彼得後書 3
主應承再來1 親愛嘅朋友,我現今寫俾你哋嘅第二封信。呢兩封信,都係提醒你哋,激發你哋純潔嘅思想。
2 等你哋記得嚿時聖先知所講嘅話,同我哋嘅主─救主由使徒傳俾你哋嘅命令。
3 最重要嘅係,你哋必要知道,喺末世必有人被私慾支配,出嚟譏笑你哋,
4 話:「主再來嘅應許喺邊處呢?我哋嘅祖先都死咗,一切唔係同創世之初一樣咩?」
5 佢哋故意唔理會上帝喺太初用佢嘅話創造諸天地嘅事實。地係從水而出亦係藉水而成;
6 所以當時嘅世界亦係由洪水消滅。
7 現今嘅諸天地亦同樣係靠上帝嘅話保留,要等嗰啲唔敬虔嘅人被審判,被消滅嗰日,至用火燒毀。
8 但係,親愛嘅朋友,有一件事你哋唔好忘記:喺上帝眼中,一日如千年,千年如一日。
9 主並唔似一般人所諗,遲遲唔實現佢嘅應許。相反,佢寬容你哋;因為佢唔願有一人沉淪,乃係想人人離棄罪惡。
10 但係,主再來嘅日子將好似賊忽然嚟到。喺嗰日,諸天要喺巨大嘅響聲中消失,天體喺烈火中燒毀,大地同萬物都會消滅。
11 既然呢一切要噉樣毀滅,你哋為人應該點樣聖潔、虔誠,
12 等候上帝嘅日子,盡力加快佢嘅嚟到。喺嗰日,諸天被燒毀,天體喺烈火中鎔化。
13 但,我哋盼望上帝應許嘅新天新地;喺嗰處,正義常存。
14 所以,親愛嘅朋友,既然你哋盼望嗰日,就應該喺上帝面前盡力追求聖潔,過無可指責嘅生活,同佢和好。
15 要用我哋主嘅容忍作為你哋得救嘅機會,好似我哋親愛嘅兄弟保羅用上帝賜嘅智慧寫信勸你哋一樣。
16 佢所寫嘅書信都講呢啲事。信中有啲難明嘅,被無知同反覆無常嘅人隨便曲解,好似曲解其他經書一樣,結果係自取滅亡。
17 親愛嘅朋友,你哋已經知道此事,就應該防備,免致被壞人用荒謬嘅言論將你哋引入歧途,使你哋離開穩固嘅立場。
18 你哋要喺我哋嘅主─救主耶穌基督嘅恩典裏,同對佢嘅認識上,繼續長進。願榮耀歸俾佢,由現今直到永遠!阿們。