Library · ksw

John 1

1 လၢထံးလၢသီန့ၣ်တၢ်ကလုၢ်အိၣ်ဝဲ,ဒီးတၢ်ကလုၢ်န့ၣ်အိၣ်ဝဲဒီးယွၤ,ဒီးတၢ်ကလုၢ်န့ၣ်မ့ၢ်ယွၤလီၤ.

2 အဝဲဒၣ်န့ၣ်အိၣ်ဒီးယွၤလၢထံးလၢသီလီၤ.

3 ကယဲၢ်တၢ်ခဲလၢာ်ခဲဆ့အံၤကဲထီၣ်ဝဲလၢအစုပူၤ,ဒီးတၢ်လၢအကဲထီၣ်ဝဲန့ၣ်,တကဲထီၣ်ဘၣ်လၢအစုပူၤဒီး,တအိၣ်ဘၣ်နီတမံၤဘၣ်.

4 တၢ်မူအိၣ်ဝဲလၢအပူၤ,ဒီးတၢ်မူန့ၣ်မ့ၢ်ပှၤကညီအတၢ်ကပီၤလီၤ.

5 ဒီးတၢ်ကပီၤန့ၣ်ကပီၤထီၣ်လၢတၢ်ခံးကျါဒီးတၢ်ခံးန့ၣ်တတူၢ်လိာ်ဘၣ်အီၤဘၣ်.

6 ပှၤကညီလၢအဘၣ်တၢ်မၢလီၤအီၤလၢယွၤန့ၣ်အိၣ်တဂၤ,အမံၤမ့ၢ်စီၤယိၤဟၣ်လီၤ.

7 ဒ်သိးပှၤခဲလၢာ်ကစူၢ်က့ၤနာ်က့ၤတၢ်လၢအီၤဒီး,အဝဲဒၣ်ဟဲလၢတၢ်အုၣ်အသးအဂီၢ်,ဒ်သိးအကအုၣ်အသးလၢတၢ်ကပီၤအဂ့ၢ်လီၤ.

8 အဝဲဒၣ်န့ၣ်တမ့ၢ်ဘၣ်တၢ်ကပီၤန့ၣ်ဘၣ်.မ့ၢ်အဟဲဝဲဒ်သိးအကအုၣ်အသးလၢတၢ်ကပီၤန့ၣ်အဂ့ၢ်လီၤ.

9 တၢ်ကပီၤအနီၢ်နီၢ်န့ၣ်မ့ၢ်တၢ်လၢအဒုးကပီၤထီၣ်ကယဲၢ်ပှၤကညီလၢအဟဲနုာ်လၢဟီၣ်ခိၣ်ချၢအံၤလီၤ.

10 အိၣ်ဝဲလၢဟီၣ်ခိၣ်,ဒီးဟီၣ်ခိၣ်ကဲထီၣ်လၢအစုပူၤ,ဒီးဟီၣ်ခိၣ်တသ့ၣ်ညါဘၣ်အီၤဘၣ်.

11 ဟဲဆူအတၢ်ဒၣ်ဝဲ,ဒီးအပှၤဒၣ်ဝဲတတူၢ်လိာ်ဘၣ်အီၤဘၣ်.

12 ဘၣ်ဆၣ်ဒီး,ဖဲဒၣ်ပှၤလၢအတူၢ်လိာ်အီၤ,ပှၤလၢအစူၢ်က့ၤနာ်က့ၤအမံၤတဖၣ်န့ၣ်,ဟ့ၣ်ဝဲလၢအစိအကမီၤ,ဒ်သိးအကကဲထီၣ်ယွၤအဖိလီၤ.

13 ပှၤတဖၣ်န့ၣ်အိၣ်ဖျဲၣ်လၢတၢ်သွံၣ်တမ့ၢ်ဘၣ်,လၢတၢ်ညၣ်အသးတမ့ၢ်ဘၣ်,လၢပှၤကညီအသးတမ့ၢ်ဘၣ်,မ့ၢ်ဝဲလၢယွၤလီၤ.

14 ဒီးတၢ်ကလုၢ်န့ၣ်ကဲထီၣ်လၢတၢ်ညၣ်,ဒီးလၢပှဲၤဒီးတၢ်ဘျုးတၢ်ဖှိၣ်ဒီးတၢ်မ့ၢ်တၢ်တီ,ဒီးအိၣ်ဝဲဆိးဝဲလၢပကျါ,ဒီးပထံၣ်ဘၣ်အလၤအကပီၤလီၤဂာ်လၢပၢ်အဖိခွါတဂၤဃီအလၤအကပီၤလီၤ.

15 စီၤယိၤဟၣ်အုၣ်အသးလၢအဂ့ၢ်,ဒီးကိးပသူထီၣ်ဒီးစံးဝဲဒၣ်,ပှၤအံၤမ့ၢ်ပှၤလၢယစံး,ပှၤဟဲလၢယလီၢ်ခံတဂၤန့ၣ်,ဒိၣ်န့ၢ်ယၤတက့ၢ်လီၤ.အဂ့ၢ်ဒ်အံၤ,အိၣ်ဆိန့ၢ်ယၤလီၤ.

16 ဒီးပဝဲဒၣ်ခဲလၢာ်အံၤ,ပဒိးန့ၢ်တၢ်လၢအဝဲဒၣ်အတၢ်လၢတၢ်ပှဲၤအပူၤ,ဒီးတၢ်ဘျုးလၢတၢ်ဘျုးအဖီခိၣ်လီၤ.

17 အဂ့ၢ်ဒ်အံၤ,တၢ်ဟ့ၣ်လီၤတၢ်သိၣ်တၢ်သီလၢစီၤမိၤရှ့အစုပူၤ,မ့မ့ၢ်တၢ်ဘျုးတၢ်ဖှိၣ်ဒီးတၢ်မ့ၢ်တၢ်တီန့ၣ်,အိၣ်ထီၣ်ဝဲလၢယ့ၣ်ရှူးခရံာ်န့ၣ်လီၤ.

18 ပှၤတထံၣ်ဘၣ်ယွၤနီတခီၣ်နီတဂၤဘၣ်.အဖိခွါတဂၤဃီအိၣ်လၢပၢ်အသးနါပှၢ်န့ၣ်,လီၣ်ဖျါထီၣ်လံအီၤလံ.

19 ဒီးဖဲပှၤယူဒၤဖိတဖၣ်မၢလီၤပှၤလုၢ်တၢ်အဒိၣ်ဒီးပှၤလ့ၤဝံဖိတဖၣ်,လၢယရူၤၡလ့ၣ်အပူၤဆူအအိၣ်,ဒ်သိးအကသံကွၢ်အီၤ,နဲဒၣ်အံၤနမ့ၢ်မတၤတဂၤလဲၣ်န့ၣ်ဒီး,စီၤယိၤဟၣ်အတၢ်အုၣ်အသးမ့ၢ်အအံၤ,

20 ဒီးအုၣ်အသးဒီးတသမၢဘၣ်ဝဲဘၣ်,ဒီးအုၣ်အသး,လၢယဲဒၣ်အံၤ,ယတမ့ၢ်ဘၣ်ခရံာ်ဘၣ်.

21 ဒီးအဝဲသ့ၣ်သံကွၢ်အီၤ,မ့မ့ၢ်ဒ်န့ၣ်ဒီး,နမ့ၢ်မတၤတဂၤလဲၣ်.နမ့ၢ်စီၤအ့ၤလံယၤဧါ.ဒီးစံးဝဲဒၣ်,တမ့ၢ်ဘၣ်.မ့ၢ်နမ့ၢ်ဝံအဝဲန့ၣ်ဧါ.ဒီးကတိၤဆၢဝဲ,တမ့ၢ်ဘၣ်.

22 မၤသးဒ်န့ၣ်ဒီး,အဝဲသ့ၣ်စံးဘၣ်အီၤ,နမ့ၢ်မတၤတဂၤလဲၣ်,ဒ်သိးပကစံးဘၣ်က့ၤပှၤလၢအမၢလီၤပှၤန့ၣ်လီၤ.နစံးလၢနဂ့ၢ်နကျိၤဒၣ်နဲဒ်လဲၣ်.

23 ဒီးစံးဝဲဒၣ်,ယမ့ၢ်ပှၤလၢအကိးထီၣ်လၢပှၢ်မုၢ်ကနၢအကလုၢ်သီၣ်,မၤလိၤက့ၤကစၢ်အကျဲဧိၤကပူၤဧိၤတက့ၢ်,ဒ်စီၤယၡါယၤစံးဝဲအသိးန့ၣ်လီၤ.

24 ဒီးပှၤလၢတၢ်မၢလီၤအီၤတဖၣ်န့ၣ်,ဘၣ်ဃးဒီးပှၤဖၤရံၤၡဲန့ၣ်လီၤ.

25 ဒီးသံကွၢ်အီၤ,ဒီးစံးဘၣ်အီၤ,မၤသးဒ်န့ၣ်ဒီး,နဲဒၣ်အံၤ,နမ့တမ့ၢ်ဘၣ်ခရံာ်န့ၣ်,နမ့တမ့ၢ်ဘၣ်စီၤအ့ၤလံယၤ,နမ့တမ့ၢ်ဘၣ်ဝံအဝဲန့ၣ်ဘၣ်ဒီး,ဘၣ်မနုၤလၢနဘျၢတၢ်လဲၣ်.

26 ဒီးစီၤယိၤဟၣ်ကတိၤဆၢအီၤဒီးစံးဝဲဒၣ်,ယဲဒၣ်အံၤယဘျၢတၢ်လၢထံကျါလီၤ.

27 ဘၣ်ဆၣ်ဒီးပှၤလၢသုကျါ,လၢသုတသ့ၣ်ညါဘၣ်အီၤန့ၣ်,အိၣ်ဝဲတဂၤလီၤ.အဝဲန့ၣ်ဟဲလၢယလီၢ်ခံ,ဒီးထဲယကဃ့ၣ်လီၤအခီၣ်ဖံးအပျံၤဒီး,ယတကြၢးဘၣ်ယဲဘၣ်.

28 တၢ်န့ၣ်တဖၣ်မၤအသးဖဲစီၤယိၤဟၣ်ဘျၢတၢ်လၢဘ့ၤသနံအပူၤ,အိၣ်လၢယၢ်ဒ့ၣ်ဝၢ်ဘးခီလီၤ.

29 မုၢ်ဆ့ၣ်ထီၣ်တနံၤန့ၣ်,(စီၤယိၤဟၣ်)ထံၣ်ဘၣ်ယ့ၣ်ရှူးဟဲဆူအအိၣ်ဒီးစံးဝဲဒၣ်,ကွၢ်ကွၢ်,ယွၤအသိဖိလၢအစိာ်ထီၣ်ကွံာ်ပှၤဟီၣ်ခိၣ်ဖိအတၢ်ဒဲးဘးလီၤ.

30 အဝဲဒၣ်အံၤမ့ၢ်ပှၤလၢယစံးတ့ၢ်လၢအဂ့ၢ်,ပှၤဟဲလၢယလီၢ်ခံတဂၤန့ၣ်,အိၣ်လၢယမဲာ်ညါလီၤ.အဂ့ၢ်ဒ်အံၤ,အိၣ်ဆိန့ၢ်ယၤလီၤ.

31 ဒီးယဲဒၣ်အံၤ,ယတသ့ၣ်ညါဘၣ်အီၤဘၣ်,မ့မ့ၢ်ဒ်သိးအကအိၣ်ဖျါလၢအံၣ်စရ့လးဒီး,ယဟဲဘျၢတၢ်လၢထံကျါလီၤ.

32 ဒီးစီၤယိၤဟၣ်အုၣ်အသးဒီးစံးဝဲဒၣ်,ယထံၣ်သးန့ၣ်ဟဲလီၤလၢမူခိၣ်ဒ်ထိၣ်လွံၢ်အသိး,ဒီးအိၣ်ဝဲဆိးဝဲလၢအလိၤလီၤ.

33 ဒီးယဲဒၣ်အံၤ,ယတသ့ၣ်ညါဘၣ်အီၤဘၣ်.မ့မ့ၢ်ပှၤလၢအမၢယဟဲဘျၢတၢ်လၢထံကျါတဂၤ,အဝဲဒၣ်စံးဘၣ်ယၤ,ပှၤလၢနထံၣ်သးန့ၣ်ဟဲလီၤ,ဒီးအိၣ်ဝဲဆိးဝဲလၢအလိၤ,အဝဲတဂၤန့ၣ်ကဘျၢတၢ်လၢသးစီဆှံအပူၤလီၤ.

34 ဒီးယထံၣ်ဘၣ်လံ,ဒီးယအုၣ်လံယသးလၢအဝဲဒၣ်န့ၣ်မ့ၢ်ယွၤအဖိခွါလီၤ.

35 မုၢ်ဆ့ၣ်ထီၣ်တနံၤစီၤယိၤဟၣ်ဆၢထၢၣ်ကဒီးဒီးအပျဲၢ်ခံဂၤ,ဒီးကွၢ်ယ့ၣ်ရှူးလဲၤတၢ်,ဒီးစံးဝဲဒၣ်,ကွၢ်ကွၢ်,ယွၤအသိဖိလီၤ.

36 ဒီးအပျဲၢ်ခံဂၤန့ၣ်နၢ်ဟူအကတိၤတၢ်,ဒီးပိာ်ထီၣ်ယ့ၣ်ရှူးအခံလီၤ.

37 ဒီးယ့ၣ်ရှူးဃၣ်ဃီၤအသး,ဒီးထံၣ်လၢအပိာ်အခံ,ဒီးစံးဘၣ်အီၤ,

38 သုဃုမနုၤတမံၤလဲၣ်.ဒီးအဝဲသ့ၣ်စံးဘၣ်အီၤ,ရၤဘံဧၢ,(အခီပညီမ့ၢ်သရၣ်),နအိၣ်နဆိးဖဲလဲၣ်ပူၤလဲၣ်.

39 ဒီးအဝဲဒၣ်စံးဘၣ်အီၤ,ဟဲဒီးကွၢ်တက့ၢ်.ဒီးလဲၤကွၢ်ဖဲအအိၣ်ဝဲ,ဒီးမ့ၢ်တဆံနၣ်ရံၣ်ဃၣ်ဃၣ်သတးဒီး,အိၣ်ဒီးအီၤတနံၤန့ၣ်လီၤ.

40 ဒီးပှၤလၢအနၢ်ဟူတၢ်လၢစီၤယိၤဟၣ်,ဒီးပိာ်ထီၣ်(ယ့ၣ်ရှူး)အခံခံဂၤအကျါန့ၣ်,တဂၤမ့ၢ်စီၤၡံမိၣ်ပ့းတရူးအဒီပုၢ်ဝဲၢ်,စီၤအၣ်ဒရ့းလီၤ.

41 အဝဲဒၣ်န့ၣ်ထံၣ်န့ၢ်ဆိအဒီပုၢ်ဝဲၢ်ဒၣ်ဝဲ,စီၤၡံမိၣ်,ဒီးစံးဘၣ်အီၤ,ပထံၣ်န့ၢ်လံမ့းၡံအၤန့ၣ်လံ.(အခီပညီမ့ၢ်ခရံာ်လီၤ.)

42 ဒီးလဲၤဆှၢအီၤဆူယ့ၣ်ရှူးအအိၣ်လီၤ.ဒီးယ့ၣ်ရှူးကွၢ်အီၤဒီးစံးဝဲဒၣ်,နဲဒၣ်အံၤ,နမ့ၢ်စီၤယိၤနါအဖိခွါစီၤၡံမိၣ်လီၤ.တၢ်ကကိးက့ၤနၤလၢစီၤက့ၤဖးလီၤ.(အခီပညီမ့ၢ်လၢၢ်လီၤ.)

43 မုၢ်ဆ့ၣ်ထီၣ်တနံၤန့ၣ်(ယ့ၣ်ရှူး)သါကလဲၤဆူကၤလံၤလါ,ဒီးထံၣ်န့ၢ်စီၤဖံလံးပူးဒီးစံးဘၣ်အီၤ,ပိာ်ယခံတက့ၢ်.

44 ဒီးစီၤဖံလံးပူးဘၣ်ဃးဒီးစီၤအၣ်ဒရ့းဒီးစီၤပ့းတရူးအဝ့ၢ်,ဘ့ၤသစဲဒၤလီၤ.

45 ဒီးစီၤဖံလံးပူးန့ၣ်ထံၣ်န့ၢ်စီၤနၤသန့လးဒီးစံးဘၣ်အီၤ,ပထံၣ်န့ၢ်လံပှၤလၢစီၤမိၤရှ့လၢလံာ်တၢ်သိၣ်တၢ်သီအပူၤ,ဒီးဝံသ့ၣ်တဖၣ်န့ၣ်,ကွဲးဝဲလၢအဂ့ၢ်,ပှၤနစၤရ့းဖိစီၤယိၤသးအဖိခွါ,ယ့ၣ်ရှူးတဂၤလံ.

46 ဒီးစီၤနၤသန့လးစံးဘၣ်အီၤ,တၢ်ဂ့ၤတၢ်ဝါတမံၤမံၤဟဲထီၣ်လၢနစၤရ့းအပူၤဘၣ်ကသ့ဧါ.ဒီးစီၤဖံလံးပူးစံးဘၣ်အီၤ,ဟဲကွၢ်တက့ၢ်.

47 ယ့ၣ်ရှူးထံၣ်ဘၣ်စီၤနၤသန့လးဟဲဆူအအိၣ်ဒီးကတိၤတၢ်လၢအဂ့ၢ်,ကွၢ်ကွၢ်,ပှၤအံၣ်စရ့လးဖိနီၢ်နီၢ်,လၢတၢ်လီတၢ်ဝ့ၤတအိၣ်လၢအပူၤဘၣ်တဂၤလီၤ.

48 ဒီးစီၤနၤသန့လးစံးဘၣ်အီၤ,နသ့ၣ်ညါယၤဒ်လဲၣ်.ဒီးယ့ၣ်ရှူးကတိၤဆၢတၢ်ဒီးစံးဘၣ်အီၤ,လၢစီၤဖံလံးပူးတချုးကိးဒံးဘၣ်နၤ,ဖဲနအိၣ်လၢချၢၣ်ဒၢအခီၣ်ထံးန့ၣ်,ယထံၣ်နၤလီၤ.

49 ဒီးစီၤနၤသန့လးကတိၤဆၢတၢ်ဒီးစံးဘၣ်အီၤ,ရၤဘံဧၢ,နဲဒၣ်အံၤနမ့ၢ်ယွၤအဖိခွါ,နမ့ၢ်အံၣ်စရ့လးအစီၤပၤလီၤ.

50 ဒီးယ့ၣ်ရှူးကတိၤဆၢတၢ်ဒီးစံးဘၣ်အီၤ,မ့ၢ်ယစံးဘၣ်နၤလၢယထံၣ်နၤလၢချၢၣ်ဒၢအခီၣ်ထံးဒီး,မ့ၢ်နနာ်တၢ်စ့ၢ်ကီးဧါ.နကထံၣ်ဘၣ်တၢ်ဒိၣ်န့ၢ်တၢ်အံၤတဖၣ်တက့ၢ်လီၤ.

51 ဒီးစံးဘၣ်အီၤ,ယစံးဘၣ်တဲဘၣ်သုတီတီလိၤလိၤ,လၢခံက့ၤအံၤဒီး,သုကထံၣ်ဘၣ်မူခိၣ်အိးထီၣ်အသး,ဒီးယွၤအကလူးတဖၣ်န့ၣ်လဲၤထီၣ်ဒီးဟဲလီၤလၢပှၤကညီဖိခွါအံၤအလိၤလီၤ.