Library · ksw

Deuteronomy 34

1 ဒီးစီၤမိၤရှ့လဲၤထီၣ်လၢမိၤအးအတၢ်ပျီပူၤဆူကစၢၢ်နဘိ,လၢပံးစကၤအဒီခိၣ်လၢအအိၣ်သဃီၤဒီးယရံၤဃိလီၤ.ဒီးယွၤဒုးနဲၣ်အီၤလၢကီၢ်ကံးလဧးဒီဘ့ၣ်ညါပၢၢ်လၢဒၣ်,

2 ဒီးနးသၤလံဒီဘ့ၣ်ညါ,ဒီးအ့ဖရဲၣ်,ဒီးမနၤရှ့ၤအကီၢ်,ဒီးကီၢ်ယူဒၤဒီဘ့ၣ်ညါပၢၢ်လၢပီၣ်လဲၣ်မုၢ်နုာ်န့ၣ်,

3 ဒီးတၢ်လၢကလံၤထံး,ဒီးယရံၤဃိအကစၢၢ်ကဆူးအပျီ,ဒီးသ့ၣ်စူၣ်ပလိၣ်အဝ့ၢ်ပၢၢ်လၢစိၤဧၢ်လီၤ.

4 ဒီးယွၤစံးဘၣ်အီၤ,အဝဲအံၤမ့ၢ်ကီၢ်လၢယဆိၣ်တၢ်လၢအဂ့ၢ်ဒီးစီၤအၤဘြၤဟၣ်,ဒီးစီၤအံၤစဲး,ဒီးစီၤယၤကိာ်,ဒီးစံး,ယကဟ့ၣ်လီၤအီၤလၢနချံနသၣ်လီၤ.ယဒုးထံၣ်ဘၣ်လံနၤလၢနမဲာ်လံ.ဘၣ်ဆၣ်ဒီးနတလဲၤခီဂာ်ဖဲန့ၣ်ဘၣ်.

5 ဒီးစီၤမိၤရှ့,ယွၤအခ့အပှၤန့ၣ်,သံဝဲဖဲန့ၣ်လၢကီၢ်မိၤအးအပူၤ,ဒ်ယွၤအကလုၢ်ကထါအသိးန့ၣ်လီၤ.

6 ဒီးတၢ်ခူၣ်လီၤကွံာ်အီၤလၢကစၢၢ်ကဆူးပူၤလၢကီၢ်မိၤအးအပူၤအိၣ်ဝဲသဃီၤဒီးဘ့ၤသပဧိၢ်လီၤ.ဘၣ်ဆၣ်ဒီးပှၤကညီတသ့ၣ်ညါဘၣ်အသွၣ်ခိၣ်တုၤမုၢ်မဆါတနံၤအံၤလီၤ.

7 ဒီးလၢစီၤမိၤရှ့သံဝဲန့ၣ်အသးပှၢ်တ့ၢ်အနံၣ်တကယၤခံဆံလီၤ.အမဲာ်တခံးဒံးဘၣ်,ဒီးအသးစၢ်အဂံၢ်အဘါတစၢ်လီၤဒံးဘၣ်လီၤ.

8 ဒီးပှၤအံၣ်စရ့လးဖိဟီၣ်ဝဲလၢစီၤမိၤရှ့အဃိလၢမိၤအးအတၢ်ပျီပူၤအနံၤသၢဆံလီၤ.ဒီးမုၢ်နံၤတဖၣ်လၢအဟီၣ်ဝဲလၢစီၤမိၤရှ့အဃိလၢာ်ဝဲလီၤ.

9 ဒီးစီၤနိၣ်အဖိခွါစီၤယိၤရှူပှဲၤဝဲဒီးတၢ်ကူၣ်သ့ကူၣ်ဘၣ်အသးလီၤ.အဂ့ၢ်ဒ်အံၤ,စီၤမိၤရှ့ပာ်တ့ၢ်အစုလၢအလိၤလီၤ.ဒီးပှၤအံၣ်စရ့လးဖိဒိကနၣ်အကလုၢ်အကထါ,ဒီးမၤဝဲဒ်ယွၤမၤလိာ်စီၤမိၤရှ့အသိးန့ၣ်လီၤ.

10 ဒီးတၢ်တအိၣ်ထီၣ်လၢၤဘၣ်လၢအံၣ်စရ့လးအကျါလၢဝံတဂၤဒ်စီၤမိၤရှ့အသိး,လၢယွၤသ့ၣ်ညါဒီးကွၢ်ဆၢညါအီၤ,

11 လၢကယဲၢ်တၢ်အပနီၣ်လီၤလး,ဒီးတၢ်ဒီးတၢ်လီၤလိၢ်လီၤလးခဲလၢာ်လၢယွၤမၢအလဲၤမၤလၢကီၢ်အဲၤကူပတူးအပူၤ,လၢဖၤရိၤအလိၤ,ဒီးလၢအခ့အပှၤအလိၤခဲလၢာ်,ဒီးလၢအကီၢ်ဒီဘ့ၣ်ညါအပူၤ,

12 ဒီးလၢတၢ်အစုဆူၣ်န့ၣ်ခဲလၢာ်,ဒီးလၢတၢ်မၤပျံၤတၢ်ခဲလၢာ်လၢစီၤမိၤရှ့ဒုးနဲၣ်လၢအံၣ်စရ့လးခဲလၢာ်အမဲာ်ညါန့ၣ်နီတဂၤဘၣ်လီၤ.