猶大書 1
1 我係耶穌基督嘅僕人,雅各嘅兄弟猶大。我寫信俾蒙上帝選召,生活喺父上帝嘅愛中,並蒙耶穌基督保守嘅人。
2 願上帝豐豐富富噉賜俾你哋憐憫、平安,同慈愛。
假教師3 親愛嘅朋友呀,我早想寫信俾你哋,論及我哋公共關於救恩嘅問題,但係我覺得有必要向你哋提出勸告,要你哋繼續為上帝一次過傳授俾聖徒嘅信仰爭戰。
4 因為,有啲唔敬虔嘅人偷偷混入我哋中,透過曲解上帝恩典嘅信息嚟掩飾自己腐敗嘅行為。佢哋拒絕惟一嘅主宰—我哋嘅主耶穌基督。喺好耐以前,聖經已經預言佢哋必要受懲罰。
5 雖然你哋都知呢一切,我仍然要提醒你哋:主點樣救以色列人脫離埃及,然後消嗰啲唔信嘅人。
6 唔好忘記唔守本份、離開崗位嘅一班天使,佢哋永遠被主用鎖鍊鎖喺黑暗深淵裏,等到審判嘅大日子。
7 重有住喺所多瑪、蛾摩拉,同左近城市嘅人民,好似嗰啲天使一樣,佢哋行為淫亂,放縱反自然嘅性慾,就受永唔熄滅嘅火懲罰。此事可以做眾人嘅鑑戒。
8 呢啲唔敬虔嘅人亦係一樣。佢哋淫穢嘅幻想令佢哋犯罪,污穢自己嘅身體;佢哋輕慢上帝嘅權威,侮辱喺天上嘅尊榮者。
9 甚至天使長米迦勒,為摩西嘅屍體同魔鬼爭辯時,亦唔敢用侮辱嘅話責駡佢,只係話:「主要責備你!」
10 但係,呢啲人竟然毀謗佢哋所唔明白嘅事;好以野獸一樣,佢哋隨住本能嘅指使去做毀滅自己嘅事。
11 呢啲人有禍啦!佢哋同該隱走同一條路。為錢財,跌入巴蘭所犯嘅錯誤裏。佢哋好似可拉噉背叛,一樣噉滅亡。
12 呢啲人喺你哋愛筳上無恥狂飲,佢哋做牧人,只係顧自己,污辱筳席。佢哋好以無雨嘅雲被風吹逐,又好似喺秋天結唔出果嘅樹,連根都被拔出,完全枯死。
13 佢哋可恥嘅行為好似海中嘅狂浪激起泡。佢哋好似流蕩嘅星跌喺上帝永遠保留俾佢哋幽暗嘅深淵。
14 亞當嘅第七代孫以諾對呢啲人早就有預言;話:「睇吓主帶住千萬嘅聖者一齊嚟。
15 審判所有嘅人,懲罰所有唔敬虔嘅罪人;因為佢哋嘅行為唔敬虔,又用唔敬虔嘅話冒犯上帝!」
16 呢啲人成日埋怨人,責怪人;佢哋隨從自己邪惡嘅慾望,講誇張嘅話,為自己嘅利益奉承人。
警告同教導17 親愛嘅朋友呀,唔好忘記我哋主耶穌基督嘅使徒所講嘅話。
18 佢哋對你哋話:「喺歷史嘅末期必有好譏誚嘅人出來,隨從自己邪惡同唔敬虔嘅慾念愚弄你哋。」
19 呢啲人冇聖靈;佢哋受本性嘅支配製造紛爭。
20 至於你哋,親愛嘅朋友呀,你哋應該始終堅立喺至聖嘅信仰上,藉聖靈嘅力量禱告,
21 保守自己常在上帝嘅愛中,仰望我哋主耶穌基督嘅憐憫,賜俾你哋永生。
22 對嗰啲猶疑不定嘅人,你哋要憐憫佢哋。
23 有啲人,你哋要從火裏搶救佢哋。另有啲人,你哋要憐憫佢哋,但要存畏懼嘅心,連佢哋被罪惡沾染嘅衫亦唔接觸。
稱頌嘅禱告24 上帝能保守你哋不至於跌倒,冇缺點,歡歡喜喜嚟到佢嘅榮耀面前。
25 呢位獨一無二嘅上帝,透過我哋主耶穌基督拯救我哋。願佢得到榮耀、威嚴、能力,同權威,從萬世到現今,一直到永遠!阿們