Library · yue

路加福音 7

耶穌醫好羅馬軍官嘅僕人

1 耶穌向羣眾講完呢啲話,就去迦百農。

2 嗰處一個羅馬軍官,有個佢所器重嘅僕人患重病,將近死。

3 軍官聽見耶穌嘅事,就託幾個猶太人嘅長老去請求耶穌嚟醫好佢嘅僕人。

4 佢哋到咗耶穌處,懇切求佢話:「此人的確值得你幫助;

5 佢愛護我哋猶太人,曾替我哋建造會堂。」

6 於是耶穌同佢哋去,快到時,軍官託幾個朋友嚟向耶穌話:「主呀,請不必勞駕。你到舍下嚟,我唔敢當;

7 我自己亦唔配同你見面。只要你吩咐一聲,我嘅僕人就會好。

8 好似喺我上面有指揮我嘅長官,下面有受我指揮嘅士兵;我命令呢個去,佢就去,命令嗰個嚟,佢就嚟;對我嘅僕人話『你做呢啲』,佢就去做。」

9 耶穌聽聞呢啲話,非常驚奇,轉身向跟隨佢嘅羣眾話:「我話你哋知,噉樣信心嘅人,就係喺以色列人中,我亦冇見過!」

10 嗰啲被打發嚟嘅人返到軍官家,睇見軍官嘅僕人已經好返。

使寡婦嘅仔復生

11 過冇耐,耶穌去拿因城;佢嘅門徒同一大羣人跟佢去。

12 佢嚟到城門口,一隊送殯嘅行列出嚟。死者係一個寡婦嘅獨生子;從城裏有好多人出嚟,陪寡婦送殯。

13 主睇見寡婦,就憐憫佢,對佢話:「唔使哭!」

14 於是上前按住抬架,抬架嘅人就企住。耶穌話:「年輕人,我吩咐你起身!」

15 死者就坐起身,並且講話。耶穌將佢交過佢母親。

16 眾人都非常驚奇;佢哋讚美上帝話:「有偉大嘅先知喺我哋中出現!」又話:「上帝嚟拯救佢嘅子民!」

17 關於耶穌呢件事嘅消息傳遍猶太同附近嘅地區。

施洗約翰嘅門徒嚟見耶穌

18 約翰嘅門徒將呢一切事都話俾約翰知。約翰叫兩個門徒嚟,

19 打發佢哋去見主,要佢哋問佢:「你就喺約翰所講將要嚟嘅嗰一位,抑或我哋重要等待另一位呢?」

20 佢哋到耶穌嗰處,就話:「施洗約翰打發我哋嚟問你:『你就係佢所講將要嚟嘅嗰一位,抑或我哋重要等待另一位呢?』」

21 剛好嗰時耶穌醫好好多患病,疫症,同被邪靈迷嘅人,並且使好多盲眼嘅睇得見。

22 於是佢答約翰嘅門徒話:「你哋返去,將所睇見所聽到嘅報告約翰,即係盲嘅睇見,跛腳嘅行走,痳瘋嘅潔淨,耳聾嘅聽聞,死人復生,窮人有福音傳俾佢哋。

23 凡對我唔疑惑嘅人有福咯!」

24 約翰嘅使者走咗之後,耶穌向羣眾講起約翰,話:「你哋從前到曠野去搵約翰時,想睇嘅係乜嘢呢?係睇風吹蘆葦咩?

25 你哋究竟要睇乜嘢呢?係睇衣着華麗嘅人咩?衣着考究、起居奢侈嘅人係住喺皇宮裏!

26 噉樣,你哋出去睇乜嘢呢?睇先知咩?我話你哋知,冇錯,但係佢比先知重大。

27 佢係聖經所提到嘅嗰一位;上帝話:『睇吖!我要差遣我嘅使者喺你面前;為你開路。』」

28 耶穌又話:「我話你哋知,喺人間冇比約翰更大嘅人;但係喺上帝國,最微小嘅都比約翰大呀!」

29 〈一般羣眾,包括收稅嘅人,聽聞耶穌,都稱上帝為義,因為佢哋已經接受約翰嘅洗禮。

30 但係法利賽人同經學教師拒絕上帝為佢哋安排嘅計劃,因為佢哋冇接受約翰嘅洗禮。〉

31 耶穌又話:「我要用乜嘢嚟比喻此世代嘅人呢?佢哋究竟似乜嘢呢?

32 佢哋好比喺街頭玩嘅兒童,其中一羣向另一羣叫話:『我哋為你哋奏婚禮樂曲,你哋唔跳舞!我哋唱喪禮哀歌,你哋唔哭泣!』

33 施洗約翰嚟,唔飲唔食,你哋話:『佢係被鬼迷嘅!』

34 人子嚟,又飲又食,你哋就話:『佢係酒肉之徒,係税吏同罪人嘅朋友! 』

35 但係上帝嘅智慧係從所有願意接受嘅人身上證實出嚟。

耶穌喺法利賽人西門家中坐席

36 有個法利賽人請耶穌食飯,耶穌就去佢家坐席。

37 當地有個女人,一向過着罪惡嘅生活。佢聽聞耶穌喺法利賽人家中食飯,就帶一個裝滿香油嘅玉瓶嚟。

38 佢喺耶穌背後,挨住佢腳來哭。眼淚滴濕耶穌嘅腳,佢用自己嘅頭髮嚟抹乾,又用嘴親吻,然後將香油搽落去。

39 請耶穌食飯嘅法利賽人睇見,心裏想:「此人若真係先知,佢應該知摸佢嘅係點樣嘅一個女人;佢係有罪嘅人!」

40 耶穌就對佢話:「西門,我有句話同你講。」西門話:「老師請講。」

41 耶穌話:「一個債主,有兩個人欠佢債,一個欠五十両銀,一個欠五両銀。

42 佢哋無力償還,債主將佢哋嘅債取消。你想,佢哋邊個會更愛佢呢?」

43 西門話:「我想係嗰個免得較多嘅。」耶穌話:「你講得對。」

44 於是佢轉向個女人,對西門話:「你睇見呢個女人?我來到你家中,你冇俾水我洗腳,但係此女人用眼淚流濕我嘅腳,又用頭髮抹返乾。

45 你冇用接吻禮歡迎我,但係佢從我入嚟就不停用嘴親我嘅腳。

46 你冇用油搽我嘅頭,但佢用香油搽我嘅腳。

47 我話你知,佢所表示深厚嘅愛證明佢好多嘅罪都得赦免。嗰個赦免得少嘅,表示嘅愛亦少。」

48 耶穌就對嗰個女人話:「你嘅罪都得赦免。」

49 於是同席嘅人心裏想:「此人係邊個?居然赦免人嘅罪!」

50 耶穌對個女人話:「你嘅信救咗你;可以平安返去咯!」