Library · yue

羅馬書 4

亞伯拉罕嘅榜樣

1 至於喺血統上做我哋先祖亞伯拉罕嘅事,我哋應該點講呢?

2 佢被稱為義人若係由於佢嘅行為,佢就有所誇口喇,但喺上帝面前唔可以。

3 聖經話:「亞伯拉罕信上帝,因佢嘅信,上帝算佢為義。」

4 做工嘅人得工資,唔算係恩典,而係佢應得嘅。

5 但係只信上帝宣判罪人為無罪嘅人,上帝要因為佢嘅信,而唔係佢嘅行為,稱佢為義,

6 大衛話:「嗰個唔靠行為而得到上帝算為義嘅人有福咯。

7 過犯得到寬恕,罪被赦免嘅人有福咯!

8 罪過唔被主記喺心嘅人有福咯!」

9 大衛所講嘅福單係屬於受割禮嘅人咩?唔係。此福亦屬於冇受割禮嘅人;因為我哋已經引證聖經所講,話:「亞伯拉罕信上帝,因佢嘅信,上帝就算佢為義」。

10 此例喺邊一種情形下發生嘅呢?喺亞伯拉罕受割禮以前,抑或喺以後呢?喺以前,唔係以後。

11 佢後來受割禮;係一種表徵,證明佢喺受割禮前已經因信稱義。所以,對所有未受割禮、因信而被上帝算為義嘅人嚟講,亞伯拉罕係屬靈嘅父。

12 佢亦係已受割禮嘅人嘅父,唔單只因為佢哋受割禮,亦因為佢哋學我哋先祖亞伯拉罕喺未受割禮時嗰種信心生活。

上帝應許嘅實現

13 上帝應許亞伯拉罕同佢子孫,必承受此世界。唔係因為亞伯拉罕遵守律法,係由佢因信而得嘅義。

14 若上帝嘅應許係俾遵守摩西律法嘅人,人嘅信就係冇用嘅,而上帝嘅應許亦係無效嘅。

15 上帝嘅義憤係由律法而嚟嘅;未有律法,就未有違犯律法嘅事。

16 噉樣,應許係以信為根據;係要保證上帝嘅應許白白賜俾亞伯拉罕所有嘅子孫,唔單只係遵守律法嘅,亦包括嗰啲好似亞伯拉罕一樣信上帝嘅人。因為亞伯拉罕係我哋眾人屬靈之父。

17 好似聖經所講:「我立你做好多民族之父。」喺上帝面前,此應許係有效嘅; 亞伯拉罕所信嘅就係嗰位令死人復生、使無變為有嘅上帝。

18 喺無可盼望時,亞伯拉罕因信仍有盼望,因為噉成為「好多民族之父」。好似聖經所講:「你必會有好多子孫」。

19 當時亞伯拉罕快到一百歲。佢自己嘅身體好似已死,而撒拉生育嘅機能亦已喪失,但佢並唔因為噉削弱信心。

20 佢冇失去信心,亦冇懷疑上帝嘅應許;佢嘅信心反而更堅固,將榮耀歸俾上帝。

21 佢堅決信上帝必成就佢所應許嘅。

22 為噉亞伯拉罕因信而「被上帝算佢為義」。

23 但係「算佢為義」呢句話並唔單係指佢講,

24 亦係為我哋講。因為我哋信嗰位使我哋嘅主耶穌從死裏復生嘅上帝,因而被算公義。

25 主耶穌被交喺人手裏,為我哋嘅罪死;上帝使佢復生,使我哋能得稱義。