Library · hlt

2MA 1

1:1 Judah khohmuen neh Judea kah rhoek loh Egypt kah a manuca boeih taengah, Kuttuuknah neh oltak la mongnah om saeh ka ti. 1:2 Pathen loh nangmih ham hno then han saii saeh lamtah amah kah uepom sal rhoek Abraham, Isaak neh Jakob taengkah paipi te ham poek saeh. 1:3 Amah bawknah ham thinko khaw, thinko thincaknah neh a kongaih saii ham khaw, thahluennah mueihla khaw nangmih te m'pae nawn saeh. 1:4 A olkhueng neh a olpaek dongah na thinko han ong saeh lamtah, nangmih taengah rhoepnah thoeng sak saeh. 1:5 Na thangthuinah hnatun saeh lamtah nangmih taengah moeithennah om saeh. Yoethenah tue ah khaw amah loh nangmih te n'hnoo boel saeh. 1:6 Nangmih hamla ka thangthui uh coeng ne. 1:7 Demetrius tue vaengkah, kum ya sawmrhuk kum ko vaengah, kaimih Judah rhoek loh nangmih ham ca kan pat. Te tah Jason neh a hui rhoek loh khohmuen cim neh ram khui lamloh a tloelh uh phoeikah kum ah kaimih ham aka pai citcai aka tlo koek pawn ni. 1:8 Te vaengah vongka khaw boeih ung tih, ommongsitoe kah a thii khaw long coeng. Tedae Boeipa taengah ka thangthui uh tih a yaak coeng. Te dongah hmueih neh khocang nawnnah khaw aka khueh uh. Hmaithoi khaw ka tok uh tih vaidam kaep ah ka khueh uh. 1:9 Te dongah tahae kah kum ya sawmrhet kum rhet kun Khislev hla dongah ah tah pohlip khotue he tuem uh laeh. 1:10 Judea neh Jerusalem kah pilnam long khaw, laipai rhoek neh Judah rhoek loh, manghai Ptolemy kah saya neh khosoih la a koelh rhoek imkhui la aka om Aristobulus neh Egypt kah Judah rhoek taengah Kuttuuknah neh sadingah then om saeh ka ti. 1:11 Pathen loh manghai taengah khaw mamih benah pai tih mueirhih hlan khui lamloh n'hlawt dongah amah taengah a lenkoek la uemnah khueh uh. 1:12 Amah long tih khopuei cim aka vathoh thil khaw a vai. 1:13 Amih kah mawtkung loh Persia a pha vaengah tah a caem khaw yawk mahpawh a ti. Tedae amih te Nanea kah rhainu khosoih aka bi rhoek loh a rhaithinah tih Nanea bawkim ah maehpoel bangla a tloek uh. 1:14 Antiokus loh rhainu te yunah hamla a caii dongah a hui rhoek neh a man neh te hmuen ah a cip la cet uh. 1:15 Nanae bawkim kah khosoih rhoek loh khohrhang te a yaal vaengah tah Antiokus te hlang a yol neh hmuen cim kah pangbueng khuila kun uh. Anih a kun van neh bawkim te tloep a khaih pa uh. 1:16 Buengyai dongkah bangbuet te a huep la a ong uh tih lungto a palate pa uh dongah mawtkung neh a hlang rhoek te mat a dae uh. Amih te a cuk thil uh tih a lu a rhaih uh phoeiah amih te pilnam kah a voella a voeih uh. 1:17 A cungkuem dongah mahmih kah Pathen tah a yoethen pai saeh. Amah loh boethae la kho aka boe taengah laitloeknah a khueh coeng. 1:18 Khislve hla hnin kul hnin nga lamlong tah bawkim cimnah ka saii uh pawn ni. Te dongah nangmih kan yaksak a ngoe. Te daengah ni nangmih long khaw pohlip khotue neh, Nehemiah bawkim neh hmueihtuk aka thoh tih hmueih aka nawn vaengkah hmai a paek nah khotue te na saii uh thai eh. 1:19 A pa rhoek te Persia ah tamna la a sol uh vaengah khaw, khosoih hlang cuem rhoek loh hmueihtuk kah hmai te a loh uh tih a huep la tangrhom aka rhae khuiah a thui uh tah. Te kah hmuen te malh a phah uh coeng dongah uh long khaw ming voel pawh. 1:20 Kum muep a koe phoeiah tah, Pathen loh a ngoe coeng dongah Nehemiah te Persia manghai taengla a tueih. Te dongah hmai thuh te koep loh hamla khosoih koca rhoek te a tueih. Tedae hmai te hmu uh pawt tih a naeng khoilawk la a om dongah koep a puen pa uh. Te dongah te te a dueh uh tih a khuen pa uh. 1:21 Hmueihhlutnah hnopai te boeih a tawn uh phoeiah tah a naeng te thing neh a sokah a tloeng hno soah haeh hamla Nehemiah loh ol a paek. 1:22 Bawt a saii tih a tue rhai a om vaengah tah khomai loh a dah khomik khaw phuk sae tih hmai hlup a rhong dongah a ngai boeih hmang uh. 1:23 Hmueih te hlup a dom vaengah tah khosoih rhoek loh thangthuinah a khueh uh. Khosoih rhoek neh hlang boeih te Jonathan loh a mawt tih Nehemiah loh a saii bangla a tloe rhoek long khaw a rhoi uh. 1:24 Aw Boeipa, hno cungkuem suenkung Boeipa Pathen, nang tah rhimom, aka tlung, tiktam neh sitlohnah la na om. Namah bueng ni manghai neh rhennah la na om coeng. 1:25 Nang bueng ni na moeihoeih tih, nang bueng ni tiktam neh tloengkhoelh neh dungyan la na om. Namah loh Israel te yoethae khui lamloh na hlawt, a pa rhoek khaw na coelh tih amih te na ciim coeng. 1:26 Na pilnam Israel boeih yueng la hmueih neh doe lah. Na buham he khaw hoeptlang lam tah a cim la khueh lah. 1:27 Pilnam aka paekboe tangtae khaw tun coi lamtah, namtom taengah sal aka bi rhoek te khaw loeih sak lah. A hnawt uh tih a hnaep uh te khaw namah loh hmu lamtah namtom long khaw kaimih kah Pathen la na om te ming uh saeh. 1:28 Koevoeinah neh hlang aka hnaemtaek tih kut aka hlah te khaw dantat nawn. 1:29 Moses taengah ol na khueh bangla na pilnam he hmuen cim dongah koep phung lah. 1:30 Te vaengah khosoih rhoek loh laa a sak. 1:31 Hmueih dongkah hnopai a tlum nen tah a naeng a coih rhoek te longto a len dongah bueih hamla Nehe miah loh ol a paek. 1:32 Te tlam te a saii vaengah hmai hlup rhong dae hmueihtuk dong lamloh phuk a aa vaengah tah te khaw vik khum. 1:33 Tekah olka te mingpha la a om vaengah tah, khosoih tamnah rhoek loh hmai a thuhnah hmuen khaw, a naeng tui lamloh Nehemiah ne a hui rhoek loh hmueih dongkah hnopai a hoeh te khaw, Persia manghai taengla a puen pa uh. 1:34 Manghai loh ol te boeih a cae phoeiah tah a hmuen te malh a bing tih hmuen cim la a khueh. 1:35 Manghai loh amih te a ngaihnah hil ah kutdoe neh hno then te a paek. 1:36 Nehemiah neh a hui rhoek long tah te te “Nephthar” a ti. Te tah cimnah ni a thuingaih dae pilnam a yet long tah naphtha a ti uh.