提摩太後書 4
1 喺上帝同要審判所有生人死人嘅基督耶穌面前,憑着佢嘅顯現同佢嘅國度,我迫切勸告你:
2 要傳福音,唔理時機理想唔理想都要傳,用最大嘅耐心勸勉,督責,鼓勵,教導。
3 時候將到,人必拒絕正確嘅教義,隨從自己嘅慾望,到處拜人為師,嚟滿足佢哋痕癢嘅耳。
4 佢哋掩耳唔聽真理嘅話,反傾向荒唐嘅傳說。
5 但你無論喺任何情況下都要謹慎;忍受苦難,做傳道人應做嘅工作,忠心履行上帝僕人嘅職務。
6 至於我,我犧牲自己嘅時候已經到;現今就係我離開人世嘅時候。
7 我已經戰善戰。應當跑嘅全程,我已經跑過;應當守嘅信仰,我亦守住。
8 現今,勝利嘅獎賞等住我;嗰位照公義施行審判嘅主,喺佢再來嘅日子,將公義嘅冠冕賜俾我,唔單只賜俾我,亦賜俾所有愛慕等候佢顯現嘅人。
9 你要盡快到我呢處。
10 底馬貪愛現世,離開我到帖撒羅尼迦。革勒士去加拉太,提多去撻馬太,
11 只有路加同我喺處。你要去搵馬可,帶佢一齊嚟,因為佢會幫助我嘅工作。
12 我已經打發推基古去以弗所。
13 你來時,要將我喺特羅亞時留喺加布處嘅外衣帶嚟;同時要將嗰啲書,尤其係嗰幾本羊皮書卷亦一齊帶嚟。
14 銅匠亞力山大害我不淺;主會照佢所做嘅報應佢。
15 你自己亦要提防佢,因為佢極力反對我哋所傳嘅信息。
16 我第一次為自己辯護時,眾人都離棄我。願上帝唔加罪於佢哋!
17 主喺旁邊支持我,俾我力量,使我將完整嘅信息傳俾所有嘅異邦人;我亦從獅口裏被救出嚟。
18 主必會救我脫離一切邪惡,接我安全去佢嘅天國。願榮耀永遠歸俾佢!阿們。
最後嘅問安19 請代我向百基拉、亞居拉、同阿尼色弗一家問安。
20 以拉都喺哥林多住。特羅非摩有病,我將佢留喺米利都。
21 你要盡可能喺冬季以前趕嚟。友布羅、布田、利奴、革老底亞,同其他所有嘅兄弟都向你問安。
22 願主與你同在!願上帝賜恩典俾你哋!