Library · ksw

Acts 2

1 ဒီးဖဲဘူၣ်ယဲၢ်ဆံအမုၢ်နံၤပှဲၤထီၣ်ဝဲဒီး,အဝဲသ့ၣ်ခဲလၢာ်,အိၣ်ဝဲအသးတဖျၢၣ်ဃီ,လၢအလီၢ်တပူၤဃီလီၤ.

2 ဒီးတၢ်သီၣ်လီၤဝဲသတူၢ်ကလာ်လၢမူခိၣ်,ဒ်ကလံၤမုၢ်ဟဲသီၣ်ဝဲအသိးန့ၣ်,ဒီးမၤပှဲၤထီၣ်ဟံၣ်လၢအဝဲသ့ၣ်ဆ့ၣ်နီၤအိၣ်ဝဲလၢအပူၤ,ဒီဖျၢၣ်ညါလီၤ.

3 ဒီးတၢ်အပျ့ၤတဖၣ်နီၤဖးလီၤအသးအိၣ်ဖျါထီၣ်လၢအီၤ,ဒ်မ့ၣ်အူလၣ်အသိး,ဒီးစီၢ်လီၤလၢပှၤတဖၣ်န့ၣ်အလိၤစုာ်စုာ်လီၤ

4 ဒီးပှၤခဲလၢာ်လၢထီၣ်ပှဲၤထီၣ်ဒီးသးစီဆှံ,ဒီးကတိၤတၢ်လၢအပျ့ၤအဂၤတဖၣ်,ဒ်သးန့ၣ်ဒုးကတိၤအီၤအသိးလီၤ.

5 ဒီးပှၤယူဒၤဖိလၢအယူးယီၣ်ယွၤဟဲလၢပှၤကိးကလုာ်ဒဲး,အိၣ်လၢမူခိၣ်အဖီလာ်အကျါ,ဒီးအိၣ်ဝဲဆိးဝဲလၢယရူၤၡလ့ၣ်အပူၤလီၤ.

6 ဒီးတုၤတၢ်အကလုၢ်အံၤသီၣ်ထီၣ်ဒီး,ပှၤဂီၢ်မုၢ်န့ၣ်အိၣ်ဖှိၣ်ရိဖှိၣ်,ဒီးအသးကတုၤဝဲဝဲလီၤ.အဂ့ၢ်ဒ်အံၤ,နၢ်ဟူတဂၤလၢအကလုၢ်ဒၣ်ဝဲ,တဂၤလၢအကလုၢ်ဒၣ်ဝဲ,အဝဲသ့ၣ်ကတိၤတၢ်န့ၣ်လီၤ.

7 ဒီးပှၤခဲလၢာ်ပာ်အသးကမၢကမၣ်,ဒီးတၢ်လီၤလးလၢအမဲာ်,ဒီးကတိၤလိာ်အသးဒီးစံးဝဲဒၣ်,ပှၤလၢအကတိၤတၢ်တဖၣ်အံၤ,မ့ၢ်ပှၤကၤလံၤလါဖိခဲလၢာ်တမ့ၢ်ဘၣ်ဧါ.

8 ဒီးပနၢ်ဟူတၢ်လၢပအိၣ်ဖျဲၣ်အကလုၢ်,တဂၤလၢအကလုၢ်ဒၣ်ဝဲ,တဂၤလၢအကလုၢ်ဒၣ်ဝဲဒ်လဲၣ်.

9 ပှၤပၢ်သ့ၤဖိ,ဒီးပှၤမၤဒဲဖိ,ပှၤဧ့ၤလၣ်ဖိ,ဒီးပှၤအိၣ်ဝဲဆိးဝဲလၢမ့းစပတၤမံ,ဒီးကီၢ်ယူဒၤ,ဒီးကပၤဒကံ,ဒီးပီၣ်တူး,ဒီးအၤစံ,

10 ဖြူၤကံ,ဒီးပၣ်ဖူၤလံ,အဲၤကူပတူး,ဒီးလံၤဘူအကီၢ်အိၣ်ဘူးဒီးကူၤရ့ၤန့သ့ၣ်တဖၣ်,ဒီးပှၤတမှံၤလၢရိမ့ၤ,ပှၤယူဒၤဖိ,ဒီးပှၤနုာ်လၢပှၤယူဒၤဖိအလုၢ်အလၢ်တဖၣ်,

11 ပှၤကြ့တ့ၤဖိ,ဒီးပှၤဧ့ရ့းဖိ,ပဝဲဒၣ်အံၤ,ပနၢ်ဟူလၢအစံၣ်တဲၤတဲလီၤယွၤအတၢ်လီၤလိၢ်လီၤလးလၢပကလုၢ်ဒၣ်ပဝဲဒ်လဲၣ်.

12 ဒီးပှၤခဲလၢာ်ပာ်အသးကမၢကမၣ်,ဒီးအသးဒ့ဒီ,ဒီးစံးလိာ်အသးသကိးသကိး,တၢ်အံၤကမ့ၢ်တၢ်မနုၤလဲၣ်.

13 မ့မ့ၢ်အဂၤတနီၤဒုၣ်ဒွဲၣ်တၢ်ဒီးစံးဝဲဒၣ်,မ့ၢ်အအီလုၣ်ကိစပံးထံအဆၢလီၤ.

14 ဒီးစီၤပ့းတရူးဆၢထၢၣ်ဝဲဒီးပှၤတဆံတဂၤန့ၣ်,ဒီးထုထီၣ်အကလုၢ်ဒီးကတိၤဖျါထီၣ်တၢ်လၢအီၤ,ပှၤယူဒၤဖိ,ဒီးပှၤအိၣ်ဝဲဆိးဝဲလၢယရူၤၡလ့ၣ်ခဲလၢာ်သ့ၣ်ဧၢ,သ့ၣ်ညါတၢ်အံၤ,ဒီးဒိးသုနၢ်လၢယကလုၢ်တက့ၢ်.

15 အဂ့ၢ်ဒ်အံၤ,ပှၤတဖၣ်အံၤတအီမူၤဘၣ်အသး,ဒ်သုဆိကမိၣ်အသိးဘၣ်.အဂ့ၢ်ဒ်အံၤ,ခဲကနံၣ်အံၤမ့ၢ်မုၢ်ဟဲထီၣ်သၢနၣ်ရံၣ်လီၤ.

16 မ့မ့ၢ်တၢ်အံၤမ့ၢ်ဝံစီၤယိၤအ့လးစံးပာ်တၢ်လီၤ.

17 ဒီးလၢမုၢ်နံၤအခံကတၢၢ်တဖၣ်န့ၣ်,ယွၤစံးဝဲဒၣ်,တၢ်ကမၤအသးလၢယကလူလီၤဂၢ်လီၤယသးလၢကယဲၢ်တၢ်ညၣ်ခဲလၢာ်အလိၤ,ဒီးသုဖိမုၣ်ဒီးသုဖိခွါတဖၣ်,ကကတိၤတၢ်လၢဝံအကျိာ်,ဒီးသုဖိၣ်သၣ်ခွါတဖၣ်ကထံၣ်တၢ်လၢညါခီ,ဒီးသုသးပှၢ်တဖၣ်ကမံမီၢ်တၢ်မံမီၢ်လီၤ.

18 ဒီးလၢမုၢ်နံၤတဖၣ်န့ၣ်,ယကလူလီၤဂၢ်လီၤယသး,လၢယကုၢ်ပိာ်မုၣ်ဒီးယကုၢ်ပိာ်ခွါအလိၤ,ဒီးကကတိၤတၢ်လၢဝံအကျိာ်လီၤ.

19 ဒီးယကဟ့ၣ်တၢ်လီၤလိၢ်လၢမူခိၣ်ထး,ဒီးတၢ်ပနီၣ်လီၤလးလၢဟီၣ်ခိၣ်လာ်,တၢ်သွံၣ်,ဒီးမ့ၣ်အူ,ဒီးတၢ်ခုၣ်အသဝံလီၤ.

20 တချုးကစၢ်အမုၢ်နံၤဖးဒိၣ်လီၤဆီတနံၤန့ၣ်တုၤဝဲဒီး,မုၢ်ကကဲထီၣ်တၢ်ခံး,ဒီးလါကကဲထီၣ်တၢ်သွံၣ်လီၤ.

21 ဒီးတၢ်ကမၤအသးလၢဖဲဒၣ်ပှၤလၢအကကိးထီၣ်ကစၢ်အမံၤတဂၤလၢ်လၢ်န့ၣ်,ကတုၤလၢတၢ်အုၣ်က့ၤခီၣ်က့ၤအီၤလီၤ.

22 ပှၤအံၣ်စရ့လးဖိသ့ၣ်ဧၢ,တၢ်အကလုၢ်အကထါအံၤ,ဒိကနၣ်တက့ၢ်.ဒ်သုသ့ၣ်ညါသုဝဲအသိးန့ၣ်,ယွၤဒုးနဲၣ်ဖျါထီၣ်ပှၤနစၤရ့းဖိယ့ၣ်ရှူးလၢသုလၢတၢ်စိတၢ်ကမီၤ,ဒီးတၢ်လီၤလိၢ်လီၤလး,ဒီးတၢ်ပနီၣ်လီၤလးသ့ၣ်တဖၣ်,လၢယွၤမၤဝဲလၢအဝဲဒၣ်အစုပူၤလၢသုကျါလီၤ.

23 အဝဲဒၣ်တဂၤဘၣ်တၢ်ဟ့ၣ်လီၤကွံာ်,ဒ်ယွၤအတၢ်ကူၣ်တၢ်ပာ်ဒီးအတၢ်သ့ၣ်ညါပာ်အသိးန့ၣ်,ဒီးသုဟံးန့ၢ်အီၤ,ဒီးသုစဲထီၣ်အီၤလၢထူၣ်စုညါအလိၤ,ဒီးမၤသံအီၤလၢပှၤအၢတဖၣ်အစုပူၤလီၤ.

24 အဝဲဒၣ်န့ၣ်မ့ၢ်ယွၤပျၢ်ကွံာ်အီၤလၢတၢ်သံအတၢ်ဖှီၣ်,ဒီးဒုးဂဲၤဆၢထၢၣ်က့ၤအီၤလီၤ.အဂ့ၢ်ဒ်အံၤ,အဝဲန့ၣ်ဟံးဃာ်အီၤတသ့ဘၣ်လီၤ.

25 အဂ့ၢ်ဒ်အံၤ,စီၤဒၤဝံးစံးလၢအဂ့ၢ်အကျိၤ,ယထံၣ်ဘၣ်ယွၤလၢယမဲာ်ညါတဘိယူၢ်ဃီလီၤ.အဂ့ၢ်ဒ်အံၤ,အိၣ်ဝဲလၢယစုထွဲ,ဒ်သိးယသုတဟူးတဝးတဂ့ၤလီၤ.

26 မ်ဒ်န့ၣ်ဒီးယသးသူၣ်ခုသးခု,ဒီးယပျ့ၤသူၣ်ပိၢ်သးဝးလီၤ.လၢန့ၣ်အမဲာ်ညါယဖံးယညၣ်ကအိၣ်ကဆိးဝဲလၢတၢ်မုၢ်လၢ်အပူၤလီၤ.

27 အဂ့ၢ်ဒ်အံၤ,နတပာ်လီၤတဲာ်ဘၣ်ယသးလၢပျုၤပူၤဘၣ်.နတဒုးထံၣ်ဘၣ်နပှၤစီဆှံလၢတၢ်အုၣ်တၢ်ကျၣ်ဘၣ်.

28 နဘိးဘၣ်သ့ၣ်ညါယၤလၢတၢ်မူအကျဲလီၤ.နကမၤလၢထီၣ်ပှဲၤထီၣ်ယၤလၢတၢ်သးခုလၢနမဲာ်န့ၣ်လီၤ.

29 ပှၤဒီပုၢ်ဝဲၢ်သ့ၣ်ဧၢ,ဒုးကတိၤယၤခူတလ့ၢ်လၢပှၤတကလုာ်အပၢ်စီၤဒၤဝံးအဂ့ၢ်အကျိၤ,လၢအသံဝဲ,ဒီးဘၣ်တၢ်ခူၣ်လီၤကွံာ်ဝဲ,ဒီးအသွၣ်ခိၣ်န့ၣ်အိၣ်ဒီးပှၤတုၤမုၢ်မဆါတနံၤအံၤတက့ၢ်.

30 အဝဲဒၣ်န့ၣ်မ့ၢ်ဝံတဂၤ,ဒီးသ့ၣ်ညါဝဲလၢယွၤဆိၣ်တၢ်ဒီးအီၤလၢအကဒုးဆ့ၣ်နီၤအယီၢ်ဒ့အသၣ်လၢအလီၢ်ပစိာ်အဖီခိၣ်လီၤ.

31 အဝဲဒၣ်ထံၣ်ပာ်ဝဲသတးဒီး,ကတိၤတၢ်လၢခရံာ်အတၢ်ဂဲၤဆၢထၢၣ်က့ၤအဂ့ၢ်,လၢတၢ်တပာ်လီၤတဲာ်ဘၣ်အသးလၢပျုၤပူၤဘၣ်,ဒီးလၢအညၣ်တထံၣ်ဘၣ်တၢ်အုၣ်တၢ်ကျၣ်ဘၣ်လီၤ.

32 ယ့ၣ်ရှူးတဂၤအံၤ,လၢယွၤဒုးဂဲၤဆၢထၢၣ်က့ၤအီၤအဂ့ၢ်န့ၣ်,ပဝဲဒၣ်ခဲလၢာ်အံၤ,ပမ့ၢ်ပှၤအုၣ်အသးလီၤ.

33 မၤသးဒ်န့ၣ်ဒီး,အဝဲဒၣ်ဘၣ်တၢ်ပာ်ထီၣ်ထီအီၤလၢယွၤအစုထွဲ,ဒီးဒိးန့ၢ်တၢ်စံးပာ်ဘၣ်ဃးဒီးသးစီဆှံလၢပၢ်အအိၣ်သတးဒီး,မ့ၢ်အလူလီၤတၢ်လၢသုထံၣ်,ဒီးသုနၢ်ဟူသုဝဲခဲကနံၣ်အံၤလီၤ.

34 အဂ့ၢ်ဒ်အံၤ,စီၤဒၤဝံးတထီၣ်ဘးဆူမူခိၣ်ဘၣ်.မ့မ့ၢ်အကစၢ်ဒၣ်ဝဲစံးဝဲဒၣ်,ယွၤစံးဘၣ်ယကစၢ်,ဆ့ၣ်နီၤလၢယစုထွဲ,

35 တုၤယပာ်နဒုၣ်နဒါလၢနခီၣ်ယီၢ်လီၤအလီၢ်တက့ၢ်.

36 မၤသးဒ်န့ၣ်ဒီးယ့ၣ်ရှူးလၢသုပျၤထီအီၤလၢထူၣ်စုညါအလိၤန့ၣ်လၢယွၤပာ်အီၤလၢကစၢ်ဒီးခရံာ်န့ၣ်,မ်အံၣ်စရ့လးအပှၤဟံၣ်ဖိခဲလၢာ်သ့ၣ်ညါနီၢ်နီၢ်တက့ၢ်.

37 ဒီးအဝဲသ့ၣ်တဖၣ်န့ၣ်နၢ်ဟူတၢ်ဒီး,အသးဘၣ်ဆဲး,ဒီးစံးဘၣ်စီၤပ့းတရူး,ဒီးပှၤတၢ်မၢဖိအဂၤတဖၣ်န့ၣ်,ပှၤဒီပုၢ်ဝဲၢ်သ့ၣ်ဧၢ,ပကမၤဒ်လဲၣ်.

38 ဒီးစီၤပ့းတရူးစံးဘၣ်အီၤ,သ့ၣ်နီၣ်ပီၢ်ယၢ်လီၤက့ၤသုသး,ဒီးဒိးဘျၢသုသးတဂၤဒီးတဂၤ,လၢယ့ၣ်ရှူးအမံၤ,လၢတၢ်ပျၢ်တၢ်ဒဲးဘးအဂ့ၢ်တက့ၢ်,ဒီးသုကဒိးန့ၢ်တၢ်ဟ့ၣ်သးစီဆှံလီၤ.

39 အဂ့ၢ်ဒ်အံၤ,တၢ်စံးပာ်ဘၣ်ဃးဒီးသု,ဒီးသုဖိသုလံၤ,ဒီးပှၤလၢအယံၤခဲလၢာ်,ဖဲဒၣ်ပှၤလၢယွၤပကစၢ်ကကိးက့ၤအီၤတဖၣ်လီၤ.

40 ဒီးအုၣ်အသး,ဒီးသဆၣ်ထီၣ်ပှၤအခံ,လၢတၢ်ကတိၤအဂုၤအဂၤအါထံၣ်ဒီးစံးဝဲဒၣ်,အုၣ်က့ၤခီၣ်က့ၤသုသးလၢပှၤအနၢ်က့ၣ်တစိၤအံၤအကျါတက့ၢ်.

41 မၤသးဒ်န့ၣ်ဒီးပှၤလၢအတူၢ်လိာ်အကလုၢ်တဖၣ်န့ၣ်,ဒိးဘျၢအသး,ဒီးတၢ်လၢမုၢ်တနံၤန့ၣ်,တၢ်ပာ်ဖှိၣ်ပှၤသၢကထိဃၣ်ဃၣ်လီၤ.

42 ဒီးအဝဲသ့ၣ်တဖၣ်န့ၣ်,အိၣ်ဝဲတဘိယူၢ်ဃီလၢပှၤတၢ်မၢဖိအတၢ်သိၣ်တၢ်သီအပူၤ,ဒီးလၢတၢ်ရ့လိာ်,ဒီးတၢ်စိၢ်ဘျဲးကိၣ်,ဒီးတၢ်ဘါထုကဖၣ်အပူၤလီၤ.

43 ဒီးတၢ်လီၤလိၢ်လီၤလး,ဒီးတၢ်ပနီၣ်လီၤလးမၤအသးအါမံၤလၢပှၤတၢ်မၢဖိတဖၣ်အစုပူၤ,ဒီးတၢ်သူၣ်ပျံၤသးပျံၤလီၤဘၣ်လၢပှၤအသးကိးအဂၤဒဲးလီၤ.

44 ဒီးပှၤလၢအစူၢ်က့ၤနာ်က့ၤခဲလၢာ်န့ၣ်,အိၣ်လၢအလီၢ်တပူၤဃီ,ဒီးပာ်ဃုာ်အတၢ်ခဲလၢာ်လီၤ.

45 ဒီးဆါကွံာ်အတၢ်ဖိတၢ်လံၤ,ဒီးအစုလီၢ်အခီၣ်ခိၣ်,ဒီးနီၤဟ့ၣ်ပှၤခဲလၢာ်,ဖဲအန့ၢ်တၢ်အလီၢ်အိၣ်ဝဲအသိးန့ၣ်လီၤ.

46 ဒီးအိၣ်ဒၣ်တၢ်လၢအသးတဖျၢၣ်ဃီလၢတၢ်လုၢ်အဟံၣ်ပူၤသ့သ့တနံၤ,ဒီးစိၢ်ဘျဲးကိၣ်လၢတဟံၣ်ဘၣ်တဟံၣ်အပူၤ,ဒီးဒိးန့ၢ်တၢ်အီၣ်တၢ်အီလၢအသူၣ်ခုအသးခု,ဒီးအသူၣ်လိၤအသးလိၤလီၤ.

47 သးဝံၣ်ယွၤ,ဒီးဘၣ်ဘျုးလၢပှၤဂီၢ်မုၢ်ခဲလၢာ်လီၤ.ဒီးပှၤတုၤလၢတၢ်အုၣ်က့ၤခီၣ်က့ၤအီၤတဖၣ်န့ၣ်ယွၤပာ်ဖှိၣ်က့ၤဝဲလၢတၢ်အိၣ်ဖှိၣ်အပူၤသ့သ့တနံၤလီၤ.