Library · hlt

2MA 2

2:1 A vaivoek rhoek taengah hmai loh hamla Jeremiah loh a uen te thui tangtae bangla cabu dongah pakhat la tueng tih. 2:2 A vaivoek rhoek te tekah tonghma loh olkhueng a paek tih, Boeipa kah olpaek hnilh pawt ham neh, amamih kopoek ngaih bangla sui neh, cak neh, phuekhlaknah dongah phael pawt ham khaw a uen coeng. 2:3 Amah ol boeiloeih nen te amih te olkhueng dong lamloh a thinko a dong pawt ham khaw a thaphoh. 2:4 Amah te kah tonghma cabu dongah ni olrhuh khaw a dang. Te dongah anih khaw Moses yoeng tih Pathen kah rho a dang nah tlang la cet. 2:5 Jeremiah te a pha vaengah tah lungko pakhat te a hm uh. Te lam te dap khaw, thingkawng khaw, bo-ul hmueituk khaw a khuen tih a khui te malh a bing. 2:6 Anih hnukvai hlangvang rhoek loh longpuei te kutnoek a khueh uh dae hmuh uh thai pawh. 2:7 A ming vaengah tah Jeremiah loh a mih te a tlung tih, “Pathen loh a pilnam te tun a coi tih a sitlohnah a tueng hlan hil, a hmuen te mingpha boel saeh. 2:8 Te vaengah Boeipa loh he hno he phoe saeh lamtah Boeipa thangpomnah neh khomai khaw phoe ni. Mose kah olka neh Solomon loh hmuen nawnnah a khueh vaengah a bih tih a phoe bangla tueng saeh,” a ti. 2:9 Solomon loh bawkim a coengnah neh a nawnnah dongah hmueih a nawn tih cueihnah a khueh te khaw a caih la a tueng sak. 2:10 Moses te Boeipa taengah thangthui tih vaan lamkah hmai a suntlak dongah hmueih a hlawp bangla, Solomon khaw thangthui. Te vaengah hmai suntla tih hmaihhlutnah khaw boeih a hlawp. 2:11 Moses loh, “Boirhaem he caak koi pawt dongah a hlawp coeng,” a ti. 2:12 Te tlam ni Solomon loh hnin rhet khuiah a yaeh. 2:13 Amah phek la cabu neh Nehemiah poekoepnah dongah khaw a khueh. Te te cabu im dongah khaw, manghai neh tonghma cabu dongah khaw, David kah cadaek dongah khaw, nawnnah ham manghai kah khuenah capat dongah khaw om coeng. 2:14 Amah te tlam bal te mamih soah caem ha pai tih mamih kah khorhang boeih a long vaengkah a kawng a lam aka hma tangtae te Judas loh a coi tih cabu dongah a khueh coeng. 2:15 Te ni na ngoe uh atah hlang han tueih uh lamtah tah lo uh vaan. 2:16 Te dongah cimnah ka saii uh ham parhi te, nangmih taengah ca la kan pat uh uh. Te khohnin tuem ham te na kohuem uh van venim te? 2:17 Te tah a pilnam boeih aka khang Pathen amah kah ni. Amah loh a rho te hlang boeih taengah khaw, manghainah khaw, khosoihnah khaw, ciimnah khaw a paek coeng. 2:18 A olkhueng dongkah olkhueh bangla, Pathen dongah ngaiuepnah n'khueh uh bangla mamih soah sitlohnah a khueh pawn ni. Mamih he vaan hmuen boeih lamloh hmuen cim la n'coi pawn ni. Yoethae koek khui lamloh mamih he n'hlawt tih a hmuen te a cim sak coeng. 2:19 Judas Makkabi neh a manuca rhoek, bawkim puei a cimnah neh hmueihtuk nawnnah cil, 2:20 Antiokus Epiphanes neh a capa Eupotor taengkah vathohnah, 2:21 Judah phung ham thinom la aka vathoh rhoek taengah vaan lamloh aka pai kopoekrhainah cil ni. Te vaengah a hlangmi la yol uh dae khohmuen tom te a loh uh tih hlanglueng hlangping a haek uh. 2:22 Te dongah bawkimkah kawn te koep a loh uh tih diklai pum ah khaw thang uh coeng. Khopuei te koep a thoh uh tih a phae uh dalh olkhueng te khaw koep a pai sak uh. Te vaengah Boeipa loh amih taengah rhennah neh haidamnah a bahoeng a khueh. 2:23 He boeih he tah Cyrenne Jason loh a cabu panga la a khueh coeng. Te dae cabu pakhat dongah a toibawt la tueng sak ham ka cai uh. 2:24 A kawng lam aka phul paluep khaw, khokhuen kah cil tae aka ngaih loh olka muep a yet dongah a kuelka pah te khaw ka poek uh. 2:25 Tae aka ngaih loh a yoei la tae saeh lamtah aka kuem ham neh a tae boeih ham hoeikhangnah la om saeh ka ti uh. 2:26 Ka boem uh he khaw kaimih ham thakthaenah la khoeng om tih, olka a phoeng pawt dongah hlan tui neh ih khaw ka tal uh coeng. 2:27 Hlang khat loh buhkoknah a saii vaengah hlang tloe ham a rhoeikhangnah a tlap he a yoei moenih. Tedae a yet kah a uemnah ham tah thakthaenah a rhainah khaw kohoenah neh phat ka ueh mai eh. 2:28 a kawng a tip te tah lamhma kah cabu aka daekkung kah a hut la om vetih, a toi la bawt ah daek ham tah kaimih loh tha ka huel mai eh. 2:29 Imsa boei loh im pum a sak ham te a poek. Tedae si aka hluk long tah im thoeihcam ham, picainah he aka rhoeprhui koi te a poek. 2:30 Tuengrhuem cil aka daek loh a hmuethma rhep a ming, olka te a hnukhma la sawt tih, dumlai la a tip la a thui te a hutnah. 2:31 Tedae patoeng aka thui coeng long tah a thuingaihnah te bawt a thui vetih, khocueh rhamvueh lam tah thui mah pawh. 2:32 Te dongah mamih kah cilka te mah tong uh pawn sih. Thui tangtae te koep thui boel sih. Olrhannah te muep sen tih a khokhuen cil lat a toi he khaw hlang ang bibi banghui lamni a om eh.