約翰參書 1
1 我係長老;我寫信俾親愛嘅該猶—我誠心所愛嘅朋友:
2 親愛嘅朋友,我祝你事事順利,身體健康,好似你喺靈性上健康一樣。
3 有啲兄弟到呢處,話俾我知,你對真理忠誠,一向以真理為生活嘅中心,令我非常高興。
4 冇其他嘅事比聽到我嘅仔女喺真理中生活更能使我快樂。
稱讚該猶5 親愛嘅朋友,你為兄弟做事咁真誠,甚至對陌生嘅兄弟亦係一樣。
6 佢哋曾向呢處嘅教會提起你嘅愛心。請你照上帝喜歡嘅,幫助佢哋繼續旅程。
7 佢哋為基督嘅緣故出外作工,唔接受非信徒嘅幫助。
8 所以,我哋基督徒必要接待噉樣嘅人,同佢哋一齊為真理作工。
丟特腓同低米丟9 我曾經寫一封信俾教會;但係,想做教會領袖嘅丟特腓唔理我所講嘅。
10 我嚟時,要揭發佢所做嘅。佢用壞話攻擊我哋,造謠毀謗我哋!咁重唔夠,佢自己唔接待外來嘅兄弟,甚至阻止嗰啲願意接待嘅人,將佢哋趕出教會!
11 親愛嘅朋友,唔好學壞,要學好。邊個有好行為,就係屬上帝;邊個作惡,就係冇見過上帝。
12 眾人都稱讚低米丟。真理為佢作證;我哋亦為佢作證。你知道我哋所講嘅話係真嘅。
最後嘅問安13 我重有好多話要講俾你知,但我唔想用筆墨嚟寫。
14 我希望冇幾耐能見到你,當面同你傾談。
15 願你平安!你班朋友都問候你。請替我向各位朋友一一問安。