Library · yue

路加福音 1

序言

1 提阿非羅閣下:已經有好多人從事寫作,記錄喺我哋中發生嘅事。

2 佢哋嘅記錄係根據從開始親眼睇見嘅事,並且曾經傳此信息嘅人所敘述嘅。

3 呢一切我從頭仔細查考過,所以我想按次序向你報告。

4 等你知你所學嘅道係正確嘅。

預言施洗約翰嘅出生

5 希律王統治猶太時,有一祭司,名撒迦利亞,係屬亞比雅司班嘅;佢嘅妻以利沙伯,亦係祭司家族嘅後代。

6 喺上帝眼中,佢哋兩個都係正直嘅人,嚴謹遵守主一切嘅誡命同規律。

7 佢哋冇仔女;因為以利沙伯不能生育,而兩人又已經老。

8 有一日,撒迦利亞值班,喺上帝前執行祭司嘅職務。

9 按照祭司慣例,抽籤得入主嘅聖殿上香。

10 上香時,民眾喺外面禱告。

11 忽然,有主嘅天使企喺香壇右邊向佢顯現;

12 撒迦利亞睇見,驚慌害怕。

13 天使對佢話;「撒迦利亞,唔使怕!上帝垂聽你嘅禱告;你嘅妻以利沙伯會為你生個仔,你要改佢名做約翰。

14 你要歡喜快樂;好多人亦要為佢出世歡喜。

15 喺主眼中,佢係一個偉大人物。淡酒烈酒,佢都唔飲;喺母胎裏,佢就被聖靈充滿。

16 佢將帶領好多以色列人歸回主─佢地嘅上帝。

17 佢將做主嘅前驅,堅強有力,好似先知以利亞一樣。佢將使父親同仔女重新和好,使悖逆嘅人回頭,走上義人明智嘅道路;佢將幫助人民預備迎接主。」

18 撒迦利亞對天使話:「我憑乜嘢知道此事呢?我已經老;我妻嘅年紀亦唔細。」

19 天使話:「我係侍立喺上帝前嘅加百列;我奉派,將此好消息報俾你知。

20 時候到,此話必得應驗,但因你唔信我嘅話,你必變成啞,直到我嘅應許實現嗰日致能講話。」

21 嗰時,眾人等候撒迦利亞,唔明白佢點解喺聖殿裏咁耐。

22 及致佢出嚟,不能同佢哋講話,眾人致知道佢喺聖殿裏睇見異象。佢不能講話,只打手勢向眾人示意。

23 供職嘅日期一滿,撒迦利亞就返回家。

24 過冇耐,佢嘅妻以利沙伯果然懷孕,五個月內冇出門。

25 佢話:「主終於噉樣厚待我,除去我喺眾人面前嘅羞辱。」

預告耶穌誕生

26 喺以利沙伯懷孕嘅第六個月,上帝差遣天使加百列去加利利省一個叫拿撒勒嘅城,

27 去見一個童女,名叫馬利亞;佢已經同大衛家族一個名叫約瑟嘅男子訂婚。

28 天使到佢面前,話:「願你平安!主與你同在,大降福俾你。」

29 馬利亞因為天使嘅話,就好驚慌,反覆思想呢啲話嘅意思。

30 天使對佢話:「馬利亞,唔使怕,因為上帝施恩俾你。

31 你將懷孕生個仔,要改佢名做耶穌。

32 佢將成為偉大嘅人物,被稱為至高者之子。主─上帝將立佢繼承佢祖先大衛嘅王位。

33 佢將永遠做雅各子孫嘅王,佢嘅國無窮無盡。」

34 馬利亞對天使話:「我未嫁人,噉樣嘅事點能發生呢?」

35 天使答話:「聖靈將降臨你身上;至高者嘅能力將蔭庇你。因此,你所生嘅聖者必稱為上帝之子。

36 你親戚以利沙伯,雖然年老,向來不能生育,但係佢現在已經有六個月身孕。

37 因為對上帝嚟講冇一件事係做唔到嘅。」

38 馬利亞話:「我係主嘅婢女;願你嘅話成就喺我身上。」於是天使離開佢。

馬利亞探訪以利沙伯

39 冇幾耐,馬利亞起程,急忙去山區,到猶太一個鎮。

40 佢入撒迦利亞嘅家,向以利沙伯請安。

41 以利沙伯一聽見馬利亞嘅問安,肚裏嘅胎就跳動。以利沙伯被聖靈充滿,

42 高聲叫話:「你係婦女中最有福嘅;你所懷嘅胎亦有福嘅。

43 我主嘅母親嚟探我,我點敢當呢?

44 我一聽見你問安嘅聲,我肚裏嘅胎就歡喜跳動。

45 你確信主傳俾你嘅信息必定實現,你有福呀!」

馬利亞嘅尊主頌

46 馬利亞話:「我心尊主為大;

47 我靈以上帝─我救主為樂;

48 因為佢顧念佢婢女嘅卑微。從今以後,萬民將稱我有福,

49 因為大能嘅上帝為我成全大事。佢嘅名為聖;

50 佢憐憫敬畏佢嘅人,直到永遠。

51 佢伸出大能嘅手臂,驅除驕傲人心中一切嘅計謀。

52 將有權嘅君王革位;升高卑微嘅人。

53 使飢餓嘅人飽餐美食,富足嘅人空手而歸。

54 佢對我哋嘅祖先所講嘅,都依照去做。佢扶助佢嘅僕人以色列。

55 顧念亞伯拉罕,向佢大施仁慈,並且顧及佢嘅後裔,直到永遠!」

56 馬利亞同以利沙伯同住約有三個月,然後回家。

施洗約翰出世

57 以利沙伯產期到,就生個仔。

58 佢嘅鄰居同親戚聽見主賜佢咁大嘅恩慈,都同佢一齊歡喜。

59 個仔出世滿一星期,佢哋共佢行割禮,想用佢父親嘅名叫佢做撒迦利亞。

60 但係佢母親話:「唔可以!佢要叫做約翰。」

61 親友對佢話:「你親族中並冇人叫噉嘅名。」

62 佢哋就向佢父親打手勢,問佢要改佢個仔做乜嘢名。

63 撒迦利亞攞一塊寫字板,喺上面寫:「佢名叫約翰。」眾人都非常驚奇。

64 就在此時,撒迦利亞再能講話,開口頌讚上帝。

65 鄰居都好驚奇。此消息傳遍全猶太山區;

66 聽聞嘅人都將此事放在心裏話:「此孩子將會成為點樣嘅人物呢?」因為有主與佢同在。

撒迦利亞嘅預言

67 約翰嘅父親撒迦利亞被聖靈充滿,傳達上帝嘅信息,話:

68 「等我哋歌頌主─以色列嘅上帝!佢眷顧佢嘅子民,釋放佢哋。

69 從佢嘅僕人大衛家中,為我哋興起一位全能嘅救主。

70 古時,佢藉聖先知講過:

71 佢要拯救我哋脱離敵人,擺脱一切恨惡我哋嘅人嘅權勢。

72 佢要向我哋祖宗大施仁慈,並記住佢神聖嘅約。

73 佢應許我哋先祖亞伯拉罕,

74 立誓要拯救我哋擺脱仇敵,

75 使我哋一生一世,坦然無懼喺佢面前,以聖潔同正直事奉佢。

76 孩子呀,你將稱為至高者嘅先知。做主嘅前驅,為佢預備道路;

77 要話佢嘅子民知:由於佢哋嘅罪得赦免,佢哋將得到拯救。

78 我哋嘅上帝慈悲柔和;使救恩嘅曙光照耀我哋,

79 又從高天光照一切生活喺死亡陰影下嘅人,引導我哋走上和平嘅道路。」

80 孩子漸漸長大,身心強健。住喺曠野,一直到佢喺以色列人中公開活動時。