Library · yue

提摩太後書 2

基督嘅忠勇戰士

1 我嘅仔呀,你要倚賴基督耶穌所賜嘅恩典剛強起嚟。

2 你喺好多證人前從我領受嘅教訓;亦應該交俾你所信任而能教導人嘅人。

3 做基督耶穌嘅忠勇戰士,你要分擔苦難。

4 一個入伍嘅兵士想爭取長官嘅嘉許就不能俾營外嘅事務纏擾佢。

5 一個賽跑嘅人喺競賽時唔遵守規則就不能得獎。

6 勤力耕作嘅農夫應該首先享受所收成嘅。

7 你要思想我講嘅話,因為主必使你能領悟一切嘅事。

8 你要記得耶穌基督,佢係大衛嘅後代,上帝使佢由死裏復生;呢啲就係我所傳嘅福音。

9 我因為傳此福音而遭受苦難,甚至被捆綁,好似囚犯一樣,但,上帝嘅話唔受綑綁。

10 為噉,我為上帝所揀選嘅子民忍受呢一切,使佢哋亦能得到從基督耶穌嚟嘅拯救同永恆嘅榮耀。

11 以下嘅話係可信嘅:若我哋已經共佢同死,亦必共佢同生。

12 若我哋忍耐到底,我哋就共佢一齊掌權。若我哋唔認佢,佢亦唔會認我哋。

13 若我哋失信,佢依然可信,因為佢唔違背自己。

蒙嘉許嘅工人

14 你要提醒眾人,喺上帝前鄭重勸戒佢哋:唔好喺言詞上爭辯;嗰啲係毫無益嘅,只會腐化聽嘅人。

15 要努力喺上帝前做一個經得起考驗、問心無愧嘅工人,正確講解上帝真理嘅信息。

16 要遠避荒唐無稽嘅空談,因為呢一類說話使人遠離上帝;

17 佢哋所講嘅係好似腐蝕肌肉嘅毒瘡。呢啲人中有許米乃同腓理徒;

18 佢哋離開真理,竟然話復生嘅事已成為過去,因而動搖他人嘅信心。

19 但,上帝所建立鞏固嘅根基喺唔會動搖嘅;喺呢塊基石上刻住:「主認得屬佢嘅人」,又刻住:「嗰啲自稱為屬主嘅人必要離棄邪惡。」

20 喺每一個大家庭裏都有好多器皿,唔單只有金器、銀器,亦有木器、瓦器;有啲用嚟特別嘅場合,有啲用係普通嘅場合。

21 人若自潔,脫離一切邪惡嘅事,就能被主器重,因為佢已獻俾主,為主所重用,嚟做各樣善事。

22 你要逃避少年人嘅私慾;同心地純潔、祈求主幫助嘅人一齊追求正義、信心、愛心,同和平。

23 要棄絕愚拙無知嘅辯論;呢種辯論往往會引起爭論。

24 主嘅僕人唔好爭論;應該和氣待人,殷勤善導,

25 溫柔規勸敵對嘅人。或者上帝會俾佢悔改嘅機會,使佢哋認識真理。

26 噉樣,雖然佢哋被魔鬼擄去,被迫順服佢,佢哋亦會醒悟,由佢嘅羅網掙脫出嚟。