Library · yue

啟示錄 17

大淫婦

1 揸住七碗嘅七天使,其中有一位嚟對我話:「你嚟,我要你睇嗰個大淫婦所要受嘅懲罰;佢係建造喺河邊嘅大城。

2 地上所有嘅王都同佢行淫;世上嘅人飲佢淫亂嘅酒。」

3 我被聖靈感動;天使帶我到曠野。我睇見一個女人騎住一隻紅色嘅獸;獸遍體寫滿褻瀆嘅名號,佢有七頭十角。

4 嗰個女人着住大紅大紫嘅衣服,戴滿金飾、寶石,同珍珠。手揸金杯,杯裏裝盛滿佢淫亂可憎嘅污糟。

5 佢額有寫落話:「大巴比倫一世上淫婦同一切可憎之物嘅母!」

6 我又睇見女人飲醉聖徒嘅血,同為耶穌作證而殉道嘅人嘅血。我睇到佢時,非常驚奇。

7 天使問我:「你點解咁驚奇?我要將女人同佢騎有七頭十角嘅獸嘅奧秘話你知。

8 你睇見嗰隻獸曾經生過、現今唔再生嘅,將要從無底深坑上嚟,走向滅亡。所有地上嘅人,佢嘅名從創世之前冇被登記喺生命冊嘅,睇見曾經生過、現今唔再生、將來又要出現嘅獸,就必驚奇。」

9 (呢處需要有聰明智慧)。七頭係女人坐嘅七座山,亦係指七王。

10 其中五個已經傾跌,一個尚在;另一個未曾嚟,佢嚟時只能停留一陣。

11 嗰個曾經生過、現今唔再生嘅獸,即係第八個王;係七王其中之一,正走向滅亡。

12 「你見嗰個十角係指十個重未開始統治嘅王;佢哋要承受王權,同嗰隻獸一齊統治一個鐘頭。

13 十王有相同嘅目標:佢哋要將自己嘅能力權柄交俾嗰隻獸。

14 佢哋同羔羊打仗;但係羔羊必打敗佢哋,因為佢係萬主之主,萬王之王。佢所選召、忠心跟從佢嘅人亦必得勝。」

15 天使又對我話:「你睇見嗰個淫婦坐嘅眾水即係指各民族、各種族、各國,同講各種語言嘅人。」

16 你所睇見嘅十角同獸必憎恨嗰個淫婦,要奪走佢所有嘅,使佢赤身露體;又要食佢嘅肉,用火焚燒佢。

17 因為上帝將執行佢旨意嘅意念放喺十王心裏,使佢哋有相同嘅目標,將統治權交俾嗰隻獸,直到上帝嘅話實現。

18 「你所睇見嗰個女人就係統治地上所有王嘅大城。」