希伯來書 8
我哋嘅大祭司耶穌1 我哋所講嘅重點係:我哋有噉樣嘅一位大祭司;佢坐喺天上至高權力者寶座嘅右邊。
2 佢喺至聖所供職做大祭司;此聖所唔係人造,而係主造嘅真聖幕。
3 凡大祭司都係被任命向上帝獻禮物同祭品;為噉我哋嘅大祭司亦應該有所奉獻。
4 若佢係喺地上,就不能做祭司,因為已經有照猶太律法嚟獻禮物嘅祭司。
5 呢啲祭司所做嘅不過係天上聖幕嘅副本同影像。好似摩西建造聖幕時,上帝對佢話:「你所造嘅要依照喺山上所指示你嘅模樣。」
6 但現今,耶穌所接受嘅祭司職務比佢哋更優越,佢喺上帝同人之間做中保嘅約係更好嘅,因為此約係根據更好嘅應許而立嘅。
7 若前約冇缺點,就唔需要有後約。
8 但上帝責備佢嘅子民,話:日子將到,我要同以色人同猶大支派另立新約。
9 此約唔係好似從前我同佢哋祖宗立嘅約;喺嗰日我拖住佢哋嘅手,帶領佢哋離開埃及。佢哋冇遵守我同佢哋所立嘅約。為噉主話:我亦唔理會佢哋。
10 主又話:以後,我要同以色列人立噉樣嘅約;我要將我嘅律法放喺佢哋裏頭,寫喺佢哋心裏。我要做佢哋嘅上帝;佢哋要做我嘅子民。
11 佢哋唔使教導同胞,或向兄弟話:你哋應該認識上帝;因為由最細到最大,佢哋每個都認識我。
12 我要寬恕佢哋嘅過犯,唔再記住佢哋嘅罪惡。
13 既然上帝提到新嘅約,可見佢已經將前約當做舊嘅。嗰啲逐漸衰老陳舊嘅,好快就會歸於無有。