路加福音 18
寡婦同法官嘅比喻1 耶穌又向佢哋講一個比喻,要佢哋時常禱告,不可灰心。
2 佢話:「某城有個法官,佢唔敬畏上帝,又唔尊重人。
3 城裏有個寡婦成日去見佢,請求佢主持公道,制裁佢嘅冤家。
4 法官一直拖延,但後來心裏想:我雖然唔敬畏上帝,亦唔尊重人,
5 但係呢個寡婦不斷煩擾我,不如為佢伸冤,免致佢經常上門糾纏我。」
6 主跟住話:「你哋聽不義嘅法官所講嘅話!
7 唔通上帝唔會替日夜向佢求救嘅子民伸冤咩?佢會延遲援助佢哋咩?
8 我話你哋知,佢必盡快為佢哋伸冤。但係,人子嚟時,佢能喺世上搵到噉樣嘅信心咩?」
法利賽人同收稅嘅人9 耶穌又講另一個比喻,係針對自以為義而輕視他人嘅人講嘅。佢話:
10 「有兩個人到聖殿禱告:一個係法利賽人,一個係收稅嘅人。
11 法利賽人獨自企處,禱告話:『上帝呀!我感謝你,因為我唔似他人咁貴貪婪、不義、淫亂,更唔似嗰個稅吏。
12 我每星期禁食兩次,又奉獻全部收入十分之一。』
13 稅吏遠遠企處,連抬頭望天都唔敢,獨係捶胸話:『上帝呀,可憐我呢個罪人!』
14 我話你哋知,呢兩人返去時,喺上帝眼中嘅義人係嗰個收稅嘅人,唔係嗰個法利賽人。因為上帝將自高嘅人降為卑微,但高舉自甘卑微嘅人。」
耶穌祝福小孩15 有人抱佢哋嘅嬰孩嚟見耶穌,想耶穌為佢哋按手。門徒睇見,就責備佢哋。
16 但耶穌叫小孩到佢前,話:「由得小孩到我處,唔好阻止佢哋,因為上帝國嘅子民正係屬於佢哋噉樣嘅人。
17 我實在話你哋知:凡唔似小孩噉樣承受上帝國嘅人,絕對不能成為佢嘅子民。」
財主嘅難題18 有個猶太人嘅領袖嚟請教耶穌話:「良善嘅老師,我應該做乜嘢致能得到永生呢?」
19 耶穌問佢:「你點解稱我為良善嘅呢?除上帝外,再冇良善嘅。
20 你一定識得誡命所規定嘅:『 唔好姦淫;唔好殺人;唔好偷竊;唔好做假見證;要孝敬父母。』」
21 個人答話:「呢一切誡命我從小都遵守。」
22 耶穌聽見呢啲話,再對佢話:「你重缺少一件。要去賣你所有嘅產業,將錢賙濟窮人,你就會有財富積存喺天上;然後嚟跟從我。」
23 個人聽見呢啲話,好唔開心,因為佢好富有。
24 耶穌睇見呢種情形,就話:「有錢人成為上帝國嘅子民好難呀!
25 有錢人成為上帝國嘅子民比駱駝穿過針眼重難呀!」
26 聽見呢啲話嘅人就問:「噉樣講,邊個能得救呢?」
27 耶穌話:「人所不能嘅,上帝都能。」
28 嗰時,彼得話:「我哋已經捨棄自己所有嘅嚟跟從你。」
29 耶穌話:「我實在話你哋知,凡為上帝國而捨棄自己嘅房屋、妻、兄弟、父母,或仔女嘅,
30 必喺今世得到更多,並喺來世享受永生。」
耶穌第三次預言自己嘅死31 耶穌帶十二門徒到一邊,對佢哋話:「我哋去耶路撒冷;先知所記述關於人子嘅每一件事都要實現。
32 佢將被交過異邦人;佢哋戲弄佢,侮辱佢,俾口水唾佢,
33 又鞭打佢,殺佢;但係,第三日佢就復生。」
34 門徒對呢啲事一樣都唔明白,對耶穌所講嘅話一啲都唔識得,因為嗰啲話嘅意思係隱藏嘅。
耶穌醫好盲眼嘅乞兒35 耶穌嚟到靠近耶利哥嘅地方,有一個盲人坐喺路旁乞食。
36 佢聽見羣眾經過,就查問係乜嘢事。
37 有人話佢知:「拿撒勒人耶穌正經過呢處。」
38 佢就呼叫話:「大衛嘅子孫耶穌,可憐我喇!」
39 喺前頭行嘅人責備佢,叫佢唔好出聲。但佢更大聲呼叫話:「大衛嘅子孫,可憐我呀!」
40 於是耶穌停住,吩咐將盲人帶到佢面前。佢近前時,耶穌問佢:
41 「你想我為你做乜嘢?」佢答話:「主呀,我想睇見!」
42 耶穌對佢話:「你可以睇見!你嘅信心醫好你。」
43 盲人立刻睇見,就跟隨耶穌,一路頌讚上帝。羣眾睇見呢件事,亦頌讚上帝。