Library · yue

希伯來書 1

上帝透過佢嘅仔講話

1 上古時,上帝多次用多種方法,透過先知向我哋嘅祖先講話;

2 但喺呢啲日子嘅末期,佢透過自己嘅仔向我哋講話,上帝曾透過佢創造宇宙,而且揀選佢嚟承受萬有。

3 佢反照上帝嘅光輝,又完全反映上帝嘅本體;佢用大能嘅話托住萬有。佢清除人嘅罪惡之後,就坐喺天上至高權力者嘅右邊。

仔喺天使之上

4 呢個仔嘅地位遠比天使高,好似上帝賜俾佢嘅名遠比天使嘅名高貴。

5 上帝從來冇對任何一個天使講過:你係我嘅仔;今日我做你嘅父。佢亦從來冇指住任何一個天使話:我要做佢嘅父;佢要做我嘅仔。

6 上帝打發佢嘅長子到世上時,又話:上帝所有嘅天使必要拜佢。

7 關於天使,佢話:上帝使佢嘅天使成為風,使佢嘅僕役成為火燄。

8 關於仔,就話:上帝呀!你嘅寶座世世長存!你用公平掌權。

9 你喜愛正義,憎恨不義;為噉上帝─你嘅上帝選立你;佢賜俾你嘅喜樂遠超過賜俾你嘅同伴。

10 佢又話:主呀,起初你創造地;又親手創造天。

11 天地會消失,但你常存。

12 你將天地捲起;佢哋好似件衫噉逐漸舊爛,但你永不改變。

13 上帝從來冇對任何天使講過:你坐喺我嘅右邊,等我使你嘅仇敵屈服喺你腳下。

14 天使都係事奉上帝嘅靈;上帝差遣佢哋嚟幫助嗰啲將要承受救恩嘅人。