘံးအဲၣ်ဘၢ,တၢ်သူၣ်ကွံသးကွံ,တၢ်အၢတၢ်သီ,တၢ်လီတၢ်ဝ့ၤ,တၢ်လုၣ်ကိလုၣ်ကပာ်,တၢ်သးကါ,တၢ်ဒုၣ်ဒွဲၣ်,တၢ်ပာ်ထီၣ်ထီပသး,တၢ်ကူၣ်တဘၣ်ဘၣ်တဖၣ်န့ၣ်,ဟဲထီၣ်ဝဲလၢအပူၤ,လၢပှၤကညီအသးကံၢ်ပူၤန့ၣ်လီၤ.
23 ကယဲၢ်တၢ်အၢတဖၣ်အံၤခဲလၢာ်ဟဲထီၣ်လၢအပူၤ,ဒီးမၤကဆှီဘၣ်ပှၤကညီလီၤ.
24 ဒီးဂဲၤဆၢထၢၣ်ဖဲန့ၣ်,ဒီးလဲၤဝဲဆူစိၢ်ဒီးစံဒိၣ်အကီၢ်အဃၢၤ,ဒီးလဲၤနုာ်ဝဲလၢဟံၣ်တဖျၢၣ်အပူၤ,ဒီးအသးအိၣ်လၢပှၤသုတသ့ၣ်ညါနီတဂၤတဂ့ၤ,ဒီးအိၣ်ခူသူၣ်ဝဲတသ့ဘၣ်လီၤ.
25 အဂ့ၢ်ဒ်အံၤ,ပိာ်မုၣ်လၢတၢ်နါအိၣ်လၢအဖိမုၣ်အလိၤတဂၤ,နၢ်ဟူအဂ့ၢ်အကျိၤ,ဒီးဟဲဝဲ,ဒီးထိၣ်လီၤပှီၤအသးလၢအခီၣ်ထံးလီၤ.
26 ဒီးပိာ်မုၣ်န့ၣ်မ့ၢ်ပှၤဟ့းလ့ၣ်ဖိအကလုာ်,ကီၢ်စူၤရံဖံၤနံက့ၤဖိလီၤ.ဒီးဃ့ကညးဝဲလၢအကဟီထီၣ်ကွံာ်တၢ်နါလၢအဖိမုၣ်အလိၤလီၤ.
27 ဒီးယ့ၣ်ရှူးစံးဘၣ်အီၤ,ပျဲဖိသၣ်တဖၣ်ကအီၣ်ဘျဲးအီၣ်ဆိဒၣ်ကလိာ်တက့ၢ်.အဂ့ၢ်ဒ်အံၤ,တၢ်လၢဖိအတၢ်အီၣ်န့ၣ်,တဂ့ၤဟံးန့ၢ်ဒီးကွံာ်လီၤန့ၢ်လၢထွံၣ်တဖၣ်ဘၣ်.
28 ဒီးအဝဲဒၣ်စံးဆၢတၢ်ဒီးစံးဘၣ်အီၤ,မ့ၢ်လံ,ကစၢ်ဧၢ.အဂ့ၢ်ဒ်အံၤ,ထွံၣ်အိၣ်လၢစီၢ်နီၤခိၣ်အဖီလာ်တဖၣ်န့ၣ်,အီၣ်ဖိသၣ်အတၢ်လီၤဆှုလီၤပလ့ၤလီၤ.
29 ဒီးစံးဘၣ်အီၤ,မ့ၢ်နတၢ်ကတိၤတထံၣ်န့ၣ်အဃိဒီး,က့ၤတက့ၢ်.တၢ်နါဟးထီၣ်ကွံာ်လံလၢနဖိမုၣ်အလိၤလံ.
30 ဒီးတုၤအက့ၤတုၤလၢဟံၣ်ဒီး,ထံၣ်ဘၣ်ဝဲလၢတၢ်နါဟးထီၣ်ကွံာ်လံ,ဒီးအဖိမုၣ်မံလီၤလၢအလီၢ်မံပူၤလီၤ.
31 ဒီးဟးထီၣ်ကွံာ်ကဒီးဝဲလၢကီၢ်စိၢ်,ဒီးခီဂာ်စံဒိၣ်အကီၢ်,ဒီးလဲၤဆူပီၣ်လဲၣ်ကၤလံၤလါ,ဒီးခီဂာ်ဒ့းကးပလံၣ်အကီၢ်ဃၢၤအသးကံၢ်ပူၤလီၤ.
32 ဒီးပှၤဟဲစိာ်ပှၤလၢအနၢ်တအၢဒီးအုးအးကတာ်ပျ့ၤတဂၤ,ဆူအအိၣ်ဒီးဃ့ကညးအီၤ,ဒ်သိးအကပာ်ထီၣ်အစုလၢအလိၤလီၤ.
33 ဒီးဟံးန့ၢ်ဒီးဆှၢထီၣ်ကွံာ်အီၤလၢပှၤဂီၢ်မုၢ်အကျါ,ဆူတၢ်တဒၢ,ဒီးအူနုာ်အစုနၢဆူအနၢ်ပူၤ,ဒီးထူးပှဲာ်ဝဲ,ဒီးထိးဘၣ်အပျ့ၤလီၤ.
34 ဒီးကွၢ်ထီၣ်တၢ်ဆူမူခိၣ်ဒီးကအုကစွါဝဲ,ဒီးစံးဘၣ်အီၤ,အ့ၤဖးသါ,ဒ်ပစံးတၢ်အသိး,အိးထီၣ်တက့ၢ်.
35 ဒီးအနၢ်ကပီၤထီၣ်တကီၢ်ခါ,ဒီးအပျ့ၤအထူၣ်အပျၢ်လီၤဆှၣ်က့ၤဝဲ,ဒီးကတိၤက့ၤတၢ်ကစီဒီလီၤ.
36 ဒီးမၤလိာ်အဝဲသ့ၣ်,ဒ်သိးအသုတစံးဘၣ်တဲဘၣ်ပှၤနီတဂၤတဂ့ၤလီၤ,ဘၣ်ဆၣ်ဒီး,ဒံးမၤလိာ်ဝဲန့ၣ်,အဝဲသ့ၣ်ဒံးစံးဘၣ်တဲဘၣ်အါထီၣ်အါအါကလဲာ်လီၤ.
37 ဒီးပာ်အသးကမၤကမၣ်တကူၢ်သ့ၣ်ဒိၣ်ဒိၣ်ကလဲာ်,ဒီးစံးဝဲ,အဝဲဒၣ်မၤတၢ်လံခဲလၢာ်ကစီဒီလံ.ပှၤလၢအနၢ်တအၢတဖၣ်န့ၣ်,ဒုးနၢ်ဟူဝဲ,ဒီးပှၤလၢအတအုၣ်တဖၣ်န့ၣ်,ဒုးကတိၤဝဲလီၤ.