Library · ksw

1 Samuel 6

1 ဒီးယွၤအတလါန့ၣ်အိၣ်ဝဲလၢပှၤဖလ့ၡသးဖိအကီၢ်ပူၤနွံလါလီၤ.

2 ဒီးပှၤဖလ့ၡသးဖိကိးန့ၢ်ပှၤလုၢ်တၢ်အဒိၣ်,ဒီးပှၤဖးတၢ်,ဒီးစံးဝဲဒၣ်,ပကမၤယွၤအတလါန့ၣ်ဒ်လဲၣ်.ဘိးဘၣ်သ့ၣ်ညါပှၤလၢပကဟ့ၣ်ယုၢ်အီၤဆူအလီၢ်ဒၣ်ဝဲအိၣ်ဒီးတၢ်မနုၤတမံၤလဲၣ်န့ၣ်တက့ၢ်.

3 ဒီးစံးဝဲဒၣ်,သုမ့ၢ်ဟ့ၣ်ယုၢ်အံၣ်စရ့လးအကစၢ်အတလါဒီး,ဟ့ၣ်ယုၢ်အီၤကလီတဂ့ၤဟ့ၣ်ယုၢ်အီၤလၢတၢ်လုၢ်တၢ်ကမၣ်သပှၢ်တၢၢ်တက့ၢ်.တုၤနုၤတစုသုကဘျါက့ၤ,ဒီးအစုတသုးဘၣ်အသးလၢသုလိၤအဂ့ၢ်န့ၣ်သုကသ့ၣ်ညါလီၤ.

4 ဒီးစံးဝဲဒၣ်,တၢ်လုၢ်တၢ်ကမၣ်လၢပဘၣ်ဟ့ၣ်ယုၢ်န့ၣ်မ့ၢ်မနုၤလဲၣ်.ဒီးအဝဲသ့ၣ်စံးဆၢဝဲဒၣ်,အ့ၣ်ကီၢ်အဂီၤထူယဲၢ်ဖျၢၣ်,ဒီးယုၢ်သုၣ်ထူယဲၢ်ဒု,ဒ်ပှၤဖလ့ၡသးဖိအပဒိၣ်ဖးဒိၣ်အတၢ်ဂံၢ်အသိးန့ၣ်လီၤ.အဂ့ၢ်ဒ်အံၤ,တၢ်တီၢ်တမံၤဃီအိၣ်ဝဲလၢသုလိၤခဲလၢာ်,ဒီးလၢသုပဒိၣ်အလိၤလီၤ.

5 ဒီးသုဘၣ်တ့သုအ့ၣ်ကီၢ်အဂီၤ,ဒီးသုယုၢ်သုၣ်အဂီၤလၢအမၤဟးဂီၤထံဧိၤကီၢ်ဧိၤ,ဒီၤသုကဘၣ်ဟ့ၣ်တၢ်လၢကပီၤလၢအံၣ်စရ့လးအကစၢ်လီၤ.ဒီးဘၣ်တဘၣ်ကမၤဖှံထီၣ်အစုလၢသုလီၤ,ဒီးလၢသုကစၢ်တဖၣ်အလိၤ,ဒီးလၢသုထံသုကီၢ်အလိၤန့ၣ်လီၤ.

6 ဒီးသုမၤကိၤသုသးဒ်ပှၤအဲၤကူပတူးဖိဒီးဖၤရိမၤကိၤအသးအသိးန့ၣ်မ့ၢ်အဘၣ်မနုၤလဲၣ်.တုၤအမၤတၢ်လီၤလးလၢအကျါဒီး,အဝဲသ့ၣ်တဖၣ်န့ၢ်ပျၢ်ပှၤဂီၢ်မုၢ်,ဒီးအဝဲသ့ၣ်ဟးထီၣ်ကွံာ်,တမ့ၢ်ဘါဧါ.

7 ဒီးခဲကနံၣ်အံၤမၤလ့ၣ်ကဟၣ်အသီတဆိ,ဒီးဟံးန့ၢ်ဂီၤဖံးမိၢ်လၢအဒုးအီၣ်နုၢ်လၢအတဘၣ်ဒံးဘၣ်နီၣ်ယိးဘိခံဒု,ဒီးစၢဃာ်ဂီၤဖံးလၢလ့ၣ်ကဟၣ်,ဒီးဒုးက့ၤက့ၤအဖိလၢအလီၢ်ခံဆူဟံၣ်ပူၤ,

8 ဒီးဟံးန့ၢ်ယွၤအတလါ,ဒီးပာ်လၢလ့ၣ်ကဟၣ်အပူၤ,ဒီးပာ်ကယၢထူလၢသုဟ့ၣ်ယုၢ်အီၤလၢတၢ်လုၢ်တၢ်ကမၣ်အဂီၢ်,လၢတလါဖိလၢအဃၢၤ,ဒီးပျၢ်အီၤ,ဒီးဒုးဟးထီၣ်အီၤတက့ၢ်.

9 ဒီးကွၢ်,မ့ၢ်လဲၤထီၣ်လၢကျဲပူၤလၢအကီၢ်ဒၣ်ဝဲအဃၢၤဆူဘ့ၤသရှ့မ့ၣ်ဒီး,မ့ၢ်အမၤပှၤလၢတၢ်အၢဖးဒိၣ်အံၤလီၤ.ဒီးမ့တမ့ၢ်ဘၣ်ဒ်န့ၣ်ဒီး,ပကသ့ၣ်ညါလၢအတမ့ၢ်ဘၣ်အစုတီၢ်ပှၤဘၣ်.မ့ၢ်တၢ်ဘၣ်ဒၣ်ပှၤလီၤ.

10 ဒီးပှၤကညီတဖၣ်န့ၣ်မၤဝဲဒ်န့ၣ်,ဒီးဟံးန့ၢ်ဂီၤဖံးမိၢ်လၢအဒုးအီၣ်နုၢ်ခံဒု,ဒီးစၢဃာ်အီၤဒီးလ့ၣ်ကဟၣ်,ဒီးကးတံာ်ဃာ်အဖိလၢဟံၣ်ပူၤလီၤ.

11 ဒီးပာ်ယွၤအတလါလၢလ့ၣ်ကဟၣ်အပူၤ,ဒီးတလါဖိအိၣ်ဝဲဒီးယုၢ်သုၣ်ထူ,ဒီးအ့ၣ်ကီၢ်အဂီၤလီၤ.

12 ဒီးဂီၤဖံးမိၢ်န့ၣ်လဲၤတၢ်စၢၢ်ဆၢဆူဘ့ၤသရှ့မ့ၣ်အကျဲ,ပိာ်ဝဲလၢကျဲမုၢ်,ဒီးကိးထီၣ်ဝဲ,ဒီးလဲၤတၢ်,ဒီးဆူစုထွဲမ့ၢ်ဂ့ၤ,ဆူစုစ့ၢ်မ့ၢ်ဂ့ၤ,တဃၣ်ကပၤဘၣ်.ဒီးပှၤဖလ့ၡသးဖိအပဒိၣ်ဖးဒိၣ်တဖၣ်ပိာ်အခံပၢၢ်လၢဘ့ၤသရှ့မ့ၣ်အဃၢၤလီၤ.

13 ဒီးပှၤဘ့ၤသရှ့ၤမ့ၣ်ဖိကူးအဘုကၠူၣ်လၢတၢ်ပၢၤခိၣ်,ဒီးကျ့ထီၣ်အမဲာ်,ဒီးထံၣ်ဘၣ်တလါ,ဒီးသးခုလၢအထံၣ်ဝဲအဃိန့ၣ်လီၤ.

14 ဒီးလ့ၣ်ကဟၣ်လဲၤနုာ်လၢပှၤဘ့ၤသရှ့ၤမ့ၣ်ဖိစီၤယိၤရှူအစံာ်ပူၤ,ဒီးအိၣ်ကတီၢ်ဖဲန့ၣ်,ဖဲလၢၢ်ဖးဒိၣ်တဖျၢၣ်အအိၣ်လီၤ.ဒီးပှၤဖးသ့ၣ်ဖးလ့ၣ်ကဟၣ်အသ့ၣ်,ဒီးလုၢ်ဂီၤဖံးမိၢ်တဖၣ်လၢတၢ်လုၢ်မ့ၢ်အူလၢယွၤအဂီၢ်လီၤ.

15 ဒီးပှၤလ့ၤဝံဖိဟံးန့ၢ်ယွၤအတလါန့ၣ်,ဒီးတလါဖိအိၣ်ဒီးအီၤ,လၢကယၢထူအိၣ်လၢအပူၤ,ဒီးပာ်ဝဲလၢလၢၢ်ဖးဒိၣ်တဖျၢၣ်အလိၤလီၤ.ဒီးဘ့ၤသရှ့မ့ၣ်အပှၤကညီလုၢ်တၢ်လုၢ်မ့ၣ်အူ,ဒီးလုၢ်တၢ်လုၢ်လၢယွၤလၢမုၢ်တနံၤန့ၣ်လီၤ.

16 ဒီးပှၤဖလ့ၡသးဖိအပဒိၣ်ဖးဒိၣ်ယဲၢ်ဂၤန့ၣ်ထံၣ်ဘၣ်ဝဲ,ဒီးက့ၤကဒါက့ၤဝဲဆူဧ့ကြိၣ်လၢမုၢ်တနံၤန့ၣ်လီၤ.

17 ဒီးအအံၤမ့ၢ်တၢ်အ့ၣ်ကီၢ်အဂီၤထူလၢပှၤဖလ့ၡသးဖိဟ့ၣ်ယုၢ်ယွၤလၢတၢ်လုၢ်တၢ်ကမၣ်,လၢအၤစဒိးအဂီၢ်တဖျၢၣ်,လၢဂါစၤအဂီၢ်တဖျၢၣ်,လၢအၤၡကလိၣ်အဂီၢ်တဖျၢၣ်,လၢကၤသးအဂီၢ်တဖျၢၣ်,လၢဧ့ကြိၣ်အဂီၢ်တဖျၢၣ်လီၤ.

18 ဒီးယုၢ်သုၣ်ထူန့ၣ်ပှဲၤသိးသိးဒီးကယဲၢ်ပှၤဖလ့ၡသးဖိအဝ့ၢ်လၢအဘၣ်ဃးဒီးပဒိၣ်ဖးဒိၣ်ယဲၢ်ဂၤ,ဝ့ၢ်အိၣ်ဒီးအခိၣ်ဒူတဖၣ်,ဒီးအတဝီတဖၣ်ပၢၢ်လၢလၢၢ်ဟ့းဘ့ၤလးဖးဒိၣ်ဖဲအပာ်လီၤယွၤအတလါလၢအလိၤန့ၣ်လီၤ.လၢၢ်တဖျၢၣ်န့ၣ်အိၣ်ဝဲတုၤမုၢ်မဆါတနံၤအံၤလၢပှၤဘ့ၤသရှ့မ့ၣ်ဖိစီၤယိၤရှူအစံာ်ပူၤလီၤ.

19 ဒီးတၢ်ကျီကွံာ်ဘ့ၤသရှ့မ့ၣ်အပှၤကညီလီၤ.အဂ့ၢ်ဒ်အံၤ,အဝဲသ့ၣ်တဖၣ်န့ၣ်ကွၢ်ဝဲလၢယွၤအတလါအပူၤလီၤ.ဒီးကျီကွံာ်ပှၤယဲၢ်ကလးဒီးနွံဆံလၢပှၤဂီၢ်မုၢ်အကျါလီၤ.ဒီးပှၤဂီၢ်မုၢ်ဟီၣ်ဝဲလီၤ.အဂ့ၢ်ဒ်အံၤ,ယွၤကျီပှၤဂီၢ်မုၢ်လၢတၢ်ကျီကွံာ်ဖးဒိၣ်လီၤ.

20 ဒီးဘ့ၤသရှ့မ့ၣ်အပှၤကညီစံးဝဲဒၣ်,မ့ၢ်မတၤဆၢထၢၣ်လၢယွၤ,ကစၢ်စီဆှံတဂၤအံၤအမဲာ်ညါသ့တဂၤလဲၣ်.ဒီးကလဲၤထီၣ်လၢပအိၣ်ဆူမတၤအအိၣ်လဲၣ်.

21 ဒီးမၢကလူးတဖၣ်လဲၤဆူပှၤအိၣ်ဝဲဆိးဝဲလၢကံးရယးယဧၤရံၣ်အပူၤ,ဒီးစံးဝဲဒၣ်,ပှၤဖလ့ၡသးဖိဟဲစိာ်လံယွၤအတလါန့ၣ်လံ.ဟဲလီၤ,ဒီးက့ၤစိာ်ထီၣ်အီၤဆူသုအိၣ်တက့ၢ်.