Job 12
12:1 Job loh a doo tih,
12:2 Na pilnam khaw nangmih taengkah cueihnah a duek ham tueng pai.
12:3 Tedae kai khaw nangmih bangla thinko ka khueh. Nangmih lamloh ka yalh sut moenih. Te dongah u taengah nim he bang a om pawt eh?
12:4 Pathen taengah ka pang khaw a hui taengah nueihbu la ka om. A cuemthuek neh a dueng khaw nueihbu la a doo.
12:5 Mongkawt kah kopoek ah yoethaenah he nueihbu la om tih a kho aka paloe ham a tawn pah bangla om.
12:6 Rhoelrhak kah dap te dingsuek lah tih, Pathen kah a tlai thil khaw a ciip la om. Te long te a kut dongah Pathen a khuen.
12:7 Tedae rhamsa rhoek te dawt laeh lamtah nang n'thuinuet bitni. Vaan kah vaa long khaw nang taengla ha puen bitni.
12:8 Diklai taengah khaw lolmang lamtah nang n'thuinuet vetih tuitunli kah nga loh nang hamla han tae bitni.
12:9 He he BOEIPA kut loh a saii tila te boeih khuikah aka ming pawt te unim?
12:10 A kut dongah mulhing boeih kah hinglu neh hlang pumsa boeih kah mueihla khaw om.
12:11 Lai caak a ten bangla olthui te hna loh a nuemnai moenih a.
12:12 Patong taengah cueihnah om tih khohnin aka sen te a lungcuei om.
12:13 A taengah cueihnah om tih a taengah thayung thamal, cilsuep neh lungcuei khaw om.
12:14 A koengloeng phoeiah tah thoh uh thai pawt tih hlang te a tlaeng phoeiah tah a ong pa uh thai moenih.
12:15 Tui te a kueng tih kak coeng ke. Te te a hlah bal tih diklai a khuk.
12:16 Sarhi neh lungming cueihnah khaw amah hut, aka taengphael neh aka palang khaw amah hut.
12:17 Ol aka uen te khotling la a khuen tih laitloek rhoek te a yan.
12:18 Manghai rhoek kah thuituennah a ah pah tih amih kah cinghen te hailaem a khih pah.
12:19 Khosoih rhoek te khotling la a khuen tih khangmai rhoek khaw a paimaelh.
12:20 A tangnah kah a ka khaw a baeh tih patong rhoek a omih khaw a loh pah.
12:21 Hlangcong rhoek soah nueihbu a hawk tih sokca cihin khaw hlong coeng.
12:22 Hmaisuep lamkah a dung khaw phoe coeng tih dueknah hlipkhup te vangnah khuila a khuen.
12:23 Namtom te a puel sak phoeiah a milh sak. Namtom te a yaal tih a mawt.
12:24 Diklai pilnam boeilu kah lungbuei a doek pah tih amih te hinghong ah longpuei pawt la kho a hmang sak.
12:25 Vangnah om pawt vaengah hmaisuep a phatuem uh tih yurhui bangla amih te kho a hmang sak.