Library · hlt

Job 11

11:1 Naamathi Zophar loh a doo tih, 11:2 “Ol cungkuem te a doo moenih a? Hlang he a hmuilai ngawn tah tang dae ta. 11:3 Na olsai te hlang loh ngam vetih na tamdaeng vaengah a hmaithae mahpawt nim? 11:4 Te vaengah, “Ka rhingtuknah he cil tih na mikhmuh ah a caih la ka om,” na ti. 11:5 Nang taengah aka thui la Pathen loh unim dawk a paek tih a hmuilai ong koinih. 11:6 Lungming cueihnah he rhaepnit a lo dongah cueihnah olhuep te nang taengah a thui pawn ko. Namah kathaesainah lamloh Pathen loh nang n'hnilh te ming. 11:7 Pathen kah khenah na hmuh tih Tlungthang kah a khuetnah hil na hmuh a? 11:8 Vaan la a sang te metlam na saii eh? Saelkhui lakah a dung te metlam na ming eh? 11:9 A himbaidok loh diklai lakah a puet tih tuitunli lakah dangka ngai. 11:10 A hil tih a tlaeng tih a tingtun sak phoeiah tah ulong anih a mael sak. 11:11 Amah loh a poeyoek hlang rhoek khaw a ming ngawn dae boethae a hmuh vaengah yakming pawh. 11:12 Tedae tuihong hlang loh hloih koinih kohong marhang neh laak te hlang la a sak khaming. 11:13 Na lungbuei na cikngae tih a taengla na kut na phuel koinih, 11:14 Na kut dongkah boethae te na lakhla tak tih na dap ah dumlai na khueh pawt atah, 11:15 A lolhmaih kolla na maelhmai na ludoeng van bitni. Na om vaengah khaw tluektluek na long vetih na rhih om mahpawh. 11:16 Nang ham tah thakthaenah te na hnilh vetih tui aka long voelh bangla na poek bitni. 11:17 Na khosak khaw khothun lakah sae vetih, a hmuep khaw mincang bangla om ni. 11:18 Ngaiuepnah a om dongah na pangtung vetih ngaikhuek la na too phoeiah na yalh bitni. 11:19 Na kol vaengah na lakueng neh na maelhmai muep thae voel mahpawh. 11:20 Tedae halang kah mik tah kha vetih thuhaelnah khaw amih lamloh bing ni, a ngaiuepnah khaw hinglu polpainah la om ni,” a ti nah.