Library · ksw

John 6

1 တၢ်န့ၣ်တဖၣ်အလီၢ်ခံဒီး,ယ့ၣ်ရှူးခီဂာ်ပီၣ်လဲၣ်ကၤလံၤလါတံၤဘ့ၤရံဆူဝၢ်ဘးခီလီၤ.

2 ဒီးပှၤဂီၢ်မုၢ်ဖးဒိၣ်ပိာ်ထီၣ်အခံ,အဂ့ၢ်ဒ်အံၤ,ထံၣ်အတၢ်လီၤလးလၢအမၤဝဲလၢပှၤအဆူးအဆါတဖၣ်အလိၤလီၤ.

3 ဒီးယ့ၣ်ရှူးလဲၤထီၣ်ဆူကစၢၢ်တဖျၢၣ်အလိၤ,ဒီးဆ့ၣ်နီၤဝဲဒီးအပျဲၢ်အဘီၣ်ဖဲန့ၣ်လီၤ.

4 ဒီးပှၤယူဒၤဖိအဘူၣ်လဲၤကပာ်အိၣ်ဘူးတ့ၢ်ဝဲလီၤ.

5 မၤသးဒ်န့ၣ်ဒီးယ့ၣ်ရှူးကျ့ထီၣ်အမဲာ်,ဒီးထံၣ်ပှၤဂီၢ်မုၢ်ဖးဒိၣ်ဟဲဆူအအိၣ်,ဒီးစံးဘၣ်စီၤဖံလံးပူး,အဝဲသ့ၣ်တဖၣ်,ဒ်သိးအကအီၣ်တၢ်ဒီး,ပပှ့ၤကိၣ်ကန့ၢ်ဖဲလဲၣ်ပူၤလဲၣ်.

6 ဒီးဒ်သိးအကမၤကွၢ်အီၤဒီး,ကတိၤတၢ်န့ၣ်လီၤ.အဂ့ၢ်ဒ်အံၤ,မ့ၢ်အကမၤဝဲဒ်လဲၣ်ဒ်လဲၣ်န့ၣ်,အကစၢ်ဒၣ်ဝဲသ့ၣ်ညါလီၤ.

7 ဒီးစီၤဖံလံးပူးစံးဆၢအီၤ,ဒ်သိးအဝဲသ့ၣ်ကန့ၢ်တဂၤတစဲးတဂၤတစဲးန့ၣ်ဒီး,ကိၣ်အပှ့ၤဒန့ၤရံၤခံကယၤတလၢဘၣ်ဝဲဘၣ်.

8 အပျဲၢ်အဘီၣ်,စီၤၡံမိၣ်ပ့းတရူးအဒီပုၢ်ဝဲၢ်,စီၤအၣ်ဒရ့းတဂၤစံးဘၣ်အီၤ,

9 ဖိသၣ်အိၣ်ဖဲအံၤတဂၤ,အကိၣ်အိၣ်ယဲၢ်ဖျၢၣ်,ဒီးအညၣ်အိၣ်ခံဘ့ၣ်လီၤ.ဘၣ်ဆၣ်ဒီးတၢ်တဖၣ်န့ၣ်,လၢပှၤပှဲၤအံၤအဂီၢ်,မ့ၢ်အမ့ၢ်မနုၤလဲၣ်.

10 ဒီးယ့ၣ်ရှူးစံးဝဲဒၣ်,မၢပှၤကညီဆ့ၣ်နီၤသန့ၤတက့ၢ်.ဒီးအလီၢ်ဖဲန့ၣ်နီၣ်အိၣ်အါမးလီၤ.မၤသးဒ်န့ၣ်ဒီး,ပှၤဆ့ၣ်နီၤသန့ၤတၢ်တဖၣ်န့ၣ်,အတၢ်ဂံၢ်အိၣ်ယဲၢ်ကထိဃၣ်ဃၣ်လီၤ.

11 ဒီးယ့ၣ်ရှူးဟံးန့ၢ်ကိၣ်,ဒီးစံးထီၣ်ပတြၢၤတၢ်အဘျုးအဖှိၣ်ဝံၤဒီး,ဟ့ၣ်လီၤဝဲလၢပှၤလၢအဆ့ၣ်နီၤသန့ၤတဖၣ်လီၤ.ဒ်န့ၣ်အသိးညၣ်န့ၣ်စ့ၢ်ကီး,ဖဲပှၤမိၣ်န့ၢ်ဘၣ်အသးလီၤ.

12 ဒီးတုၤအအီၣ်ဘျဲးအီၣ်ဝဲဒီး,စံးဘၣ်အပျဲၢ်အဘီၣ်,ဒ်သိးတၢ်သုတဟါမၢ်နီတစဲးတဂ့ၤဒီး,ထၢဖှိၣ်က့ၤအဘျဲၣ်အစဲၢ်တက့ၢ်.

13 မၤသးဒ်န့ၣ်ဒီးပှၤအီၣ်ကိၣ်ယဲၢ်ဖျၢၣ်,ဒီးအဘျဲၣ်အစဲၢ်အိၣ်လီၤတဲာ်န့ၣ်,ထၢဖှိၣ်က့ၤဝဲပှဲၤကုတဆံခံဒုလီၤ.

14 မၤသးဒ်န့ၣ်ဒီးပှၤတဖၣ်န့ၣ်တုၤအထံၣ်တၢ်ပနီၣ်လီၤလးလၢယ့ၣ်ရှူးမၤဝဲဒီး,စံးဝဲဒၣ်,အဝဲဒၣ်အံၤမ့ၢ်နီၢ်နီၢ်ဝံလၢအကဟဲဆူဟီၣ်ခိၣ်တဂၤန့ၣ်လီၤ.

15 မၤသးဒ်န့ၣ်ဒီး,ယ့ၣ်ရှူးသ့ၣ်ညါလၢအဝဲသ့ၣ်ကဟဲဒီးဟံးန့ၢ်ဆူၣ်အီၤ,ဒ်သိးအကပာ်ထီၣ်အီၤလၢစီၤပၤဒီး,လဲၤထီၣ်ကဒီးဆူကစၢၢ်အလိၤတဂၤဃီလီၤ.

16 ဒီးတုၤမုၢ်ဟါလီၤဒီး,အပျဲၢ်အဘီၣ်လဲၤလီၤဆူပီၣ်လဲၣ်,

17 ဒီးလဲၤထီၣ်ဆူကဘီပူၤ,ဒီးခီဃီၤပီၣ်လဲၣ်ဆူကပ့းရနီၣ်လီၤ.

18 တုၤနုၤတစုတၢ်ခံးလီၤ,ဒီးယ့ၣ်ရှူးဟဲတတုၤဒံးဘၣ်ဆူအအိၣ်ဘၣ်လီၤ.ဒီးကလံၤအူတၢ်ဆူၣ်ဒီး,ပီၣ်လဲၣ်ဟူးဂဲၤဝဲလီၤ.

19 မၤသးဒ်န့ၣ်ဒီးကၢၢ်ဝဲစတၤဒံအူၢ်ခံဆံယဲၢ်,သၢဆံဃၣ်ဃၣ်ဒီး,ထံၣ်ဘၣ်ယ့ၣ်ရှူးဟးလၢပီၣ်လဲၣ်အဖီခိၣ်,ဒီးဟဲဃီၤဘူးထီၣ်ဒီးကဘီန့ၣ်,ဒီးပျံၤတၢ်တကူၢ်သ့ၣ်လီၤ.

20 ဒီးအဝဲဒၣ်စံးဘၣ်အီၤ,မ့ၢ်ယၤလီၤ,ပျံၤတၢ်တဂ့ၤ.

21 မၤသးဒ်န့ၣ်ဒီးအသူၣ်ခုအသးခုဒီးတူၢ်လိာ်အီၤလၢကဘီပူၤ,ဒီးကဘီန့ၣ်တုၤတကီၢ်ခါလၢခိဖဲအကလဲၤဝဲအလီၢ်လီၤ.

22 မုၢ်ဆ့ၣ်ထီၣ်တနံၤန့ၣ်,ပှၤဂီၢ်မုၢ်အိၣ်ဆၢထၢၣ်လၢပီၣ်လဲၣ်ဝၢ်ဘးခီတဖၣ်,သ့ၣ်ညါလၢကဘီအဂၤတအိၣ်ဘၣ်,အိၣ်ထဲတဘ့ၣ်လၢအပျဲၢ်အဘီၣ်လဲၤနုာ်ဝဲန့ၣ်ဧိၤလီၤ.ဒီးယ့ၣ်ရှူးတလဲၤထီၣ်ဃုာ်ဒီးအပျဲၢ်အဘီၣ်ဆူကဘီပူၤဘၣ်,ဒီးဟးထီၣ်ဝဲထဲအပျဲၢ်အဘီၣ်ဧိၤလီၤ.

23 မ့မ့ၢ်ကဘီအဂၤတဖၣ်ဟဲလၢတံၤဘ့ၤရံ,ဘူးဒီးအလီၢ်လၢကစၢ်စံးထီၣ်ပတြၢၤတၢ်အဘျုး,ဒီးပှၤအီၣ်ကိၣ်န့ၣ်လီၤ.

24 မၤသးဒ်န့ၣ်ဒီးတုၤပှၤဂီၢ်မုၢ်သ့ၣ်ညါလၢယ့ၣ်ရှူးမ့ၢ်ဂ့ၤ,အပျဲၢ်အဘီၣ်မ့ၢ်ဂ့ၤ,တအိၣ်ဘၣ်ဖဲန့ၣ်ဘၣ်ဒီး,ဒိးထီၣ်ကဘီ,ဒီးလဲၤဃုယ့ၣ်ရှူးဆူကပ့းရနီၣ်လီၤ.

25 ဒီးတုၤအထံၣ်န့ၢ်အီၤလၢပီၣ်လဲၣ်ဝၢ်ဘးခီဒီး,စံးဘၣ်အီၤ,ရၤဘံဧၢ,နဟဲဖဲအံၤအခါဖဲလဲၣ်.

26 ဒီးယ့ၣ်ရှူးစံးဆၢအီၤ,ဒီးစံးဝဲဒၣ်,ယစံးဘၣ်တဲဘၣ်သုတီတီလိၤလိၤ,သုထံၣ်တၢ်ပနီၣ်လီၤလးဒီး,သုဟဲဃုယၤတမ့ၢ်ဘၣ်.မ့ၢ်လၢသုအီၣ်ဘၣ်ကိၣ်ဒီးဘျဲးအီၣ်အဃိလီၤ.

27 တၢ်အီၣ်လၢအဟးဂီၤဒၣ်တၢ်အဂီၢ်န့ၣ်,သုတမၤတဂ့ၤ.မ့မ့ၢ်တၢ်အီၣ်လၢအအိၣ်ဝဲဆိးဝဲလၢတၢ်မူလီၤထူလီၤယိာ်,လၢပှၤကညီဖိခွါကဟ့ၣ်လီၤသုန့ၣ်မၤတက့ၢ်.အဂ့ၢ်ဒ်အံၤ,အဝဲဒၣ်န့ၣ်ပၢ်ယွၤတဂၤစဲပနီၣ်ဃာ်ဝဲလီၤ.

28 မၤသးဒ်န့ၣ်ဒီးအဝဲသ့ၣ်တဖၣ်စံးဘၣ်အီၤ,ဒ်သိးပကမၤယွၤအတၢ်မၤတဖၣ်ဒီး,ပကမၤမနုၤလဲၣ်.

29 ဒီးယ့ၣ်ရှူးကတိၤဆၢတၢ်ဒီးစံးဘၣ်အီၤ,ယွၤအတၢ်မၤန့ၣ်မ့ၢ်အအံၤ,မ့ၢ်လၢသုကစူၢ်က့ၤနာ်က့ၤပှၤလၢအဝဲဒၣ်မၢလီၤအီၤတဂၤလီၤ.

30 မၤသးဒ်န့ၣ်ဒီးအဝဲသ့ၣ်တဖၣ်စံးဘၣ်အီၤ,နမၤတၢ်ပနီၣ်လီၤလးလၢပကထံၣ်ဘၣ်အီၤ,ဒီးစူၢ်က့ၤနာ်က့ၤနၤန့ၣ်,မ့ၢ်မနုၤတမံၤလဲၣ်.နမၤမနုၤလဲၣ်.

31 ပပၢ်သ့ၣ်အီၣ်မၤနၤလၢပှၢ်မုၢ်ကနၢ်,ဒ်တၢ်ကွဲးအသးအသိးန့ၣ်,တၢ်ဟ့ၣ်အီၣ်အီၤလၢကိၣ်လၢမူခိၣ်လီၤ.

32 မၤသးဒ်န့ၣ်ဒီးယ့ၣ်ရှူးစံးဘၣ်အီၤ,ယစံးဘၣ်တဲဘၣ်သုတီတီလိၤလိၤ,စီၤမိၤရှ့တဟ့ၣ်ဘၣ်သုကိၣ်လၢမူခိၣ်ဘၣ်.မ့မ့ၢ်ယပၢ်န့ၣ်,ဟ့ၣ်သုကိၣ်နီၢ်နီၢ်လၢမူခိၣ်လီၤ.

33 အဂ့ၢ်ဒ်အံၤ,ယွၤအကိၣ်မ့ၢ်ပှၤလၢအဟဲလီၤလၢမူခိၣ်,ဒီးဟ့ၣ်လီၤတၢ်မူလၢဟီၣ်ခိၣ်တဂၤန့ၣ်လီၤ.

34 မၤသးဒ်န့ၣ်ဒီးအဝဲသ့ၣ်တဖၣ်န့ၣ်စံးဘၣ်အီၤ,ကစၢ်ဧၢ,ဟ့ၣ်လီၤပှၤလၢကိၣ်အဝဲန့ၣ်တထံၣ်ဃီတက့ၢ်.

35 ဒီးယ့ၣ်ရှူးစံးဘၣ်အီၤ,ယဲဒၣ်,ယမ့ၢ်ကိၣ်မူန့ၣ်လီၤ.ပှၤလၢအဟဲဆူယအိၣ်န့ၣ်တၢ်တသၣ်ဝံၤလၢၤဘၣ်အသးဘၣ်.ဒီးပှၤလၢအစူၢ်က့ၤနာ်က့ၤယၤန့ၣ်,တၢ်တသူလၢၤဘၣ်အသးလၢထံဘၣ်.

36 မ့မ့ၢ်ယစံးဘၣ်တ့ၢ်သုလၢသုထံၣ်လံယၤလံ.ဒီးသုတနာ်ဘၣ်ယၤဘၣ်.

37 ကယဲၢ်ပှၤလၢယပၢ်ဟ့ၣ်လီၤယၤတဂၤလၢ်လၢ်န့ၣ်,ကဟဲဆူယအိၣ်လီၤ.ဒီးပှၤလၢအဟဲဆူယအိၣ်န့ၣ်,ယတဟီထီၣ်ကွံာ်ဘၣ်အီၤဘၣ်.

38 အဂ့ၢ်ဒ်အံၤ,တမ့ၢ်ဘၣ်ယဟဲလီၤလၢမူခိၣ်ဒ်သိးယကမၤဖဲဒၣ်ယသးဘၣ်,မ့ၢ်ဖဲဒၣ်ပှၤလၢအမၢလီၤယၤတဂၤအသးလီၤ.

39 ကယဲၢ်ပှၤလၢအဟ့ၣ်လီၤယၤတဂၤလၢ်လၢ်န့ၣ်,ဒ်သိးယသုတဒုးဟါမၢ်တဂ့ၤ,မ့ၢ်ဒ်သိးယကဒုးဂဲၤဆၢထၢၣ်က့ၤအီၤလၢမုၢ်နံၤကတၢၢ်န့ၣ်,မ့ၢ်ပှၤလၢအမၢလီၤယၤတဂၤအသးန့ၣ်လီၤ.

40 အဂ့ၢ်ဒ်အံၤ,ကယဲၢ်ပှၤလၢအထံၣ်ဖိခွါဒီးစူၢ်က့ၤနာ်က့ၤအီၤတဂၤလၢ်လၢ်န့ၣ်ဒ်သိးကန့ၢ်ဘၣ်တၢ်မူအထူအယိာ်န့ၣ်,မ့ၢ်ယပၢ်အသးလီၤ.ဒီးယကဒုးဂဲၤဆၢထၢၣ်က့ၤအီၤလၢမုၢ်နံၤကတၢၢ်လီၤ.

41 မၤသးဒ်န့ၣ်ဒီးမ့ၢ်အစံးဝဲဒၣ်,ယဲဒၣ်အံၤ,ယမ့ၢ်ကိၣ်ဟဲလီၤလၢမူခိၣ်ဒီး,ပှၤယူဒၤဖိကဒူးကဒ့ၣ်တၢ်လၢအလိၤ,

42 ဒီးစံးဝဲဒၣ်,ပှၤအံၤမ့ၢ်စီၤယိၤသးအဖိခွါယ့ၣ်ရှူး,တမ့ၢ်ဘၣ်ဧါ.အမိၢ်ဒီးအပၢ်န့ၣ်,ပသ့ၣ်ညါ,တမ့ၢ်ဘၣ်ဧါ.မ့မ့ၢ်ဒ်န့ၣ်ဒီး,ဘၣ်မနုၤလၢအစံးဝဲ,ယဟဲလီၤလၢမူခိၣ်လဲၣ်.

43 ယ့ၣ်ရှူးကတိၤဆၢတၢ်ဒီးစံးဘၣ်အီၤ,ကဒူးကဒ့ၣ်လိာ်သုသးသကိးသကိးတဂ့ၤ.

44 ယပၢ်လၢအမၢလီၤယၤန့ၣ်မ့ၢ်တမိၤဘၣ်ဒီး,ပှၤဟဲဆူယအိၣ်တသ့ဘၣ်နီတဂၤဘၣ်.ဒီးယကဒုးဂဲၤဆၢထၢၣ်က့ၤအီၤလၢမုၢ်နံၤကတၢၢ်လီၤ.

45 တၢ်ကွဲးအသးလၢဝံသ့ၣ်တဖၣ်အပူၤ,ဒီးယွၤကသိၣ်လိအီၤခဲလၢာ်လီၤ.ကယဲၢ်ပှၤလၢအနၢ်ဟူပၢ်သိၣ်တၢ်သီတၢ်ဒီးမၤလိဝဲတဖၣ်န့ၣ်,ဟဲဝဲဆူယအိၣ်လီၤ.

46 လၢပှၤတဂၤဂၤထံၣ်ပၢ်န့ၣ်တမ့ၢ်ဘၣ်.ပှၤလၢအဟဲလၢယွၤန့ၣ်,အဝဲဒၣ်မ့ၢ်ပှၤလၢအထံၣ်ပၢ်န့ၣ်လီၤ.

47 ယစံးဘၣ်တဲဘၣ်သုတီတီလိၤလိၤ,ပှၤလၢအစူၢ်က့ၤနာ်က့ၤယၤန့ၣ်,အိၣ်ဒီးတၢ်မူအထူအယိာ်လီၤ.

48 ယဲဒၣ်အံၤ,ယမ့ၢ်တၢ်မူအကိၣ်လီၤ.

49 သုပၢ်တဖၣ်အီၣ်မၤနၤလၢပှၢ်မုၢ်ကနၢဒီးသံဝဲလီၤ.

50 ကိၣ်လၢအဟဲလီၤလၢမူခိၣ်,မ့ၢ်အအံၤ,ဒ်သိးပှၤလၢအအီၣ်ဝဲတဖၣ်,အသုတသံတဂ့ၤလီၤ.

51 ယဲဒၣ်အံၤ,ယမ့ၢ်တၢ်မူအကိၣ်လၢအဟဲလီၤလၢမူခိၣ်လီၤ.ပှၤမ့ၢ်အီၣ်ကိၣ်အံၤဒီး,ကမူဝဲလီၤထူလီၤယိာ်လီၤ.ဒီးကိၣ်လၢယဟ့ၣ်န့ၣ်,မ့ၢ်ယညၣ်လၢယဟ့ၣ်လၢဟီၣ်ခိၣ်အတၢ်မူအဂီၢ်လီၤ.

52 မၤသးဒ်န့ၣ်ဒီးပှၤယူဒၤဖိတဲးလိာ်ဃိလိာ်အသးဒီးစံးဝဲဒၣ်,အဝဲဒၣ်န့ၣ်ဟ့ၣ်အီၣ်ပှၤလၢအညၣ်ကသ့ဒ်လဲၣ်.

53 မၤသးဒ်န့ၣ်ဒီးယ့ၣ်ရှူးစံးဘၣ်အီၤ,ယစံးဘၣ်တဲဘၣ်သုတီတီလိၤလိၤ,သုမ့ၢ်တအီၣ်ဘၣ်ပှၤကညီဖိခွါအညၣ်,ဒီးသုမ့ၢ်တအီဘၣ်အသွံၣ်ဘၣ်ဒီး,တၢ်မူတအိၣ်ဘၣ်လၢသုပူၤဘၣ်.

54 ပှၤလၢအအီၣ်ယညၣ်,ဒီးအီယသွံၣ်န့ၣ်,အိၣ်ဒီးတၢ်မူလီၤထူလီၤယိာ်,ဒီးယကဒုးဂဲၤဆၢထၢၣ်က့ၤအီၤလၢမုၢ်နံၤကတၢၢ်လီၤ.

55 အဂ့ၢ်ဒ်အံၤ,ယညၣ်မ့ၢ်တၢ်အီၣ်နီၢ်နီၢ်,ဒီးယသွံၣ်မ့ၢ်တၢ်အီနီၢ်နီၢ်လီၤ.

56 ပှၤလၢအအီၣ်ယညၣ်,ဒီးအီယသွံၣ်န့ၣ်,အိၣ်ဝဲဆိးဝဲလၢယပူၤ,ဒီးယအိၣ်ယဆိးယဲလၢအပူၤလီၤ.

57 ဒ်ပၢ်လၢအမၢလီၤယၤမူဝဲ,ဒီးယမူစ့ၢ်ကီးလၢပၢ်အသိးန့ၣ်,ပှၤလၢအအီၣ်ယၤကမူဝဲစ့ၢ်ကီးလၢယၤလီၤ.

58 တၢ်အံၤမ့ၢ်ကိၣ်လၢအဟဲလီၤလၢမူခိၣ်လီၤ.တမ့ၢ်ဘၣ်ဒ်သုပၢ်သ့ၣ်အီၣ်မၤနၤ,ဒီးသံဝဲအသိးန့ၣ်ဘၣ်.ပှၤလၢအအီၣ်ကိၣ်အအံၤ,ကမူဝဲလီၤထူလီၤယိာ်လီၤ.

59 တၢ်တဖၣ်န့ၣ်,စံၣ်တဲၤတဲလီၤဝဲလၢဘူၣ်ဘျီၣ်ပူၤ,ဖဲအသိၣ်က့ၤသီက့ၤတၢ်လၢကပ့းရနီၣ်အပူၤအဖၢမုၢ်န့ၣ်လီၤ.

60 မၤသးဒ်န့ၣ်ဒီးအပျဲၢ်အဘီၣ်အါဂၤနၢ်ဟူဒီးစံးဝဲဒၣ်,တၢ်ကတိၤအံၤကီမးလီၤ.မ့ၢ်မတၤဒိကနၣ်အီၤသ့တဂၤလဲၣ်.

61 ဒီးယ့ၣ်ရှူးသ့ၣ်ညါလၢအသးဒၣ်ဝဲ,လၢအပျဲၢ်အဘီၣ်ကဒူးကဒ့ၣ်တၢ်လၢတၢ်န့ၣ်အဂ့ၢ်အကျိၤဒီးစံးဘၣ်အီၤ,မ့ၢ်တၢ်န့ၣ်အဃိဒီး,သုသးဟးဂီၤဧါ.

62 သုမ့ၢ်ထံၣ်ဘၣ်ပှၤကညီဖိခွါအံၤက့ၤထီၣ်ဆူအလီၢ်လၢအအိၣ်တ့ၢ်လၢအခီၣ်ထံးန့ၣ်ဒီး,သုကဆိကမိၣ်ဒ်လဲၣ်.

63 တၢ်မၤမူတၢ်န့ၣ်မ့ၢ်သးလီၤ.တၢ်ညၣ်တဂိာ်တသီၣ်ဘၣ်တၢ်နီတမံၤဘၣ်.တၢ်ကတိၤလၢယစံးဘၣ်သုန့ၣ်,မ့ၢ်သးဒီးတၢ်မူလီၤ.

64 ဘၣ်ဆၣ်ဒီးလၢသုဝဲဒၣ်အကျါအံၤ,ပှၤတစူၢ်တနာ်ဘၣ်အိၣ်ဝဲတနီၤနီၤလီၤ.အဂ့ၢ်ဒ်အံၤ,လၢအခီၣ်ထံးလံၤလံၤန့ၣ်မ့ၢ်မတၤလၢအတနာ်ဘၣ်ဝဲဘၣ်,ဒီးမ့ၢ်မတၤလၢအကဟ့ၣ်လီၤကွံာ်အီၤန့ၣ်ယ့ၣ်ရှူးသ့ၣ်ညါဝဲလီၤ.

65 ဒီးစံးဝဲဒၣ်,မၤသးဒ်န့ၣ်ဒီး,ယစံးဘၣ်တဲဘၣ်လံသုလၢယပၢ်မ့ၢ်တဒုးဟဲဘၣ်ပှၤဆူယအိၣ်ဘၣ်ဒီး,ဟဲဝဲတသ့ဘၣ်နီတဂၤဘၣ်.

66 လၢန့ၣ်လံၤလံၤဒီး,အပျဲၢ်အဘီၣ်အါဂၤတပိာ်လၢၤဘၣ်အခံဘၣ်.ဒီးက့ၤကဒါက့ၤဆူအလီၢ်ခံတကူၢ်သ့ၣ်လီၤ.

67 မၤသးဒ်န့ၣ်ဒီးယ့ၣ်ရှူးစံးဘၣ်ပှၤတဆံခံဂၤ,သုကက့ၤကဒါက့ၤစ့ၢ်ကီးဧါ.

68 စီၤၡံမိၣ်ပ့းတရူးစံးဆၢအီၤ,ကစၢ်ဧၢ,ပကလဲၤဆူမတၤတဂၤအအိၣ်လဲၣ်.တၢ်မူအထူအယိာ်အတၢ်ကတိၤန့ၣ်အိၣ်ဒီးနၤလီၤ.

69 ဒီးပနာ်လံ,ဒီးပသ့ၣ်ညါလံလၢနမ့ၢ်ယွၤအတၢ်စီဆှံတဂၤန့ၣ်လီၤ.

70 ဒီးယ့ၣ်ရှူးစံးဆၢအီၤ,ယဃုထၢသုတဆံခံဂၤန့ၣ်တမ့ၢ်ဘၣ်ဧါ.ဒီးပှၤလၢသုကျါတဂၤန့ၣ်မ့ၢ်မုၣ်ကီၤလံၢ်လီၤ.

71 ဒီးကတိၤတၢ်န့ၣ်မ့ၢ်လၢစီၤၡံမိၣ်အဖိခွါ,စီၤယူဒၤအံၣ်စကၤရံၤအိာ်အဂ့ၢ်လီၤ.အဂ့ၢ်ဒ်အံၤ,အဝဲဒၣ်ကဟ့ၣ်လီၤကွံာ်အီၤ,ဒီးအိၣ်ဝဲလၢပှၤတဆံခံဂၤန့ၣ်အကျါလီၤ.