2 Timothy 4
1 ယမၤလိာ်နၤလၢယွၤဒီးယ့ၣ်ရှူးခရံာ်လၢအကစံၣ်ညီၣ်ပှၤမူဒီးပှၤသံတဖၣ်,အမဲာ်ညါ,ဒီးလၢအတၢ်အိၣ်ဖျါဒီးအဘီအမုၢ်အမဲာ်ညါ,စံၣ်တဲၤတဲလီၤတၢ်အကလုၢ်အကထါတက့ၢ်.
2 ကျဲးစၢးလၢတၢ်အကတီၢ်ဘၣ်လၢအကတီၢ်တဘၣ်ဘၣ်တက့ၢ်.မၤဖျါပှၤအတၢ်ကမၣ်,သိၣ်ဃီၣ်တၢ်,သဆၣ်ထီၣ်အခံလၢတၢ်ဝံသးစူၤခဲလၢာ်,ဒီးသိၣ်တၢ်သီတၢ်တက့ၢ်.
3 အဂ့ၢ်ဒ်အံၤ,အမုၢ်အလါကဘၣ်,ဖဲပှၤတဝံသးစူၤဘၣ်တၢ်သိၣ်တၢ်သီလၢအဂ့ၤအဝါဘၣ်.မ့မ့ၢ်အနၢ်ကိၢ်ကွံဒီး,ကပာ်ဖှိၣ်သရၣ်တဖၣ်လၢအကစၢ်ဒၣ်ဝဲအဂီၢ်,ဒ်တၢ်ဘၣ်အသးဒၣ်ဝဲအသိးန့ၣ်လီၤ.
4 ဒီးကဃၣ်ကွံာ်အနၢ်လၢတၢ်မ့ၢ်တၢ်တီ,ဒီးကဃၣ်ဃီၤအသးဆူပူကလီကလီတဖၣ်လီၤ.
5 မ့မ့ၢ်နဲဒၣ်အံၤ,ခိးနသးလၢတၢ်ခဲလၢာ်အပူၤတက့ၢ်.ဒိးတၢ်နးတၢ်ဖှီၣ်တက့ၢ်.မၤပှၤစံၣ်တဲၤတဲလီၤတၢ်သးခုအကစီၣ်အတၢ်မၤန့ၣ်တက့ၢ်.တၢ်အခ့အပှၤအတၢ်လၢနမၤအီၤန့ၣ်,မၤလၢလၢပှဲၤပှဲၤတက့ၢ်.
6 အဂ့ၢ်ဒ်အံၤ,ခဲကနံၣ်အံၤဒၣ်လဲာ်,တၢ်လူလီၤဂၢ်လီၤယၤ,ဒီးယက့ၤတၢ်အဆၢအကတီၢ်ဘၣ်လံ.
7 တၢ်ဒုးလၢအဂ့ၤန့ၣ်,ယဒုးလံ,တၢ်ဃ့ၢ်န့ၣ်ယဃ့ၢ်လံ,ယပၢၤဃာ်တၢ်နာ်န့ၣ်လံ.
8 တုၤအံၤဆူညါတၢ်တီတၢ်လိၤအခိၣ်သလုးလၢကစၢ်ပှၤစံၣ်ညီၣ်ကွီၢ်အတီအလိၤတဂၤ,ကဟ့ၣ်လီၤယၤလၢမုၢ်နံၤန့ၣ်,အိၣ်ပာ်လီၤအသးလၢယဂီၢ်,ဒီးထဲယၤတဂၤဧိၤတမ့ၢ်ဘၣ်,မ့ၢ်ကယဲၢ်ပှၤလၢအအဲၣ်ဒိးအတၢ်အိၣ်ဖျါခဲလၢာ်အဂီၢ်န့ၣ်လီၤ.
9 ဂုာ်ဟဲဆူယအိၣ်ချ့ချ့တက့ၢ်.
10 အဂ့ၢ်ဒ်အံၤ,စီၤဒ့မၤအဲၣ်တၢ်လၢအအံၤတဃၣ်သတးဒီး,ဟးသဒၣ်ယၤဒီးလဲၤဆူသ့းစၤလနံ,ဒီးစီၤကြံစကံၣ်ဆူကလၤတံ,ဒီးစီၤတံတူးဆူဒၤလမါတံၤလီၤ.
11 အိၣ်ဒီးယၤထဲစီၤလူၤကၣ်တဂၤဧိၤလီၤ.ဟံးန့ၢ်စီၤမၢ်ကူးဒီးမၢအဟဲဒီးနၤတက့ၢ်.အဂ့ၢ်ဒ်အံၤ,လၢတၢ်အခ့အပှၤအတၢ်မၤန့ၣ်အပူၤ,အဝဲဒၣ်မၤတၢ်လၢယဂီၢ်အဘျုးအိၣ်လီၤ.
12 ဒီးစီၤတူဃံၤကူးန့ၣ်,ယမၢအလဲၤဆူအ့းဖ့းစူးလီၤ.
13 ယဆ့ဖးဒိၣ်လၢယပာ်လီၤတဲာ်ဒီးစီၤကၢ်ပူးလၢတြိၤအါအပူၤတဘ့ၣ်,ဟဲစိာ်န့ၢ်ယၤ,ဒီးလံာ်ဧိၤလဲၢ်ဧိၤ,လီၤဆီဒၣ်တၢ်လံာ်တၢ်ဖံးတဖၣ်တက့ၢ်.
14 ပှၤပိာ်တိၢ်,စီၤအလ့းစၣ်ဒြူးတဂၤ,မၤအၢယၤအါမးလီၤ.ကစၢ်ကဟ့ၣ်ကၣ်အီၤဒ်အတၢ်မၤအသိးန့ၣ်လီၤ.
15 ဒီးနဲဒၣ်ပလီၢ်နသးစ့ၢ်ကီးလၢအီၤတက့ၢ်.အဂ့ၢ်ဒ်အံၤ,ဂ့ၢ်လိာ်ဘှီလိာ်ပတၢ်ကတိၤနးမးလီၤ.
16 လၢယကတိၤပူၤဖျဲးတၢ်အခီၣ်ထံးတဘျီန့ၣ်,ပှၤတဆၢထၢၣ်စၢၤယၤနီတဂၤဘၣ်.မ့မ့ၢ်ပှၤခဲလၢာ်ဟးသဒၣ်ယၤလီၤ.မ်တၢ်သုတပာ်လၢအတၢ်ကမၣ်တဂ့ၤ.
17 ဘၣ်ဆၣ်ဒီးကစၢ်ဆၢထၢၣ်ဒီးယၤဒီးဒုးဆူၣ်ထီၣ်ယဂံၢ်ယဘါ,ဒ်သိးလၢယဃိ,တၢ်စံၣ်တဲၤတဲလီၤကဘၣ်တၢ်ပာ်ဖျါထီၣ်အီၤလၢလၢပှဲၤပှဲၤ,ဒီးပှၤကလုာ်ခဲလၢာ်ကနၢ်ဟူဘၣ်ဝဲလီၤ.ဒီးယထူၣ်ဖျဲးထီၣ်လၢခ့ယုၢ်အထးခိၣ်လီၤ.
18 ဒီးကစၢ်ကထုးထီၣ်န့ၢ်ယၤလၢကယဲၢ်တၢ်မၤလၢအအၢ,ဒီးကအုၣ်က့ၤခီၣ်က့ၤယၤဆူအဘီအမုၢ်လၢမူခိၣ်အပူၤလီၤ.မ်အဘၣ်တၢ်လၤကပီၤအစိၤစိၤအဃၣ်ဃၣ်တက့ၢ်.အၤမ့ၣ်.
19 ကတိၤဒိၣ်နီၢ်ပြံစကံးလၤ,ဒီးစီၤအကူလၤ,ဒီးစီၤအီးနံၤစံဖရူးအဟံၣ်ဖိတက့ၢ်.
20 စီၤအ့ၤရၤစတူးတဂၤအိၣ်ကတီၢ်ဝဲလၢကရံၣ်သူးအပူၤ,မ့မ့ၢ်စီၤတြီးဖံၤမူးတဂၤမၤတကဲဘၣ်ဒီး,ယပာ်လီၤတဲာ်အီၤလၢမံလ့ၤတူးအပူၤလီၤ.
21 မၤသပှၢ်ပှၢ်ဒ်သိးနကဟဲလၢတၢ်ဂိၢ်အကတီၢ်တချုးဘၣ်ဒံးဘၣ်တက့ၢ်.စီၤအူၤဘူလူး,ဒီးစီၤပူဒံၣ်,ဒီးစီၤလံနူး,ဒီးနီၢ်ကျီၢ်ဒံ,ဒီးဒီပုၢ်ဝဲၢ်ခဲလၢာ်ကတိၤဒိၣ်နၤလီၤ.
22 မ်ကစၢ်ယ့ၣ်ရှူးခရံာ်အိၣ်ဒီးနသးတက့ၢ်.မ်တၢ်အဘျုးအဖှိၣ်အိၣ်ဒီးသုတက့ၢ်.